ຈັດສັນຄວາມບໍ່ເປັນລະບຽບຮຽບຮ້ອຍ ຢູ່ຖະໜົນອາຊຽນ

591 13 ພ.ຈ. 2019 ຂ່າວໜ້າ​ໜຶ່ງ
ຈັດສັນຄວາມບໍ່ເປັນລະບຽບຮຽບຮ້ອຍ ຢູ່ຖະໜົນອາຊຽນ

    ພະ​ແນກ​ໂຍ­ທາ​ທິ​ການ ແລະ ຂົນ­ສົ່ງ ນະ­ຄອນ­ຫຼວງ​ວຽງ​ຈັນ (ຍທຂ ນວ) ສົມ­ທົບ​ກັບ​ເມືອງ​ສີ​ໂຄດ​ຕະ­ບອງ ແລະ ພາກ­ສ່ວນ​ກ່ຽວ­ຂ້ອງ ດຳ­ເນີນ​ການ​ຈັດ​ສັນ​ຄວາມ​ບໍ່​ເປັນ​ລະ­ບຽບ​ຮຽບ​ຮ້ອຍ​ຢູ່​ຖະ­ໜົນ​ອາ​ຊຽນ (ຖະ­ໜົນ T2) ວັນ​ທີ 12 ພະ­ຈິກ 2019 ເພື່ອ​ເຮັດ​ໃຫ້​ຖະ­ໜົນ​ດັ່ງ­ກ່າວ ມີ​ຄວາມ​ເປັນ​ລະ­ບຽບ​ຮຽບ​ຮ້ອຍ​ແລະ ຈົບ­ງາມ ທັງ​ເປັນ​ການ­ຈັດ­ຕັ້ງ​ປະ­ຕິ­ບັດ​ຕາມ​ທິດ 6 ສ ເພື່ອ​ຫຼຸດ­ຜ່ອນ​ອຸ­ບັດ­ເຫດ ແກ້​ໄຂ​ການ​ຈະ­ລາ ຈອນ​ແອ​ອັດ ແລະ ເພື່ອ​ສ້າງ​ຂະ​ບວນ​ການ​ຄຳ­ນັບ​ຮັບ​ຕ້ອນ​ກອງ​ປະ­ຊຸມ​ໃຫຍ່ 3 ຂັ້ນ ຂອງ​ພັກ.

    ທ່ານ ສຸ​ລິ​ວັນ ພົມ​ມະ­ຫາ​ໄຊ ຮອງ​ຫົວ­ໜ້າ​ພະ​ແນກ ຍທຂ ນວ ໃຫ້​ສຳ­ພາດ​ວ່າ: ເພື່ອ​ຈັດ​ສັນ​ຄວາມ ບໍ່​ເປັນ​ລະ­ບຽບ​ຕາມ​ເສັ້ນ­ທາງ​ສາຍ​ຫຼັກ​ຕ່າງໆ​ໃຫ້​ເປັນ​ລະ­ບຽບ​ຮຽບ​ຮ້ອຍ ແລະ ຈົບ­ງາມ ຫັນ​ໄປ​ສູ່​ການ​ປະ ຕິ​ບັດ​ລະ­ບຽບ​ກົດ­ໝາຍ​ຢ່າງ​ເຂັ້ມ​ງວດ ເຮັດ​ໃຫ້­ການ​ປຸກ​ສ້າງ ຕໍ່​ເຕີມ​ເທີບ-ເງີບ ແລະ ອື່ນໆ ບໍ່​ໃຫ້​ກີດ ຂວາງ ແລະ ເກີນ​ເຂດ​ສະ­ຫງວນ​ທາງ ທັງ​ເປັນ​ການ​ຫຼຸດ­ຜ່ອນ​ອຸ­ບັດ­ເຫດ ເພື່ອ​ບັນ­ລຸ​ຄຳ​ຂວັນ 6 ສ ແລະ ເພື່ອ​ສ້າງ​ຂະ​ບວນ​ການ​ຄຳ­ນັບ​ຮັບ​ຕ້ອນ​ກອງ​ປະ­ຊຸມ​ໃຫຍ່ 3 ຂັ້ນ ຂອງ​ພັກ ໂດຍ​ການ​ປະ­ຕິ­ບັດ​ໄດ້​ອີງ­ໃສ່​ກົດ­ໝາຍ​ຜັງ­ເມືອງ ວ່າ​ດ້ວຍ​ການ​ຄຸ້ມ​ຄອງ​ການ​ປຸກ​ສ້າງ​ກົດ­ໝາຍ​ທາງ​ຫຼວງ ກ່ຽວ​ກັບ​ການ​ກຳ­ນົດ​ຂອບ​ເຂດ​ສະ­ຫງວນ​ທາງ​ຫຼວງ ກົດ­ໝາຍ​ຄຸ້ມ​ຄອງ​ປ້າຍ​ໂຄ­ສະ­ນາ ຂໍ້​ຕົກ­ລົງ​ຂອງ​ລັດ­ຖະ­ມົນ­ຕີ​ກະ­ຊວງ ຍທຂ ກ່ຽວ​ກັບ​ພາ­ລະ​ບົດ­ບາດ​ຂອງ​ພະ​ແນກ ຍທຂ ນວ ອັນ​ສຳ­ຄັນ​ແມ່ນ​ຂໍ້​ຕົກ­ລົງ​ຂອງ​ເຈົ້າ​ຄອງ ນວ ວ່າ​ດ້ວຍ​ການ​ຈັດ​ສັນ​ຄວາມ​ບໍ່​ເປັນ​ລະ­ບຽບ​ຮຽບ​ຮ້ອຍ​ຕາມ​ເສັ້ນ­ທາງ​ຕ່າງໆ ໂດຍ​ມີ​ໜ່ວຍ​ງານ​ລົງ​ກວດ­ກາ​ທຸກ​ວັນ ໃນ​ນີ້ ໄດ້​ກວດ­ກາ​ການ​ປຸກ​ສ້າງ ການ​ວາງ​ກອງ​ຫີນ-ຊາຍ ວັດ​ສະ​ດຸ​ກໍ່­ສ້າງ ຕໍ່​ເຕີມ​ເທີບ-ເງີບ ແລະ ຕິດ​ຕັ້ງ​ປ້າຍ​ໂຄ ສະ​ນາ​ໃຫ້​ຖືກ­ຕ້ອງ​ຕາມ​ລະ­ບຽບ ພ້ອມ​ທັງ​ໄດ້​ສົມ­ທົບ​ກັບ​ຫ້ອງ­ການ ຍທຂ ເມືອງ ລົງ​ກວດ­ກາ​ເປັນ​ປະ­ຈຳ.

    ການ­ຈັດ­ຕັ້ງ​ປະ­ຕິ­ບັດ​ຕົວ​ຈິງ​ໄດ້​ດຳ­ເນີນ​ການ​ເຜີຍ­ແຜ່​ນິ­ຕິ​ກຳ​ຕ່າງໆ​ຜ່ານ​ໂທລະ­ພາບ ໜັງ­ສື­ພິມ ແລະ ສື່​ຕ່າງໆ ແລະ ໄດ້​ເຜີຍ­ແຜ່​ໃຫ້​ຜູ້​ປະ­ກອບ​ການ​ຢູ່​ສອງ​ຟາກ​ຖະ­ໜົນ​ເປົ້າ​ໝາຍ ວັດ­ແທກ​ເກັບ​ກຳ​ຂໍ້​ມູນ​ເຮັດ​ບົດ​ບັນ­ທຶກ​ກັບ​ຄອບ­ຄົວ​ກ່ຽວ­ຂ້ອງ ແລະ ໄດ້​ແຈ້ງ​ໃຫ້​ເຂົາ­ເຈົ້າ​ປະ­ຕິ­ບັດ​ໃຫ້​ຖືກ­ຕ້ອງ ໂດຍ​ກຳ­ນົດ​ເວ­ລາ​ໃຫ້​ລະ­ອຽດ ເຊິ່ງ​ຖະ­ໜົນ T2 ໄດ້​ປະ­ຕິ­ບັດ​ແຕ່​ເດືອນ​ກຸມ­ພາ 2019 ເປັນ­ຕົ້ນ​ມາ ປັດ­ຈຸ­ບັນ​ຍັງ​ມີ​ຫຼາຍ​ພາກ­ສ່ວນ​ບໍ່​ຈັດ​ຕັ້ງ​ປະ­ຕິ­ບັດ ມື້­ນີ້ ພວກ​ເຮົາ​ຈຶ່ງ​ໄດ້​ລົງ​ດຳ­ເນີນ​ການ​ຈັດ​ສັນ ໂດຍ​ສະ­ເພາະ​ຕັດ​ປ້າຍ​ໂຄ­ສະ­ນາ​ທີ່​ຕິດ​ຕັ້ງ​ເກີນ​ເຂດ​ສະ­ຫງວນ​ທາງ ໂດຍ​ປ້າຍ​ທີ່​ຕັດ​ໄປ​ນັ້ນ​ຈະ​ເກັບ​ຮັກ­ສາ​ໄວ້ ແລະ ແຈ້ງ​ໃຫ້​ເຈົ້າ​ຂອງ​ປ້າຍ​ໄປ​ພົວ­ພັນ​ເອົາ​ຄືນ​ພາຍ​ໃນ​ເວ­ລາ 15 ວັນ ພ້ອມ​ທັງ​ປັບ​ໃໝ​ຕາມ​ລະ­ບຽບ ໂອ­ກາດ​ນີ້ ກໍ​ຂໍ​ຮຽກ­ຮ້ອງ​ໃຫ້​ຜູ້​ປະ­ກອບ​ການ ກໍ​ຄື​ປະ­ຊາ­ຊົນ​ໃຫ້­ການ​ຮ່ວມ​ມື ແລະ ປະ­ຕິ­ບັດ​ລະ­ບຽບ​ຢ່າງ​ເຂັ້ມ​ງວດ.

ຂ່າວທີ່ກ່ຽວຂ້ອງ