ກົມອຸຕຸເຕືອນ ອຸນຫະພູມຈະຫຼຸດລົງ 1-3 ອົງສາ ທົ່ວທຸກພາກ

1.298 13 ພ.ຈ. 2019 ຂ່າວໜ້າ​ໜຶ່ງ

    ກົມ​ອຸ­ຕຸ­ນິ­ຍົມ ແລະ ອຸ​ທົກ​ກະ​ສາດ ກະ­ຊວງ​ຊັບ­ພະ­ຍາ­ກອນ​ທຳ​ມະ​ຊາດ ແລະ ສິ່ງ­ແວ­ດລ້ອມ ຄາດ​ຄະ­ເນ​ສະ­ພາບ​ອາ­ກາດ ແຕ່​ວັນ​ທີ 11-17 ພະ­ຈິກ​ນີ້​ວ່າ: ວັນ​ທີ 11-13 ພະ­ຈິກ 2019 ຄວາມ​ກົດ​ດັນ​ສູງ​ຂອງ​ອາ­ກາດ​ເຢັນ​ທີ່​ປະ­ເທດ​ຈີນ​ຈະ​ມີ​ກຳ­ລັງ​ປານ​ກາງ​ສືບ­ຕໍ່​ປົກ​ຄຸມ​ຢູ່​ແຂວງ​ພາກ​ເໜືອ-ພາກ​ກາງ­ຂອງ​ປະ­ເທດ​ລາວ ສົມ­ທົບ​ກັບ​ລົມ​ຕາ­ເວັນ​ອອກ–ຕາ­ເວັນ​ອອກ​ສ່ຽງ​ເໜືອ ພັດ​ປົກ​ຄຸມ​ເປັນ​ສ່ວນ​ໃຫຍ່ ເຊິ່ງ​ຈະ​ເຮັດ​ໃຫ້​ອາ­ກາດ​ເຢັນ​ຕອນ​ກາງ­ຄືນ-ຕອນ​ເຊົ້າ ພ້ອມ​ມີ​ໝອກ​ບາງ​ປົກ​ຫຸ້ມ​ຢູ່​ທົ່ວ​ໄປ.

    ສ່ວນ​ພາ­ຍຸ​ດີ​ເປ​ຊັນ ຍັງ​ສືບ­ຕໍ່​ເຄື່ອນ​ທີ່​ຜ່ານ​ພາກ​ໃຕ້ ແລະ ຢູ່​ບາງ​ທ້ອງ­ຖິ່ນ​ແຂວງ​ພາກ​ກາງ­ຂອງ​ປະ ເທດ​ລາວ ເຊິ່ງ​ຈະ​ເຮັດ​ໃຫ້​ມີ​ຝົນ­ຕົກ​ໃນ​ລະ­ດັບ​ຄ່ອຍ​ຢູ່​ເກືອບ​ທົ່ວ​ໄປ.

    ວັນ​ທີ 14-17 ພະ­ຈິກ 2019 ຄວາມ​ກົດ​ດັນ​ສູງ​ຂອງ​ອາ­ກາດ​ເຢັນ ຈະ​ເພີ່ມ​ກຳ­ລັງ​ແຮງ​ຂຶ້ນ​ປົກ​ຄຸມ​ຢູ່​ທຸກ​ພາກ​ຂອງ​ປະ­ເທດ​ລາວ ເຊິ່ງ​ຈະ​ເຮັດ​ໃຫ້​ອຸນ­ຫະ­ພູມ​ອາ­ກາດ​ເຢັນ​ລົງ 1-3 ອົງ­ສາ ໂດຍ​ສະ­ເພາະ​ຢູ່​ແຂວງ​ພາກ​ເໜືອ ແຂວງ​ໄຊ​ສົມ­ບູນ ເຂດ​ພູ​ພຽງ​ບໍ­ລິ­ເວນ​ປາກ​ຊ່ອງ ແລະ ນິ­ຄົມ 34 ພ້ອມ​ມີ​ໝອກ​ໜາ​ປົກ​ຫຸ້ມ​ຢູ່​ບາງ​ທ້ອງ­ຖິ່ນ​ຕອນ​ກາງ­ຄືນ-ຕອນ​ເຊົ້າ ສ່ວນ​ພາກ​ກາງ ແລະ ພາກ​ໃຕ້ ອາ­ກາດ​ຈະ​ເຢັນ​ພ້ອມ​ມີ​ໝອກ​ບາງ​ປົກ​ຫຸ້ມ​ໃນ​ຕອນ​ເຊົ້າ.

    ສະ­ນັ້ນ ຈຶ່ງ​ຂໍ​ໃຫ້​ປະ­ຊາ­ຊົນ​ທີ່​ອາ­ໄສ​ຢູ່​ແຂວງ​ຕ່າງໆ ໂດຍ​ສະ­ເພາະ​ພື້ນ​ທີ່​ມີ​ພູມ​ສັນ­ຖານ​ສູງ ມີ​ອາ­ກາດ​ໜາວ​ເຢັນ ພ້ອມ​ກັນ​ຮັກ­ສາ​ສຸ­ຂະ­ພາບ ໂດຍ​ສະ­ເພາະ​ເດັກ­ນ້ອຍ ແລະ ຜູ້​ອາ­ຍຸ​ສູງ ເນື່ອງ​ຈາກ​ມີ​ພູມ​ຄຸມ​ກັນ​ບໍ່​ສູງ ອາດ​ສ່ຽງ​ຕໍ່​ການ​ເຈັບ​ປ່ວຍ​ໄດ້.

ຂ່າວທີ່ກ່ຽວຂ້ອງ