ເພີ່ມມາດຕະການປັບປຸງສະພາບແວດລ້ອມ ການດຳເນີນທຸລະກິດໃຫ້ສອດຄ່ອງ

947 13 ພ.ຈ. 2019 ຂ່າວໜ້າ​ໜຶ່ງ
ເພີ່ມມາດຕະການປັບປຸງສະພາບແວດລ້ອມ ການດຳເນີນທຸລະກິດໃຫ້ສອດຄ່ອງ

    ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ ຮ່ວມ​ກັບ​ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ​ລາວ (ສຄອຊ) ຈັດ​ກອງ​ປະ­ຊຸມ​ທຸ­ລະ​ກິດ​ລາວ ຄັ້ງ​ທີ 12 ຫົວ­ຂໍ້ “ສິ່ງ​ທ້າ​ທາຍ ແລະ ໂອ­ກາດ​ຂອງ​ທຸ­ລະ​ກິດ​ຢູ່ ສປປ ລາວ ຕໍ່​ການ​ປ່ຽນ­ແປງ​ຢ່າງ​ໄວ­ວາ​ຂອງ​ສະ­ພາບ​ເສດ­ຖະ­ກິດ” ຈັດ​ຂຶ້ນ​ວັນ​ທີ 12 ພະ­ຈິກ 2019 ຢູ່​ຫໍ​ປະ­ຊຸມ​ແຫ່ງ​ຊາດ ໂດຍ​ເປັນ​ປະ­ທານ​ຂອງ​ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ທ່ານ​ນາງ ເຂັມ​ມະ­ນີ ພົນ​ເສ­ນາ ລັດ­ຖະ­ມົນ­ຕີ​ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ ເປັນ​ກຽດ​ເຂົ້າ​ຮ່ວມ​ຂອງ​ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ພ້ອມ​ດ້ວຍ​ຜູ້​ປະ­ກອບ​ການ​ສະ­ມາ­ຄົມ​ທຸ­ລະ​ກິດ ຜູ້­ຕາງ­ໜ້າ​ອົງ​ການ­ຈັດ­ຕັ້ງ​ສາ­ກົນ ແລະ ຂະ­ແໜງ­ການ​ກ່ຽວ­ຂ້ອງ.

    ທ່ານ ອຸດ​ເດດ ສຸ­ວັນ­ນະ​ວົງ ປະ­ທານ ສຄອຊ ກ່າວ​ວ່າ: ນັບ​ແຕ່​ກອງ​ປະ­ຊຸມ​ທຸ­ລະ​ກິດ​ລາວ ຄັ້ງ​ທີ 11 ສຄອຊ ໄດ້​ຮ່ວມ​ກັບ​ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ ທີ່​ເຮັດ​ວຽກ​ເປັນ​ກອງ​ເລ­ຂາ​ດັ່ງ­ກ່າວ ເອົາ­ໃຈ­ໃສ່​ປັບ­ປຸງ​ຂັ້ນ​ຕອນ​ການ​ສະ­ເໜີ ແລະ ປຶກ­ສາ​ຫາ­ລື​ແກ້​ໄຂ​ບັນ­ຫາ​ຂອງ​ພາກ​ທຸ­ລະ​ກິດ​ໄປ​ແຕ່​ລະ​ບາດ­ກ້າວ ເຊິ່ງ​ມີ​ພາກ​ທຸ­ລະ​ກິດ​ໄດ້​ສະ­ເໜີ 100 ກວ່າ​ບັນ­ຫາ ແລະ ໄດ້​ຄັດ​ຈ້ອນ​ບັນ­ຫາ​ທີ່​ມີ​ຄວາມ​ສຳ­ຄັນ ແລະ ມີ​ຜົນ​ກະ­ທົບ​ຫຼາຍ​ຕໍ່​ຂະ­ແໜງ­ການ​ພາກ​ທຸ­ລະ​ກິດ ແລະ ຂະ­ແໜງ­ການ​ພາກ​ລັດ​ກ່ຽວ­ຂ້ອງ ໂດຍ​ໄດ້​ກຳ­ນົດ​ບັນ­ຫາ​ບຸ­ລິ­ມະ­ສິດ​ສະ­ເພາະ​ໄດ້ 23 ບັນ­ຫາ ແລະ ຕິດ​ພັນ​ກັບ​ຂົງ­ເຂດ​ຕ່າງໆ​ເຊັ່ນ: ຂົງ­ເຂດ​ສ່ວຍ​ສາ​ອາ­ກອນ ການ​ອຳ­ນວຍ​ຄວາມ​ສະ­ດວກ​ໃຫ້­ການ​ນຳ​ເຂົ້າ ແລະ ສົ່ງ​ອອກ ການ​ກໍ່​ຕັ້ງ​ທຸ­ລະ​ກິດ ການ​ສົ່ງ­ເສີມ​ການ­ທ່ອງ­ທ່ຽວ​ທີ່​ຍືນ​ຍົງ ແລະ ຂົງ­ເຂດ​ອື່ນໆ ໃນ​ນີ້ ໄດ້​ແກ້​ໄຂ 7 ບັນ­ຫາ ເຊິ່ງ​ກອງ​ປະ­ຊຸມ​ຄັ້ງ​ຜ່ານ​ມາ ຍັງ​ໄດ້​ຕົກ­ລົງ​ເຫັນ​ດີ​ຕໍ່​ກັບ​ທິດ​ທາງ​ການ​ແກ້​ໄຂ 16 ບັນ­ຫາ​ບຸ­ລິ­ມະ­ສິດ​ທີ່​ຍັງ​ຄົງ​ຄ້າງ​ຕໍ່​ການ​ພັດ­ທະ­ນາ​ຂະ­ແໜງ­ການ​ດັ່ງ­ກ່າວ ເພື່ອ​ສືບ­ຕໍ່​ປຶກ­ສາ​ຫາ­ລື ແລະ ຮ່ວມ​ກັນ​ແກ້​ໄຂ​ໃນ­ຕໍ່­ໜ້າ.

    ໄລ­ຍະ​ເກືອບ 2 ທົດ​ສະ​ວັດ​ຜ່ານ​ມາ ອັດ­ຕາ​ການ​ຂະ­ຫຍາຍ­ຕົວ​ຂອງ​ເສດ­ຖະ­ກິດ ຂະ­ຫຍາຍ­ຕົວ​ສະ­ເລ່ຍ​ລະ­ດັບ 8% ແຕ່​ການ​ຂະ­ຫຍາຍ­ຕົວ​ດັ່ງ­ກ່າວ ຍັງ​ບໍ່​ໄດ້​ນຳ​ມາ​ຜົນ​ປະ­ໂຫຍດ​ໃຫ້​ສັງ­ຄົມ​ລາວ​ຫຼາຍ​ເທົ່າ​ທີ່​ຄວນ ພ້ອມ​ນີ້ ຍັງ​ມີ​ຄວາມ​ສ່ຽງ​ສູງ​ຕໍ່​ບັນ­ຫາ​ຕ່າງໆ ເປັນ­ຕົ້ນ ໜີ້​ສາ­ທາ­ລະ­ນະ​ຕໍ່ GDP ການ​ຂຸດ​ຄົ້ນ​ຊັບ­ພະ­ຍາ­ກອນ​ທຳ​ມະ​ຊາດ​ທີ່​ມີ​ອັດ­ຕາ​ສູນ​ເສຍ​ໃນ​ລະ­ດັບ​ສູງ ແລະ ອຸດ­ສາ­ຫະ­ກຳ​ທີ່​ເປັນ​ເຫດ​ໃຫ້​ເກີດ​ບັນ­ຫາ​ມົນ​ລະ​ພິດ​ເພີ່ມ​ຂຶ້ນ ເຊິ່ງ​ນັບ​ແຕ່​ປີ 2013 ເປັນ­ຕົ້ນ​ມາ ລະ­ດັບ​ການ​ຂະ­ຫຍາຍ­ຕົວ​ທີ່​ທະ­ນາ­ຄານ​ໂລກ​ໄດ້​ຄາດ​ຄະ­ເນ​ວ່າ ອັດ­ຕາ​ການ​ຂະ­ຫຍາຍ­ຕົວ​ຂອງ​ເສດ­ຖະ­ກິດ​ລາວ ມີ​ລັກ­ສະ­ນະ​ຫຼຸດ​ລົງ ເຊິ່ງ​ປີ 2019 ຢູ່​ລະ­ດັບ 6,5% ເຊິ່ງ​ຈະ​ເປັນ​ທິດ​ທາງ​ທີ່​ບໍ່​ດີ​ຕໍ່​ການ​ພັດ​ທະ​ເສດ­ຖະ­ກິດ​ຂອງ​ປະ­ເທດ ທີ່​ຈະ​ຕ້ອງ​ໄດ້​ຮ່ວມ​ກັນ​ຊຸກ­ຍູ້​ສົ່ງ­ເສີມ ແລະ ບຸກ​ທະ­ລຸ​ໃຫ້­ການ​ພັດ­ທະ­ນາ​ເສດ­ຖະ­ກິດ​ຂອງ​ລາວ​ຢູ່​ລະ­ດັບ​ທີ່​ດີ​ຂຶ້ນ​ກວ່າ​ເກົ່າ.

    ໂອ­ກາດ​ນີ້ ທ່ານ ທອງ​ລຸນ ສີ​ສຸ​ລິດ ກໍ​ໄດ້​ເນັ້ນ​ໃຫ້​ຂະ­ແໜງ­ການ​ກ່ຽວ­ຂ້ອງ​ເອົາ­ໃຈ­ໃສ່​ເພີ່ມ​ມາດ​ຕະ­ການ​ປັບ­ປຸງ​ສະ­ພາບ​ແວດ​ລ້ອມ​ການ​ດຳ­ເນີນ​ທຸ­ລະ​ກິດ​ໃຫ້​ສອດ­ຄ່ອງ ຖ້າ​ປັບ­ປຸງ​ສະ­ພາບ​ດັ່ງ­ກ່າວ​ໄດ້​ຖືກ­ຕ້ອງ​ຈະ​ເຮັດ​ໃຫ້­ການ​ລົງ­ທຶນ​ຈາກ​ຕ່າງ­ປະ­ເທດ ແລະ ພາຍ​ໃນ​ເພີ່ມ​ຂຶ້ນ ທັງ​ຈະ​ເຮັດ​ໃຫ້­ການ​ຜະ­ລິດ​ສິນ­ຄ້າ​ເພື່ອ​ຕະ­ຫຼາດ​ພາຍ​ໃນ ແລະ ການ​ສົ່ງ​ອອກ​ຂອງ​ລາວ​ເພີ່ມ​ຂຶ້ນ​ເຊັ່ນ​ກັນ ເຊິ່ງ​ຈະ​ເປັນ​ການ​ສ້າງ​ຖານ​ລາຍ​ຮັບ​ຂອງ​ຊາດ​ໃຫ້​ໝັ້ນ­ຄົງ​ດ້ານ​ການ​ເງິນ (ເງິນ­ຕາ​ຕ່າງ­ປະ­ເທດ) ແລະ ຈະ​ຫຼຸດ­ຜ່ອນ​ເສດ­ຖະ­ກິດ​ນອກ​ລະ­ບົບ​ເຮັດ​ໃຫ້​ເສດ­ຖະ­ກິດ​ມະ­ຫາ​ພາກ​ດີ​ຂຶ້ນ ພ້ອມ​ກັນ​ເປັນ​ເຈົ້າ​ການ​ປັບ­ປຸງ​ສະ­ພາບ​ແວດ​ລ້ອມ​ການ​ສົ່ງ­ເສີມ​ການ​ລົງ­ທຶນ​ຂອງ​ທຸ­ລະ​ກິດ​ພາຍ​ໃນ ແລະ ຕ່າງ­ປະ­ເທດ​ໃນ​ຂະ ແໜງ​ການ​ທີ່​ບໍ່​ເອື່ອຍ​ອີງ­ໃສ່​ຊັບ­ພະ­ຍາ­ກອນ​ທຳ​ມະ​ຊາດ ໂດຍ​ສະ­ເພາະ​ຂະ­ແໜງ​ອຸດ­ສາ­ຫະ­ກຳ​ປຸງ​ແຕ່ງ ການ­ທ່ອງ­ທ່ຽວ ແລະ ການ​ປຸງ​ແຕ່ງ​ຜະ­ລິດ​ຕະ​ພັນ​ກະ­ສິ­ກຳ​ໃຫ້​ສອດ­ຄ່ອງ ເອົາ­ໃຈ­ໃສ່​ຈັດ​ຕັ້ງ​ປະ­ຕິ­ບັດ​ການ​ລົງ­ທຶນ​ຂອງ​ລັດ​ໃສ່​ໂຄງ​ລ່າງ​ພື້ນ­ຖານ ເພື່ອ​ສ້າງ​ໃຫ້​ມີ​ສິນ­ຄ້າ​ສົ່ງ​ອອກ​ທີ່​ມີ​ຫຼາຍ​ຮູບ​ແບບ ເພີ່ມ​ຜະ­ລິດ​ຕະ​ພາບ​ຂອງ​ພາກ​ທຸ­ລະ​ກິດ ແລະ ຫຼຸດ­ຜ່ອນ​ຕົ້ນ​ທຶນ​ຄ່າ​ໃຊ້​ຈ່າຍ​ໃນ​ການ​ດຳ­ເນີນ​ທຸ­ລະ​ກິດ ດ້ວຍ​ການ​ປັບ­ປຸງ​ກົນ​ໄກ​ການ​ຄຸ້ມ​ຄອງ​ຂອງ​ພາກ​ລັດ ແລະ ປັບ­ປຸງ​ຂັ້ນ​ຕອນ​ການ​ອະ­ນຸ­ມັດ​ຕ່າງໆ​ໃຫ້​ສະ­ດວກ ວ່ອງ­ໄວ ແລະ ໂປ່ງ​ໃສ.

ຂ່າວທີ່ກ່ຽວຂ້ອງ