ເບິ່ງບ້ານເຂົາເອົາບົດຮຽນ 14-11-2019

2.413 14 ພ.ຈ. 2019 ຫົວຂໍ້ຂ່າວອື່ນໆ

   ສາມ​ຫົວ­ຂໍ້​ທີ່​ໜ້າ​ສົນ­ໃຈ​ໃນ​ບົດ​ປະ­ຈຳ​ວັນ​ນີ້ ເລີ່ມ​ຈາກ​ເລື່ອງ​ກົດ­ໝາຍ​ຫ້າມ​ຢອກ​ລໍ້​ອໍ້​ແອ້​ກັນ ​ຢູ່​ຕາມ​ເສັ້ນ­ທາງ​ສະ­ຖານ­ທີ່​ສາ­ທາ­ລະ­ນະ ຢູ່​ຟິ​ລິບ​ປິນ ເລື່ອງ​ນະ­ໂຍ­ບາຍ​ເພື່ອ​ຈຳ­ກັດ​ອາ​ຊະ​ຍາ​ກຳ​ຢາ​ເສບ​ຕິດ​ທີ່​ປາ​ນາ​ມາ ແລະ ໂຄງ­ການ​ເກັບ​ພາ­ສີ​ສູງໆ​ຈາກ​ຄົນ​ຮັ່ງ ທີ່​ປະ­ເທດ​ລັດ​ເວຍ.

   ທີ່ ຟິ​ລິບ​ປິນ: ໃນ​ກາງ​ປີ​ນີ້ ທ່ານ ໂຣ​ດຼິກ​ໂກ ດູ​ເຕັກ​ເຕ ປະ­ທາ­ນາ­ທິ­ບໍ­ດີ​ຟິ​ລິບ​ປິນ ໄດ້​ລົງ​ລາຍ​ເຊັນ​ໃນ​ຮ່າງ​ກົດ­ໝາຍ​ວ່າ​ດ້ວຍ​ຄວາມ​ປອດ​ໄພ​ຕາມ​ຖະ­ໜົນ ຊຶ່ງ​ໄດ້​ມີ​ບົດ​ລົງ­ໂທດ​ຕໍ່​ຜູ້​ໄດ້​ສະ­ແດງ​ອອກ​ທາງ​ກາຍ ຫຼື ທາງ​ວາ­ຈາ ທີ່​ບໍ່​ເໝາະ​ສົມ ຊຶ່ງ​ເປັນ​ການ​ກະ­ທົບ​ຕໍ່​ສິດ​ສ່ວນ​ຕົວ ແລະ ຄວາມ​ປອດ​ໄພ​ທາງ​ດ້ານ​ຮ່າງ­ກາຍ​ຂອງ​ຄົນ​ອື່ນ (ໜັງ­ສື­ພິມ​ຜູ້​ແທນ​ປະ­ຊາ­ຊົນ ສະ­ບັບ 600 ອາ­ທິດ​ທ້າຍ​ເດືອນ​ກໍ­ລະ­ກົດ 2019) ກົດ­ໝາຍ​ສະ­ບັບ​ນີ້​ໄດ້​ກຳ­ນົດ​ຫ້າມ​ຜິວ​ປາກ​ຢອກ​ລໍ້​ອໍ້​ແອ້​ໃສ່​ຜູ້​ສາວ ກໍ​ຄື ການ​ກະ­ທຳ​ທີ່​ຖື​ເປັນ​ການ​ລ່ວງ​ລະ­ເມີດ​ທາງ​ເພດ​ຕາມ​ຖະ­ໜົນ ຫຼື ສະ­ຖານ­ທີ່​ສາ­ທາ­ລະ­ນະ ໂດຍ​ຜູ້​ຕົກ​ເປັນ​ເຫຍື່ອ​ບໍ່​ຍິນ​ຍອມ ສ່ວນ​ຜູ້​ທີ່​ສະ­ແດງ​ພຶດ­ຕິ​ກຳ​ທີ່​ເປັນ​ການ​ຮຸກ​ຮານ ຫຼື ແຕະ­ຕ້ອງ​ທາງ​ເພດ ຜ່ານ​ສື່​ອອນ​ລາຍ​ນັ້ນ ຈະ​ໄດ້​ຮັບ​ໂທດ​ຕິດ​ຄຸກ​ຕາມ​ສະ­ຖານ​ໜັກ-ເບົາ ຫຼື ຖືກ​ປັບ​ໃໝ​ເປັນ​ເງິນ​ແຕ່ 1 ແສນ ເຖິງ 5 ແສນ​ເປ​ໂຊ (ສະ­ກຸນ​ເງິນ​ຟິ​ລິບ​ປິນ ເທົ່າ 16 ຫາ 58 ລ້ານ​ກວ່າ​ກີບ ໂດຍ​ປະ­ມານ) ຫຼື ທັງ​ຖືກ​ຄຸກ ທັງ​ຖືກ​ປັບ​ໃໝ ຖ້າ​ຜູ້​ກະ­ທຳ​ຜິດ​ເປັນ​ນິ­ຕິ­ບຸກ­ຄົນ​ທີ່​ມີ​ໃບ​ອະ­ນຸ­ຍາດ ຫຼື ຮັບ​ສິດ​ໃນ​ການ​ດຳ­ເນີນ​ທຸ­ລະ​ກິດ ກໍ​ຈະ​ຖືກ​ຖອນ​ໃບ​ອະ­ນຸ­ຍາດ​ໂດຍ​ອັດ­ຕະ­ໂນ­ມັດ ແລະ ຜູ້­ອຳ­ນວຍ­ການ​ທຸ­ລະ​ກິດ​ດັ່ງ­ກ່າວ ຕ້ອງ​ຮັບ­ຜິດ­ຊອບ​ຕໍ່​ຄວາມ​ຜິດ ບັນ­ນາ­ທິ­ການ ນັກ​ຂ່າວ ສື່​ສິ່ງ​ພິມ ກໍ​ຄື ສື່​ເອ​ເລັກ​ໂຕຣ​ນິກ ກໍ​ລ້ວນ​ແຕ່​ຕ້ອງ​ຮັບ­ຜິດ­ຊອບ​ຕໍ່​ການ​ເຜີຍ­ແຜ່​ພາບ?ຂ່າວ ທີ່​ລະ­ເມີດ​ກົດ­ໝາຍ​ສະ­ບັບ​ນີ້ ສ່ວນ​ຄົນ​ຕ່າງ­ປະ­ເທດ​ທີ່​ພົວ­ພັນ​ກັບ​ຄະ­ດີ​ນີ້ ກໍ​ຈະ​ຖືກ​ເນ­ລະ­ເທດ​ພາຍ­ຫຼັງ​ໄດ້​ປະ­ຕິ­ບັດ​ໂທດ ແລະ ເສຍ​ຄ່າ​ປັບ​ໃໝ​ແລ້ວ.

   ທີ່ ປາ​ນາ​ມາ: ນັບ​ແຕ່​ກາງ​ເດືອນ​ມັງ­ກອນ ປີ 2015 ເປັນ­ຕົ້ນ​ມາ ລັດ­ຖະ­ບານ​ປະ­ເທດ​ປາ​ນາ​ມາ (ເຂດ​ອາ​ເມ​ຣິ​ກາ​ກາງ) ໄດ້​ເລີ່ມ​ໂຄງ­ການ​ເຝິກ​ວິ­ຊາ​ຊີບ ພ້ອມ​ດ້ວຍ​ນະ­ໂຍ­ບາຍ​ນິ­ລະ­ໂທດ​ກຳ​ໃຫ້​ແກ່​ບັນ­ດາ​ອະ­ດີດ​ສະ­ມາ­ຊິກ​ແກ້ງ​ຄ້າ​ຢາ​ເສບ​ຕິດ ແລະ ກຸ່ມ​ອາ​ຊະ​ຍາ​ກອນ​ໃນ​ປະ­ເທດ ແນ­ໃສ່​ເປີດ​ໂອ­ກາດ​ໃຫ້​ພວກ​ເຂົາ­ເຈົ້າ​ກັບ​ຄືນ​ມາ​ເປັນ​ພົນ­ລະ­ເມືອງ​ດີ​ຂອງ​ສັງ­ຄົມ ແລະ ໃຊ້​ຊີ­ວິດ​ເໝືອນ​ຄົນ​ປົກ­ກະ­ຕິ​ທົ່ວ​ໄປ ເງື່ອນ­ໄຂ​ສຳ­ລັບ​ກຸ່ມ​ແກ້ງ​ຢາ​ເສບ​ຕິດ ແລະ ອາ​ຊະ​ຍາ​ກອນ​ທີ່​ຕ້ອງ­ການ​ເຂົ້າ​ຮ່ວມ​ໂຄງ­ການ​ເຝິກ​ອາ­ຊີບ ແລະ ນິ­ລະ­ໂທດ​ກຳ​ນັ້ນ ກ່ອນ​ອື່ນ​ຕ້ອງ​ປົດ​ອາ­ວຸດ ແລະ ມອບ​ອາ­ວຸດ​ທັງ​ໝົດ​ໃຫ້​ທາງ​ການ ເວ­ລາ​ທີ່​ກຳ­ນົດ​ຮັບ​ຄຳ​ຂໍ​ຮ້ອງ​ສະ­ໝັກ​ສຳ­ລັບ​ການ​ເຝິກ­ອົບ­ຮົມ​ຊຸດ​ທີ 1 ນັ້ນ ແມ່ນ 1 ເດືອນ ແຕ່​ກໍ​ຕ້ອງ​ໄດ້​ຕໍ່​ເວ­ລາ​ຕື່ມ​ອີກ ໂດຍ​ບໍ່​ມີ​ກຳ­ນົດ ຍ້ອນ​ວ່າ​ມີ​ຜູ້​ສະ­ໝັກ​ເປັນ​ຈຳ­ນວນ​ຫຼາຍ​ເກີນ​ຄາດ ໃນ 6 ເດືອນ​ທຳ​ອິດ​ຂອງ​ປີ 2015 ຊຶ່ງ​ເປັນ​ໄລ­ຍະ​ເລີ່ມ​ໂຄງ­ການ​ນັ້ນ ຂ່າວ​ບອກ​ວ່າ ໄດ້​ມີ​ຜູ້​ສະ­ໝັກ​ຮ່ວມ​ໂຄງ­ການ​ເຖິງ 2.500 ຄົນ ແລະ ໃນ​ທ້າຍ​ປີ​ນັ້ນ ຈຳ­ນວນ​ກໍ​ໄດ້​ກະ​ດືບ​ຂຶ້ນ​ເຖິງ 5.000 ຄົນ ປາ​ນາ​ມາ ເປັນ​ປະ­ເທດ​ທີ່​ປະ​ເຊີນ​ກັບ​ບັນ­ຫາ​ອາ​ຊະ​ຍາ​ກຳ​ຫຼາຍ​ທີ່​ສຸດ​ຂອງ​ໂລກ ຊຶ່ງ​ສ່ວນ​ໃຫຍ່​ແມ່ນ​ພົວ­ພັນ​ກັບ​ການ​ຄ້າ​ຢາ​ເສບ​ຕິດ.

   ທີ່ ລັດ​ເວຍ: (Latvia ເຄີຍ​ເປັນ​ລັດ​ໃນ​ອະ­ດີດ​ສະ­ຫະ­ພາບ​ໂຊ​ວຽດ) ໃນ​ທ້າຍ​ເດືອນ​ກັນ­ຍາ ປີ 2015 ລັດ­ຖະ­ບານ​ປະ­ເທດ​ລັດ​ເວຍ ໄດ້​ເລີ່ມ​ໂຄງ­ການ​ເກັບ​ພາ­ສີ​ຄົນ​ຮັ່ງ ທີ່​ເອີ້ນ​ກັນ​ວ່າ “ພາ­ສີ​ສາ­ມັກ­ຄີ” (Solidarity tax) ທີ່​ມີ​ເປົ້າ​ໝາຍ​ເກັບ​ນຳ​ບັນ­ດາ​ນັກ­ທຸ­ລະ­ກິດ​ຖົງ​ເງິນ​ໜັກໆ ຊຶ່ງ​ມີ​ຢູ່​ໃນ​ປະ­ເທດ​ທັງ​ໝົດ 4.700 ຄົນ ໃນ​ເວ­ລາ​ນັ້ນ ໂຄງ­ການ​ນີ້​ວາງ​ເປົ້າ​ໝາຍ​ເກັບ​ພາ­ສີ​ນຳ​ຜູ້​ມີ​ລາຍ​ຮັບ​ຫຼາຍ​ກວ່າ 48.000 ເອີ​ໂຣ/ປີ (ເທົ່າ​ກັບ 54.000 ໂດ​ລາ​ສະ­ຫະ­ລັດ) ມາດ​ຕະ­ການ​ເກັບ​ພາ­ສີ​ພິ­ເສດ​ຈາກ​ຄົນ​ຮັ່ງ​ນີ້ ມີ​ຫຼາຍໆ​ປະ­ເທດ​ໃຫ້​ຄວາມ​ສົນ­ໃຈ ເພາະ​ເຊື່ອ​ວ່າ​ຜູ້​ມີ​ຖົງ​ເງິນ​ໃຫຍ່ໆ​ກໍ​ຄວນ​ຈະ​ໃຈ​ໃຫຍ່​ໄປ​ດ້ວຍ ເພື່ອ​ຊ່ວຍ​ແກ້​ໄຂ​ບັນ­ຫາ​ເສດ­ຖະ­ກິດ?ການ​ເງິນ​ຂອງ​ປະ­ເທດ​ໃນ​ຍາມ​ຄັບ­ຂັນ (ແຫຼ່ງ​ຂ່າວ​ວຽງ​ຈັນ​ທາມ 24 ກັນ­ຍາ 2015).

ຂ່າວທີ່ກ່ຽວຂ້ອງ