ແລກປ່ຽນບົດຮຽນນັກການທູດໜຸ່ມ ຈາກປະເທດສະມາຊິກແມ່ນ້ຳຂອງ-ແມ່ນ້ຳລ້ານຊ້າງ

1.138 15 ພ.ຈ. 2019 ຂ່າວໜ້າ​ໜຶ່ງ
ແລກປ່ຽນບົດຮຽນນັກການທູດໜຸ່ມ ຈາກປະເທດສະມາຊິກແມ່ນ້ຳຂອງ-ແມ່ນ້ຳລ້ານຊ້າງ

    ສຳ​ມະ​ນາ​ຫົວ­ຂໍ້ “ນັກ​ການ​ທູດ​ໜຸ່ມ​ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ” (Mekong-Lancang Cooperation Young Diplomats Forum) ຈັດ​ຂຶ້ນ​ວັນ​ທີ 14-18 ພະ­ຈິກ 2019 ຢູ່ ນະ­ຄອນ­ຫຼວງ​ວຽງ​ຈັນ ໂດຍ​ເປັນ​ປະ­ທານ​ຂອງ​ທ່ານ ວິ­ລະ​ສັກ ສົມ­ພົງ ຮັກ­ສາ​ການ​ຫົວ­ໜ້າ​ກົມ​ເສດ­ຖະ­ກິດ ກະ­ຊວງ​ການ​ຕ່າງ­ປະ­ເທດ ແລະ ທ່ານ Zhao Chenggang ທີ່​ປຶກ­ສາ​ສະ­ຖານ​ເອກ​ອັກ​ຄະ​ລັດ​ຖະ​ທູດ ສປ ຈີນ ປະ­ຈຳ ສປປ ລາວ ມີ​ຜູ້­ຕາງ­ໜ້າ​ຈາກ​ປະ­ເທດ​ສະ­ມາ­ຊິກ​ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ (ກຳ­ປູ­ເຈຍ ມຽນ​ມາ ລາວ ໄທ ສສ ຫວຽດ­ນາມ ແລະ ສປ ຈີນ) ບັນ­ດາ​ກົມ ຫ້ອງ­ການ ສະ​ຖາ​ບັນ ຈາກ​ກະ­ຊວງ​ການ​ຕ່າງ­ປະ­ເທດ ແລະ ຄະ­ນະ​ພົວ­ພັນ​ຕ່າງ­ປະ­ເທດ​ສູນ​ກາງ​ພັກ​ເຂົ້າ​ຮ່ວມ.

    ເພື່ອ​ເປີດ​ໂອ­ກາດ​ໃຫ້​ນັກ​ການ​ທູດ​ໜຸ່ມ​ນ້ອຍ​ຈາກ​ປະ­ເທດ​ສະ­ມາ­ຊິກ​ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ ໄດ້​ພົບ​ປະ​ແລກ­ປ່ຽນ​ບົດ­ຮຽນ ປະ­ສົບ​ການ​ເຊິ່ງ​ກັນ ແລະ ກັນ ກ່ຽວ​ກັບ​ການ​ດຳ­ເນີນ​ວຽກ​ງານ​ດ້ານ​ການ​ທູດ​ຂອງ​ແຕ່​ລະ​ປະ­ເທດ ເພື່ອ​ສາ­ມາດ​ນຳ​ເອົາ​ໄປ​ປັບ​ໃຊ້​ໃຫ້​ແທດ­ເໝາະ​ກັບ​ສະ­ພາບ​ເງື່ອນ­ໄຂ​ຕົວ​ຈິງ​ຂອງ​ປະ­ເທດ​ຕົນ ໂດຍ​ຜູ້​ເຂົ້າ​ຮ່ວມ​ຈະ​ໄດ້​ຮັບ​ຟັງ​ການ​ບັນ­ຍາຍ​ໃນ​ຫົວ­ຂໍ້: ກາ­ລະ​ໂອ­ກາດ ແລະ ສິ່ງ​ທ້າ​ທາຍ​ຂອງ ສປປ ລາວ ໃນ​ການ​ຮ່ວມ​ມື​ໜຶ່ງ​ແລວ ໜຶ່ງ​ເສັ້ນ­ທາງ ຂອບ​ການ​ຮ່ວມ​ມື​ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ ກາ­ລະ​ໂອ­ກາດ ແລະ ສິ່ງ​ທ້າ​ທາຍ​ຂອງ​ການ​ພັດ­ທະ­ນາ​ເສດ­ຖະ­ກິດ​ຂອງ ສປປ ລາວ ພາ­ລະ​ບົດ­ບາດ​ຂອງ​ສູນ​ຄົ້ນ­ຄວ້າ​ແມ່­ນ້ຳ​ຂອງ​ສາ­ກົນ​ຂອງ ສປປ ລາວ ຕໍ່​ກັບ​ການ​ສ້າງ​ແລວ​ເສດ­ຖະ­ກິດ​ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ ພ້ອມ​ນີ້ ຍັງ​ໄດ້​ຮັບ​ຟັງ​ການ​ບັນ­ຍາຍ​ກ່ຽວ​ກັບ​ປະ­ສົບ​ການ​ຕົວ​ຈິງ​ຈາກ​ນັກ​ການ​ທູດ​ອາ­ວຸ­ໂສ​ຈາກ ສປປ ລາວ.

    ຂອບ​ການ​ຮ່ວມ​ມື​ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ ສ້າງ­ຕັ້ງ​ຂຶ້ນ​ວັນ​ທີ 23 ມີ­ນາ 2016 ເພື່ອ​ແນ­ໃສ່​ການ​ພັດ­ທະ­ນາ​ແບບ​ຍືນ​ຍົງ​ໃນ​ພາກ​ພື້ນ​ແມ່­ນ້ຳ​ຂອງ ບົນ​ພື້ນ­ຖານ​ການ​ຮ່ວມ​ມື​ໃນ 3 ເສົາ­ຄ້ຳ ຄື: ການ­ເມືອງ-ຄວາມ​ໝັ້ນ­ຄົງ ເສດ­ຖະ­ກິດ-ການ​ພັດ­ທະ­ນາ​ແບບ​ຍືນ​ຍົງ ແລະ ສັງ­ຄົມ-ວັດ­ທະ­ນະ­ທຳ ແລະ ການ​ແລກ­ປ່ຽນ​ລະ­ຫວ່າງ​ປະ­ຊາ­ຊົນ ແລະ 5 ຂົງ­ເຂດ​ບຸ­ລິ­ມະ­ສິດ ປະ­ກອບ​ມີ: ການ​ເຊື່ອມ​ຈອດ ຄວາມ​ສາ­ມາດ​ດ້ານ​ການ​ຜະ­ລິດ​ອຸດ­ສາ­ຫະ­ກຳ ເສດ­ຖະ­ກິດ​ຂ້າມ​ຊາຍ​ແດນ ການ​ຄຸ້ມ​ຄອງ​ແຫຼ່ງ​ຊັບ­ພະ­ຍາ­ກອນ​ນ້ຳ ແລະ ກະ­ສິ­ກຳ ແລະ ການ​ຫຼຸດ­ຜ່ອນ​ຄວາມ­ທຸກ​ຍາກ.

ຂ່າວທີ່ກ່ຽວຂ້ອງ