ຂີ້​ເຫຍື້ອ​ໃນ​ງານ​ບຸນ

4.227 15 ພ.ຈ. 2019 ນານາສາລະ
ຂີ້​ເຫຍື້ອ​ໃນ​ງານ​ບຸນ

    ບ້ານ​ເຮົາ​ມີ​ບຸນ​ຫຼາຍ​ປາງ​ທີ່​ມີ​ບັນຫາ​ເລື່ອງ​ການ​ເກັບ​ມ້ຽນ​ຂີ້​ເຫຍື້ອ ເຊິ່ງ​ທ່ານ​ຜູ້​ອ່ານ​ກໍ​ອາດ​ພົບ​ເຫັນ​ນຳ​ກັນ ເພາະ​ມີ​ແຕ່​ຄົນ ຢາກ​ໄດ້​ຢາກ​ເອົາ ແຕ່​ບາດ​ເວົ້າ​ເຖິງ​ການ​ເກັບ​ຮັກສາ​ຂີ້​ເຫຍື້ອ ຜັດ​ຂາດ​ຈິດ​ສຳນຶກ ແລະ ບໍ່​ຄິດ​ສ້າງ​ແຜນ ຫຼື ລະບຽບ ເພື່ອ​ໃຫ້​ທຸກ​ຄົນ​ຮັບຜິດຊອບ​ຮ່ວມ​ກັນ ຍົກ​ຕົວຢ່າງ​ຍັງ​ມີ​ປາກົດ​ເຫັນ​ຫຼາຍ​ເຂດ​ຮອບ​ນອກ​ກຳແພງ​ໃນ​ງານ​ບຸນທາດຫຼວງ​ທີ່​ຍາມ​ເຊົ້າ​ເວລາ​ຂີ່​ລົດ​ຜ່ານ​ຈະ​ເຫັນ​ຂີ້​ເຫຍື້ອ​ທັງ​ປິວ​ທັງ​ກອງ​ຕາມ​ບໍລິເວນ​ຮ້ານ​ເຕັ້ນ​ຂາຍເຄື່ອງ ເຊິ່ງ​ບັນຫາ​ແບບ​ນີ້​ຖ້າ​ເຮົາ​ບອກ​ພໍ່ຄ້າ-ແມ່​ຄ້າ​ໃຫ້​ພວກ​ເຂົາ​ຮັບຜິດຊອບ​ນຳ​ຄົງ​ຈະ​ດີ​ບໍ່​ໜ້ອຍ.

     ບຸນທາດຫຼວງ​ປີ​ນີ້​ຕ້ອງ​ຊົມເຊີຍ ​ອພບ ແລະ ບາງ​ໜ່ວຍ​ງານ​ການຈັດຕັ້ງ ເຊັ່ນ: ຊາວ​ໜຸ່ມ​ອາສາ​ເກັບ​ຂີ້​ເຫຍື້ອ ເຊິ່ງ​ຜູ້​ຂຽນ ແລະ ໝູ່​ພວກ​ບາງ​ຄົນ​ຕ່າງ​ກໍ​ພາກັນ​ດີໃຈ​ຊົມເຊີຍ ເພາະ​ມັນ​ເປັນ​ການ​ປູກຝັງ​ຈິດ​ສຳນຶກ​ຜູ້​ຄົນ​ໃຫ້​ຮູ້​ຮັກ​ຄວາມ​ສະອາດ ເຊິ່ງ​ຜູ້​ຂຽນ​ກໍ​ໄດ້​ໄປ​ຍ່າງ​ໃນ​ງານ​ບຸນ​ບາງ​ແລງ​ໄດ້​ພົບ​ເຫັນ​ເພິ່ນ​ວາງ​ຖົງ ແລະ ຖັງ​ຂີ້​ເຫຍື້ອ​ໄວ້​ຫຼາຍ​ຈຸດ ເຮັດ​ໃຫ້​ຜູ້​ທີ່​ມາ​ທ່ຽວ​ໃນ​ງານ​ບຸນ​ງ່າຍ​ຕໍ່​ການ​ຖິ້ມ​ຂີ້​ເຫຍື້ອ​ລົງ​ຖັງ ການ​ສ້າງ​ນິໄສ ຫຼື ປູກ​ຈິດ​ສຳນຶກ​ໃຫ້​ຮັກ​ຄວາມ​ສະອາດ​ນັ້ນ​ບາງ​ປະເທດ​ເຂົາ​ປູກຝັງ​ເຍົາວະ​ຊົນ ມາ​ແຕ່​ເຂົ້າ​ໂຮງຮຽນ​ອະນຸບານ ພໍ່​ແມ່​ກໍ​ເອົາໃຈໃສ່​ປະພຶດ​ເປັນ​ຕົວຢ່າງ​ບໍ່​ມັກງ່າຍ​ຕາມໃຈ​ຖິ້ມ​ຂີ້​ເຫຍື້ອ​ຊະຊາຍ ເພາະ​ຖ້າ​ລູກ​ຫຼານ ຫຼື ເດັກນ້ອຍ​ເຫັນ​ກໍ​ຈະ​ເປັນ​ຕົວຢ່າງ​ບໍ່​ດີ.

     ຜູ້​ຂຽນ​ມີ​ຄົນຮູ້​ຈັກ​ເລົ່າ​ສູ່​ຟັງ​ເລື່ອງ​ມາລະຍາດ​ຖິ້ມ​ຂີ້​ເຫຍື້ອ ເຂົາ​ເລົ່າ​ວ່າ: ບາງ​ຄົນ​ກໍ​ຂີ່​ລົດ​ເລັກ​ຊັດ​ຄັນ​ງາມ ແຕ່​ເປີດ​ແວ່ນ​ລົດ​ຖິ້ມ​ຂີ້​ເຫຍື້ອ​ລົງ​ຊະຊາຍ​ຂ້າງ​ຖະໜົນ ເກືອບ​ຖືກ​ໜ້າ​ຜູ້​ຂີ່​ລົດ​ມາ​ຕາມ​ຫຼັງ ເຊິ່ງ​ໝາຍ​ຄວາມ​ວ່າ ພຶດຕິ​ກຳ​ແບບ​ນັ້ນ​ເຫັນແກ່​ໂຕ ແລະ ເປັນ​ນິໄສ​ທີ່​ບໍ່​ໄດ້​ເຝິກອົບຮົມ​ມາ (ກິລິຍາ​ບອກ​ຊາດ ມາລະຍາດ​ບອກ​ຕະກູນ) ຮອດ​ມື້​ໃສ່​ບາດ​ບາງ​ຄົນ​ແຕ່ງ​ໂຕ​ດີໆ ເວລາ​ຈະ​ໃສ່​ບາດ​ຜັດ​ເອົາ​ມື​ເກົາ​ຫົວ​ເສີຍ​ຜົມ ຫຼື ເວລາ​ແຕ່ງກິນ​ຜັດ​ເອົາ​ບ່ວງ​ກ້ານ​ດຽວ​ທັງ​ຊິມ​ທັງ​ຕັກ​ອາຫານ​ໄປ​ຖວາຍ​ຄູບາ​ໃນ​ວັດ ບາງ​ຄົນ​ແຕ່ງ​ໂຕ​ທາ​ເຂົ້າແປ້ງ​ນ້ຳ​ແດງ​ໃນ​ມື​ຍັງ​ຕິດ​ເຄື່ອງ​ສຳອາງ ເວລາ​ຈົກ​ເຂົ້າ​ໃສ່​ບາດ​ເຮັດ​ໃຫ້​ເຂົ້າ​ຕິດ​ເຄື່ອງ​ສຳອາງ ຫອມ​ກຸ້ມ​ໃນ​ບາດ​ຄູບາ ບາງ​ອົງ​ເພິ່ນ​ອາດ​ຈຳ​ໃຈ​ສັນ​ເຂົ້າ.

        ຜູ້​ຂຽນ​ເລົ່າ​ມາ​ຂ້າງ​ເທີງ​ນີ້​ເພື່ອ​ໃຫ້​ເປັນ​ອຸທາຫອນ ໃຫ້​ມີ​ສະຕິ​ເວລາ​ເຮັດບຸນ ເຮົາ​ຄວນ​ຮັກສາ​ຄວາມ​ສະອາດ ມີ​ລະບຽບ​ລະວັງ​ຄັກແນ່​ວ່າ ອັນ​ໃດ​ເໝາະ​ສົມ ແລະ ບໍ່​ເໝາະ​ສົມ ບໍ່​ດັ່ງນັ້ນ ເຮັດບຸນ​ອາດ​ໄດ້​ບາບ​ແທນ ສ່ວນ​ເລື່ອງ​ຂີ້​ເຫຍື້ອ​ໃນ​ງານ​ບຸນທາດຫຼວງ​ປີ​ນີ້ ໂດຍ​ພາບ​ລວມ​ຄໍ​ລຳ​ເຮົາ​ຂໍ​ຊົມເຊີຍ​ຊາວ​ໜຸ່ມ ເຍົາວະ​ຊົນ ອາສາ​ເກັບ​ຂີ້​ເຫຍື້ອ ເພາະ​ເປັນ​ການ​ສ້າງ​ປາກົດການ ແລະ ປູກ​ຈິດ​ສຳນຶກ​ໃຫ້​ສັງຄົມ​ໄດ້​ເຫັນ​ຄວາມ​ສຳຄັນ ຮັກສາ​ສິ່ງແວດລ້ອມ​ຊ່ວຍ​ກັນ ສຳຄັນ​ກໍ​ແມ່ນ​ໜ່ວຍ​ງານ​ກ່ຽວຂ້ອງ​ປີ​ນີ້​ເຮັດ​ດີ​ຫຼາຍ ທັງ​ມີ​ການ​ໂຄສະນາ​ປູກ​ຈິດ​ສຳນຶກ​ນຳ ພໍ່​ແມ່​ຜູ້​ປົກຄອງ​ກະ​ບໍ່​ໃຈງ່າຍ ຄວນ​ຖື​ສຳຄັນ​ສອນ​ລູກ​ຫຼານ​ຮັກ​ຄວາມ​ສະອາດ.

ຂ່າວທີ່ກ່ຽວຂ້ອງ