ຮຸນໄດ ເປິດຕົວລົດຫຼັງຄາ ໂຊລ່າເຊລ ຄັນທໍາອິດ

2.169 19 ພ.ຈ. 2019 ຫົວຂໍ້ຂ່າວອື່ນໆ

   ບໍ­ລິ­ສັດ​ຜະ­ລິດ​ລົດ Hyundai Motor Group ຂອງ ສ ເກົາ­ຫຼີ ເປີດ​ຕົວ​ລົດ​ຄັນ​ທຳ​ອິດ ທີ່​ຕິດ​ຕັ້ງ​ລະ­ບົບ​ສາກ​ໄຟ​ດ້ວຍ​ພະ­ລັງ­ງານ​ແສງ​ອາ­ທິດ​ເທິງ​ຫຼັງ­ຄາ​ລົດ.

   ຜູ້​ຜະ­ລິດ​ລົດ​ລາຍ​ອື່ນໆ ຕ່າງ​ກໍ​ກຳ­ລັງ​ພັດ­ທະ­ນາ​ລະ­ບົບ​ສາກ​ໄຟ​ດ້ວຍ​ພະ­ລັງ­ງານ​ແສງ​ອາ­ທິດ ເພື່ອ​ເພີ່ມ​ປະ­ສິດ­ທິ­ພາບ​ແກ່​ລົດ​ພະ­ລັງ­ງານ​ໄຟ­ຟ້າ ແລະ ເພື່ອ​ເພີ່ມ​ໄລ­ຍະ​ທາງ​ໃນ​ການ​ຂັບ​ຂີ່​ລະ­ຫວ່າງ​ການ​ສາກ​ແຕ່​ລະ​ຄັ້ງ​ດ້ວຍ.

   ເມື່ອ​ມໍ່ໆມານີ້ Hyundai ປະ­ກາດ​ວ່າ​ເຕັກ​ໂນ​ໂລ​ຊີ​ນີ້​ຈະ​ເລີ່ມ​ມີ​ໃຊ້​ກັບ​ລົດ Sonata Hybrid ຮຸ່ນ​ໃໝ່ ເຊິ່ງ​ປັດ­ຈຸ­ບັນ​ມີ​ຂາຍ​ໃນ ສ ເກົາ­ຫຼີ ໄຮ​ບຣິດ ເປັນ​ລົດ​ທີ່​ສາ­ມາດ​ຂັບ​ເຄື່ອນ​ດ້ວຍ​ທັງ​ພະ­ລັງ­ງານ​ໄຟ­ຟ້າ ແລະ ພະ­ລັງ­ງານ​ເຊື້ອ​ໄຟ ເຊັ່ນ ນ້ຳ­ມັນ​ກາ​ຊວນ.

   Sonata Hybrid ມີ​ໂຄງ​ສ້າງ​ຂອງ​ແຜງ​ໂຊ​ລ່າ ຕິດ​ຕັ້ງ​ຢູ່​ເທິງ​ຫຼັງ­ຄາ​ຂອງ​ລົດ ເຊິ່ງ​ຈະ​ເຮັດ​ໜ້າ­ທີ່​ໃນ​ການ​ຮວບ​ຮວມ​ພະ­ລັງ­ງານ​ຈາກ​ແສງ​ອາ­ທິດ ເພື່ອ​ຊ່ວຍ​ໃນ​ການ​ສາກ​ແບດ​ເຕີ​ຣີ​ລົດ ແລະ ສາ­ມາດ​ສາກ​ໄດ້​ໃນ​ຂະ­ນະ​ທີ່​ລົດ​ຈອດ​ຢູ່ ຫຼື ໃນ​ຂະ­ນະ​ທີ່​ລົດ​ເຄື່ອນ​ຕົວ​ຢູ່​ກໍ​ໄດ້.

   ພະ­ລັງ­ງານ​ທີ່​ຖືກ​ເກັບ​ກັກ​ໂດຍ​ແຜງ​ໂຊ​ລ່າ ຈະ​ຖືກ​ແປງ​ເປັນ​ໄຟ­ຟ້າ​ທີ່​ສາ­ມາດ​ເກັບ​ໄວ້​ໃນ​ແບດ​ເຕີ​ຣີ.

   Hyundai ກ່າວ​ວ່າ ເຕັກ​ໂນ​ໂລ​ຊີ​ນີ້​ສາ­ມາດ​ເກັບ​ກັກ​ພະ­ລັງ­ງານ​ແສງ​ອາ­ທິດ ໄດ້​ຫຼາຍ​ພໍ​ທີ່​ຈະ​ສາກ​ແບດ​ເຕີ​ຣີ​ຂອງ​ລົດ​ໄດ້ 30 ເຖິງ 60% ແລະ ດ້ວຍ​ການ​ສາກ​ສະ­ເລ່ຍ​ວັນ​ລະ 6 ຊົ່ວ­ໂມງ ຄາດ​ວ່າ​ຈະ​ສາ­ມາດ​ເພີ່ມ​ໄລ­ຍະ​ທາງ​ໃນ​ການ​ຂັບ​ຂີ່​ໄດ້​ປີ​ລະ 1.300 ກິ­ໂລ­ແມັດ.

   ສ່ວນ​ຍານ­ພາ­ຫະ­ນະ​ໄຟ­ຟ້າ ແລະ ໄຮ​ບຣິດ ຮຸ່ນ​ອື່ນໆ ຈະ​ຕ້ອງ​ເຊື່ອມ​ຕໍ່​ກັບ​ປັກ​ສຽບ​ໄຟ ເພື່ອ​ສາກ​ໄຟ ເວ­ລາ​ໃນ​ການ​ສາກ​ຈະ​ແຕກ​ຕ່າງ​ກັນ​ໄປ ຕາມ​ປະ­ເພດ​ຂອງ​ຍານ­ພາ­ຫະ­ນະ ແລະ ອຸ­ປະ­ກອນ​ໄຟ­ຟ້າ​ທີ່​ໃຊ້ ເຊິ່ງ​ບັນ­ດາ​ຜູ້​ຜະ­ລິດ​ພະ­ຍາ­ຍາມ​ຢ່າງ​ຍິ່ງ ທີ່​ຈະ​ຫາ​ທາງ​ເພີ່ມ​ໄລ­ຍະ​ທາງ​ໃນ​ການ​ຂັບ​ຂີ່​ກ່ອນ​ທີ່​ຈະ​ຕ້ອງ​ສາກ​ແບດ​ເຕີ​ຣີ.

   Hyundai ເປີດ­ເຜີຍ​ວ່າ ຕໍ່​ໄປ​ຈະ​ເປີດ​ຕະ­ຫຼາດ​ລົດ​ຮຸ່ນ Sonata Hybrid ຫຼັງ­ຄາ​ໂຊ​ລ່າ​ທີ່​ອາ​ເມ​ຣິ​ກາ​ເໜືອ ເຊິ່ງ​ຈະ​ມີ​ລົດ​ຮຸ່ນ​ດັ່ງ­ກ່າວ​ຂາຍ​ໃນ​ໄວໆ​ນີ້ ແລະ ວ່າ​ທາງ​ບໍ­ລິ­ສັດ​ຍັງ​ວາງ​ແຜນ­ທີ່​ຈະ​ເພີ່ມ​ເຕັກ​ໂນ​ໂລ​ຊີ​ຫຼັງ­ຄາ​ໂຊ​ລ່າ​ໃຫ້​ກັບ​ລົດ​ຮຸ່ນ​ອື່ນໆ​ຂອງ​ບໍ­ລິ­ສັດ ໃນ​ອີກ​ບໍ່​ເທົ່າ­ໃດ​ປີ​ຂ້າງ​ໜ້າ​ນີ້​ດ້ວຍ.

ຂ່າວທີ່ກ່ຽວຂ້ອງ