ລັດ​ໃຊ້​ງົບ 15 ຕື້​ກີບ ສົ່ງ​ນັກກີລາ​ເຂົ້າ​ຮ່ວມ​ກີລາ​ຊີເກມ ແລະ ອາ​ຊຽນ​ພາລາ​ເກມ

1.468 19 ພ.ຈ. 2019 ວົງຈອນກີລາ
 ລັດ​ໃຊ້​ງົບ 15 ຕື້​ກີບ ສົ່ງ​ນັກກີລາ​ເຂົ້າ​ຮ່ວມ​ກີລາ​ຊີເກມ ແລະ ອາ​ຊຽນ​ພາລາ​ເກມ

    ພິທີ​ຖະແຫຼງ​ຂ່າວ​ການ​ກະກຽມ​ຄວາມ​ພ້ອມ​ຂອງ​ນັກກີລາ​ລາວ​ເຂົ້າ​ຮ່ວມ​ງານ​ມະ​ຫະ​ກຳ​ກີລາ​ຊີເກມ ຄັ້ງ​ທີ XXX ແລະ ກະກຽມ​ເຂົ້າ​ຮ່ວມ​ກີລາ​ອາ​ຊຽນ​ພາລາ​ເກມ ຄັ້ງ​ທີ X ທີ່​ປະເທດ​ຟິ​ລິບ​ປິນ ຈັດ​ຂຶ້ນ​ວັນ​ທີ 15 ພະຈິກ 2019 ຢູ່​ຄະນະ​ກຳມະການ​ໂອ​ແລມ​ປິກ​ແຫ່ງ​ຊາດ​ລາວ (​ຄອລ) ມີ​ທ່ານ ບົວ​ລານ ສິລິ​ປັນຍາ ຮອງ​ລັດຖະມົນຕີ ກະຊວງ​ສຶກ​ສາ​ທິ​ການ ແລະ ກີລາ (​ສສກ) ທັງ​ເປັນ​ຮອງ​ປະທານ ​ຄອລ ທ່ານ ສົມ​ພູ ພົງສາ ຮອງ​ປະທານ ແລະ ເລຂາທິການ ​ຄອລ ທ່ານ ແສງ​ພອນ ພົນ​ອາມາດ ຫົວໜ້າ​ກົມ​ກີລາ​ລະດັບ​ສູງ ທ່ານ ສີທາດ ຈັນທະ​ບູ​ລີ ຫົວໜ້າ​ກົມ​ກີລາ​ມວນ​ຊົນ ພ້ອມ​ດ້ວຍ​ຜູ້​ໃຫ້ການ​ສະໜັບສະໜູນ ຄະນະ​ນຳ ຄູ​ເຝິກ ແລະ ນັກກີລາ​ເຂົ້າ​ຮ່ວມ.

     ໂອກາດ​ນີ້​ທ່ານ ແສງ​ພອນ ພົນ​ອາມາດ ລາຍ​ງານ​ໃຫ້​ຊາບ​ວ່າ: ປີ​ນີ້​ໄດ້​ເປັນ​ເອກ​ກະ​ພາບ​ກັນ​ກຳນົດ​ຈະ​ສົ່ງ​ຄະນະ​ນຳ ກຳມະການ​ຕັດສິນ ຄູ​ເຝິກ ແລະ ນັກກີລາ 25 ປະເພດ ທັງ​ໝົດ 370 ຄົນ ເຂົ້າ​ຮ່ວມ​ແຂ່ງຂັນ​ງານ​ຊີເກມ​ທີ່​ຟິ​ລິບ​ປິນ ໃນ​ນັ້ນ​ສະເພາະ​ໝວດ​ກີລາ​ທີ່​ເຄີຍ​ມີ​ມູນເຊື້ອ​ໄດ້​ຫຼຽນ​ຄຳ​ມາ​ແລ້ວ​ແມ່ນ​ນຳ​ໃຊ້​ງົບປະມານ​ຂອງ​ລັດຖະບານ 18 ປະເພດ ຈາກ​ທັງ​ໝົດ 230 ຄົນ ປະກອບ​ມີ​ເປ​ຕັງ ບິນ​ລຽດ-ສະນຸກ​ເກີ ວູ​ຊູ ກະຕໍ້ ປັນ​ຈັກ​ສີ​ລັດ ລົດຖີບ ຍິງ​ທະນູ ຢູ​ໂດ ມວນ​ສາກົນ ມວຍ​ລາວ ມວຍ​ປ້ຳ ລອຍນ້ຳ ແລ່ນ-ລານ ເທ​ຄວັນ​ໂດ ກາ​ຣາ​ເຕ​ໂດ້ ຍົກ​ນ້ຳໜັກ ຄິກ​ບ໋ອກ​ຊີງ ແລະ ພິເສດ​ກີລາ​ຜ່ານ​ສິ່ງ​ກີດຂວາງ ເປັນ​ກີລາ​ຮູບ​ແບບ​ການ​ທະຫານ ເຊິ່ງ​ເຈົ້າພາບ​ຮຽກຮ້ອງ​ຂໍ​ຄວາມ​ຮ່ວມ​ມື​ໃຫ້​ເຂົ້າ​ຮ່ວມ ໂດຍ​ເພີ່ມ​ຄວາມ​ຮັບຜິດຊອບ​ຄ່າ​ເດີນທາງ​ໄປ​ກັບ ແລະ ທີ່​ພັກ​ອາຫານ ສ່ວນ​ໝວດ​ບັນດາ​ສະຫະພັນ​ກີລາ​ແຫ່ງ​ຊາດ​ຮັບຜິດຊອບ​ກຸ້ມ​ຕົນ​ເອງ​ທາງ​ດ້ານ​ງົບປະມານ​ມີ 7 ປະເພດ ຈາກ​ທັງ​ໝົດ 140 ຄົນ ຄື ​ກ໊ອຟ ຣັກ​ບີ້ ອີ​ສະປອດ ບານເຕະ​ຊາຍ ເທັນ​ນິດ ຊ໋ອບ​ເທັນ​ນິດ ແລະ ໝາກ​ເສີກ ສະຫະພັນ​ກີລາ​ແຫ່ງ​ຊາດ​ຮັບຜິດຊອບ​ຄ່າ​ໃຊ້​ຈ່າຍ​ໄລຍະ​ກະກຽມ ແລະ ໄລຍະ​ເຂົ້າ​ຮ່ວມ​ແຂ່ງຂັນ ລັດຖະບານ​ຊ່ວຍ​ຮັບຜິດຊອບ​ເງິນ​ແຮ່​ຖົງ​ບຸກຄົນ ຊຸດ​ວອມ ແລະ ຊຸດ​ສວນສະໜາມ ພ້ອມ​ທັງ​ຕັ້ງ​ເປົ້າ​ໝາຍ​ຈະ​ສູ້​ຊົນ​ໃຫ້​ໄດ້ 2 ຫຼຽນ​ຄຳ.

     ທ່ານ ສີທາດ ຈັນທະ​ບູ​ລີ ໄດ້​ລາຍ​ງານ​ໃຫ້​ຊາບ​ວ່າ: ໃນ​ການ​ເຂົ້າ​ຮ່ວມ​ງານ​ກີລາ​ອາ​ຊຽນ​ພາລາ​ເກມ ຄັ້ງ​ທີ X ທີ່​ປະເທດ​ຟິ​ລິບ​ປິນ ເປັນ​ເຈົ້າພາບ ໃນ​ຕົ້ນ​ປີ 2020 ຈະ​ສົ່ງ​ຄະນະ​ນຳ ຄູ​ເຝິກ ແລະ ນັກກີລາ ຈຳນວນ 6 ປະເພດ ປະກອບ​ມີ ແລ່ນ-ລານ ຍົກ​ນ້ຳໜັກ ລອຍນ້ຳ ໂກນ​ບານ ບານບ້ວງ​ລໍ້​ເລື່ອນ ແລະ ກີລາ​ລົດຖີບ ໃນ​ນັ້ນ​ຕັ້ງ​ເປົ້າ​ຈະ​ສູ້​ຊົນ​ໃຫ້​ໄດ້ 4 ຫູ​​ຽນ​ຄຳ ຈາກ 4 ປະເພດ ນອກຈາກ​ກີລາ​ບານບ້ວງ ລໍ້​ເລື່ອນ ແລະ ກີລາ​ລົດຖີບ.

     ຫຼັງ​ຈາກ​ນັ້ນ ​ໄດ້​ມີ​ພິທີ​ມອບ-ຮັບ​ການ​ອຸປະຖຳ​ນັກກີລາ​ລາວ​ຄື: ບໍລິສັດ ເບຍ​ລາວ ຈຳກັດ ອຸປະຖຳ 121 ລ້ານ​ກີບ ບໍລິສັດ FBT ຈຳໜ່າຍ​ເຄື່ອງ​ກີລາ​ຄົບ​ວົງ​ຈອນ ສະໜັບສະໜູນ 106 ລ້ານ​ກີບ ບໍລິສັດ ບໍລິການ​ເຝິກຊ້ອມ​ກີລາ​ຍິງ​ປືນ ຈຳກັດ 5.000 ໂດ​ລາ​ສະຫະລັດ ຫຼື ປະມານ 44 ລ້ານ ແລະ ບໍລິສັດ ລັດ​ວິ​ສາ​ຫະ​ກິດ​ລາວ​ໂທລະ​ຄົມ 10 ລ້ານ​ກີບ ນອກ​ນີ້​ ນັກກີລາ​ລາວ​ທັງ​ສອງ​ງານ​ດັ່ງກ່າວ​ລັດຖະບານ​ໄດ້​ກຳນົດ​ໃຫ້​ນຳ​ໃຊ້​ງົບປະມານ​ຮັບ​ໃຊ້​ທັງ​ໝົດ 15 ຕື້​ກີບ.  

ຂ່າວທີ່ກ່ຽວຂ້ອງ