ເບິ່ງບ້ານເຂົາເອົາບົດຮຽນ 19-11-2019

2.202 19 ພ.ຈ. 2019 ຫົວຂໍ້ຂ່າວອື່ນໆ

   ພົບ​ກັນ​ປະ­ຈຳ​ວັນ​ນີ້ ມີ​ເລື່ອງ​ກ່ຽວ​ກັບ​ການ​ລົງ­ໂທດ​ຜູ້​ຂັບ​ຂີ່​ໃນ​ການ​ມືນ​ເມົາ ຍ້ອນ​ທາດ​ເຫຼົ້າ​ຢູ່​ເກາະ​ໄຕ້​ຫວັນ ຕໍ່​ໃສ່​ເລື່ອງ​ທາງ​ການ​ອິນ​ໂດ​ເນ​ເຊຍ ກັບ​ການ​ແກ້​ໄຂ​ຄຳ​ຮ້ອງ­ທຸກ​ຂອງ​ປະ­ຊາ­ຊົນ ສຸດ​ທ້າຍ​ໄປ​ເບິ່ງ​ເລື່ອງ​ການ​ດຶງ​ດູດ​ການ​ລົງ­ທຶນ​ຢູ່​ສະ­ຫະ­ລັດ​ເອ​ມິ​ເລດ.

   ທີ່ ໄຕ້​ຫວັນ: ການ​ຂັບ​ລົດ​ໃນ​ເວ­ລາ​ມີ​ອາ­ການ​ມືນ​ເມົາ​ດ້ວຍ​ລິດ​ນ້ຳ​ຕາ​ຜີ​ເຜດ ຈະ​ໄດ້​ຮັບ​ການ​ລົງ­ໂທດ​ໜັກ​ທີ່​ສຸດ​ຢູ່​ເກາະ​ໄຕ້​ຫວັນ ບໍ່​ພຽງ​ແຕ່​ຜູ້​ຂັບ​ຄົນ​ດຽວ​ຮັບ​ໂທດ ຜູ້​ທີ່​ນັ່ງ​ມາ​ໃນ​ລົດ​ຄັນ​ນັ້ນ ກໍ​ຈະ​ຖືກ​ລົງ­ໂທດ​ເຊັ່ນ​ກັນ ມາດ​ຕະ­ການ​ລົງ­ໂທດ​ດັ່ງ­ກ່າວ​ໄດ້​ກຳ­ນົດ​ໄວ້​ໃນ​ກົດ​ລະ­ບຽບ​ຈາ­ລະ​ຈອນ ສະ­ບັບ​ດັດ­ແກ້ ທີ່​ມີ​ຜົນ​ບັງ­ຄັບ​ໃຊ້​ນັບ​ແຕ່​ວັນ​ທີ 1 ກໍ­ລະ­ກົດ​ປີ​ນີ້​ເປັນ­ຕົ້ນ​ໄປ ໄຕ້​ຫວັນ ມີ​ສະ­ຖິ­ຕິ​ທີ່​ໜ້າ​ຍ້ານ​ກົວ​ກ່ຽວ​ກັບ​ອຸ­ບັດ­ເຫດ​ຕາມ​ຖະ­ໜົນ ຍ້ອນ​ບັນ­ຫາ “ເມົາ​ແລ້ວ​ຂັບ” ສະ­ຖິ­ຕິ​ລະ­ຫວ່າງ​ປີ 2014-2018 ຊີ້​ອອກ​ວ່າ ກໍ­ລະ­ນີ​ເມົາ​ແລ້ວ​ຂັບ​ໄດ້​ຂ້າ​ຊີ­ວິດ​ຊາວ​ເກາະ​ຫຼາຍ​ກວ່າ 3 ພັນ​ຄົນ ສ່ວນ​ຈຳ­ນວນ​ຜູ້​ເມົາ​ແລ້ວ​ຂັບ​ນັ້ນ​ມີ​ສູງ​ເກືອບ 430.000 ຄົນ ກົດ​ລະ­ບຽບ​ສະ­ບັບ​ນີ້ ໄດ້​ເພີ່ມ​ມູນ​ຄ່າ​ການ​ປັບ​ໃໝ​ໂຊ​ເຟີ້​ຂີ້​ເມົາ ຈາກ 90.000 ໂດ​ລາ​ໄຕ້​ຫວັນ (ເທົ່າ​ກັບ 24 ລ້ານ​ກີບ) ມາ​ເປັນ 120.000 ໂດ​ລາ​ໄຕ້​ຫວັນ (ເທົ່າ​ກັບ 32 ລ້ານ​ກີບ) ຖ້າ​ເປັນ​ການ​ກະ­ທຳ​ຜິດ​ຊ້ຳ​ຊາກ ກໍ​ຈະ​ປັບ​ໃໝ​ເພີ່ມ​ອີກ 90.000 ໂດ​ລາ​ໄຕ້​ຫວັນ ສຳ­ລັບ​ຜູ້­ໂດຍ­ສານ ຫຼື ຜູ້​ນັ່ງ​ລົດ​ມາ​ກັບ​ໂຊ​ເຟີ​ຂີ້​ເມົາ​ນັ້ນ ກໍ​ຈະ​ຖືກ​ປັບ​ໃໝ​ໃນ​ມູນ​ຄ່າ​ແຕ່ 600-3.000 ໂດ​ລາ​ໄຕ້​ຫວັນ (164.000-822.000 ກີບ) ໂຊ​ເຟີ​ຂີ້​ເມົາ​ທີ່​ເຮັດ​ໃຫ້​ເກີດ​ອຸ­ບັດ­ເຫດ​ເຖິງ​ຂັ້ນ​ມີ​ຜູ້​ບາດ­ເຈັບ​ໜັກ ຫຼື ເສຍ​ຊີ­ວິດ​ຍ້ອນ​ນັ້ນ ນອກ­ຈາກ​ໄດ້​ຮັບ​ໂທດ​ທາງ​ແພ່ງ ແລະ ອາ­ຍາ​ແລ້ວ ຍັງ​ຈະ​ຖືກ​ຖອນ​ໃບ​ຂັບ​ຂີ່​ຕະ­ຫຼອດ​ຊີ­ວິດ ແລະ ຖືກ​ຢຶດ​ລົດ​ຄັນ​ທີ່​ກໍ່​ເຫດ​ຂອງ​ຜູ້­ກ່ຽວ​ທັນ­ທີ ກົດ​ລະ­ບຽບ​ນີ້​ຍັງ​ໄດ້​ກຳ­ນົດ​ໂທດ​ຕໍ່​ຜູ້​ທີ່​ຮູ້​ວ່າ​ຕົນ​ມີ​ອາ­ການ​ມຶນ­ເມົາ​ແລ້ວ​ຍັງ​ດື້​ຂີ່​ລົດ­ຖີບ ລົດ­ຖີບ​ໄຟ­ຟ້າ ຫຼື ບັນ­ຊາ​ລົດ​ສາມ​ລໍ້ ດ້ວຍ​ການ​ປັບ​ໃໝ ຖ້າ​ເປັນ​ເງິນ​ລາວ​ແມ່ນ​ລະ­ຫວ່າງ 160.000-320.000 ກີບ.

   ທີ່ ອິນ​ໂດ​ເນ​ເຊຍ: ເມື່ອ 2 ປີ​ກ່ອນ​ໜ້າ​ນີ້ ບັນ­ຫາ​ຄຳ​ຮ້ອງ­ທຸກ​ທີ່​ປະ­ຊາ­ຊົນ​ອິນ​ໂດ​ເນ​ເຊຍ ສົ່ງ​ເຖິງ​ໜ່ວຍ​ກຳ­ມະ­ການ​ແກ້​ໄຂ​ຄຳ​ຮ້ອງ­ທຸກ​ຫຼາຍ​ທີ່​ສຸດ ນັ້ນ​ແມ່ນ​ກ່ຽວ​ກັບ​ຄວາມ​ຂັດ​ແຍ່ງ​ເລື່ອງ​ທີ່​ດິນ ຮອງ​ລົງ​ມາ​ແມ່ນ​ເລື່ອງ​ການ​ບໍ­ລິ­ຫານ​ງານ​ຂອງ​ອຳ­ນາດ​ການ​ປົກ­ຄອງ​ທ້ອງ­ຖິ່ນ ທີ່​ພົວ­ພັນ​ກັບ​ສິດ​ເຂົ້າ​ເຖິງ​ການ​ສຶກ​ສາ ແລະ ສາ­ທາ­ລະ­ນະ​ສຸກ ສ່ວນ​ມາ​ໃນ​ອັນ​ດັບ​ທີ 3 ກໍ​ແມ່ນ​ກ່ຽວ​ກັບ​ການ​ປະ­ຕິ­ບັດ​ງານ​ຂອງ​ເຈົ້າ​ໜ້າ­ທີ່​ຕຳ­ຫຼວດ ຊຶ່ງ​ມີ​ຈຳ­ນວນ​ຄຳ​ຮ້ອງ­ທຸກ​ສູງ​ທີ່​ສຸດ ທຽບ​ກັບ​ການ​ບໍ­ລິ­ການ​ຂອງ​ລັດ​ໃນ​ຂະ­ແໜງ­ການ​ອື່ນໆ (Vientiane Times 15/3/2017) ທ່ານ​ນາງ ນີ​ນິກ ຣາ​ຮາ​ຢູ (Ninik Rahayu) ຫົວ­ໜ້າ​ຄະ­ນະ​ກຳ­ມະ­ການ​ພິ­ຈາ­ລະ­ນາ​ແກ້​ໄຂ​ຄຳ​ຮ້ອງ­ທຸກ ອິນ​ໂດ​ເນ​ເຊຍ ໄດ້​ເປີດ­ເຜີຍ​ໃຫ້​ຮູ້​ວ່າ ໃນ​ປີ 2016 ຜູ້​ສະ­ເໜີ​ຄຳ​ຮ້ອງ­ທຸກ​ກ່ຽວ​ກັບ​ການ​ໃຫ້​ບໍ­ລິ­ການ​ຂອງ​ລັດ ນັ້ນ ມີ​ເກືອບ 11.000 ຄົນ ເພີ່ມ​ຂຶ້ນ​ເກືອບ 6.000 ຄົນ ທຽບ­ໃສ່​ປີ 2016 ສຳ­ລັບ​ໄຕ​ມາດ​ທີ 1 ຂອງ​ປີ 2017 ນັ້ນ ທາງ​ຄະ­ນະ​ກຳ­ມະ­ການ​ໄດ້​ຮັບ​ຄຳ​ຮ້ອງ­ທຸກ​ຈາກ​ຈຳ­ນວນ​ເກືອບ 3.000 ຄົນ​ແລ້ວ ທ່ານ​ນາງ ນີ​ນິກ ສະ­ແດງ​ຄວາມ​ຊົມ­ເຊີຍ​ທີ່​ປະ­ຊາ­ຊົນ​ອິນ​ໂດ​ເນ​ເຊຍ ບໍ່​ນິ້ງ​ເສີຍ​ຕໍ່​ການ​ບໍ­ລິ­ການ​ຮັບ​ໃຊ້​ປະ­ຊາ­ຊົນ​ຂອງ​ທາງ​ການ​ທີ່​ຍັງ​ເຮັດ​ບໍ່​ໄດ້​ດີ.

   ທີ່ ສະ­ຫະ­ລັດ​ອາ​ຣັບ ເອ​ມີ​ເຣດ: (UAE) ຂ່າວ​ຕ່າງ­ປະ­ເທດ​ໃນ​ໄຕ​ມາດ​ທີ 2 ຂອງ​ເດືອນ​ພຶດ­ສະ­ພາ 2018 ໄດ້​ເວົ້າ​ເຖິງ​ການ​ເປີດ​ປະ­ຕູ​ຂອງ UAE ສູ່​ການ​ລົງ­ທຶນ​ຕ່າງ­ປະ­ເທດ​ຄັ້ງ​ຍິ່ງ​ໃຫຍ່​ໄພ­ສານ ດ້ວຍ​ຮູບ​ການ​ດຶງ​ດູດ​ສຸດ​ຍອດ​ຄື: ອະ­ນຸ­ຍາດ​ໃຫ້​ຄົນ​ຕ່າງ­ປະ­ເທດ​ສາ­ມາດ​ຄອບ​ຄອງ​ວິ​ສາ​ຫະ​ກິດ​ທີ່​ສ້າງ­ຕັ້ງ​ຢູ່​ໃນ​ປະ­ເທດ​ນີ້​ໄດ້ 100% ພ້ອມ​ດ້ວຍ​ນະ­ໂຍ­ບາຍ​ວີ​ຊາ​ສຳ­ລັບ​ບັນ­ດາ​ນັກ​ລົງ­ທຶນ ແລະ ຍາດ​ພີ່­ນ້ອງ​ຂອງ​ພວກ​ເຂົາ­ເຈົ້າ ວີ​ຊາ​ດັ່ງ­ກ່າວ​ມີ​ອາ­ຍຸ​ໃຊ້​ງານ​ເຖິງ 10 ປີ ແລະ ຕໍ່​ອາ­ຍຸ​ໄດ້​ບໍ່​ມີ​ວັນ​ສິ້ນ​ສຸດ ນະ­ໂຍ­ບາຍ​ເອື້ອ​ອຳ­ນວຍ​ຄວາມ​ສະ­ດວກ​ນີ້​ເລ່ງ​ໃສ່​ດຶງ​ດູດ​ບັນ­ດາ​ນັກ​ລົງ­ທຶນ​ກະ­ເປົາ​ໜັກໆ ແລະ ຊ່ຽວ­ຊານ​ລະ­ດັບ​ຫົວ​ກະ­ທິ​ໃນ​ຂະ­ແໜງ­ການ​ຢາ ວິ­ທະ­ຍາ­ສາດ ການ​ຄົ້ນ­ຄວ້າ ແລະ ເຕັກ​ໂນ​ໂລ​ຊີ.

ຂ່າວທີ່ກ່ຽວຂ້ອງ