ໂຄງການຊົນລະປະທານຢູ່ເມືອງສັງທອງ 2 ແຫ່ງ ສ້າງສຳເລັດ

561 19 ພ.ຈ. 2019 ຂ່າວໜ້າ​ໜຶ່ງ
ໂຄງການຊົນລະປະທານຢູ່ເມືອງສັງທອງ 2 ແຫ່ງ ສ້າງສຳເລັດ

   ພິ­ທີ​ມອບ-ຮັບ​ໂຄງ­ການ ການ​ກໍ່­ສ້າງ​ຊົນ­ລະ­ປະ­ທານ​ຈັກ­ສູບ­ນ້ຳ ບ້ານ​ຄົກ​ເພີງ ແລະ ບ້ານ​ອ່າງ​ນ້ອຍ ເມືອງ​ສັງ​ທອງ ນະ­ຄອນ­ຫຼວງ​ວຽງ​ຈັນ ຈັດ​ຂຶ້ນ​ວັນ​ທີ 15 ພະ­ຈິກ 2019 ກ່າວ​ມອບ​ໂດຍ​ທ່ານ ສີ­ທາດ ແສງ​ພະ­ຈັນ ປະ­ທານ​ບໍ­ລິ­ສັດ ແກ້ວ​ທະ­ວີ​ຊັບ ກໍ່­ສ້າງ​ຄົບ​ວົງ​ຈອນ ຈຳ­ກັດ​ຜູ້​ດຽວ ແລະ ກ່າວ​ຮັບ​ໂດຍ​ທ່ານ ຫຼ້າ​ສາຍ ນວນ​ທາ​ສິງ ຫົວ­ໜ້າ​ພະ​ແນກ​ກະ­ສິ­ກຳ ແລະ ປ່າ­ໄມ້ ນະ­ຄອນ­ຫຼວງ​ວຽງ​ຈັນ ມີ​ທ່ານ ສີ​ຫຸນ ສິດ­ທິ​ລື​ໄຊ ຮອງ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ທ່ານ ດາວ​ເພັດ ອາ​ລຸນ ເຈົ້າ­ເມືອງ​ສັງ​ທອງ ພ້ອມ​ດ້ວຍ​ຂະ­ແໜງ­ການ​ທີ່​ກ່ຽວ­ຂ້ອງ​ເຂົ້າ​ຮ່ວມ.

   ທ່ານ ສີ­ທາດ ແສງ​ພະ­ຈັນ ໄດ້​ລາຍ​ງານ​ການ­ຈັດ­ຕັ້ງ​ປະ­ຕິ­ບັດ​ໂຄງ­ການ​ກໍ່­ສ້າງ​ຊົນ­ລະ­ປະ­ທານ ຈັກ­ສູບ­ນ້ຳ ໂດຍ​ບໍ­ລິ­ສັດ​ໄດ້​ລົງ­ທຶນ​ສ້ອມ­ແປງ​ຊົນ­ລະ­ປະ­ທານ​ຢູ່​ເມືອງ​ສັງ​ທອງ ແລະ ໄດ້​ສ້າງ­ສັນ​ຍາ​ລົງ­ມື​ຈັດ​ຕັ້ງ​ປະ­ຕິ­ບັດ​ຮ່ວມ ລະ­ຫວ່າງ​ຫ້ອງ­ການ​ພັດ­ທະ­ນາ​ຊົນ­ນະ­ບົດ ແລະ ລຶ­ບລ້າງ​ຄວາມ­ທຸກ​ຍາກ​ໃນ​ເມື່ອ​ກ່ອນ ຕາມ​ແຈ້ງ​ການ​ຂອງ​ລັດ­ຖະ­ມົນ­ຕີ​ປະ­ຈຳ​ຫ້ອງ​ວ່າ­ການ​ລັດ­ຖະ­ບານ ຫົວ­ໜ້າ​ຄະ­ນະ​ພັດ­ທະ­ນາ​ຊົນ­ນະ­ບົດ ແລະ ລຶ­ບລ້າງ​ຄວາມ­ທຸກ​ຍາກ​ຂັ້ນ​ສູນ​ກາງ ທີ່​ເຫັນ​ດີ​ອະ­ນຸ­ມັດ​ໃຫ້​ບໍ­ລິ­ສັດ​ລົງ­ທຶນ​ຈັດ​ຕັ້ງ​ປະ­ຕິ­ບັດ​ໂຄງ­ການ​ກໍ່­ສ້າງ​ຊົນ­ລະ­ປະ­ທານ​ຈັກ­ສູບ­ນ້ຳ 6 ແຫ່ງ ຢູ່​ເມືອງ​ສັງ​ທອງ​ຕາມ​ສັນ­ຍາ​ຮັບ​ເໜົາ​ກໍ່­ສ້າງ​ຊົນ­ລະ­ປະ­ທານ​ຈັກ­ສູບ­ນ້ຳ ເຊິ່ງ​ໂຄງ­ການ​ໄດ້​ເລີ່ມ​ຈັດ​ຕັ້ງ​ປະ­ຕິ­ບັດ​ເດືອນ​ພຶດ­ສະ­ພາ 2013 ແລະ ສິ້ນ​ສຸດ​ສັນ­ຍາ ປີ 2018 ໄລ­ຍະ​ເວ­ລາ 5 ປີ ຜ່ານ​ການ­ຈັດ­ຕັ້ງ​ປະ­ຕິ­ບັດ​ໜ້າ​ວຽກ 6 ໂຄງ­ການ ມາ​ຮອດ​ປັດ­ຈຸ­ບັນ​ສາ­ມາດ​ປະ­ຕິ­ບັດ​ໄດ້ 56% ຍັງ​ບໍ່​ທັນ​ໄດ້​ສືບ­ຕໍ່ 4 ໂຄງ­ການ ເທົ່າ​ກັບ 44% ສ່ວນ 2 ໂຄງ­ການ​ທີ່​ໄດ້​ລົງ­ມື​ຈັດ​ຕັ້ງ​ປະ­ຕິ­ບັດ​ສຳ­ເລັດ 100% ທັງ​ນີ້ ເພື່ອ​ປະ­ກອບ­ສ່ວນ​ສ້າງ­ສາ​ພັດ­ທະ­ນາ​ປະ­ເທດ​ຊາດ ໂດຍ​ສະ­ເພາະ ການ​ແກ້​ໄຂ​ຄວາມ­ທຸກ​ຍາກ​ຂອງ​ປະ­ຊາ­ຊົນ​ເມືອງ​ສັງ​ທອງ ກໍ​ຄື ປະ­ຊາ­ຊົນ​ບ້ານ​ອ່າງ​ນ້ອຍ ແລະ ບ້ານ​ຄົກ​ເພີງ ເຮັດ​ໃຫ້​ປະ­ຊາ­ຊົນ​ມີ​ນ້ຳ​ຊົນ­ລະ­ປະ­ທານ​ສະ­ໜອງ​ໃຫ້​ເນື້ອ­ທີ່​ການ​ຜະ­ລິດ ສ້າງ​ໃຫ້​ເຂົາ­ເຈົ້າ​ມີ​ວຽກ​ເຮັດ​ງານ​ທຳ​ມີ​ລາຍ​ຮັບ ພ້ອມ​ກັນ​ສ້າງ​ເສດ­ຖະ­ກິດ​ຄອບ­ຄົວ​ຂອງ​ຕົນ​ເອງ ໃຫ້​ຫຼຸດ​ພົ້ນ​ອອກ​ຈາກ​ຄວາມ­ທຸກ​ຍາກ​ເທື່ອ​ລະ​ກ້າວ ຕາມ​ແນວ­ທາງ​ນະ­ໂຍ­ບາຍ​ຂອງ​ພັກ​ວາງ​ໄວ້.

ຂ່າວທີ່ກ່ຽວຂ້ອງ