ມາເລເຊຍ ເປີດງານອາຊຽນມິດ 2019 ຕັ້ງເປົ້າດຶງດູດນັກທ່ອງທ່ຽວ 30 ລ້ານຄົນ

617 19 ພ.ຈ. 2019 ຂ່າວໜ້າ​ໜຶ່ງ
ມາເລເຊຍ ເປີດງານອາຊຽນມິດ 2019 ຕັ້ງເປົ້າດຶງດູດນັກທ່ອງທ່ຽວ 30 ລ້ານຄົນ

   ອົງ​ການ­ທ່ອງ­ທ່ຽວ​ປະ­ເທດ​ມາ​ເລ​ເຊຍ ຈັດ​ພິ­ທີ​ເປີດ​ງານ​ອາ​ຊຽນ​ມິດ 2019 ASEAN MEET 2019 ຢ່າງ​ເປັນ​ທາງ​ການ​ງານ​ດັ່ງ­ກ່າວ ແນ­ໃສ່​ສົ່ງ­ເສີມ​ການ­ທ່ອງ­ທ່ຽວ ແລະ ຖື​ໄດ້​ວ່າ​ເປັນ​ກິດ­ຈະ­ກຳ​ສຳ­ຄັນ ໃນ​ການ​ສົ່ງ­ເສີມ​ປີ​ທ່ອງ​ທ່ຽວ​ມາ​ເລ​ເຊຍ 2020 (Visit Malaysia 2020) ເຊິ່ງ​ຈະ​ເປີດ​ເປັນ​ທາງ​ການ​ໃນ​ທ້າຍ​ປີ 2019 ແລະ ໄດ້​ວາງ​ເປົ້າ​ໝາຍ​ດຶງ​ດູດ​ນັກ​ທ່ອງ​ທ່ຽວ​ໃຫ້​ໄດ້​ເຖິງ 30 ລ້ານ​ຄົນ.

   ທ່ານ ອິ​ສ​ການ​ດາ ເມີ​ຊາ ໂມດ ຢູ​ຊອຟ ຫົວ­ໜ້າ​ພະ​ແນກ​ປະ­ຊາ­ສຳ­ພັນ ແລະ ການ​ສື່­ສານ ອົງ​ການ­ທ່ອງ­ທ່ຽວ​ມາ​ເລ​ເຊຍ ກ່າວ​ວ່າ: ການ​ຈັດ​ງານ​ຄັ້ງ​ນີ້ ຫຼັກໆ​ແມ່ນ​ແນ­ໃສ່​ເປັນ​ການ​ສ້າງ​ຕາ​ໜ່າງ​ຜູ້​ປະ­ສານ​ງານ​ດ້ານ​ການ­ທ່ອງ­ທ່ຽວ​ໃນ​ປະ­ເທດ​ອາ​ຊຽນ ບໍ­ລິ­ສັດ​ຕົວ​ແທນ​ທ່ອງ​ທ່ຽວ ລວມ​ໄປ​ເຖິງ​ສື່​ມວນ​ຊົນ​ໃນ​ບັນ­ດາ​ປະ­ເທດ​ອາ​ຊຽນ ເພື່ອ​ໂຄ­ສະ­ນາ​ສົ່ງ­ເສີມ​ປີ​ທ່ອງ​ທ່ຽວ​ມາ​ເລ​ເຊຍ 2020 (Visit Malaysia 2020) ເຊິ່ງ​ໃນ​ປີ 2020 ຄາດ​ວ່າ​ຈະ​ສ້າງ​ລາຍ​ຮັບ​ໃຫ້​ໄດ້ 100 ຕື້​ຣິງ​ກິດ (ເງິນ​ມາ​ເລ​ເຊຍ) ຫຼື ປະ­ມານ 212.806 ຕື້​ກີບ.

   ນອກ​ນັ້ນ ຈຸດ­ປະ­ສົງ​ຂອງ​ການ​ພົບ​ປະ​ຄັ້ງ​ນີ້ ພວກ​ເຮົາ​ໄດ້​ວາງ​ໄວ້​ໃນ​ປະ­ເທດ​ເພື່ອນ​ມິດ ໃນ​ປະ­ເທດ​ອາ​ຊຽນ​ດ້ວຍ​ກັນ ເພື່ອ​ເຂົ້າ​ມາ​ທ່ອງ​ທ່ຽວ​ໃນ​ມາ​ເລ​ເຊຍ ເຊິ່ງ​ຕາມ​ຕົວ​ເລກ​ສະ­ຖິ­ຕິ​ຂອງ​ນັກ​ທ່ອງ​ທ່ຽວ​ໃນ​ອາ​ຊຽນ​ເຂົ້າ​ມາ ໃນ​ປີ 2018 ມີ​ເຖິງ 18,11 ລ້ານ​ຄົນ ກວມ​ເຖິງ 70,1% ແລະ ໃນ 6 ເດືອນ​ຕົ້ນ​ປີ 2019 ເຫັນ​ໄດ້​ວ່າ​ແມ່ນ​ເພີ່ນ​ຂຶ້ນ 10,9 ລ້ານ​ຄົນ ຖ້າ​ທ່ຽບ​ໃສ່​ໄລ­ຍະ​ດຽວ​ກັນ​ຂອງ​ປີ 2018 ມີ​ພຽງ​ແຕ່ 10,5 ລ້ານ​ຄົນ ຄິດ​ເປັນ​ອັດ­ຕາ​ສ່ວນ​ເພີ່ມ​ຂຶ້ນ​ເຖິງ 4,7%.

   ສຳ­ລັບ​ງານ​ຄັ້ງ​ນີ້ ຜູ້​ເຂົ້າ​ຮ່ວມ​ຈະ​ໄດ້​ຮັບ​ຟັງ​ການ​ພັດ­ທະ­ນາ​ການ­ທ່ອງ­ທ່ຽວ​ຂອງ​ມາ​ເລ​ເຊຍ ແລກ­ປ່ຽນ​ປະ­ສົບ​ການ​ລະ­ຫວ່າງ​ບໍ­ລິ­ສັດ​ທ່ອງ​ທ່ຽວ ພ້ອມ​ນັ້ນ ຍັງ​ຈະ​ໄດ້​ເດີນ­ທາງ​ທ່ຽວ​ຊົມ​ສະ­ຖານ­ທີ່​ທ່ອງ​ທ່ຽວ​ຕ່າງໆ ເຊັ່ນ: ຈໍ​ຫໍ ປີ​ນັງ ຊາ​ຣາ​ວັກ ຊາ​ບະ ແລະ ທີ​ຣັງ​ກາ​ນູ ສະ­ເພາະ​ຕົວ​ແທນ​ບໍ­ລິ­ສັດ​ທ່ອງ​ທ່ຽວ ແລະ ສື່​ມວນ​ຊົນ​ລາວ ແມ່ນ​ໄດ້​ໄປ​ສຳ­ຜັດ​ບັນ­ຍາ­ກາດ​ການ­ທ່ອງ­ທ່ຽວ​ທີ່​ຊາ​ບະ.

   ພິ­ທີ​ເປີດ​ງານ​ດັ່ງ­ກ່າວ​ຈັດ​ຂຶ້ນ​ທີ່​ເມືອງ ແລະ ລັດ​ມາ​ລັກ​ກາ ໃນ​ວັນ​ທີ 18 ພະ­ຈິກ 2019 ເຊິ່ງ​ມີ​ຕົວ​ແທນ​ບໍ­ລິ­ສັດ​ທ່ອງ​ທ່ຽວ ສື່​ມວນ​ຊົນ ແລະ ພາກ­ສ່ວນ​ກ່ຽວ­ຂ້ອງ.

ຂ່າວທີ່ກ່ຽວຂ້ອງ