ສສຊ ຮັບຮອງເອົາຮ່າງມະຕິສະພາແຫ່ງຊາດ

740 19 ພ.ຈ. 2019 ຂ່າວໜ້າ​ໜຶ່ງ
ສສຊ ຮັບຮອງເອົາຮ່າງມະຕິສະພາແຫ່ງຊາດ

   ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 8 ຂອງ​ສະ­ພາ​ແຫ່ງ​ຊາດ​ຊຸດ​ທີ VIII ໃນ​ວັນ​ທີ 18 ພະ­ຈິກ 2019 ບັນ­ດາ​ສະ­ມາ­ຊິກ​ສະ­ພາ​ແຫ່ງ​ຊາດ (ສສຊ) ໄດ້​ພິ­ຈາ­ລະ­ນາ ແລະ ຮັບ­ຮອງ​ເອົາ​ຮ່າງ​ມະ­ຕິ​ກອງ​ປະ­ຊຸມ​ສະ­ພາ​ແຫ່ງ​ຊາດ ກ່ຽວ​ກັບ​ວຽກ​ງານ​ຂອງ​ລັດ­ຖະ­ບານ ອົງ­ການ​ກວດ​ສອບ​ແຫ່ງ​ລັດ ແລະ ອົງ­ການ​ກວດ­ກາ​ລັດ­ຖະ­ບານ ເປັນ​ປະ­ທານ​ຂອງ​ທ່ານ ນາງ ປາ­ນີ ຢາ​ທໍ່​ຕູ້ ປະ­ທານ​ສະ­ພາ​ແຫ່ງ​ຊາດ.

   ກອງ​ປະ­ຊຸມ​ທ່ານ ນາງ ສວນ​ສະ­ຫວັນ ວິ​ຍະ​ເກດ ເລ­ຂາ­ທິ­ການ​ສະ­ພາ​ແຫ່ງ​ຊາດ ໄດ້​ຂຶ້ນ​ສະ­ເໜີ​ຮ່າງ​ມະ­ຕິ​ຂອງ​ສະ­ພາ​ແຫ່ງ​ຊາດ 3 ມະ­ຕິ ຄື: ຮ່າງ​ມະ­ຕິ​ກອງ​ປະ­ຊຸມ​ສະ­ພາ​ແຫ່ງ​ຊາດ ວ່າ​ດ້ວຍ​ການ​ຮັບ­ຮອງ​ເອົາ​ບົດ​ລາຍ​ງານ​ຂອງ​ລັດ­ຖະ­ບານ ກ່ຽວ​ກັບ​ການ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ການ​ແກ້​ໄຂ​ສະ­ພາບ​ຄວາມ​ຫຍຸ້ງ­ຍາກ​ທາງ​ດ້ານ​ເສດ­ຖະ­ກິດ​ມະ­ຫາ​ພາກ ແລະ ຜົນ​ກະ­ທົບ​ອຸ​ທົກ​ກະ​ໄພ ປີ 2019 ແລະ ທິດ​ທາງ​ແຜນ­ການ​ປີ 2020 ຮ່າງ​ມະ­ຕິ​ກອງ​ປະ­ຊຸມ​ສະ­ພາ​ແຫ່ງ​ຊາດ ວ່າ​ດ້ວຍ​ການ​ຮັບ­ຮອງ​ເອົາ​ບົດ​ລາຍ​ງານ​ຂອງ​ລັດ­ຖະ­ບານ ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ແຜນ​ງົບ­ປະ­ມານ​ແຫ່ງ​ລັດ ປີ 2019 ແລະ ທິດ​ທາງ​ແຜນ­ການ​ປີ 2020 ແລະ ຮ່າງ​ມະ­ຕິ​ກອງ​ປະ­ຊຸມ​ສະ­ພາ​ແຫ່ງ​ຊາດ ວ່າ​ດ້ວຍ​ການ​ຮັບ­ຮອງ​ເອົາ​ບົດ​ລາຍ​ງານ​ການ­ຈັດ­ຕັ້ງ​ປະ­ຕິ­ບັດ​ແຜນ­ການ­ເຄື່ອນ­ໄຫວ​ວຽກ​ງານ ປີ 2019 ແລະ ທິດ​ທາງ​ແຜນ­ການ ປີ 2020 ຜົນ​ການ​ກວດ​ສອບ​ບົດ​ສະ­ຫຼຸບ​ຂາດ​ຕົວ ການ­ຈັດ­ຕັ້ງ​ປະ­ຕິ­ບັດ​ແຜນ​ງົບ­ປະ­ມານ​ແຫ່ງ​ລັດ ປີ 2018 ຂອງ​ອົງ­ການ​ກວດ​ສອບ​ແຫ່ງ​ລັດ ການ​ກວດ­ກາ​ຕາມ​ຜົນ​ການ​ກວດ​ສອບ​ບົດ​ສະ­ຫຼຸບ​ຂາດ​ຕົວ ການ­ຈັດ­ຕັ້ງ​ປະ­ຕິ­ບັດ​ແຜນ​ງົບ­ປະ­ມານ​ແຫ່ງ​ລັດ ປີ 2017 ຂອງ​ອົງ​ກາກ​ກວດ­ກາ​ລັດ­ຖະ­ບານ ຈາກ​ນັ້ນ ປະ­ທານ​ສະ­ພາ​ແຫ່ງ​ຊາດ​ໄດ້​ມີ​ຄຳ​ເຫັນ​ເຈາະ​ຈິ້ມ ເພື່ອ​ໃຫ້ ສສຊ ໄດ້​ປະ­ກອບ​ຄຳ​ເຫັນ ເຊິ່ງ​ສ່ວນ​ໃຫຍ່​ເຫັນ​ດີ​ເປັນ​ເອ­ກະ​ພາບ​ກັບ​ເນື້ອ​ໃນ​ຂອງ​ຮ່າງ​ມະ­ຕິ ແຕ່​ກໍ​ຍັງ​ມີ​ບາງ​ຈຸດ​ທີ່​ຕ້ອງ​ໄດ້​ປັບ­ປຸງ ເພື່ອ​ເຮັດ​ໃຫ້​ມີ​ເນື້ອ​ໃນ​ຄົບ​ຖ້ວນ ກະ­ທັດ​ຮັດ ແລະ ສົມ­ບູນ ໃນ​ນີ້ ສສຊ ໄດ້​ສະ­ເໜີ​ໃຫ້​ເພີ່ມ​ທະ­ວີ ແລະ ມີ​ມາດ​ຕະ­ການ​ໃນ​ການ­ຈັດ­ຕັ້ງ​ປະ­ຕິ­ບັດ ບັນ­ດາ​ຄາດ­ໝາຍ​ທີ່​ບໍ່​ບັນ­ລຸ​ຕາມ​ແຜນ­ການ ຄວນ​ແກ້​ໄຂ​ການ​ຂາດ​ດຸນ​ການ​ຄ້າ ແລະ ການ​ຊຳ­ລະ​ສະ​ສາງ ເພື່ອ​ສຸມ​ໃສ່​ການ​ຜະ­ລິດ​ກະ­ສິ­ກຳ ແລະ ການ​ບໍ­ລິ­ການ​ໃຫ້​ເປັນ​ແຫຼ່ງ​ລາຍ​ຮັບ ພ້ອມ​ນັ້ນ ຕ້ອງ​ເພີ່ມ​ທະ­ວີ​ການ​ປະ­ຕິ­ບັດ​ເນື້ອ​ໃນ ມາດ​ຕະ­ການ​ທີ່​ໄດ້​ກຳ­ນົດ​ແລ້ວ​ໃຫ້​ເປັນ​ຮູບ​ປະ​ທຳ ບົນ​ພື້ນ­ຖານ​ຄວາມ​ຮັບ­ຜິດ­ຊອບ​ຂອງ​ຂະ­ແໜງ­ການ​ກ່ຽວ­ຂ້ອງ ສະ­ເໜີ​ໃຫ້​ກຳ­ມາ​ທິ​ການ​ກ່ຽວ­ຂ້ອງ ເບິ່ງ​ຄືນ​ຂະ­ແໜງ­ການ​ກະ­ສິ­ກຳ ແລະ ຂະ­ແໜງ­ການ​ບໍ­ລິ­ການ ແລະ ໃຫ້​ສູ້​ຊົນ​ຈັດ​ຕັ້ງ​ປະ­ຕິ­ບັດ​ກົດ­ໝາຍ​ວ່າ​ດ້ວຍ​ທຸ­ລະ​ກິດ​ຂະ­ໜາດ​ນ້ອຍ ແລະ ຂະ­ໜາດ​ກາງ ສ່ວນ​ການ​ລົງ­ທຶນ​ຂອງ​ພາກ​ເອ­ກະ​ຊົນ​ໃຫ້​ກຳ­ນົດ​ແຈ້ງ­ວ່າ ຄວນ​ໃຫ້​ລົງ­ທຶນ​ໃນ​ຂະ­ແໜງ­ການ​ໃດ ດ້ານ​ວັດ­ທະ­ນະ­ທຳ-ສັງ­ຄົມ​ໃຫ້​ສຸມ​ໃສ່​ບັນ­ດາ​ຄາດ­ໝາຍ​ທີ່​ບໍ່​ບັນ­ລຸ ປັບ­ປຸງ​ຄຸນ​ນະ​ພາບ​ຂອງ​ຄາດ­ໝາຍ​ທີ່​ບັນ­ລຸ​ແລ້ວ​ໃຫ້​ດີ​ຂຶ້ນ ແລະ ການ​ພັດ­ທະ­ນາ​ສີ­ມື​ແຮງ​ງານ​ຕ້ອງ​ໃຫ້​ມີ​ສ່ວນ​ຮ່ວມ​ຂອງ​ພາກ​ທຸ­ລະ​ກິດ ແລະ​ອື່ນໆ.

   ສຳ­ລັບ​ຕອນ​ບ່າຍ​ກອງ​ປະ­ຊຸມ ໄດ້​ດຳ­ເນີນ​ພາຍ​ໃຕ້​ເປັນ​ປະ­ທານ​ຂອງ​ທ່ານ ບຸນ​ປອນ ບຸດ​ຕະ​ນະ​ວົງ ຮອງ​ປະ­ທານ​ສະ­ພາ​ແຫ່ງ​ຊາດ ເຊິ່ງ​ທ່ານ ຊົມ​ພູ ດວງ​ສະ­ຫວັນ ປະ­ທານ​ກຳ­ມາ​ທິ​ການ​ວັດ­ທະ­ນະ­ທຳ-ສັງ­ຄົມ ສະ­ພາ​ແຫ່ງ​ຊາດ ຂຶ້ນ​ລາຍ​ງານ​ຜົນ​ການ​ຕິດ­ຕາມ​ກວດ­ກາ​ຂອງ​ຄະ­ນະ​ປະ­ຈຳ​ສະ­ພາ​ແຫ່ງ​ຊາດ ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ບັນ­ດາ​ກົດ­ໝາຍ ແລະ ນິ­ຕິ​ກຳ​ໃຕ້​ກົດ­ໝາຍ ທີ່​ຕິດ​ພັນ​ກັບ​ການ​ສ້າງ​ວິ­ຊາ​ຊີບ ການ​ພັດ­ທະ­ນາ​ສີ­ມື​ແຮງ​ງານ​ທີ່​ມີ​ຄຸນ​ນະ​ພາບ ແລະ ການ​ສ້າງ​ວຽກ​ເຮັດ​ງານ​ທຳ​ຂອງ​ປະ­ຊາ­ຊົນ ເຊິ່ງ​ໄດ້​ເອົາ­ໃຈ­ໃສ່​ສ້າງ​ນິ­ຕິ​ກຳ ແລະ ປັບ­ປຸງ​ກົດ­ໝາຍ​ໃຫ້​ແກ່​ການ​ຄຸ້ມ​ຄອງ​ລັດ ຄຸ້ມ​ຄອງ​ເສດ­ຖະ­ກິດ-ສັງ­ຄົມ ໂດຍ​ໄດ້​ປະ­ກາດ​ໃຊ້​ກົດ­ໝາຍ ທັງ​ໝົດ 145 ສະ­ບັບ ໃນ​ນັ້ນ ຂົງ­ເຂດ​ວັດ­ທະ­ນະ­ທຳ-ສັງ­ຄົມ 25 ສະ­ບັບ 137 ມາດ­ຕາ ທີ່​ກຳ­ນົດ​ໃຫ້​ອອກ​ລະ­ບຽບ​ນິ­ຕິ​ກຳ ເຊິ່ງ​ໄດ້​ອອກ​ນິ­ຕິ​ກຳ​ໄປ​ແລ້ວ 68 ມາດ­ຕາ ແລະ 69 ມາດ­ຕາ​ກຳ­ລັງ​ສືບ­ຕໍ່​ຜັນ​ຂະ­ຫຍາຍ ຈາກ​ນັ້ນ ປະ­ທານ​ກອງ​ປະ­ຊຸມ​ໄດ້​ມີ​ຄຳ​ຖາມ​ເຈາະ​ຈິ້ມ​ເພື່ອ​ໃຫ້ ສສຊ ໄດ້​ຜັດ­ປ່ຽນ​ກັນ​ປະ­ກອບ​ຄຳ​ເຫັນ​ໃສ່​ບົດ​ລາຍ​ງານ​ຢ່າງ​ກົງ​ໄປ​ກົງ​ມາ ເປັນ­ຕົ້ນ ໃຫ້​ເບິ່ງ​ຄືນ​ບົດ​ລາຍ​ງານ​ຂອງ​ຄະ­ນະ​ປະ­ຈຳ ໄດ້​ສ່ອງ​ແສງ​ສະ­ພາບ​ຄວາມ​ເປັນ​ຈິງ​ຖືກ­ຕ້ອງ​ແລ້ວ​ບໍ່ ຫຼື ມີ​ບັນ­ຫາ​ສະ­ພາບ​ໃດ​ໃຫ້​ໄດ້​ຮັບ​ການ​ແກ້​ໄຂ ພ້ອມ​ນັ້ນ ໃຫ້​ເບິ່ງ​ທັດ­ສະ­ນະ​ມາດ​ຕະ­ການ​ທີ່​ສະ­ພາ​ແຫ່ງ​ຊາດ​ສະ­ເໜີ​ຕໍ່​ລັດ­ຖະ­ບານ ແລະ ຍັງ​ມີ​ບັນ­ຫາ​ໃດ​ທີ່​ຢາກ​ເພີ່ມ​ເຕີມ​ກ່ຽວ​ກັບ​ການ​ແກ້​ໄຂ​ຕົວ​ຈິງ ພ້ອມ​ນັ້ນ ໃຫ້ ສສຊ ຍົກ​ສະ­ພາບ​ຄວາມ​ເປັນ​ຈິງ​ໃນ​ເຂດ​ເລືອກ​ຕັ້ງ ໂອ­ກາດ​ທີ່​ລົງ​ພົບ​ປະ​ກັບ​ປະ­ຊາ­ຊົນ ມີ​ບັນ­ຫາ​ໃດ​ທີ່​ປະ­ຊາ­ຊົນ​ສະ­ເໜີ​ເພື່ອ​ຢາກ​ໃຫ້​ມີ​ການ​ແກ້​ໄຂ ແລະ​ອື່ນໆ.

   ໂດຍ​ລວມ​ແລ້ວ ບັນ­ຫາ​ຕ່າງໆ​ທີ່​ສະ­ເໜີ​ຢູ່​ໃນ​ກອງ​ປະ­ຊຸມ​ບັນ­ດາ ສສຊ ໄດ້​ປະ­ກອບ​ຄຳ​ຄິດ​ຄຳ​ເຫັນ​ຢ່າງ​ກົງ​ໄປ​ກົງ​ມາ ເພື່ອ​ໃຫ້​ເນື້ອ​ຄົບ​ຖ້ວນ​ສົມ­ບູນ​ແບບ ແລະ ສຸດ​ທ້າຍ ກໍ​ໄດ້​ພ້ອມ​ກັນ​ລົງ​ຄະ­ແນນ​ສຽງ​ຮັບ­ຮອງ​ເອົາ​ດ້ວຍ​ຄະ­ແນນ​ສຽງ​ສ່ວນ​ຫຼາຍ.

ຂ່າວທີ່ກ່ຽວຂ້ອງ