ນາຍົກລັດຖະມົນຕີ ຕ້ອນຮັບ​ຄະນະ​ຜູ້​ແທນ​ຈີນ

714 20 ພ.ຈ. 2019 ຂ່າວໜ້າ​ໜຶ່ງ
ນາຍົກລັດຖະມົນຕີ ຕ້ອນຮັບ​ຄະນະ​ຜູ້​ແທນ​ຈີນ

    ວັນ​ທີ 19 ພະຈິກ 2019 ທີ່​ສຳນັກງານ​ນາຍົກລັດຖະມົນຕີ ທ່ານ ທອງ​ລຸນ ສີ​ສຸ​ລິດ ກຳມະການ​ກົມ​ການເມືອງ​ສູນ​ກາງ​ພັກ ນາຍົກລັດຖະມົນຕີ ໄດ້​ຕ້ອນຮັບ​ການ​ເຂົ້າ​ຢ້ຽມ​ຄຳນັບ​ຂອງ​ທ່ານ ຫວາງ ຢາງ ກຳ​ມະ ການ​ປະຈຳ​ກົມ​ການເມືອງ​ສູນ​ກາງ​ພັກ​ກອມ​ມູ​ນິດ​ຈີນ ປະທານ​ສະພາ​ທີ່​ປຶກສາ​ການເມືອງ​ທົ່ວ​ປະເທດ​ຈີນ ພ້ອມ​ຄະນະ ໃນ​ໂອກາດ​ທີ່​ເດີນທາງ​ມາ​ຢ້ຽມຢາມ​ລາວ ແລະ ເຮັດ​ວຽກ​ກັບ​ສູນ​ກາງ​ແນວ​ລາວ​ສ້າງ​ຊາດ ວັນ​ທີ 16-19 ພະຈິກ​ນີ້.

    ໂອກາດ​ນີ້ ທ່ານ ທອງ​ລຸນ ສີ​ສຸ​ລິດ ໄດ້​ສະແດງ​ຄວາມ​ຕ້ອນຮັບ ແລະ ຕີ​ລາຄາ​ສູງ​ຕໍ່​ການ​ເດີນທາງ​ມາ​ຢ້ຽມຢາມ ແລະ ເຮັດ​ວຽກ​ຢູ່​ລາວ​ຂອງ​ຄະນະ​ຜູ້​ແທນ​ສະພາ​ທີ່​ປຶກສາ​ການເມືອງ​ທົ່ວ​ປະເທດ​ຈີນ​ຄັ້ງ​ນີ້ ຈະ​ເປັນ​ການ​ປະກອບສ່ວນ​ອັນ​ສຳຄັນ ເຂົ້າ​ໃນ​ການ​ເພີ່ມ​ທະວີ​ການ​ພົວພັນ​ຮ່ວມ​ມື​ທີ່​ມີ​ຍາວ​ນານ​ມາ​ແລ້ວ​ນັ້ນ ລະຫວ່າງ​ສອງ​ພັກ ສອງ​ລັດ ແລະ ປະຊາຊົນ​ສອງ​ຊາດ ລາວ-ຈີນ ໃຫ້​ນັບ​ມື້​ແຕກ​ດອກ​ອອກ​ຜົນ​ຍິ່ງ​ຂຶ້ນ ພ້ອມ​ນີ້ ທ່ານ​ຍັງ​ໄດ້​ແຈ້ງ​ສະພາບ​ການ​ພັດທະນາ​ເສດຖະກິດ-ສັງຄົມ​ຂອງ​ລາວ ກໍ​ຄື ການຈັດຕັ້ງ​ປະຕິບັດ​ການ​ຮ່ວມ​ມື​ສອງ​ຝ່າຍ​ລາວ-ຈີນ ໃນ​ໄລຍະ​ຜ່ານ​ມາ ກໍ​ຄື ໃນ​ປັດຈຸບັນ ແລະ ແຜນການ​ໃນຕໍ່ໜ້າ ພິເສດ ກໍ​ແມ່ນ​ໂຄງການ​ຮ່ວມ​ມື​ສ້າງ​ທາງ​ລົດໄຟ ລາວ-ຈີນ ທີ່​ພວມ​ຈັດ​ຕັ້ງ​ປະຕິບັດ​ຢ່າງ​ຂຸ້ນຂ້ຽວ ເພື່ອ​ໃຫ້​ສຳເລັດ​ຕາມ​ແຜນການ​ທີ່​ສອງ​ລັດຖະບານ​ວາງ​ໄວ້ ນອກ​ນີ້ ທ່ານ​ນາຍົກລັດຖະມົນຕີ​ຍັງ​ໄດ້​ຊຸກຍູ້​ໃຫ້​ສູນ​ກາງ​ແນວ​ລາວ​ສ້າງ​ຊາດ ແລະ ສະພາ​ທີ່​ປຶກສາ​ການເມືອງ​ທົ່ວ​ປະເທດ​ຈີນ ສືບຕໍ່​ເພີ່ມ​ທະວີ​ການ​ພົວພັນ​ຮ່ວມ​ມື​ໃຫ້​ນັບ​ມື້​ກວ້າງຂວາງ ເພື່ອ​ນຳ​ເອົາ​ຜົນ​ປະໂຫຍດ​ມາສູ່ ສອງ​ພັກ-ສອງ​ລັດ ແລະ ປະຊາຊົນ​ສອງ​ຊາດ ລາວ-ຈີນ.

    ຕອນ​ທ້າຍ​ທ່ານ ຫວາງ ຢາງ ໄດ້​ສະແດງ​ຄວາມ​ຂອບໃຈ​ມາ​ຍັງ​ທ່ານ​ນາຍົກລັດຖະມົນຕີ ທີ່​ໃຫ້ການ​ຕ້ອນຮັບ​ຢ່າງ​ອົບ​ອຸ່ນ​ຄັ້ງ​ນີ້  ພ້ອມ​ທັງ​ແຈ້ງ​ໃຫ້​ຊາບ​ຜົນສຳເລັດ​ການ​ພົບ​ປະ​ສອງ​ຝ່າຍ ກັບ​ສູນ​ກາງ​ແນວ​ລາວ​ສ້າງ​ຊາດ ທີ່​ສອງ​ຝ່າຍ​ໄດ້​ຕີ​ລາ​ຄືນ​ຜົນສຳເລັດ​ການ​ພົວພັນ​ຮ່ວມ​ມື​ໃນ​ໄລຍະ​ຜ່ານ​ມາ ແລະ ປຶກສາ​ຫາລື​ການ​ຮ່ວມ​ມື​ສອງ​ຝ່າຍ​ໃນຕໍ່ໜ້າ ເປັນຕົ້ນ ກໍ​ແມ່ນ​ວຽກ​ງານ​ແນວ​ໂຮມ​ທີ່​ສອງ​ຝ່າຍ​ໃຫ້​ຄວາມ​ສົນໃຈ​ໃນ​ການ​ຈັດ​ກອງ​ປະຊຸມ. 

ຂ່າວທີ່ກ່ຽວຂ້ອງ