ຫາລື​ການ​ພັດທະນາ ການທ່ອງທ່ຽວ ລາວ-ຈີນ

814 20 ພ.ຈ. 2019 ຂ່າວໜ້າ​ໜຶ່ງ
ຫາລື​ການ​ພັດທະນາ ການທ່ອງທ່ຽວ ລາວ-ຈີນ

    ກອງ​ປະຊຸມ​ປຶກສາ​ຫາລື​ກ່ຽວ​ກັບ​ການ​ຄົ້ນຄວ້າ ພັດທະນາ​ການທ່ອງທ່ຽວ ລາວ-ຈີນ (ຢຸນ​ນານ) ປະຈຳ​ປີ 2019 ຈັດ​ຂຶ້ນ​ວັນ​ທີ 16 ພະຈິກ 2019 ທີ່​ສູນ​ວາງສະແດງ​ຕ່ຽນ​ສີ ເມືອງ​ຄຸນ​ໝິງ ແຂວງ​ຢຸນ​ນານ ​ສປ ຈີນ ມີ​ທ່ານ​ນາງ ອຳໄພ​ວັນ ຄຳ​ແສງ​ສີ​ວິ​ໄວ ຮອງ​ປະທານ​ສະ​ຖາ​ບັນ​ວິທະຍາສາດ​ສັງຄົມ​ແຫ່ງ​ຊາດ​ລາວ ທ່ານ​ນາງ shi lin ຮອງ​ຫົວໜ້າ​ພະ​ແນກ​ວັດທະນະທຳ ແລະ ທ່ອງ​ທ່ຽວ ແຂວງ​ຢຸນ​ນານ ພ້ອມ​ດ້ວຍ​ຂະແໜງການ​ກ່ຽວຂ້ອງ​ເຂົ້າ​ຮ່ວມ.

    ທ່ານ​ນາງ shi lin ກ່າວ​ວ່າ: ເພື່ອ​ຜັນ​ຂະຫຍາຍ ແລະ ຈັດ​ຕັ້ງ​ປະຕິບັດ​ກອງ​ປະຊຸມ​ວຽກ​ງານ​ການທ່ອງທ່ຽວ​ຂອງ​ທົ່ວ​ແຂວງ ແລະ ຊຸກຍູ້​ການ​ພັດທະນາ ການ​ຮ່ວມ​ມື​ດ້ານ​ການທ່ອງທ່ຽວ ລະຫວ່າງ​ແຂວງ ຢຸນ​ນານ ແລະ ພາກ​ພື້ນ​ແມ່ນ້ຳ​ລ້ານ​ຊ້າງ-ແມ່ນ້ຳ​ຂອງ​ຢ່າງຮອບດ້ານ​ໃຫ້​ປາກົດ​ຜົນ​ເປັນ​ຈິງ ໂຄງການ​ດັ່ງກ່າວ​ແມ່ນ​ໜຶ່ງ​ໃນ​ກິດຈະກຳ​ປີ​ທ່ອງ​ທ່ຽວ ລາວ-ຈີນ ທີ່​ສອງ​ປະເທດ ລາວ-ຈີນ ໃຫ້​ມີ​ການ​ຊຸກຍູ້​ໂດຍ​ຜ່ານ​ໂຄງການ​ສັບປະດາ​ຮູບເງົາ​ປີ​ທ່ອງ​ທ່ຽວ ລາວ-ຈີນ (ຢຸນ​ນານ)  ທົບ​ທວນ​ຜົນ​ການ​ດຳເນີນ​ວຽກ​ງານ​ຢ່າງຮອບດ້ານ​ຂອງ​ປີ​ທ່ອງ​ທ່ຽວ ລາວ-ຈີນ ໃນ​ໄລຍະ​ຜ່ານ​ມາ ສະແດງ​ໃຫ້​ເຫັນ​ຜົນ​ໄດ້​ຮັບ​ໃນ​ແຕ່​ລະ​ຂົງເຂດ​ຂອງ​ການ​ຮ່ວມ​ມື​ດ້ານ​ການທ່ອງທ່ຽວ ລະຫວ່າງ ລາວ-ຢຸນ​ນານ ໃນ​ຫຼາຍໆ​ດ້ານ ເຮັດ​ໃຫ້​ຫຼາຍ​ຄົນ​ໄດ້​ຮູ້ສຶກ​ເຖິງ​ສະເໜ​ຄວາມ​ໃກ້ຊິດ​ກັນ ເພີ່ມ​ທະວີ​ມິດຕະພາບ​ຂອງ​ສອງ​ຊາດ ຍົກ​ສູງ​ການ​ຮັບ​ຮູ້​ຂອງ​ປວງ​ຊົນ​ຕໍ່​ການ​ຮ່ວມ​ມື​ແມ່ນ້ຳ​ລ້ານ​ຊ້າງ-ແມ່ນ້ຳ​ຂອງ ກະ​ຕຸ້ນ​ໃຫ້​ວິ​ສາ​ຫະ​ກິດ​ຈຳນວນ​ຫຼາຍ​ເຂົ້າ​ຮ່ວມ ໃນ​ການ​ຮ່ວມ​ມື​ແມ່ນ້ຳ​ລ້ານ​ຊ້າງ-ແມ່ນ້ຳ​ຂອງ ແລະ ປະຕິບັດ​ຄວາມ​ຮັບຜິດຊອບ​ຕໍ່​ສັງຄົມ.

    ໂຄງການ​ທີ່​ຊຸກຍູ້​ການ​ຮ່ວມ​ມື​ການທ່ອງທ່ຽວ ລາວ-ຢຸນ​ນານ ບໍລິສັດ ບລູ​ເບີ​ຣີ​ລາວ ອອກ​ແບບ ແລະ ວາງ​ແຜນ ຈຳກັດ ຮ່ວມ​ກັບ ບໍລິສັດ ເຄີ​ຈ້ຽນ​ຄຸນ​ໝິງ ເຜີຍແຜ່​ວັດທະນະທຳ ຈຳກັດ ສ້າງ​ໂຄງການ​ສັບປະດາ​ຮູບເງົາ​ປີ​ທ່ອງ​ທ່ຽວ ລາວ-ຈີນ ພາຍຫຼັງ​ແນະນຳ​ໂຄງການ​ແລ້ວ ທັງ​ສອງ​ຝ່າຍ​ກໍ​ໄດ້​ເຊັນ​ສັນຍາ​ໂຄງການ ໂດຍ​ເປັນ​ສັກຂີ​ພິຍານ​ຂອງ​ທ່ານ​ນາງ  shi lin ທ່ານ ບຸນ​ມາ ເພັກ​ສາ​ວົງ ຫົວໜ້າ​ກົມ​ຄຸ້ມ​ຄອງ​ການທ່ອງທ່ຽວ ກະຊວງ​ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ ​ສປປ ລາວ ທ່ານ ວິນ ລຽມ ສຸວັນ​ນາມ ຮອງ​ຜູ້ອຳນວຍການ​ໂທລະພາບ​ແຫ່ງ​ຊາດ​ລາວ ໂຄງການ​ສັບປະດາ​ຮູບເງົາ​ປີ​ທ່ອງ​ທ່ຽວ ລາວ-ຈີນ ຈະ​ປະ​ກອບ​​ສ່່ວນ​ເຂົ້າ​ໃນ​ການ​ຍົກ​ສູງ​ອິດ​ທິ​ພົນ​ການທ່ອງທ່ຽວ​ຂອງ​ລາວ ສ້າງ​ໂອກາດ​ໃຫ້​ໂຄງການ​ຕ່າງໆ​ທີ່​ພັດທະນາ​ການທ່ອງທ່ຽວ​ລາວ ພາຍ​ໃຕ້​ຄວາມ​ພະຍາຍາມ​ທັງ​ສອງ​ປະເທດ​ຈະ​ສະມາດ​ເຜີຍແຜ່ ແລະ ໂຄສະນາ​ປະເທດ​ໃຫ້​ທົ່ວ​ໂລກ​ຮັບ​ຮູ້.

ຂ່າວທີ່ກ່ຽວຂ້ອງ