ຍາດ​ເວລາ​ວ່າງ​ມາ​ປູກ​ພືດ-ຜັກ​ປອດ​ສານພິດ ບໍລິໂພກ​ໃນ​ຄອບຄົວ

1.042 20 ພ.ຈ. 2019 ຂ່າວໜ້າ​ໜຶ່ງ
ຍາດ​ເວລາ​ວ່າງ​ມາ​ປູກ​ພືດ-ຜັກ​ປອດ​ສານພິດ ບໍລິໂພກ​ໃນ​ຄອບຄົວ

    ທ່ານ​ນາງ ສຸ​ໄພ​ວັນ ທ່ຽງ​ຈັນ​ໄຊ ນັກທຸລະກິດ​ຍິງ​ທີ່​ພຽບ​ພ້ອມ​ດ້ວຍ​ຄວາມ​ສາມາດ ແລະ ປະສົບ​ຜົນສຳເລັດ ໃນ​ການ​ດຳເນີນ​ທຸລະ​ກິດ​ອັນ​ດັບ​ແຖວ​ໜ້າ​ຂອງ ​ສປປ ລາວ ໄດ້​ຍາດ​ເວລາ​ວ່າງ​ຈາກ​ການ​ເຮັດ​ວຽກ ສຸມ​ໃສ່​ການ​ຜະລິດ​ກະສິກຳ​ແບບ​ພໍ​ພຽງ (ກະສິກຳ​ປອດ​ສານພິດ) ຢູ່​ສວນ​ບ້ານ​ໜອງ​ໄຮ ເມືອງ​ຫາດ​ຊາຍ​ຟອງ ນະຄອນ​ຫຼວງ​ວຽງ​ຈັນ ເພື່ອ​ບໍລິໂພກ​ເອງ ແນໃສ່​ເຮັດ​ໃຫ້​ທຸກ​ຄົນ​ໃນ​ຄອບຄົວ​ມີ​ສຸຂະພາບ​ແຂງແຮງ ພ້ອມ​ທັງ​ມີ​ສ່ວນ​ເຫຼືອ​ແຈກ​ຢາຍ​ໃຫ້​ຍາດຕິ​ພີ່ນ້ອງ ແລະ ໝູ່​ເພື່ອນ.

    ທ່ານ​ນາງ ສຸ​ໄພ​ວັນ ທ່ຽງ​ຈັນ​ໄຊ ຮອງ​ຜູ້ອຳນວຍການ ບໍລິສັດ ບົວລະພາ ກະສິກຳ-ປ່າໄມ້ ຈຳກັດ ຄອບຄົວ​ຕົວ​ແບບ​ດ້ານ​ການ​ຜະລິດ​ກະສິກຳ ໃຫ້​ສຳພາດ​ວັນ​ທີ 16 ພະຈິກ 2019 ວ່າ: ສວນ​ແຫ່ງ​ນີ້ ໄດ້​ເຮັດ​ແບບ​ເສດຖະກິດ​ຄອບຄົວ ໂດຍ​ນຳພາ​ລູກ-ຫຼານ​ລົງມື​ເຮັດ​ເອງ ເພື່ອ​ປູກ-ລ້ຽງ ກິນ​ເອງ ໃນ​ນີ້ ປະກອບ​ມີ: ນາ 1 ໄລ່​ກວ່າ ປູກ​ເຂົ້າ 3 ຄັ້ງ​ຕໍ່​ປີ ປູກ​ຕົ້ນ​ພ້າວ ຕົ້ນ​ໄຜ່ ດອກ​ບົວ ລ້ຽງ​ປາ ປູກ​ໝາກ​ມັງກອນ ໝາກມ່ວງ ອາ​ໂວ​ກາ​ໂດ ໝາກກ້ວຍ ພືດ-ຜັກ ໄມ້​ໃຫ້​ໝາກ ຕາມ​ລະດູ​ການ​ແບບ​ຄົບ​ຊຸດ ໂດຍ​ນຳ​ໃຊ້​ຝຸ່ນ​ທຳ​ມະ​ຊາດ ປາ​ສະ ຈາກ​ສານ​ເຄ​ມີ​ຕ່າງໆ ເຊິ່ງ​ເປັນຄວາມ​ສຸກ​ຂອງ​ຄອບຄົວ ເນື່ອງ​ຈາກ​ສາມີ​ໄດ້​ເຮັດ​ວຽກ​ນຳ​ລັດ ຕົນ​ເອງ​ກໍ​ເຮັດ​ວຽກ​ນຳ​ພາກ​ເອກະ​ຊົນ ຕື່ນ​ຂຶ້ນ​ມາ​ກໍ​ໄດ້​ໄປ​ປະຕິບັດ​ໜ້າທີ່ ຕ້ອງ​ໄດ້​ອາ​ໃສ​ໂມງ​ເລີກ​ວຽກ ແລະ ວັນ​ເສົາ-ອາທິດ ເພື່ອ​ມາ​ໂຮມ​ຕົວ​ກັນ​ເຮັດ​ການ​ຜະລິດ ຂະຫຍາຍ​ພັນ​ພືດ​ຕ່າງໆ ດ້ວຍ​ວິທີ​ການ​ຊຳ​ກິ່ງ​ງ່າ ເພື່ອ​ເປັນ​ການ​ປູກ​ຈິດ​ສຳນຶກ​ໃຫ້​ລູກ -ຫຼານ ຮັກ​ການ​ໃຊ້​ຊີວິດ​ແບບ​ພໍ​ພຽງ ເຊິ່ງ​ນອກຈາກ​ຈະ​ເຮັດ​ໃຫ້​ຕົນ​ເອງ ແລະ ຄອບຄົວ​ມີ​ສຸ​ຂະ ພາບ​ແຂງແຮງ​ແລ້ວ ຍັງ​ເປັນ​ການ​ປະຢັດ​ຄ່າ​ໃຊ້​ຈ່າຍ​ພາຍ​ໃນ​ຄອບຄົວ​ຕື່ມ​ອີກ.

    ຖ້າວ່າ​ຄອບຄົວ​ອື່ນ​ຢາກ​ປະຕິບັດ​ຄື​ກັບ​ຄອບຄົວ​ຂ້າພະເຈົ້າ ກໍ​ໃຫ້​ເລີ່ມ​ລົງມື​ເຮັດ​ເລີຍ ເພາະວ່າ​ການ​ປູກ​ຕົ້ນ ໄມ້ ພືດ-ຜັກ​ກິນ​ເອງ ມັນ​ບໍ່​ໄດ້​ເຫຼືອ​ບ່າ​ກວ່າ​ແຮງ ພຽງ​ແຕ່​ເຮົາ​ແບ່ງ​ເວລາ​ວ່າງ​ຄ່ອຍ​ປູກ ຄ່ອຍ​ລ້ຽງ​ໄປ​ເທື່ອ​ລະ​ໜ້ອຍ ປັດຈຸບັນ ສື່​ສັງຄົມ​ອອນ​ລາຍ​ໄດ້​ລົງ​ຂໍ້​ມູນ​ຕ່າງໆ​ກ່ຽວ​ກັບ​ການ​ປູກ-ການ​ລ້ຽງ ນອກ​ນີ້ ພວກ​ເຮົາ​ຍັງ​ສາ ມາດ​ອ່ານ​ເອົາ​ຄວາມ​ຮູ້​ໃນ​ປຶ້ມ​ຄູ່​ມື​ຕ່າງໆ ບວກ​ກັບ​ປະສົບ​ການ ຈາກ​ການ​ຖອດ​ຖອນ​ບົດຮຽນ​ນຳ​ພໍ່-ແມ່ ທີ່​ເຄີຍ​ປະຕິບັດ​ມາ ມາ​ປັບ​ໃຊ້​ໃຫ້​ເກີດ​ປະໂຫຍດ ສຳລັບ​ຜົນ​ຜະລິດ​ທັງ​ໝົດ​ແມ່ນ​ບໍ່​ໄດ້​ຂາຍ ຈະ​ບໍລິໂພກ​ພາຍ​ໃນ​ຄອບ ຄົວ ແລະ ເປັນ​ຂອງຕ້ອນ​ຍາດຕິ​ພີ່ນ້ອງ ແລະ ໝູ່​ເພື່ອນ ທີ່​ມາ​ຢ້ຽມຢາມ​ໄດ້​ກິນ​ນຳ​ກັນ ເຊິ່ງ​ຖື​ວ່າ​ເປັນຄວາມ​ສຸກ​ອີກ​ຢ່າງ​ໜຶ່ງ​ໃນ​ການ​ນຳ​ໃຊ້​ເວລາ​ວ່າງ​ໃຫ້​ເປັນ​ປະໂຫຍດ​ແກ່​ຄອບຄົວ ແລະ ສັງຄົມ. 

ຂ່າວທີ່ກ່ຽວຂ້ອງ