ມອບເສື້ອກັນໜາວ-ເສື້ອຂາວ ໃຫ້ນັກຮຽນບ້ານໂນນແສງຈັນ

961 21 ພ.ຈ. 2019 ຂ່າວໜ້າ​ໜຶ່ງ
ມອບເສື້ອກັນໜາວ-ເສື້ອຂາວ ໃຫ້ນັກຮຽນບ້ານໂນນແສງຈັນ

    ທ່ານ ສີ​ສະ­ຫຼຽວ ສະ­ແຫວງ​ສຶກ​ສາ ປະ­ທານ​ກິດ​ຕິ​ມະ​ສັກ ໂຮງ­ງານ​ຜະ­ລິດ​ລິບ​ລາວ ຈຳ­ກັດ ແລະ ທ່ານ ພູ​ວົງ ສີ​ຫາ​ປັນ­ຍາ ຜູ້​ຈັດ­ການ​ໂຮງ­ງານ​ຜະ­ລິດ​ລິບ​ລາວ ຈຳ­ກັດ ນຳ​ເສື້ອ​ກັນ​ໜາວ 80 ໂຕ ແລະ ເສື້ອ​ຂາວ 2 ໂຕ ມູນ​ຄ່າ 3 ລ້ານ​ກວ່າ​ກີບ ມອບ​ໃຫ້​ນັກ­ຮຽນ​ໂຮງ­ຮຽນ​ປະ­ຖົມ​ສົມ­ບູນ ບ້ານ​ໂນນ​ແສງ​ຈັນ ເມືອງ​ໄຊ​ທາ­ນີ ນະ ຄອນ​ຫຼວງ​ວຽງ​ຈັນ ວັນ​ທີ 19 ພະ­ຈິກ 2019 ຢູ່​ໂຮງ­ຮຽນ​ດັ່ງ­ກ່າວ ເຊິ່ງ​ຮັບ​ໂດຍ​ທ່ານ​ນາງ ສາຍ­ທອງ ໄຂ​ແສງ ຜູ້­ອຳ­ນວຍ­ການ​ໂຮງ­ຮຽນ​ປະ­ຖົມ​ສົມ­ບູນ ບ້ານ​ໂນນ​ແສງ​ຈັນ ໂດຍ​ມີ​ທ່ານ ສອນ​ແພງ ພຸດ​ທິ​ຫົງ ນາຍ­ບ້ານ​ໂນນ​ແສງ​ຈັນ ແລະ ອົງ​ການ­ຈັດ­ຕັ້ງ​ບ້ານ​ທຸກ​ພາກ­ສ່ວນ ເຂົ້າ​ຮ່ວມ.

    ທ່ານ ສີ​ສະ­ຫຼຽວ ສະ­ແຫວງ​ສຶກ​ສາ ກ່າວ​ວ່າ: ໂຮງ­ງານ​ຜະ­ລິດ​ລິບ​ລາວ ຈຳ­ກັດ ສ້າງ­ຕັ້ງ​ວັນ​ທີ 9 ມິ­ຖຸ­ນາ 2019 ຢູ່​ບ້ານ​ໂນນ​ແສງ​ຈັນ ທຳ​ການ​ຜະ­ລິດ​ມາ​ໄດ້​ບໍ່​ດົນ ແລະ ບໍ່​ທັນ​ມີ​ກຳ­ໄລ ແຕ່​ຍ້ອນ​ຄວາມ​ເປັນ​ຫ່ວງ​ເປັນ​ໄຍ ແລະ ລະ­ດູ​ໜາວ​ກໍ​ມາ​ຮອດ​ແລ້ວ ຈຶ່ງ​ໄດ້​ຕົກ­ລົງ​ຊື້​ເສື້ອ​ກັນ​ໜາວ ແລະ ເສື້ອ​ຂາວ​ຈຳ­ນວນ​ດັ່ງ­ກ່າວ ມາ​ມອບ​ໃຫ້​ນັກ­ຮຽນ​ໂຮງ­ຮຽນ​ນີ້ ເພື່ອ​ຕອບ​ບຸນ​ແທນ​ຄຸນ​ອຳ­ນາດ​ການ​ປົກ­ຄອງ​ບ້ານ​ທີ່​ໂຮງ­ງານ​ຕັ້ງ​ຢູ່ ທັງ​ເປັນ​ການ​ຊຸກ­ຍູ້​ດ້ານ​ການ​ສຶກ​ສາ ແລະ ສ້າງ​ໂອ­ກາດ​ໃຫ້​ເຂົາ­ເຈົ້າ​ຕັ້ງ­ໃຈ​ຮ່ຳ­ຮຽນ ກາຍ­ເປັນ​ຄົນ​ດີ​ຂອງ​ຊາດ​ໃນ​ອະ­ນາ­ຄົດ ນອກ​ນີ້​ພວກ​ເຮົາ​ຍັງ​ມີ​ແຜນ​ຈະ​ຊ່ວຍ​ຕິດ​ເພ­ດານ ສ້ອມ­ແປງ​ຫ້ອງ­ການ ຫ້ອງ​ອາ­ຫານ​ຂອງ​ຄູ ໂຕະ-ຕັ່ງ ແລະ ອື່ນໆ​ເທົ່າ​ທີ່​ຈະ​ຊ່ວຍ​ໄດ້.

    ທ່ານ​ນາງ ສາຍ­ທອງ ໄຂ​ແສງ ກ່າວ​ວ່າ: ປັດ­ຈຸ­ບັນ​ໂຮງ­ຮຽນ​ປະ­ຖົມ​ສົມ­ບູນ ບ້ານ​ໂນນ​ແສງ​ຈັນ ມີ​ນັກ­ຮຽນ 80 ຄົນ ຍິງ 37 ຄົນ ໃນ​ນີ້ ມີ​ນັກ­ຮຽນ​ທີ່​ທຸກ​ຍາກ 2 ຄົນ ສະ­ພາບ ການ​ຮຽນ-ການ​ສອນ ຍັງ​ມີ​ຄວາມ​ຫຍຸ້ງ­ຍາກ​ສົມ­ຄວນ ເປັນ­ຕົ້ນ ໂຕະ-ຕັ່ງ​ບໍ່​ພຽງ­ພໍ ຂາດ​ເພ­ດານ ພັດ​ລົມ ນອກ​ນີ້ ຍັງ​ຂາດ​ປຶ້ມ​ແບບ­ຮຽນ ໂດຍ​ສະ­ເພາະ ປຶ້ມ​ແບບ­ຮຽນ​ພາ­ສາ​ລາວ ແລະ ຄະ­ນິດ­ສາດ.

ຂ່າວທີ່ກ່ຽວຂ້ອງ