ປະເທດຄູ່ຮ່ວມເຈລະຈາມີຂໍ້ລິເລີ່ມ ຮ່ວມມືຕິດພັນວຽກງານສະຫວັດດີການສັງຄົມ

1.020 21 ພ.ຈ. 2019 ຂ່າວໜ້າ​ໜຶ່ງ
ປະເທດຄູ່ຮ່ວມເຈລະຈາມີຂໍ້ລິເລີ່ມ ຮ່ວມມືຕິດພັນວຽກງານສະຫວັດດີການສັງຄົມ

   ວັນ​ທີ 20 ພະ­ຈິກ 2019 ທີ່​ໂຮງ­ແຮມ​ດອນ​ຈັນ​ພາ​ເລດ ນະ­ຄອນ­ຫຼວງ​ວຽງ​ຈັນ ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ໃນ​ນາມ​ຮັບ­ຜິດ­ຊອບ​ວຽກ​ງານ​ສະ­ຫວັດ­ດີ​ການ​ສັງ­ຄົມ ແລະ ການ​ພັດ­ທະ­ນາ​ອາ​ຊຽນ ໄດ້​ເປັນ​ເຈົ້າ­ພາບ​ຈັດ​ກອງ​ປະ­ຊຸມ​ເຈົ້າ​ໜ້າ­ທີ່​ອາ­ວຸ­ໂສ​ອາ​ຊຽນ​ບວກ​ສາມ ຄັ້ງ​ທີ 14 ເພື່ອ​ກະ­ກຽມ​ໃຫ້​ແກ່​ກອງ​ປະ­ຊຸມ​ລັດ­ຖະ­ມົນ­ຕີ​ສະ­ຫວັດ­ດີ​ການ​ສັງ­ຄົມ ແລະ ການ​ພັດ­ທະ­ນາ​ອາ​ຊຽນ​ບວກ​ສາມ (ຈີນ ຍີ່­ປຸ່ນ ແລະ ສ ເກົາ­ຫຼີ) ຄັ້ງ​ທີ 6 ເປັນ​ປະ­ທານ​ຂອງ​ທ່ານ ທິບ​ພະ​ສອນ ສຸ​ຂະ​ທຳ​ມະ​ວົງ ຮອງ​ຫົວ­ໜ້າ​ກົມ​ແຜນ­ການ ແລະ ການ​ຮ່ວມ​ມື​ສາ­ກົນ ຫົວ­ໜ້າ​ເຈົ້າ​ໜ້າ­ທີ່​ອາ­ວຸ­ໂສ​ສະ­ຫວັດ­ດີ​ການ​ສັງ­ຄົມ ແລະ ການ​ພັດ­ທະ­ນາ​ອາ​ຊຽນ ແຫ່ງ ສປປ ລາວ ມີ​ບັນ­ດາ​ຫົວ­ໜ້າ​ເຈົ້າ​ໜ້າ­ທີ່​ອາ­ວຸ­ໂສ​ຈາກ​ປະ­ເທດ​ສະ­ມາ­ຊິກ​ອາ​ຊຽນ ຜູ້­ຕາງ­ໜ້າ​ກອງ​ເລ­ຂາ​ອາ​ຊຽນ  ແລະ ຫົວ­ໜ້າ​ເຈົ້າ​ໜ້າ­ທີ່​ອາ­ວຸ­ໂສ​ສະ­ຫວັດ­ດີ​ການ​ສັງ­ຄົມ ແລະ ການ​ພັດ­ທະ­ນາ​ອາ​ຊຽນ ບວກ​ສາມ (ຈີນ ຍີ່­ປຸ່ນ ແລະ ສ ເກົາ­ຫຼີ) ເຂົ້າ​ຮ່ວມ.

   ເພື່ອ​ປືກ​ສາ​ຫາ­ລື​ບັນ­ຫາ​ທີ່​ຕິດ​ພັນ​ກັບ​ການ​ຮ່ວມ​ມື ເພື່ອ​ຈັດ​ຕັ້ງ​ປະ­ຕິ­ບັດ​ບັນ­ດາ​ກິດ­ຈະ­ກຳ​ຕ່າງໆ​ກ່ຽວ​ກັບ​ວຽກ​ສະ­ຫວັດ­ດີ​ການ​ສັງ­ຄົມ ແລະ ການ​ພັດ­ທະ­ນາ​ອາ​ຊຽນ ໂດຍ​ສະ­ເພາະ ການ​ສ້າງ​ຄວາມ​ເຂັ້ມ­ແຂງ​ວຽກ​ງານ​ປົກ​ປ້ອງ​ສັງ­ຄົມ​ສຳ­ລັບ​ເດັກ​ດ້ອຍ​ໂອ­ກາດ ພ້ອມ​ດຽວ​ກັນ​ນີ້ ຄະ­ນະ​ຜູ້​ແທນ​ເຂົ້າ​ຮ່ວມ​ກອງ​ປະ­ຊຸມ ຍັງ​ໄດ້​ແລກ­ປ່ຽນ​ບົດ­ຮຽນ​ກ່ຽວ​ກັບ​ຜົນ­ສຳ­ເລັດ ໃນ​ການ­ຈັດ­ຕັ້ງ​ປະ­ຕິ­ບັດ​ກິດ­ຈະ­ກຳ​ທີ່​ເປັນ​ແບບ­ຢ່າງ ການ​ສ້າງ​ຄວາມ​ອາດ​ສາ­ມາດ​ບົດ­ຮຽນ​ທີ່​ຖອດ​ຖອນ​ໄດ້ ແລະ ການ​ສະ­ໜັບ­ສະ­ໜູນ​ດ້ານ​ງົບ­ປະ­ມານ​ພາຍ​ໃຕ້​ຂອບ​ການ​ຮ່ວມ​ມື​ອາ​ຊຽນ​ບວກ​ສາມ.

   ນອກ­ຈາກ​ນີ້ ປະ­ເທດ​ຄູ່​ຮ່ວມ​ເຈລະ­ຈາ​ອາ​ຊຽນ​ບວກ​ສາມ ຍັງ​ມີ​ຂໍ້​ລິ​ເລີ່ມ​ການ​ຮ່ວມ​ມື​ວຽກ​ງານ​ໃນ​ດ້ານ​ຕ່າງໆ ທີ່​ຕິດ​ພັນ​ກັບ​ສະ­ຫວັດ­ດີ​ການ​ສັງ­ຄົມ ແລະ ການ​ພັດ­ທະ­ນາ​ອາ​ຊຽນ ພ້ອມ​ທັງ​ແລກ­ປ່ຽນ​ຄຳ​ຄິດ​ຄຳ​ເຫັນ ກ່ຽວ​ກັບ​ຄວາມ​ຄືບ​ໜ້າ​ຂອງ​ການ​ຮ່ວມ​ມື​ດ້ານ​ສະ­ຫວັດ­ດີ​ການ​ສັງ­ຄົມ ແລະ ການ​ພັດ­ທະ­ນາ ໂດຍ​ສະ­ເພາະ ການ​ສະ­ຫຼຸບ​ບັນ­ດາ​ໂຄງ­ການ​ທີ່­ຢູ່​ພາຍ​ໃຕ້​ແຜນ­ການ​ເຮັດ​ວຽກ​ໃນ​ປັດ­ຈຸ­ບັນ ແລະ ບັນ­ດາ​ຂົງ­ເຂດ​ທີ່​ມີ​ຄວາມ​ສົນ­ໃຈ​ຮ່ວມ​ກັນ ເຊິ່ງ​ຈະ​ໄດ້​ລວມ​ເຂົ້າ​ໃນ​ແຜນ​ວຽກ​ໃໝ່ ໃນ​ໄລ­ຍະ ປີ 2021-2025 ກອງ​ປະ­ຊຸມ​ຄັ້ງ​ນີ້ ສາ­ມາດ​ສັງ​ລວມ​ເອົາ​ບັນ­ຫາ​ສຳ­ຄັນ​ຕ່າງໆ ທີ່​ກ່ຽວ​ພັນ​ກັບ​ວຽກ​ງານ​ສະ­ຫວັດ­ດີ​ການ​ສັງ­ຄົມ ແລະ ການ​ພັດ­ທະ­ນາ​ອາ​ຊຽນ ເພື່ອ​ນຳ​ສະ­ເໜີ​ໃນ​ກອງ​ປະ­ຊຸມ​ລັດ­ຖະ­ມົນ­ຕີ​ສະ­ຫວັດ­ດີ​ການ​ສັງ­ຄົມ ແລະ ການ​ພັດ­ທະ­ນາ​ອາ​ຊຽນ​ບວກ​ສາມ ຄັ້ງ​ທີ 6 ທີ່​ຈະ​ຈັດ​ຂຶ້ນ​ວັນ​ທີ 22 ພະ­ຈິກ​ນີ້.

ຂ່າວທີ່ກ່ຽວຂ້ອງ