ກະຕໍ້​ລາວ​ຈະ​ສົ່ງ 3 ລາຍການ​ເຂົ້າ​ຮ່ວມ​ຊີເກມ

2.215 21 ພ.ຈ. 2019 ວົງຈອນກີລາ
ກະຕໍ້​ລາວ​ຈະ​ສົ່ງ 3 ລາຍການ​ເຂົ້າ​ຮ່ວມ​ຊີເກມ

    ສະຫະພັນ​ກີລາ​ກະຕໍ້​ແຫ່ງ​ຊາດ​ລາວ ພ້ອມ​ຈະ​ສົ່ງ​ນັກກີລາ​ກະຕໍ້​ທີມ​ຊາດ​ລາວ ຊຸດ​ທີ່​ສ້າງ​ຜົນງານ​ໃນ​ງານ​ມະ​ຫະ​ກຳ​ກີລາ​ເອ​ຊຽນ​ເກມ ງານ​ກີລາ​ຊີເກມ ແລະ ຊຸດ​ຊີງ​ແຊັມ​ໂລກ 24 ຄົນ ສະເພາະ​ນັກກີລາ​ມີ 17 ຄົນ ຍິງ 6 ຄົນ ເຂົ້າ​ຮ່ວມ​ຍາດ​ຫຼຽນ​ຄຳ 3 ລາຍການ ປະເພດ​ກະຕໍ້​ລອດ​ບ້ວງ​ຍິງ-ຊາຍ ແລະ ປະເພດ​ທີມ​ຊຸດ​ຄູ່​ຊາຍ ໃນ​ງານ​ມະ​ຫະ​ກຳ​ກີລາ​ຊີເກມ ຄັ້ງ​ທີ XXX ທີ່​ປະເທດ​ຟີ​ລິບ​ປິນ ເປັນ​ເຈົ້າພາບ​ຈັດ​ຂຶ້ນ​ວັນ​ທີ 30 ພະຈິກ ຫາ 12 ທັນວາ 2019.

    ທ່ານ ອາ​ນຸ​ສອນ ເຄນ​ກິ​ຕິ​ສັກ ຮອງ​ປະທານ ແລະ ເລຂາທິການ​ສະຫະພັນ​ກະຕໍ້​ແຫ່ງ​ຊາດ​ລາວ ແຈ້ງ​ໃຫ້​ຮູ້​ວັນ​ທີ 15 ພະຈິກ 2019 ວ່າ: ການ​ແຂ່ງຂັນ​ກີລາ​ກະຕໍ້​ງານ​ຊີເກມ​ປີ​ນີ້ ໄດ້​ມີ​ການ​ກຳນົດ​ຊີງ​ຫຼຽນ​ຄຳ​ທັງ​ໝົດ 6 ລາຍການ ປະກອບ​ມີ: ທີມ​ຊຸດ​ຊາຍ ທີມ​ຊຸດ​ຄູ່​ຊາຍ ທີມ​ດ່ຽວ​ຊາຍ-ຍິງ ກະຕໍ້​ລອດ​ບ້ວງ​ຍິງ-ຊາຍ ພ້ອມ​ທັງ​ກຳນົດ​ໃຫ້​ປະເທດ​ໃນ​ຂົງເຂດ​ອາ​ຊຽນ 11 ຊາດ ໂດຍ​ສະເພາະ​ປະເພດ​ຊາຍ​ສາມາດ​ສົ່ງ​ນັກກີລາ​ເຂົ້າ​ຮ່ວມ​ໄດ້​ຊາດ​ໜຶ່ງ​ພຽງ 2 ລາຍການ ແລະ ປະເພດ​ຍິງ​ໄດ້​ພຽງ 1 ລາຍການ ດັ່ງນັ້ນ​ສະຫະພັນ​ກະຕໍ້​ແຫ່ງ​ຊາດ​ລາວ​ຈຶ່ງ​ໄດ້​ຄົ້ນຄວ້າ ແລະ ກຳນົດ​ສົ່ງ​ພຽງ 3 ລາຍການ​ດັ່ງກ່າວ ເນື່ອງ​ຈາກ​ທາງ​ເຈົ້າພາບ ກຳນົດ​ການ​ແຂ່ງຂັນ​ລາຍການ​ໜ້ອຍ ຍ້ອນ​ວ່າ​ເຈົ້າພາບ​ມີ​ຄວາມ​ຫວັງ​ໜ້ອຍ​ຈຶ່ງ​ຕັດ​ລາຍການ​ຕ່າງໆ​ອອກ​ໃຫ້​ມີ​ພຽງ​ແຕ່ 6 ລາຍການ​ເທົ່າ​ນັ້ນ ສ່ວນ​ຄວາມ​ຫວັງ​ທີ່​ພວກ​ເຮົາ​ຕັ້ງ​ເປົ້າ​ໝາຍ​ໄວ້​ທີ່​ລາຍການ​ທີມ​ກະຕໍ້​ທີມ​ຊຸດ​ຄູ່​ຊາຍ.

    ທ່ານ ຈັນ​ໃດ ເພຍ​ເທບ ຫົວໜ້າ​ຄູ​ເຝິກ​ກະຕໍ້​ທີມ​ຊາດ​ລາວ​ໃຫ້​ຮູ້​ວ່າ: ທີມ​ນັກກີລາ​ກະຕໍ້​ທີມ​ຊາດ​ລາວ ຊຸດ​ນີ້​ໄດ້​ເກັບ​ຕົວ​ເຝິກຊ້ອມ​ມາ​ແຕ່​ຕົ້ນ​ເດືອນ​ກໍລະກົດ 2019 ທີ່​ສະໂມສອນ​ກີລາ​ໃນ​ຮົ່ມ​ໂອ​ແລມ​ປາ​ເຊຍ ວິທະຍາ​ເຂດ​ດົງ​ໂດກ ເມືອງ​ໄຊ​ທານີ ມີ​ນັກກີລາ​ທັງ​ໝົດ 17 ຄົນ ຍິງ 6 ຄົນ ປັດຈຸບັນ​ໄດ້​ເອົາໃຈໃສ່​ຢ່າງ​ຕັ້ງໜ້າ ​ທຸກ​ຄົນ​ກໍ​ມີ​ຄວາມ​ພ້ອມ​ເປັນຕົ້ນ​ ທາງ​ດ້ານ​ເທັກ​ນິກ ທັກ​ສະ ແລະ ຄວາມ​ສາມາດ ຕະຫຼອດ​ຮອດ​ສະພາບ​ຈິດໃຈ ແຕ່​ສິ່ງ​ທີ່​ຄວນ​ປັບ​ມີ​ພຽງ​ແຕ່​ແກ້​ໄຂ​ທາງ​ບັນຫາ​ດ້ານ​ເຕັກນິກ​ບາງ​ຢ່າງ​ກໍ​ຖື​ວ່າ​ພ້ອມ​ຢ່າງ​ສົມ ບູນ ເຖິງ​ຢ່າງໃດ​ກໍ​ດີ​ຂ້າພະເຈົ້າ​ພ້ອມ​ດ້ວຍ​ທີມ​ງານ​ຄະນະ​ຄູ​ເຝິກ​ທຸກ​ຄົນ​ຂໍ​ໃຫ້​ຄຳ​ໝັ້ນ​ສັນຍາ​ວ່າ​ຈະ​ພະຍາຍາມ​ສູ້​ຊົນ​ນຳພາ​ນັກກີລາ​ກະຕໍ້​ລາວ​ສ້າງ​ຜົນງານ​ຕາມ​ທີ່​ສະຫະພັນ​ຕັ້ງ​ເປົ້າ​ໄວ້​ໃຫ້​ປາກົດ​ຜົນ​ເປັນ​ຈິງ. 

ຂ່າວທີ່ກ່ຽວຂ້ອງ