ເບິ່ງບ້ານເຂົາເອົາບົດຮຽນ 21-11-2019

2.355 21 ພ.ຈ. 2019 ຫົວຂໍ້ຂ່າວອື່ນໆ

   ຄໍ​ລຳ​ປະ­ຈຳ​ວັນ​ນີ້ ເລີ່ມ​ດ້ວຍ​ຂ່າວ​ການ​ຍົກ ເລີກ​ວິ­ທີ​ຢ່າ​ຮ້າງ​ຂອງ​ຊາວ​ມຸດ​ສະ​ລິມ ທີ່​ອິນ​ເດຍ ກະ­ແສ​ສະ­ໜັບ­ສະ­ໜູນ​ມາດ​ຕະ­ການ​ຫຼຸດ­ຜ່ອນ​ເຄື່ອງ​ດື່ມ​ປະ­ເພດ​ມຶນ­ເມົາ​ທີ່​ໄທ ແລະ ເລື່ອງ ສປ ຈີນ ກັບ​ການ​ຊື້​ນັກ​ເຕະ (ບານ­ເຕະ) ຈາກ​ຕ່າງ ປະ­ເທດ​ມາ​ຮ່ວມ​ທີມ.

   ທີ່ ອິນ​ເດຍ: ແຕ່­ໃດໆ​ມາ ຊຸມ​ຊົນ​ມຸ​ສະ​ລິມ (ກຸ່ມ​ນັບ­ຖື​ສາ­ສະ­ໜາ​ອິດ​ສະ​ລາມ) ຢູ່​ອິນ​ເດຍ ໄດ້​ປະ­ຕິ­ບັດ​ປະ­ເພ­ນີ​ຢ່າ​ຮ້າງ​ກັນ​ຕາມ​ຫຼັກ​ສາ­ສະ­ໜາ​ອິດ​ສະ​ລາມ ຄື: ຝ່າຍ​ຊາຍ (ຜົວ) ພຽງ​ແຕ່​ເວົ້າ​ຄຳ​ວ່າ “ເຖາະ​ລາ” ສາມ​ຄັ້ງ ແປ​ເປັນ​ລາວ​ວ່າ “ປະ​ປະ​ປະ” ກໍ​ເປັນ​ອັນ­ວ່າ​ເສັດ​ພິ­ທີ ຄື​ຝ່າຍ​ຊາຍ​ສາ­ມາດ​ຮ້າງ​ກັບ​ຝ່າຍ​ຍິງ​ໄດ້ ໃນ​ຫຼາຍໆ​ປີ­ຜ່ານ­ມາ ສັງ­ຄົມ​ອິນ​ເດຍ​ເຫັນ​ວ່າ­ການ​ທີ່​ໃຫ້​ສິດ​ຝ່າຍ​ຊາຍ​ເວົ້າ “ເຖາະ​ລາ” ອອກ​ມາ​ພຽງ​ສາມ​ຄັ້ງ​ກໍ​ສາ­ມາດ​ຮ້າງ​ເມຍ​ໄດ້​ນັ້ນ ເປັນ​ການ​ຂັດ​ຕໍ່​ມາດ​ຕະ­ການ​ສິດ­ທິ​ຂອງ​ພົນ­ລະ­ເມືອງ​ທີ່​ກຳ­ນົດ​ຢູ່​ໃນ​ລັດ​ຖະ​ທຳ​ມະ­ນູນ​ອິນ​ເດຍ ທັງ​ເປັນ​ການ​ເອົາ​ປຽບ​ຝ່າຍ​ຍິງ​ເກີນ​ໄປ ດັ່ງ­ນັ້ນ​ຈຶ່ງ​ເກີດ​ມີ​ກະ­ແສ​ຮຽກ­ຮ້ອງ​ໃຫ້​ຢຸດ­ຕິ​ປະ­ເພ­ນີ​ຕາມ​ຫຼັກ​ສາ­ສະ­ໜາ​ອິດ​ສະ​ລາມ​ດັ່ງ­ກ່າວ ດັ່ງ​ຂ່າວ​ທີ່​ອອກ​ມາ​ໃນ​ວັນ​ທີ 31 ເດືອນ​ສິງ­ຫາ​ປີ​ນີ້ ເຊິ່ງ​ໄດ້​ບອກ​ວ່າ ລັດ​ຖະ​ສະ­ພາ​ອິນ​ເດຍ ໄດ້​ຮັບ­ຮອງ​ເອົາ​ກົດ­ໝາຍ​ວ່າ​ດ້ວຍ​ສິດ​ຂອງ​ປະ­ຊາ­ຊົນ​ຊາວ​ມຸດ​ສະ​ລິມ ໃນ​ອິນ​ເດຍ ໂດຍ​ໄດ້​ຍົກ­ເລີກ​ປະ­ເພ­ນີ​ຢ່າ​ຮ້າງ​ກັບ​ເມຍ​ດ້ວຍ​ຄຳ​ເວົ້າ “ເຖາະ​ລາ” 3 ຄັ້ງ​ຈາກ​ຝ່າຍ​ຊາຍ ກົດ­ໝາຍ​ສະ­ບັບ​ນີ້​ໄດ້​ຮ່າງ​ຂຶ້ນ​ກ່ອນ​ເດືອນ​ສິງ­ຫາ​ປີ 2017 ຈາກ​ນັ້ນ ສານ​ສູງ​ອິນ​ເດຍ ກໍ​ໄດ້​ພິ­ຈາ­ລະ­ນາ​ວ່າ ການ​ຢ່າ​ຮ້າງ​ກັບ​ພັນ​ລະ​ຍາ​ດ້ວຍ​ການ​ກ່າວ “ເຖາະ​ລາ” 3 ຄັ້ງ​ນັ້ນ ຂັດ​ກັບ​ເນື້ອ​ໃນ​ລັດ​ຖະ​ທຳ​ມະ­ນູນ​ຂອງ​ອິນ​ເດຍ ທ່ານ ນາ​ເຣັນ​ທະ­ລາ​ໂມ​ດີ ນາ­ຍົກ­ລັດ­ຖະ­ມົນ­ຕີ​ອິນ​ເດຍ​ເອງ ກໍ​ໄດ້​ກ່າວ​ກ່ຽວ​ກັບ​ບັນ­ຫາ​ນີ້​ວ່າ: ການ​ຢ່າ​ຮ້າງ​ກັບ​ພັນ​ລະ​ຍາ​ຕາມ​ຫຼັກ​ສາ­ສະ­ໜາ​ອິດ​ສະ​ລາມ​ນັ້ນ ເປັນ​ທຳ­ນຽມ​ບູ­ຮານ​ທີ່​ມີ​ລັກ­ສະ­ນະ​ຈຳ­ກັດ​ຮັດ​ແຄບ​ໃນ​ປະ­ຫວັດ­ສາດ ກົດ­ໝາຍ​ສະ­ບັບ​ນີ້​ຈະ​ມີ​ຜົນ​ສັກ­ສິດ​ພາຍ­ຫຼັງ​ມີ​ລັດ​ຖະ​ດຳ­ລັດ​ປະ­ກາດ​ໃຊ້​ຈາກ​ທ່ານ​ປະ­ທາ­ນາ­ທິ­ບໍ­ດີ​ອິນ​ເດຍ ສຳ­ລັບ​ຊາວ​ມຸດ​ສະ​ລິມ ບາງ​ກຸ່ມ​ທີ່​ບໍ່​ເຫັນ​ດີ​ກັບ​ກົດ­ໝາຍ​ສະ­ບັບ​ນີ້ ໄດ້​ກ່າວ​ຫາ​ວ່າ​ລັດ­ຖະ­ບານ​ອິນ​ເດຍ ແຊກ​ແຊງ ແລະ ມີ​ອະ­ຄະ­ຕິ​ຕໍ່​ຊຸມ​ຊົນ​ມຸດ​ສະ​ລິມ.

   ທີ່ ປະ­ເທດ​ໄທ: ຂ່າວ​ເກົ່າ​ເອົາ​ມາ​ເລົ່າ​ໃໝ່ ກ່ຽວ​ກັບ​ໄທ​ບົດ​ນີ້ (The Nation 11 ພະ­ຈິກ 2017) ເວົ້າ​ວ່າ ປະ­ຊາ­ຊົນ​ໄທ​ສ່ວນ​ໃຫຍ່​ສະ­ໜັບ­ສະ­ໜູນ​ການ​ເກືອດ​ຫ້າມ​ຂາຍ­ເຄື່ອງ​ດື່ມ​ປະ­ເພດ​ມຶນ­ເມົາ​ໃນ​ວັນ​ພັກ​ລະ­ດັບ​ຊາດ ທາງ​ສາ­ສະ­ໜາ​ພຸດ ກໍ​ຄື ການ​ຂາຍ­ເຄື່ອງ​ດື່ມ​ປະ­ເພດ​ດັ່ງ­ກ່າວ​ຕາມ​ສະ­ຖານ­ທີ່​ການ​ສຶກ​ສາ​ຕ່າງໆ ຂໍ້​ມູນ​ນີ້​ໄດ້​ມາ​ຈາກ​ການ​ສຳ​ຫຼວດ​ຫາງ​ສຽງ​ສັງ­ຄົມ ໂດຍ​ອົງ­ການ​ຊຸບ​ເປີ​ໂພນ (Super Poll) ຈາກ​ບຸກ­ຄົນ​ຈຳ­ນວນ 2.218 ຄົນ ໃນ​ທຸກໆ​ວິ­ຖີ​ຊີ­ວິດ ນັບ​ແຕ່​ວັນ​ທີ 1-17 ພະ­ຈິກ 2017 ຜົນ​ອອກ​ມາ​ກໍ​ຄື 76,4% ບອກ​ວ່າ ເຫຼົ້າ ແລະ ເບຍ ມີ​ຜົນ​ຮ້າຍ​ຫຼາຍ​ກວ່າ​ຜົນ​ດີ​ຕໍ່​ສັງ­ຄົມ 84,2% ຖິ້ມ​ໂທດ​ໃສ່​ການ​ດື່ມ​ສິ່ງ​ມຶນ­ເມົາ​ວ່າ ເປັນ­ຕົ້ນ​ເຫດ​ພາ­ໃຫ້​ເກີດ​ອຸ­ບັດ­ເຫດ​ຕາມ​ຖະ­ໜົນ ການ​ໃຊ້​ຄວາມ​ຮຸນ​ແຮງ​ໃນ​ຄອບ­ຄົວ ອາ​ຊະ​ຍາ​ກຳ ການ​ຜິດ​ຖຽງ ແລະ ການ​ລວນ​ລາມ​ທາງ​ເພດ ເມື່ອ​ຖືກ​ຖາມ​ກ່ຽວ​ກັບ​ວິ­ທີ​ຫຼຸດ­ຜ່ອນ​ບັນ­ຫາ​ຈາກ​ການ​ດື່ມ​ສິ່ງ​ມຶນ­ເມົາ ຜູ້​ຕອບ​ຄຳ​ຖາມ​ຈຳ­ນວນ​ກວ່າ 77% ສະ­ໜັບ­ສະ­ໜູນ​ມາດ​ຕະ­ການ​ເກືອດ​ຫ້າມ​ການ​ຂາຍ­ເຄື່ອງ​ດື່ມ​ປະ­ເພດ​ເຫຼົ້າ​ໃນ​ວັນ​ພັກ​ທາງ​ສາ­ສະ­ໜາ ສ່ວນ​ຈຳ­ນວນ​ຜູ້​ສະ­ໜັບ­ສະ­ໜູນ​ການ​ຂາຍ­ເຄື່ອງ​ດື່ມ​ປະ­ເພດ​ເຫຼົ້າ​ໃນ​ລັດ­ສະ­ໝີ 300-500 ແມັດ ຫ່າງ​ຈາກ​ສະ­ຖານ­ທີ່​ການ​ສຶກ​ສາ​ນັ້ນ​ມີ​ສູງ​ເກືອບ ຫຼື ເທົ່າໆ​ກັບ 73,8% ແລະ ອີກ 70,7% ເຫັນ​ວ່າ​ຄວນ​ມີ​ກົດ­ໝາຍ​ຫ້າມ​ພະ­ນັກ­ງານ​ຂອງ​ລັດ​ຮັບ​ຜົນ​ປະ­ໂຫຍດ​ໃດໆຈາກ​ບໍ­ລິ­ສັດ​ເບຍ ແລະ ເຫຼົ້າ ນອກ­ຈາກ​ນັ້ນ ຍັງ​ມີ​ອີກ 75,7% ບອກ​ວ່າ ຕ້ອງ​ມີ​ການ​ປະ­ຕິ­ບັດ​ຢ່າງ​ເຄັ່ງ​ຄັດ ແລະ ເດັດ­ຂາດ​ບັນ­ດາ​ກົດ­ໝາຍ ແລະ ມາດ​ຕະ­ການ​ກ່ຽວ​ກັບ​ການ​ຄວບ​ຄຸມ​ເຄື່ອງ​ດື່ມ​ປະ­ເພດ​ມຶນ­ເມົາ.

   ທີ່ ສປ ຈີນ: ຂ່າວ​ນີ້​ຫຼາຍ​ຄົນ​ຄົງ​ຮູ້​ແລ້ວ ເພາະ​ມັນ​ອອກ​ມາ​ແຕ່​ກາງ​ປີ 2017 ພຸ້ນ ແຕ່​ຂໍ​ເອົາ​ມາ​ເລົ່າ­ຄືນ​ໃໝ່ ເພາະ​ເປັນ​ເລື່ອງ​ດີ​ສຳ­ລັບ​ການ​ສົ່ງ­ເສີມ​ນັກ­ກີ­ລາ​ພາຍ​ໃນ​ປະ­ເທດ ໂດຍ​ສະ­ເພາະ ແມ່ນ​ກີ­ລາ​ບານ­ເຕະ ທີ່​ມີ​ກະ­ແສ​ນິ­ຍົມ​ຊື້​ໂຕ​ຂາ​ເຕະ​ຕ່າງ­ປະ­ເທດ ດ້ວຍ​ຈຳ­ນວນ​ເງິນ​ສູງ​ເກືອບ​ຈຸ​ເມກ ຂ່າວ​ນີ້​ບອກ​ວ່າ ສະ­ມາ­ຄົມ​ກີ­ລາ​ບານ­ເຕະ ສປ ຈີນ ໄດ້​ປະ­ກາດ​ໃຊ້​ກົດ​ລະ­ບຽບ​ໃໝ່​ເລີ່ມ​ແຕ່​ວັນ​ທີ 19 ມິ­ຖຸ­ນາ 2017 ທີ່​ກຳ­ນົດ​ເກັບ​ພາ­ສີ​ສະ­ໂມ­ສອນ​ບານ­ເຕະ​ໃດ​ກໍ​ຕາມ​ທີ່​ຊື້​ນັກ​ເຕະ​ຕ່າງ​ຊາດ​ມາ​ຮ່ວມ​ທີມ ພາ­ສີ​ເພີ່ມ​ດັ່ງ­ກ່າວ​ສູງ​ເຖິງ 100% ສົມ­ມຸດ​ວ່າ​ມີ​ການ​ຊື້​ຂາ​ເຕະ​ຕ່າງ​ຊາດ ຈຳ­ນວນ 90 ລ້ານ​ປອນ ສະ­ໂມ­ສອນ​ທີ່​ກ່ຽວ­ຂ້ອງ​ກໍ​ຕ້ອງ​ໄດ້​ເສຍ​ພາ­ສີ​ເພີ່ມ​ໃນ​ຈຳ­ນວນ 90 ລ້ານ​ປອນ ກົດ​ລະ­ບຽບ​ນີ້​ມີ​ເປົ້າ​ໝາຍ​ປ້ອງ​ກັນ​ບໍ່​ໃຫ້​ມີ​ການ​ຊື້​ນັກ​ເຕະ​ຕ່າງ​ຊາດ​ດ້ວຍ​ລາ­ຄາ​ມະ­ຫາ­ສານ.

ຂ່າວທີ່ກ່ຽວຂ້ອງ