ຮັບຮອງ​ຮ່າງ​ກົດໝາຍ​ວ່າ​ດ້ວຍ​ອະນາໄມ ແລະ ສົ່ງເສີມ​ສຸຂະພາບ (ສະບັບ​ປັບປຸງ)

1.039 25 ພ.ຈ. 2019 ຂ່າວໜ້າ​ໜຶ່ງ

    ການ​ດຳເນີນ​ກອງ​ປະຊຸມ ສະໄໝ​ສາມັນ​ເທື່ອ​ທີ 8 ຂອງ​ສະພາ​ແຫ່ງ​ຊາດ ຊຸດ​ທີ VIII ວັນ​ທີ 22 ພະຈິກ 2019 ທີ່​ສະພາ​ແຫ່ງ​ຊາດ (ຫຼັກ 6) ໂດຍ​ການ​ເປັນ​ປະທານ​ຂອງ ທ່ານ ສົມ​ພັນ ແພງ​ຄຳ​ມີ ຮອງ​ປະທານ​ສະພາ​ແຫ່ງ​ຊາດ ມີ​ບັນດາ​ສະມາຊິກ​ສະພາ​ແຫ່ງ​ຊາດ (​ສສຊ) ປະຈຳ​ເຂດ​ເລືອກ​ຕ່າງໆ​ເຂົ້າ​ຮ່ວມ.

   ທ່ານ ບຸນ​ກອງ ສີ​ຫາ​ວົງ ລັດຖະມົນຕີ​ກະຊວງ​ສາທາລະນະ​ສຸກ ໄດ້​ຂຶ້ນ​ຜ່ານ​ຮ່າງ​ກົດໝາຍ ວ່າ​ດ້ວຍ​ອະນາໄມ ແລະ ສົ່ງເສີມ​ສຸຂະພາບ ສະບັບ​ປັບປຸງ​ວ່າ: ຮ່າງ​ກົດໝາຍ​ສະບັບ​ນີ້ ປະກອບ​ມີ​ທັງ​ໝົດ 9 ພາກ 8 ໝວດ 79 ມາດຕາ ໃນ​ນີ້ ຮັກສາ​ໄວ້​ມີ 1 ມາດຕາ ຄື: ມາດຕາ 78 ໄດ້​ປັບປຸງ 45 ມາດຕາ ແລະ ເພີ່ມ​ເຂົ້າ​ໃໝ່ 33 ມາດຕາ ເຊິ່ງ​ກົດໝາຍ​ສະບັບ​ດັ່ງກ່າວ ໄດ້​ເລີ່ມ​ຈັດ​ຕັ້ງ​ປະຕິບັດ​ມາ​ແຕ່​ປີ 2012 ເປັນຕົ້ນ​ມາ ໂດຍ​ແມ່ນ​ກົມ​ອະນາໄມ ແລະ ກັນ​ພະຍາດ​ເປັນ​ເສນາ​ທິ​ການ​ໃຫ້​ກະຊວງ​ສາທາລະນະ​ສຸກ ໃນ​ການຈັດຕັ້ງ​ປະຕິບັດ​ວຽກ​ງານ​ດັ່ງກ່າວ ໂດຍ​ຖື​ເອົາ​ຫຼັກການ​ອະນາໄມ ກັນ​ພະຍາດ ແລະ ສົ່ງເສີມ​ສຸຂະພາບ​ເປັນຕົ້ນ​ຕໍ ໄດ້​ເຊື່ອມ​ສານ​ວຽກ​ງານ​ສາທາລະນະ​ສຸກ​ຂັ້ນ​ຕົ້ນ​ເຂົ້າ​ໃນ​ວຽກ​ງານ​ພັດທະນາ​ຊົນນະບົດ ລຶບລ້າງ​ຄວາມທຸກ​ຍາກ ແລະ ວຽກ​ງານ 3 ສ້າງ ໂດຍ​ສະເພາະ ການ​ສ້າງ​ບ້ານ​ສາ ທາ​ລະນະ​ສຸກ​ແບບຢ່າງ (ປັດຈຸບັນ​ມີ ບ້ານ​ສາທາລະນະ​ສຸກ​ແບບຢ່າງ 6.421 ບ້ານ) ເພື່ອ​ໃຫ້​ທຸກ​ຄົນ​ມີ​ສຸຂະພາບ​ດີ ມີ​ອາຍຸ​ຍືນ ຫຼຸດຜ່ອນ​ການ​ຕິດເຊື້ອ​ພະຍາດ ການ​ເຈັບເປັນ ແລະ ການ​ເສຍ​ຊີວິດ​ຂອງ​ປະຊາຊົນ ບັນດາເຜົ່າ ໂດຍ​ການ​ມີ​ສ່ວນ​ຮ່ວມ ແລະ ເປັນ​ເຈົ້າ​ການ​ຂອງ​ທຸກ​ພາກສ່ວນ​ໃນ​ສັງຄົມ.

   ຜ່ານ​ການຈັດຕັ້ງ​ປະຕິບັດ​ກົດໝາຍ​ສະບັບ​ດັ່ງກ່າວ​ໃນ​ໄລຍະ​ຜ່ານ​ມາ​ເຫັນ​ວ່າ ຍັງ​ມີ​ບາງ​ເນື້ອ​ໃນ​ບໍ່​ທັນ​ຈະແຈ້ງ ມີ​ຄວາມ​ຫຍຸ້ງຍາກ​ໃນ​ການຈັດຕັ້ງ​ປະຕິບັດ​ຕົວ​ຈິງ ແລະ ບໍ່​ສອດຄ່ອງ​ກັບ​ສະພາບ​ເງື່ອນໄຂ​ຂອງ​ການ​ພັດທະນາ ເສດ​ຖະກິດ-ສັງຄົມ​ປັດຈຸບັນ ອົງ​ປະກອບ​ຂອງ​ການ​ອະນາໄມ ກັນ​ພະຍາດ ແລະ ສົ່ງເສີມ​ສຸຂະພາບ ຍັງ​ບໍ່​ທັນ​ຄົບ​ຖ້ວນ ແລະ ມີ​ບາງ​ວຽກ​ງານ​ໄດ້​ແຍກ​ເປັນ​ກົດໝາຍ​ສະເພາະ ເຊັ່ນ: ວຽກ​ງານ​ໃຫ້​ວັກ​ຊີນ​ກັນ​ພະຍາດ​ເປັນຕົ້ນ.

   ເມື່ອ​ຮ່າງ​ກົດໝາຍ​ສະບັບ​ນີ້ ຖືກ​ຮັບຮອງ ແລະ ປະກາດ​ໃຊ້ ຈະ​ເປັນ​ບ່ອນ​ອີງ​ອັນ​ສຳຄັນ​ພື້ນຖານ ໃນ​ການຈັດຕັ້ງ​ປະຕິບັດ​ວຽກ​ງານ​ອະນາໄມ ແລະ ສົ່ງເສີມ​ສຸຂະພາບ ໄດ້​ຮັບ​ການ​ຄຸ້ມ​ຄອງ ຕິດຕາມ ກວດກາ ຖືກຕ້ອງ​ຕາມ​ແນວທາງ​ນະໂຍບາຍ​ຂອງ​ພັກ ສອດຄ່ອງ​ກັບ​ການ​ພັດທະນາ ເສດຖະກິດ-ສັງຄົມ ຂອງ ​ສປປ ລາວ ແລະ ສອດຄ່ອງ​ກັບ​ພັນທະ​ສາກົນ ເຮັດ​ໃຫ້​ວຽກ​ງານ​ອະນາໄມ ແລະ ສົ່ງເສີມ​ສຸຂະພາບ ໄດ້​ຮັບ​ການຈັດຕັ້ງ​ປະຕິບັດ​ຢ່າງ​ມີ​ປະ​ສິດທິ​ຜົນ ຕໍ່​ເນື່ອງ ແລະ ຍືນ​ຍົງ ຮັບປະກັນ​ໃຫ້​ພົນລະເມືອງ ມີ​ສຸຂະພາບ​ດີ ມີ​ອາຍຸ​ຍືນ ຫຼຸດຜ່ອນ​ການ​ຕິດເຊື້ອ​ພະຍາດ ການ​ເຈັບ​ປ່ວຍ ແລະ ການ​ເສຍ​ຊີວິດ ສາມາດ​ເຊື່ອມ​ໂຍງ​ກັບ​ພາກ​ພື້ນ ແລະ ສາກົນ ປະກອບສ່ວນ​ເຂົ້າ​ໃນ​ການ​ປົກ​ປັກ​ຮັກສາ ແລະ ພັດທະນາ​ປະເທດ​ຊາດ.

   ພາຍຫຼັງ ​ສສຊ ໄດ້​ປະກອບ​ຄຳ​ເຫັນ​ແລ້ວ ອະນຸ​ກຳມະການ​ຮ່າງ​ກົດໝາຍ ກໍ​ໄດ້​ຂຶ້ນ​ອະທິບາຍ​ໃຫ້​ຄວາມ​ກະຈ່າງ​ແຈ້ງ ໃນ​ບາງ​ເນື້ອ​ໃນ​ທີ່ ​ສສຊ ສະເໜີ ເພື່ອ​ນຳໄປ​ປັບປຸງ​ເນື້ອ​ໃນ​ຂອງ​ກົດໝາຍ​ສົມບູນ​ຍິ່ງ​ຂຶ້ນ  ຈາກ​ນັ້ນ ປະທານ​ກອງ​ປະຊຸມ​ໄດ້​ສະຫຼຸບ​ສັງ​ລວມ​ຄຳ​ຄິດ​ເຫັນ ແລະ ສະເໜີ​ໃຫ້ ​ສສຊ ລົງ​ຄະແນນ​ສຽງ ຮັບຮອງ​ເອົາ​ຮ່າງ​ກົດໝາຍ ວ່າ​ດ້ວຍ​ອະນາໄມ ແລະ ສົ່ງເສີມ​ສຸຂະພາບ ສະບັບ​ປັບປຸງ ດ້ວຍ​ຄະແນນ​ສຽງ​ສ່ວນ​ຫຼາຍ.   

ຂ່າວທີ່ກ່ຽວຂ້ອງ