ເລືອກ​ຕັ້ງ​ຜ່າ​ທາງ​ຕັນ Brexit

1.575 25 ພ.ຈ. 2019 ນານາສາລະ

     ມື້ນີ້​ຄໍ​ລຳ​ເຮົາ​ມາ​ປ່ຽນ​ບັນຫາ...ເບິ່ງ​ໂລກ​ກວ້າງ​ນໍ ? ນັ້ນ​ຄື​ບັນຫາ​ເຄັ່ງຮ້ອນ​ຂອງ​ປະເທດ​ອັງກິດ​ໃນ​ການ​ອຳ​ລາ ອີ​ຢູ ຫຼື Brexit.

     ອິງ​ຕາມ​ແຫຼ່ງ​ຂ່າວ​ຈາກ​ຕ່າງປະເທດ​ໃຫ້​ຮູ້​ວ່າ: ບັນຫາ​ອັງກິດ​ຂໍ​ລາ​ຈາກ​ອີ​ຢູ​ນີ້ ເລີ່ມ​ມາ​ແຕ່​ການ​ລົງ​ປະຊາ​ມະຕິ​ໃນ​ເດືອນ ມິຖຸນາ 2016 ພຸ້ນ ຜ່ານ​ການ​ຕໍ່​ລອງ​ມາ​ຫຼາຍ​ຄັ້ງ ແລະ ປ່ຽນ​ນາຍົກລັດຖະມົນຕີ​ເຖິງ​ສອງ​ຄົນ ຄື: ທ່ານ​ນາງ ເທ​ເລ​ຊາ​ເມ ແລະ ທ່ານ ບໍ​ຣິ​​ສ ຈອນ​ສັນ ແຕ່​ຍັງ​ຫາ​ທາງ​ອອກ​ບໍ່​ໄດ້.. ຫຼ້າ​ສຸດ EU  ໃຫ້​ເວລາ​ຕື່ມ​ອີກ 3 ເດືອນ ໝາຍວ່າ​ເຖິງ​ວັນ​ທີ 31/1/2020 ເພື່ອ​ໃຫ້​ອັງກິດ​ກະກຽມ​ເອກະສານ​ຕ່າງໆ​ໃຫ້​ຄົບ​ຕາມ​ເງື່ອນໄຂ​ແລ້ວ​ຈຶ່ງ​ຄ່ອຍ​ອຳ​ລາ​ຈາກ EU.

    ເພື່ອ​ຫາ​ທາງ​ອອກ​ນາຍົກ​ອັງກິດ​ໄດ້​ປະກາດ​ຍຸບ​ສະພາ ແລ່ນ​ໃຫ້​ມີ​ການ​ເລືອກ​ຕັ້ງ​ໃໝ່ ໃນ​ວັນ​ທີ 12/12/2019 ໃຫ້​ປະຊາຊົນ​ອັງກິດ​ຕັດສິນ​ໃຈ​ອີກ​ເທື່ອ​ໜຶ່ງ​ວ່າ ຈະ​ຢູ່​ຕໍ່​ກັບ EU ຫຼື ລາ​ອອກ.

     ໃນ​ເວລາ​ປະກາດ​ຍຸບ​ສະພາ​ນັ້ນ ນາຍົກ​ອັງກິດ​ລະບຸ​ວ່າ: ຫຼັງ​ການ​ເລືອກ​ຕັ້ງ​ພັກ​ອະນຸ​ຮັກ​ນິຍົມ​ຂອງ​ເຂົາ​ອາດ​ຈະ​ໄດ້​ສຽງ​ສ່ວນ​ຫຼາຍ​ໃນ​ສະພາ ແລະ ຫວັງ​ວ່າການ​ຖອນ​ຕົວ​ອອກ​ຈາກ EU ຈະ​ໄດ້​ຕາມ​ກຳນົດ​ເວລາ​ໃໝ່ ຄື​ໃນ​ວັນ​ທີ 31/1/2020.

      ການ​ຫາ​ສຽງ​ສຳລັບ​ການ​ເລືອກ​ຕັ້ງ​ເອົາ ​ສສ ຈຳນວນ 650 ທີ່​ນັ່ງ​ໄດ້​ເລີ່ມ​ແລ້ວ ໂດຍ​ບັນຫາ​ໃຫຍ່​ຂອງ​ແຕ່​ລະ​ພັກ​ງັດ​ອອກ​ມາ​ນັ້ນ ຄື​ບັນຫາ Brexit ໂດຍ​ພັກ​ອະນຸ​ຮັກ​ນິຍົມ​ພາຍ​ໃຕ້​ການ​ນຳພາ​ຂອງ ບໍ​ຣິ​​ສ ຈອນ​ສັນ ເປີດເຜີຍ​ວ່າ: ຂໍ​ໃຫ້​ລົງ Brexit ທາງ​ພັກ​ມີ​ຄວາມ​ພ້ອມ​ຢູ່​ແລ້ວ ເຊິ່ງ​ຖ້າວ່າ​ພັກ​ໄດ້​ຮັບ​ໄຊຊະນະ ກໍ​ຈະ​ນຳ​ອັງກິດ​ອອກ​ຈາກ EU ຕາມ​ເວລາ​ກຳນົດ​ແນ່ນອນ ໃນ​ຄະນະ​ທີ່​ພັກ​ຝ່າຍ​ຄ້ານ​ພາຍ​ໃຕ້​ການ​ນຳພາ​ຂອງ ເຈຣີ​ມີ ຄໍ​ບິນ ກໍ​ປະກາດ​ວ່າ: ອາດ​ຈະ​ໃຫ້​ມີ​ການ​ລົງ​ປະຊາ​ມະຕິ​ເລື່ອງ Brexit ໃໝ່​ຫາກ​ພັກ​ໄດ້​ຮັບ​ໄຊຊະນະ​ໃນ​ການ​ເລືອກ​ຕັ້ງ ແລະ ຈະ​ມີ​ການ​ປັບປຸງ​ສະຫວັດດີ​ການ​ຕ່າງໆ ໂດຍ​ສະ ເພາະ ແມ່ນ​ດ້ານ​ສຸຂະພາບ​ໃຫ້​ດີ​ຂຶ້ນ​ກວ່າ​ທີ່​ເປັນ​ຢູ່​ໃນ​ປັດຈຸບັນ ມີ​ຜົນ​ສຳ​ຫຼວດ​ຄວາມ​ຄິດ​ເຫັນ ຈາກ​ລາຍການ​ໂທລະພາບ Good Morning Britain ໃຫ້​ຮູ້​ໃນ​ວັນ​ທີ 18/11/2019 ວ່າ: ພັກ​ອະນຸ​ຮັກ​ນິຍົມ​ມີ​ຄະແນນ​ນຳ​ເຖິງ 42% ພັກ​ແຮງ​ງານ 28% ພັກ​ປະຊາທິປະໄຕ 13% ແລະ ພັກ Brexit 5% ຜົນ​ສຳ​ຫຼວດ​ຜູ້​ມີ​ສິດ​ເລືອກ​ຕັ້ງ​ຈຳນວນ 1.010 ຜ່ານ​ໂທລະສັບ ແຕ່​ວັນ​ທີ 14-16/11/2019 .

    ຜົນ​ຂອງ​ການ​ເລືອກ​ຕັ້ງ​ຄາດ​ຄະເນ​ວ່າ ຈະ​ຮູ້​ໃນ​ຕອນ​ເຊົ້າ​ຂອງ​ວັນ​ທີ 13/12/2019 ຫາກ​ບໍ່​ມີ​ພັກ​ໃດ​ຊະນະ​ເດັດຂາດ​ບັນຫາ Brexit ກໍ​ຍັງ​ພົບ​ທາງ​ຕັນ​ຢູ່.

ພວກ​ເຮົາ​ຕິດຕາມ​ຂ່າວ​ຕໍ່​ໄປ​ນໍ?

ຂ່າວທີ່ກ່ຽວຂ້ອງ