ຮັບຮອງ​ເອົາ​ຮ່າງ​ກົດໝາຍ​ວ່າ​ດ້ວຍ​ກີລາ-ກາ​ຍະ​ກຳ ສະບັບ​ປັບປຸງ

953 26 ພ.ຈ. 2019 ຂ່າວໜ້າ​ໜຶ່ງ

    ກອງ​ປະຊຸມ​ສະໄໝ​ສາມັນ​ເທື່ອ​ທີ 8 ຂອງ​ສະພາ​ແຫ່ງ​ຊາດ ຊຸດ​ທີ VIII ວັນ​ທີ 25 ພະຈິກ 2019 ທີ່​ສະພາ​ແຫ່ງ​ຊາດ (ຫຼັກ 6) ເປັນ​ປະທານ​ຂອງ​ທ່ານ ພົນ​ໂທ ແສງ​ນວນ ໄຊ​ຍະ​ລາດ ຮອງ​ປະທານ​ສະພາ​ແຫ່ງ​ຊາດ ມີ​ບັນດາ​ສະມາຊິກ​ສະພາ​ແຫ່ງ​ຊາດ​ປະຈຳ​ເຂດ​ເລືອກ​ຕັ້ງ​ເຂົ້າ​ຮ່ວມ.

   ກອງ​ປະຊຸມ​ທ່ານ ນາງ ແສງ​ເດືອນ ຫຼ້າ​ຈັນທະ​ບູນ ລັດຖະມົນຕີ​ກະຊວງ​ສຶກ​ສາ​ທິ​ການ ແລະ ກີລາ ຂຶ້ນ​ສະເໜີ ເຫດຜົນ ແລະ ຄວາມ​ຈຳເປັນ​ຂອງ​ການ​ປັບປຸງ​ກົດໝາຍ ວ່າ​ດ້ວຍ​ກີລາ-ກາ​ຍະ​ກຳ ຕໍ່​ກອງ​ປະຊຸມ​ວ່າ: ກົດໝາຍ​ວ່າ​ດ້ວຍ​ກີລາ-ກາ​ຍະ​ກຳ ສະບັບ​ທຳ​ອິດ ໄດ້​ຖືກ​ຮັບຮອງ ແລະ ປະກາດ​ໃຊ້ ໃນ​ປີ 2007 ແລະ ສະບັບ​ປັບປຸງ​ຄັ້ງ​ທີ 1 ຄື: ສະບັບ​ນຳ​ໃຊ້​ປັດຈຸບັນ​ນີ້ ໄດ້​ຖືກ​ຮັບຮອງ​ຕາມ​ມະຕິ​ຂອງ​ສະພາ​ແຫ່ງ​ຊາດ ເລກ​ທີ 077/​ສພຊ ລົງ​ວັນ​ທີ 6 ກໍລະກົດ 2012 ໄດ້​ປະກາດ​ໃຊ້​ຕາມ​ລັດ​ຖະ​ດຳລັດ​ຂອງ​ປະທານ​ປະເທດ ສະບັບ​ເລກ​ທີ 231/​ປປທ ລົງ​ວັນ​ທີ 1 ສິງຫາ 2012 ລວມ​ມີ 9 ພາກ 18 ໝວດ 108 ມາດຕາ ເຊິ່ງ​ຜ່ານ​ການຈັດຕັ້ງ​ປະຕິບັດ​ກົດໝາຍ ແຕ່​ປີ 2012 ເປັນຕົ້ນ​ມາ ວຽກ​ງານ​ກີລາ-ກາ​ຍະ​ກຳ ໄດ້​ຮັບ​ການຈັດຕັ້ງ​ທັງ​ປະລິມານ ແລະ ຄຸນ​ນະ​ພາບ​ດີ​ຂຶ້ນ​ເປັນ​ກ້າວໆ ແຕ່​ໃນ​ປັດຈຸບັນ​ເຫັນ​ວ່າ ກົດໝາຍ​ດັ່ງກ່າວ​ບໍ່​ສາມາດ​ຕອບ​ສະໜອງ​ຕໍ່​ຄວາມ​ຮຽກຮ້ອງ​ຕ້ອງການ ຕໍ່​ການ​ພັດທະນາ​ວຽກ​ງານ​ກີລາ-ກາ​ຍະ​ກຳ ແລະ ການ​ພັດທະນາ​ເສດຖະກິດ-ສັງຄົມ​ໃນ​ໄລຍະ​ໃໝ່​ຢ່າງ​ກວ້າງຂວາງ.

   ກົດໝາຍ​ວ່າ​ດ້ວຍ ກີລາ-ກາ​ຍະ​ກຳ (ສະບັບ​ປັບປຸງ) ມີ 10 ພາກ 20 ໝວດ 112 ມາດຕາ ເຊິ່ງ​ຫຼາຍ​ກວ່າ​ສະບັບ​ເດີມ​ຢູ່ 1 ພາກ 2 ໝວດ 4 ມາດຕາ ໃນ​ນັ້ນ ໄດ້​ປັບປຸງ​ເນື້ອ​ໃນ​ທັງ​ໝົດ 81 ມາດຕາ ຮັກສາ​ໄວ້​ຄືເກົ່າ 15 ມາດຕາ ຕັດ​ອອກ 12 ມາດຕາ ເນື່ອງ​ຈາ​ກວ່າ​ເນື້ອ​ໃນ​ມາດຕາ​ດັ່ງກ່າວ ໄດ້​ມີ​ນິຕິ​ກຳ​ສະເພາະ​ແລ້ວ ແລະ ໄດ້​ເພີ່ມ​ເຂົ້າ​ໃໝ່ 16 ມາດຕາ.

   ພາຍຫຼັງ​ທີ່​ຮັບ​ຟັງ​ການ​ສະເໜີ​ຮ່າງ​ກົດໝາຍ ວ່າ​ດ້ວຍ​ກີລາ-ກາ​ຍະ​ກຳ​ແລ້ວ ບັນດາ​ສະມາຊິກ​ສະພາ​ແຫ່ງ​ຊາດ ໄດ້​ຍ້ອງຍໍ​ຊົມເຊີຍ ແຕ່​ກໍ​ຍັງ​ມີ​ບາງ​ຈຸດ​ບາງ​ມາດຕາ​ທີ່​ຈະ​ຕ້ອງ​ໄດ້​ປັບປຸງ ເປັນຕົ້ນ ມາດຕາ​ທີ 2 ກີລາ-ກາ​ຍະ​ກຳ ແມ່ນ​ຂະ​ບວນ​ການເຄື່ອນໄຫວ​ອອກແຮງ​ງານ ໃຫ້​ເພີ່ມ​ຄວາມ​ມ່ວນຊື່ນ ຄວາມ​ຜ່ອນຄາຍ​ດ້ານ​ຮ່າງກາຍ ແລະ ຈິດໃຈ​ເຂົ້າ​ຕື່ມ​ໃສ່ ເງື່ອນໄຂ​ມາດຖານ​ຂອງ​ນັກກີລາ​ໃຫ້​ເບິ່ງ​ຄືນ ໂດຍ​ບໍ່​ໃຫ້​ຫຼຸດ​ໂຕນ​ກັນ​ຫຼາຍ ກັບ​ກົດໝາຍ​ຂອງ​ສາກົນ ນອກຈາກ​ນີ້ ຍັງ​ມີ​ມາດຕາ​ອື່ນໆ​ອີກ. 

   ພາຍຫຼັງ​ທີ່​ສະມາຊິກ​ສະພາ​ປະກອບ​ຄຳ​ຄິດ​ເຫັນ​ແລ້ວ ປະທານ​ກອງ​ປະຊຸມ​ໄດ້​ສະຫຼຸບ​ສັງ​ລວມ ເພື່ອ​ໃຫ້​ຄະນະ​ກຳມະການ​ຮ່າງ​ກົດໝາຍ​ວ່າ​ດ້ວຍ​ກີລາ-ກາ​ຍະ​ກຳ​ນຳໄປ​ປັບປຸງ ຈາກ​ນັ້ນ ໄດ້​ໃຫ້​ສະມາຊິກ​ສະພາ​ແຫ່ງ​ຊາດ​ລົງ​ຄະແນນ​ສຽງ​ຮັບຮອງ​ເອົາ​ຮ່າງ​ກົດໝາຍ​ສະບັບ​ດັ່ງກ່າວ ດ້ວຍ​ຄະແນນ​ສຽງ​ເຫັນ​ດີ​ເປັນ​ສ່ວນ​ຫຼາຍ.

ຂ່າວທີ່ກ່ຽວຂ້ອງ