ຂ່າວຫຼ້າສຸດ

ຫຼົງ​ບຸນ​ຫຼົງ​ທາງ

1.173 27 ພ.ຈ. 2019 ນານາສາລະ

     ບຸນ​ໃນ​ຍຸກ​ເສດຖະກິດ​ຝືດ​ມັນ​ອາດ​ຈະ​ເປັນ​ສິ່ງ​ທີ່​ຂົມ​ຝາດ​ສຳລັບ​ຜູ້​ມີ​ກຳລັງ​ເສດຖະກິດ​ນ້ອຍ​ຈະ​ຈົກ​ເງິນ​ໃສ່​ຊອງ​ບຸນ​ໂດຍ​ສະເພາະ ເມື່ອ​ໝູ່​ເພື່ອນ​ເອົາ​ຊອງ​ບຸນ​ມາ​ຢາຍ ຜູ້​ຂຽນ​ຢາກ​ບອກ​ວ່າ: ຍຸກ​ເສດຖະກິດ​ຝືດ​ບວກ​ກັບ​ລາຍ​ໄດ້​ຈຳກັດ​ກ່ອນ​ເຮົາ​ຈະ​ຕັດສິນ​ໃຈ ເຮັດ​ສິ່ງ​ໃດ​ລົງ​ໄປ​ກໍ່​ຄວນ​ຄຳນຶງ​ເຖິງ​ປາກ​ທ້ອງ ສ່ວນ​ລວມ​ທີ່​ສັງຄົມ​ກຳລັງ​ປະສົບ ບໍ່​ຄວນ​ເອົາ​ກຳລັງ​ຂອງ​ຕົນ​ໄປ​ເປັນ​ໄມ້​ຫຼາ​ວັດແທກ​ຄົນ​ອື່ນ ຫຼື ຜູ້​ມີ​ກຳລັງ​ນ້ອຍ​ກໍ່​ບໍ່​ຄວນ​ຢາກ​ຂີ້​ຕາມ​ຊ້າງ.

     ບຸນ​ແມ່ນ​ຫຍັງ? ຄຳ​ຕອບ​ຄື: ບຸນ​ແມ່ນ​ການ​ເຮັດ​ຄວາມ​ດີ​ທັງ​ກາຍ​ໃຈ​ເຊັ່ນ: ການ​ຊ່ວຍເຫຼືອ​ໝູ່​ເພື່ອນ​ຕົກທຸກ​ໄດ້​ຍາກ ການ​ເອື້ອເຟື້ອ​ເພື່ອ​ແຜ່​ຜູ້​ທີ່​ຈົນ​ຫຼື​ຂາດເຂີນ ຫຼື ວ່າການ​ຊ່ວຍເຫຼືອ​ກັນ​ໃຫ້​ມີ​ຄວາມ​ຮູ້​ໃຫ້​ມີ​ວຽກ​ເຮັດ​ງານ​ທຳ ທັງ​ໝົດ​ນີ້​ຄື​ບຸນ​ໂດຍ​ບໍ່​ຕ້ອງ​ໄປ​ຫຼົງ​ຄິດ​ວ່າ​ບຸນ​ຄື​ຕ້ອງ​ມີ​ເງິນ​ໃສ່​ຊອງ​ຫຼາຍໆ.

     ພະພຸດທະເຈົ້າ​ສອນ​ວ່າ: ບຸນ​ຄື​ການ​ໃຫ້​ທານ ບຸນ​ຄື​ການ​ຮັກສາ​ສິນ ບຸນ​ຄື​ການ​ພາ​ວັນນາ​ເຮັດ​ຄວາມ​ດີ​ຕໍ່​ຕົນ​ເອງ ແລະ ສັງຄົມ ຕົວຢ່າງ: ການ​ເກັບ​ຂີ້​ເຫຍື້ອ​ຂອງ​ຊາວ​ໜຸ່ມ​ໃນ​ງານ​ບຸນທາດຫຼວງ​ນີ້​ກໍ​ແມ່ນ​ບຸນ​ຕົວ​ຈິງ​ເຫັນ​ຜົນ​ໄວ ການ​ເຮັດບຸນ​ຄວນ​ປະກອບ​ດ້ວຍ​ປັນຍາ ແລະ ການ​ໃຫ້​ທານ​ຄວນ​ຄິດ​ວິໄຈ​ໃຫ້​ຖີ່​ຖ້ວນ ພະພຸດທະເຈົ້າ​ສອນ​ວ່າ: ບຸນ​ຈະ​ສົ່ງ​ຜົນ​ດີ​ເມື່ອ​ເຮົາ​ຖວາຍ​ແດ່​ຜູ້​ມີ​ສິນ​ທີ່​ບໍລິສຸດ​ແຕ່​ຖ້າວ່າ​ຜູ້​ຮັບ​ການ​ຖວາຍ​ທານ​ຂາດ​ຄຸນສົມບັດ​ດັ່ງກ່າວ​ກໍ​ບໍ່​ມີ​ໃຜ​ຮັບປະກັນ​ວ່າ​ບຸນ​ຈະ​ເກີດ​ຜົນ​ຕາມ​ທີ່​ປາດ​ຖະ​ໜາ​ຫຼື​ບໍ່?.

    ບຸນ​ຄື​ການ​ຮັກສາ​ສິນ​ໝາຍ​ຄວາມ​ວ່າ: ໃນ​ຖານະ​ເປັນ​ຊາວ​ພຸດ ເຮົາ​ຕ້ອງ​ຮັກສາ​ສິນ 5 ໃຫ້​ເຄັ່ງ​ຄັດ​ພວກ​ເຮົາ​ຢ່າ​ລືມ​ວ່າ​ຄະດີ​ຢ່າ​ຮ້າງ​ຢູ່​ສານ​ມີ​ທ່າ​ອ່ຽງ​ມາ​ທີ​ໜຶ່ງ​ບັນຫາ​ນີ້​ມັນ​ສະທ້ອນ​ວ່າ​ສິນ​ຂໍ້​ທີ​ສາມ​ມີ​ບັນຫາ​ຄື: ສິນ​ຂໍ້​ນີ້​ບໍ່​ຖືກ​ປະຕິບັດ​ຖື​ເບົາ​ເຊິ່ງ​ນຳ​ມາສູ່​ການ​ເຮັດ​ໃຫ້​ຄອບຄົວ​ແຕກ​ແຍກ.

    ຂໍ​ສັງ​ລວມ​ວ່າ ບຸນ​ຫຼື​ຊອງ​ບຸນ​ໃນ​ຍຸກ​ເສດຖະກິດ​ຝືດ​ນີ້​ເຮົາ​ຄວນ​ຄຳນຶງ​ເຖິງ​ຄຳ​ສອນ​ພະພຸດທະເຈົ້າ​ຢ່າງ​ແທ້​ຈິງ​ເພາະ​ການ​ນຳ​ເອົາ​ຫຼັກ​ທຳ​ມະ​ໄປ​ປະຕິບັດ​ກໍ​ແມ່ນ​ບຸນ​ມະຫາສານ​ແລ້ວ ບໍ່​ຄວນ​ເນັ້ນ​ວັດຖຸ​ຈົນ​ຫຼົງ​ທາງ.

ຂ່າວທີ່ກ່ຽວຂ້ອງ