ເປ​ຕັງ​ລາວ ສ້າງ​ປະຫວັດສາດ​ຄວ້າ 3 ຫຼຽນ​ເງິນ ຊີງ​ແຊັມ​ໂລກ 2019

903 27 ພ.ຈ. 2019 ວົງຈອນກີລາ
ເປ​ຕັງ​ລາວ ສ້າງ​ປະຫວັດສາດ​ຄວ້າ 3 ຫຼຽນ​ເງິນ ຊີງ​ແຊັມ​ໂລກ 2019

  ຄະນະ​ນັກກີລາ​ເປ​ຕັງ​ລາວ ຊຸດ​ສ້າງ​ປະຫວັດສາດ​ຄວ້າ 3 ຫຼຽນ​ເງິນ ຊີງ​ແຊັມ​ໂລກ 2019 ທີ່​ນະຄອນຫຼວງ​ພະນົມ​ເປັນ ປະເທດ​ກຳປູເຈຍ ໃນ​ລະຫວ່າງ​ວັນ​ທີ 18-24 ພະຈິກ 2019 ໄດ້​ເດີນທາງ​ມາ​ເຖິງ ​ສປປ ລາວ ໃນ​ວັນ​ທີ 24 ພະຈິກ 2019 ທີ່​ສະໜາມ​ບິນ​ສາກົນ​ວັດ​ໄຕ ນະຄອນຫຼວງ​ວຽງ​ຈັນ ໂດຍ​ໄດ້​ຮັບ​ການ​ຕ້ອນຮັບ​ຢ່າງ​ອົບ​ອຸ່ນ ຈາກ​ກະຊວງ​ສຶກ​ສາ​ທິ​ການ ແລະ ກີລາ ສະຫະພັນ​ເປ​ຕັງ​ແຫ່ງ​ຊາດ ພໍ່​ແມ່​ພີ່ນ້ອງ​ນັກກີລາ ແລະ ກອງ​ເຊຍ​ຈຳນວນ​ໜຶ່ງ.

    ນັກກີລາ 8 ຄົນ​ເຂົ້າ​ຮ່ວມ​ແຂ່ງຂັນ 4 ລາຍການ​ຄື: ທີມ​ຊຸດ​ຍິງ​ທົ່ວ​ໄປ ຊຸດ​ຕິ້ງ​ຍິງ​ດ່ຽວ ຊຸດ​ຕິ້ງ​ດ່ຽວ​ເຍົາວະ​ຊົນ​ຊາຍ ແລະ ທີມ​ຊຸດ​ເຍົາວະ​ຊົນ​ຊາຍ ຜ່ານ​ການ​ແຂ່ງຂັນ​ເປ​ຕັງ​ລາວ​ຍາດ​ໄດ້ 3 ຫຼຽນ​ເງິນ​ປະຫວັດສາດ​ຈາກ ປະເພດ​ທີມ​ຊຸດ​ຍິງ​ທົ່ວ​ໄປ ທີມ​ຊຸດ​ເຍົາວະ​ຊົນ​ຊາຍ ແລະ ປະເພດ​ຊຸດ​ຕິ້ງ (ຍິງເປົ້າ) ຍິງ ລຸ້ນ​ທົ່ວ​ໄປ ຈາກ​ນາງ ໂບ​ວິ​ລັກ ເທບ​ພະກັນ ສ່ວນ​ປະເພດ​ຊຸດ​ຕິ້ງ​ເຍົາວະ​ຊົນ​ຊາຍ ນ້ອງ ພິມ​ພອນ ວັນນະ​ຈອນ ໄດ້​ອັນ​ດັບ​ທີ 11 ຂອງ​ໂລກ ລາຍການ​ຕໍ່​ໄປ​ນັກກີລາ​ຊຸດ​ນີ້ ຈຳນວນ​ໜຶ່ງ​ຈະ​ເດີນທາງ​ໄປ​ຮ່ວມ​ແຂ່ງຂັນ​ໃນ​ຊີເກມ ຄັ້ງ​ທີ 30 ທີ່​ປະເທດ​ຟີ​ລິບ​ປິນ ໃນ​ວັນ​ທີ 30 ພະຈິກ ຫາ​ວັນ​ທີ 11 ທັນວາ 2019.

    ເປ​ຕັງ​ລາວ​ຊຸດ​ນີ້ ມີ​ທັງ​ໝົດ 11 ຄົນ ໃນ​ນີ້ ເປັນ​ນັກກີລາ 8 ຄົນ ຍິງ 4 ຄົນ 4 ຊາຍ​ຄົນ ຄູ​ເຝິກ 2 ທ່ານ ແລະ ຄະນະ​ນຳ 1 ທ່ານ​ຄື: ທ່ານ ວິລະ​ວັດ ເທບ​ພິ​ທັກ ທ່ານ ວຽງ​ທາ ເຂັມ​ວົງສາ ແລະ ທ່ານ ໂຊກ​ໄຊ ວິນ​ໄລ​ທອງ ເປັນ​ຄູ​ເຝິກ ນັກກີລາ 8 ຄົນ​ປະກອບ​ມີ​ປະເພດ​ຍິງ 4 ຄົນ​ຄື: ນາງ ມະນີ​ວັນ ສຸລິຍາ ນາງ ໂບ​ວິ​ລັກ ເທບ​ພະກັນ ນາງ ຈັນ​ສະໝອນ ວົງ​ສະ​ຫວັດ ແລະ ນາງ ຄູນ ສຸກ​ສະ​ຫວັດ ນັກກີລາ​ຊາຍ​ປະເພດ​ເຍົາວະ​ຊົນ 4 ຄົນ​ຄື: ທ້າວ ພິມ​ພອນ ວັນນະ​ຈອນ ທ້າວ ປີ​ໂນ່ ພັນທະ​ລີ ທ້າວ ສີ​ສົມ​ພອນ ວັນນະ​ຈອນ ແລະ ທ້າວ ສຸທາ​ພອນ ຫອມ​ສົມບັດ.

ຂ່າວທີ່ກ່ຽວຂ້ອງ