ຫວຽດນາມ ຊະນະ ບຣູ​ໄນ 6-0 ເຕະບານ​ຊີເກມ

894 27 ພ.ຈ. 2019 ວົງຈອນກີລາ
 ຫວຽດນາມ ຊະນະ ບຣູ​ໄນ 6-0 ເຕະບານ​ຊີເກມ

    ການ​ແຂ່ງຂັນ​ເຕະບານ​ຊາຍ ໃນ​ງານ​ມະ​ຫະ​ກຳ​ກີລາ​ຊີເກມ ຄັ້ງ​ທີ 30 ທີ່​ປະເທດ​ຟີ​ລິບ​ປິນ ເປີດ​ສາກ​ການ​ແຂ່ງຂັນ​ໃນ​ວັນ​ທີ 25 ພະຈິກ 2019 ກຸ່ມ B ນັດ​ທຳ​ອິດ ທີມ​ຊາດ​ຫວຽດນາມ ໜຶ່ງ​ໃນ​ຕົວ​ເຕັງ​ແຊັມ​ຄັ້ງ​ນີ້ ພົບ​ກັບ ທິມ​ຊາດ​ບຣູ​ໄນ ເຊິ່ງ​ນັດ​ນີ້ ເຈົ້າພາບ​ຍ້າຍ​ສະໜາມ​ແຂ່ງຂັນ​ຈາກ​ສະໜາມ Imus Grandstand and Track Oval ມາ​ເປັນ​ສະໜາມ Biñan Football ໂດຍ​ບໍ່​ຊາບ​ສາເຫດ.

    ສຳລັບ​ຜົນ​ການ​ແຂ່ງຂັນ​ເປັນ​ໄປ​ຕາມ​ຄາດໝາຍ ທີມ​ຊາດ​ຫວຽດນາມ ໄລ່​ເອົາ​ຊະນະ ທີມ​ຊາດ​ບຣູ​ໄນ ໄປ​ແບບ​ຂາດ​ຮອຍ 6-0 ໃນ​ນີ້ ຮ່າ​ດຸກ​ຈິ່ງ ກອງ​ໜ້າ​ດາວ​ເດັ່ນ​ຈາກ​ສະໂມສອນ SHB ດາ​ນັງ ເໝົາ​ຜູ້​ດຽວ 4 ປະຕູ ເຊິ່ງ​ເປົ້າ​ໝາຍ​ຂອງ​ທີມ​ຊາດ​ຫວຽດນາມ​ຊຸດ​ນີ້ ຕ້ອງການ​ຄວ້າ​ຫຼຽນ​ຄຳ​ອີກ​ຄັ້ງ ຫຼັງ​ຈາກ​ບໍ່​ໄດ້​ສຳຜັດ​ມາ 60 ປີ ຫຼ້າ​ສຸດ​ໄດ້​ແຊັມ​ແມ່ນ​ຄັ້ງ​ທຳ​ອິດ​ຂອງ​ການ​ແຂ່ງຂັນ ປີ 1959 ຕອນ​ນັ້ນ​ພາຍ​ໃຕ້​ຊື່​ຫວຽດນາມ​ໃຕ້

    ໃນ​ກຸ່ມ B ນອກຈາກ​ມີ​ຫວຽດນາມ ແລະ ບຣູ​ໄນ ຍັງ​ມີ​ອີກ 5 ທີມ​ຄື: ໄທ ແຊັມ​ເກົ່າ ອິນ​ໂດ​ເນ​ເຊຍ ທີ 3 ຈາກ​ຄັ້ງ​ຜ່ານ​ມາ ​ສປປ ລາວ ແລະ ສິງກະໂປ ນັດ​ຕໍ່​ໄປ​ຂອງ​ກຸ່ມ​ນີ້: ໄທ ພົບ ອິນ​ໂດ​ເນ​ເຊຍ ເວລາ: 15:00 ໂມງ ແລະ ລາວ ພົບ ສິງກະໂປ ເວລາ: 19:00 ໂມງ ໃນ​ວັນ​ທີ 26 ພະຈິກ 2019 ສ່ວນ​ນັດ​ທີ 2 ຂອງ​ທີມ​ຊາດ​ຫວຽດນາມ ຈະ​ພົບ​ກັບ ທີມ​ຊາດ​ລາວ ໃນ​ວັນ​ທີ 28 ພະຈິກ​ນີ້ ເວລາ: 15:00 ໂມງ ສ່ວນ​ຜົນ​ການ​ແຂ່ງຂັນ​ຈະ​ລາຍ​ງານ​ໃຫ້​ຊາບ​ຕື່ມ.

    ສ່ວນ​ຜົນ​ການ​ແຂ່ງຂັນ​ຂອງ​ກຸ່ມ A ຟີ​ລິບ​ປິນ ເຈົ້າພາບ ສະເໝີ ກຳປູເຈຍ 1-1 ແລະ ມາ​ເລ​ເຊຍ ສະເໝີ ມຽນ​ມາ 1-1.

ຂ່າວທີ່ກ່ຽວຂ້ອງ