ແກຣນ​ສະປອດ ສະໜັບສະໜູນ ​ສຕລ ປີ 2019-2022

1.273 27 ພ.ຈ. 2019 ວົງຈອນກີລາ
ແກຣນ​ສະປອດ ສະໜັບສະໜູນ ​ສຕລ ປີ 2019-2022

    ແກຣນ​ສະປອດ ຜູ້​ຜະລິດ ແລະ ຈຳໜ່າຍ​ເສື້ອ​ຜ້າ​ກີລາ ແລະ ອຸປະກອນ​ກີລາ ອັນ​ດັບ​ຕົ້ນໆ​ຂອງ​ອາ​ຊຽນ ໄດ້​ລົງ​ນາມ​ເຊັນ​ສັນຍາ​ສະໜັບສະໜູນ ສະຫະພັນ​ບານເຕະ​ແຫ່ງ​ຊາດ​ລາວ (​ສຕລ) ໃນ​ການ​ອອກ​ແບບ​ຜະລິດ​ຕະ​ພັນ​ຊຸດ​ແຂ່ງຂັນ ຊຸດ​ເຝິກຊ້ອມ ຊຸດ​ເດີນທາງ ແລະ ໝາກບານ ໃຫ້​ກັບ​ນັກກີລາ ແລະ ຄະນະ​ຮັບຜິດຊອບ ລວມ​ໄປ​ເຖິງ​ບັນດາ​ເຈົ້າ​ໜ້າທີ່ ແລະ ພະນັກງານ​ທີ່​ກ່ຽວຂ້ອງ​ກັບ​ການ​ແຂ່ງ ຂັນ​ໃນ​ນາມ ​ສຕລ ຕັ້ງແຕ່​ປີ 2019-2022.

    ທ່ານ ວີ​ເພັດ ວີ​ຫາ​ຈັກ ປະທານ ​ສຕລ ໄດ້​ກ່າວ​ວ່າ: ​ສຕລ ຂໍ​ສະແດງ​ຄວາມ​ຂອບໃຈ​ມາ​ຍັງ​ແກຣນ​ສະປອດ ທີ່​ໄດ້​ໃຫ້ການ​ສະໜັບສະໜູນ ​ສຕລ ໃນ​ວາລະ 4 ປີ ຕັ້ງແຕ່​ປີ 2019-2022 ແກຣນ​ສະປອດ ເປັນ​ແບຣນ​ທີ່​ໄດ້​ຮັບ​ການ​ຍອມຮັບ​ໃນ​ລະດັບ​ນາໆຊາດ​ວ່າ​ເປັນ​ສິນຄ້າ​ທີ່​ມີ​ຄວາມ​ໂດດ​ເດັ່ນ ທັງ​ໃນ​ດ້ານ​ຄວາມ​ສວຍ​ງາມ ແລະ ຄຸນ​ນະ​ພາບ ໂດຍ​ທາງ ​ສຕລ ໄດ້​ຮ່ວມ​ກັບ ແກຣນ​ສະປອດ ໃນ​ການ​ອອກ​ແບບ ແລະ ພັດທະນາ​ຊຸດ​ແຂ່ງຂັນ​ທີມ​ຊາດ​ລາວ​ໃຫ້​ມີ​ລວດລາຍ​ສະເພາະ ເຊິ່ງ​ຜົນງານ​ອອກ​ມາ​ມີ​ຄວາມ​ສວຍ​ງາມ ແລະ ຄຸນ​ນະ​ພາບ​ດີເລີດ​ຕາມ​ມາດຕະຖານ​ຂອງ​ແກຣນ​ສະປອດ.

    ທ່ານ ທາ​ຣາ ພົນ​ສະ​ອຸ່ມ ຮອງ​ປະທານ​ຜູ້ອຳນວຍການ ບໍລິສັດ​ໃນ​ເຄືອ​ແກຣນ​ສະປອດ ໄດ້​ກ່າວ​ວ່າ: ທາງ​ພວກ​ເຮົາ​ມີ​ຄວາມ​ປິ​ຕິ​ຍິນ​ດີ ແລະ ຮູ້ສຶກ​ເປັນ​ກຽດ​ຢ່າງ​ຢິ່ງ​ທີ່​ແກຣນ​ສະປອດ ໄດ້​ຮັບ​ຄວາມ​ໄວ້​ວາງໃຈ​ຈາກ ​ສຕລ ໃຫ້​ເປັນ​ຜູ້​ສະໜັບສະໜູນ​ຫຼັກ​ຢ່າງ​ເປັນ​ທາງ​ການ ໃນ​ດ້ານ​ການ​ອອກ​ແບບ ແລະ ຜະລິດ​ຊຸດ​ແຂ່ງຂັນ ສຳລັບ​ໃຊ້​ເຂົ້າ​ໃນ​ລາຍການ​ຕ່າງໆ​ທີ່​ສຳຄັນໆ​ທັງ​ພາຍ​ໃນ ແລະ ຕ່າງປະເທດ ທີ່​ຈະ​ສ້າງ​ປະ​ຫັວດ​ສາດ​ໃຫ້​ກັບ​ວົງ​ການ​ບານເຕະ​ລາວ ໂດຍ​ບໍລິສັດ​ໄດ້​ເລັງ​ເຫັນ​ເຖິງ​ຄວາມ​ສຳຄັນ​ຂອງ​ການ​ພັດທະນາ​ຊຸດ​ກີລາ​ໃນ​ດ້ານ​ການ​ອອກ​ແບບ ແລະ ການ​ຄັດ​ເລືອກ​ວັດຖຸ​ດິບ ເພື່ອ​ສົ່ງເສີມ​ຂີດ​ຄວາມ​ສາມາດ​ຂອງ​ນັກກີລາ​ໃຫ້​ມີ​ປະສິດ​ຕິ​ພາບ ແລະ ປະສິດ​ຕິ​ຜົນ​ສູງ​ສຸດ​ໃນ​ການ​ແຂ່ງຂັນ.

    ສຳລັບ​ຊຸດ​ແຂ່ງຂັນ​ກີລາ​ບານເຕະ​ຂອງ​ທີມ​ຊາດ​ລາວ ຊຸດ​ໃໝ່ ປີ 2020 ແມ່ນ​ໄດ້​ຮັບ​ແຮງ​ບັນດານ​ໃຈ​ມາ​ຈາກ​ລາຍ​ຜ້າໄໝ​ພື້ນເມືອງ​ລາວ ເຊິ່ງ​ເປັນ​ສ່ວນ​ໜຶ່ງ​ຂອງ​ມໍລະດົກ​ທາງ​ວັດທະນະທຳ​ຂອງ​ຊາດ​ລາວ ເຊິ່ງ​ໄດ້​ປັບ​ແປງ​ໃຫ້​ກາຍເປັນ​ກຣາ​ຟິກ​ທີ່​ທັນ​ສະໄໝ ແລະ ໂດດ​ເດັ່ນ ຊຸດ​ແຂ່ງຂັນ​ແມ່ນ​ມີ 2 ສີ​ຄື: ສີແດງ ແລະ ສີຂາວ ເຊິ່ງ​ເປັນ​ສີ​ຂອງ​ທຸງຊາດ​ລາວ ເຊິ່ງ​ເປັນ​ສັນຍາ​ລັກ​ໜຶ່ງ​ທີ່​ບົ່ງ​ບອກ​ເຖິງ​ຄວາມ​ເປັນ​ຊາດ ຄວາມ​ພູມໃຈ ແລະ ຄວາມ​ສາມັກຄີ​ອັນ​ເປັນ​ຈິດ​ໜຶ່ງ​ໃຈ​ດຽວ​ກັນ​ຂອງ​ຄົນ​ລາວ.

ຂ່າວທີ່ກ່ຽວຂ້ອງ