ຂ່າວຫຼ້າສຸດ

ຮັບປະກັນໃຫ້ຜູ້ອອກແຮງງານ ໄດ້ຮັບການກວດສຸຂະພາບ 1 ຄັ້ງຕໍ່ປີ

890 27 ພ.ຈ. 2019 ຂ່າວໜ້າ​ໜຶ່ງ

   ກົມ​ຄຸ້ມ​ຄອງ​ແຮງ​ງານ ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ (ຮສສ) ຈັດ​ຖະ­ແຫຼງ​ຂ່າວ​ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ດຳ­ລັດ ວ່າ​ດ້ວຍ​ຄວາມ​ປອດ​ໄພ ແລະ ສຸ­ຂະ­ພາບ​ແຮງ​ງານ ລົງ​ເລິກ​ເອົາ­ໃຈ­ໃສ່​ດ້ານ​ສຸ­ຂະ­ພາບ​ແຮງ​ງານ ຂຶ້ນ​ວັນ​ທີ 25 ພະ­ຈິກ 2019 ຢູ່​ກອງ​ທຶນ​ປະ­ກັນ​ສັງ­ຄົມ​ແຫ່ງ​ຊາດ ໂດຍ​ການ​ຖະ­ແຫຼງ​ຂອງ​ທ່ານ ພົງ​ໄຊ​ສັກ ອິນ​ຖາ​ລາດ ຫົວ­ໜ້າ​ກົມ​ຄຸ້ມ​ຄອງ​ແຮງ​ງານ ມີ​ທ່ານ ສະ­ໜອງ ທອງ​ຊະ­ນະ ຜູ້­ອຳ­ນວຍ­ການ​ໂຮງ­ໝໍ​ມິດ­ຕະ­ພາບ ທ່ານ ພອນ​ສານ ວິ­ໄລ​ເມັ້ງ ຫົວ­ໜ້າ​ກົມ​ປົກ​ປ້ອງ​ແຮງ​ງານ ສູນ​ກາງ​ສະ­ຫະ­ພັນ​ກຳ­ມະ­ບານ​ລາວ ທ່ານ​ນາງ ສຸ​ໄພ​ວັນ ທ່ຽງ​ຈັນ​ໄຊ ຄະ­ນະ​ທີ່​ປຶກ­ສາ​ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ​ລາວ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

   ທ່ານ ພົງ​ໄຊ​ສັກ ອິນ​ຖາ​ລາດ ກ່າວ​ວ່າ: ວຽກ​ງານ​ດ້ານ​ຄວາມ​ປອດ​ໄພ ແລະ ສຸ­ຂະ­ພາບ ແມ່ນ​ການ​ປ້ອງ​ກັນ​ການ​ຫຼຸດ ຜ່ອນ​ຄວາມ​ສ່ຽງ​ຈາກ​ການ​ເກີດ​ອຸ­ບັດ­ເຫດ​ແຮງ​ງານ ແລະ ເປັນ​ພະ­ຍາດ​ອາ­ຊີບ ພ້ອມ​ນີ້ ຍັງ​ແມ່ນ​ການ​ມອບ​ຄວາມ​ຮັບ­ຜິດ­ຊອບ​ໃນ​ການ​ເບິ່ງ­ແຍງ​ຊ່ວຍ­ເຫຼືອ​ບັນ­ເທົາ​ທຸກ​ໃຫ້​ຜູ້​ໄດ້​ຮັບ​ເຄາະ​ຮ້າຍ ຈາກ​ການ​ເກີດ​ອຸ­ບັດ­ເຫດ ແລະ ພະ­ຍາດ​ດັ່ງ­ກ່າວ ທັງ​ເປັນ​ການ​ຫຼຸດ­ຜ່ອນ​ການ​ສູນ​ເສຍ​ຊັບ​ສິນ ແລະ ທຸ­ລະ​ກິດ​ຂອງ​ຜູ້​ລົງ­ທຶນ ຫຼາຍ​ປະ­ເທດ​ໃນ​ໂລກ​ຖື​ວຽກ​ງານ​ຄວາມ​ປອດ​ໄພ​ແຮງ​ງານ​ເປັນ​ບຸ­ລິ­ມະ­ສິດ​ໃນ​ຂະ​ບວນ​ການ​ຜະ­ລິດ ແລະ ການ​ບໍ­ລິ­ການ ເຊິ່ງ​ລ້ວນ​ແຕ່​ມີ​ສະ​ຖາ​ບັນ ຫຼື ການ­ຈັດ­ຕັ້ງ (ກະ­ຊວງ ກົມ ສູນ) ທີ່​ມີ​ປະ​ສິດ­ທິ​ຜົນ ມີ​ກົດ­ໝາຍ ແລະ ລະ­ບຽບ​ການ​ລະ­ອຽດ​ຮັດ­ກຸມ​ເຂັ້ມ​ງວດ​ໃນ​ການ​ບັງ­ຄັບ​ໃຊ້.

   ລັດ­ຖະ­ບານ​ລາວ ໄດ້​ອອກ­ດຳ­ລັດ ວ່າ​ດ້ວຍ​ຄວາມ​ປອດ​ໄພ ແລະ ສຸ­ຂະ­ພາບ​ແຮງ​ງານ ໃນ​ຕົ້ນ​ປີ 2019 ດຳ­ລັດ​ດັ່ງ­ກ່າວ​ປະ­ກອບ​ມີ ເນື້ອ​ໃນ​ສຳ­ຄັນ​ໃຫ້​ວຽກ​ງານ​ຄວາມ​ປອດ​ໄພ ແລະ ສຸ­ຂະ­ພາບ​ແຮງ​ງານ ເຊິ່ງ​ໄດ້​ກຳ­ນົດ​ລະ­ອຽດ​ສິດ ແລະ ຄວາມ​ຮັບ­ຜິດ­ຊອບ​ຂອງ​ທັງ​ຜູ້​ອອກ­ແຮງ​ງານ ແລະ ຜູ້​ໃຊ້​ແຮງ​ງານ ກຳ­ນົດ ຫຼື ແບ່ງ​ຄວາມ​ຮັບ­ຜິດ­ຊອບ​ຊັດ​ເຈນ ລະ­ຫວ່າງ ອົງ­ການ​ລັດ ອົງ​ການ­ຈັດ­ຕັ້ງ​ມະ­ຫາ­ຊົນ ກຳ­ນົດ​ການ­ຈັດ­ຕັ້ງ ແລະ ການ­ເຄື່ອນ­ໄຫວ​ຂອງ​ສູນ​ຄວາມ​ປອດ​ໄພ ແລະ ສຸ­ຂະ­ພາບ​ແຮງ​ງານ ກຳ­ນົດ​ໃຫ້​ບຸກ­ຄົນ ນິ­ຕິ­ບຸກ­ຄົນ​ມີ​ສ່ວນ​ຮ່ວມ ແລະ ສາ­ມາດ​ລົງ­ທຶນ​ໃນ​ວຽກ​ງານ​ດ້ານ​ຄວາມ​ປອດ​ໄພ ສຸ­ຂະ­ພາບ​ແຮງ​ງານ ແລະ ອື່ນໆ.

   ເພື່ອ​ປ້ອງ​ກັນ​ພະ­ຍາດ​ອາ­ຊີບ ທີ່​ອາດ​ຈະ​ເກີດ​ຂຶ້ນ​ກັບ​ຜູ້​ອອກ­ແຮງ​ງານ ລັດ­ຖະ­ບານ​ໄດ້​ສ້າງ​ກົນ​ໄກ​ເພື່ອ​ປ້ອງ​ກັນ​ສຸ­ຂະ­ພາບ ເພື່ອ​ຮັບ​ຮູ້​ຂໍ້​ມູນ​ກ່ຽວ​ກັບ​ພະ­ຍາດ​ອາ­ຊີບ​ຂອງ​ຜູ້​ອອກ­ແຮງ​ງານ ເຖິງ​ວ່າ​ຈະ​ບໍ່​ສາ­ມາດ​ປ້ອງ​ກັນ​ໄດ້ ຢ່າງ​ໜ້ອຍ​ຜູ້​ທີ່​ໄດ້​ຮັບ​ເຄາະ​ກໍ​ຄວນ​ໄດ້​ຮັບ​ການ​ເບິ່ງ­ແຍງ​ດູ​ແລ ແລະ ຊ່ວຍ­ເຫຼືອ​ສ່ວນ​ໃດ​ສ່ວນ​ໜຶ່ງ​ຈາກ​ອົງ­ການ​ທີ່​ກ່ຽວ­ຂ້ອງ ລວມ​ທັງ​ຜູ້​ທີ່​ໃຊ້​ແຮງ​ງານ ກົດ­ໝາຍ ວ່າ​ດ້ວຍ​ແຮງ​ງານ ຈຶ່ງ​ກຳ­ນົດ​ໃຫ້​ຜູ້​ໃຊ້​ແຮງ​ງານ​ຕ້ອງ​ຮັບ­ປະ­ກັນ​ໃຫ້​ຜູ້​ອອກ­ແຮງ​ງານ​ທີ່​ເຮັດ​ວຽກ​ນຳ​ຕົນ ໄດ້​ຮັບ​ການ​ກວດ​ສຸ­ຂະ­ພາບ​ຢ່າງ​ໜ້ອຍ​ໜຶ່ງ​ຄັ້ງ​ຕໍ່​ປີ ດຳ­ລັດ​ວ່າ​ດ້ວຍ​ຄວາມ​ປອດ​ໄພ ແລະ ສຸ­ຂະ­ພາບ​ແຮງ​ງານ ກຳ­ນົດ​ໃຫ້​ຜູ້​ໃຊ້​ແຮງ​ງານ​ຮັບ​ຜິດ ຊອບ​ຄ່າ​ກວດ ແລະ ກວດ​ໃນ​ສະ­ຖານ­ທີ່​ສະ­ເພາະ​ກວດ​ສຸ­ຂະ­ພາບ​ແຮງ​ງານ ທີ່​ມີ​ຄວາມ​ຊ່ຽວ­ຊານ​ສະ­ເພາະ ມີ​ເຄື່ອງ­ມື​ອຸ­ປະ­ກອນ ມີ​ຖານ​ຂໍ້​ມູນ​ເກັບ​ກຳ​ສະ­ພາບ​ສຸ­ຂະ­ພາບ​ຂອງ​ຜູ້​ອອກ­ແຮງ​ງານ.

ຂ່າວທີ່ກ່ຽວຂ້ອງ