ຜັນຂະຫຍາຍໂຄງການສຸຂະພາບດີໃນໂຮງຮຽນ ໄລຍະ III

1.594 27 ພ.ຈ. 2019 ຂ່າວໜ້າ​ໜຶ່ງ

   ພິ­ທີ​ລົງ​ນາມ​ບົດ​ບັນ­ທຶກ​ຄວາມ​ເຂົ້າ­ໃຈ ກ່ຽວ​ກັບ​ການ​ຜັນ​ຂະ­ຫຍາຍ​ໂຄງ­ການ​ສຸ­ຂະ­ພາບ​ດີ​ໃນ​ໂຮງ­ຮຽນ ໄລ­ຍະ III ຢູ່ ສປປ ລາວ ຈັດ​ຂຶ້ນ​ວັນ​ທີ 25 ພະ­ຈິກ 2019 ຢູ່​ນະ­ຄອນ­ຫຼວງ​ວຽງ​ຈັນ ລະ­ຫວ່າງ​ທ່ານ​ນາງ ສີ​ລິນ​ທອນ ວ່າ­ການ​ຫົວ­ໜ້າ​ກົມ​ພົວ­ພັນ​ຕ່າງ­ປະ­ເທດ ກະ­ຊວງ​ສຶກ​ສາ​ທິ​ການ ແລະ ກີ­ລາ (ສສກ) ທ່ານ ຣາ​ມອນ​ຊີ ບາ​ກາ​ນີ ຜູ້­ອຳ­ນວຍ­ການ​ອົງ­ການ SEAMO INNOTECH ແລະ ທ່ານ ອາ​ເລັກ​ຊານ​ເດີ ວີນ​ຊາ ຜູ້​ປະ­ສານ​ງານ​ອົງ­ການ GIZ ປະ­ຈຳ​ລາວ ມີ​ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

   ໂຄງ­ການ​ສຸ­ຂະ­ພາບ​ດີ​ໃນ​ໂຮງ­ຮຽນ ໄດ້​ຮັບ​ທຶນ​ຈາກ​ລັດ­ຖະ­ບານ​ເຢຍ​ລະ​ມັນ ກະ­ຊວງ​ເສດ­ຖະ­ກິດ ແລະ ການ​ຮ່ວມ​ມື​ເພື່ອ​ການ​ພັດ­ທະ­ນາ ໂດຍ​ການ­ຈັດ­ຕັ້ງ​ປະ­ຕິ­ບັດ​ຂອງ​ອົງ­ການ GIZ ເຊິ່ງ​ໄດ້​ຈັດ​ຕັ້ງ​ປະ ຕິ​ບັດ​ຢູ່​ປະ­ເທດ​ຟີ​ລິບ​ປີນ ລາວ ກຳ­ປູ­ເຈຍ ແລະ ອິນ​ໂດ​ເນ​ເຊຍ ໂຄງ­ການ​ນີ້​ໄດ້​ສະ­ໜັບ­ສະ­ໜູນ​ດ້ານ​ວິ ຊາ​ການ​ໃຫ້​ກະ­ຊວງ ສສກ ແຕ່​ປີ 2011 ເປັນ­ຕົ້ນ​ມາ ໂດຍ​ຈັດ​ຕັ້ງ​ປະ­ຕິ­ບັດ​ໃນ​ໂຮງ­ຮຽນ​ປະ­ຖົມ​ຂອງ​ລັດ 22 ແຫ່ງ ຢູ່​ນະ­ຄອນ­ຫຼວງ​ວຽງ​ຈັນ ປັດ­ຈຸ­ບັນ ໄດ້​ຜັນ​ຂະ­ຫຍາຍ​ອອກ 2.700 ໂຮງ­ຮຽນ​ປະ­ຖົມ​ທົ່ວ​ປະ­ເທດ ແລະ ສ້າງ​ຜົນ​ປະ­ໂຫຍດ​ໃຫ້​ນັກ­ຮຽນ​ເຖິງ 235.000 ຄົນ ນອກ​ນີ້ ໂຮງ­ຮຽນ​ມັດ­ທະ­ຍົມ 140 ແຫ່ງ ແລະ ໂຮງ­ຮຽນ​ກ່ອນ​ໄວ​ຮຽນ 500 ກວ່າ​ແຫ່ງ ກໍ​ໄດ້​ຈັດ​ຕັ້ງ​ປະ­ຕິ­ບັດ​ເຊັ່ນ​ດຽວ​ກັນ.

   ໂຄງ­ການ​ນີ້ ໄດ້​ເຮັດ​ໃຫ້­ການ​ບໍ­ລິ­ຫານ​ໂຮງ­ຮຽນ​ມີ​ຄວາມ​ເຂັ້ມ­ແຂງ ໂດຍ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ນ້ຳ ສຸ­ຂາ­ພິ­ບານ ແລະ ອະ­ນາ­ໄມ​ຢູ່​ໃນ​ໂຮງ­ຮຽນ ເຊິ່ງ​ລວມ​ເອົາ​ກິດ­ຈະ­ກຳ​ລ້າງ​ມື​ໃສ່​ສະ­ບູ ຖູ­ແຂ້ວ​ໃສ່​ຢາ­ຖູ­ແຂ້ວ​ທີ່​ມີ ຟຣູ​ອໍ​ຣາຍ ແລະ ການ​ຢາຍ​ຢາ​ຂ້າ​ແມ່​ທ້ອງ ເພື່ອ​ປ້ອງ​ກັນ​ການ​ຕິດ­ແປດ​ພະ­ຍາດ ແລະ ຫຼຸດ­ຜ່ອນ​ການ​ຂາດ​ໂຮງ­ຮຽນ​ຂອງ​ນັກ­ຮຽນ ເພື່ອ​ແນ­ໃສ່​ການ​ປັບ­ປຸງ​ການ​ເຂົ້າ​ເຖິງ​ນ້ຳ ສິ່ງ​ອຳ­ນວຍ​ຄວາມ​ສະ­ດວກ ແລະ ສຸ­ຂາ­ພິ­ບານ ເຊິ່ງ​ບັນ­ດາ​ຈຸດ​ກຳ­ນົດ​ທີ່​ສຳ­ຄັນ​ດ້ານ​ສຸ­ຂະ­ພາບ ໄດ້​ຖືກ​ຈັດ​ຕັ້ງ​ປະ­ຕິ­ບັດ​ເປັນ​ຊຸດ ໂຄງ­ການ​ສຸ­ຂະ­ພາບ​ດີ​ໃນ​ໂຮງ­ຮຽນ ຍັງ​ໄດ້​ສຸມ​ໃສ່​ການ­ຈັດ­ຕັ້ງ​ປະ­ຕິ­ບັດ​ແບບ​ງ່າຍ­ດາຍ ຜັນ​ຂະ­ຫຍາຍ​ໄດ້ ມີ​ຄວາມ​ຍືນ​ຍົງ ແລະ ເຂົ້າ​ໃນ​ລະ­ບົບ​ຂອງ​ກະ­ຊວງ​ສຶກ​ສາ ເຊິ່ງ​ໂຄງ­ການ ໄລ­ຍະ III ນີ້ ຈະ​ຈັດ​ຕັ້ງ​ປະ­ຕິ­ບັດ​ນັບ​ແຕ່​ມື້​ລົງ​ນາມ ເຖິງ​ທ້າຍ​ປີ 2021.

ຂ່າວທີ່ກ່ຽວຂ້ອງ