ຮັບຮອງເອົາຮ່າງກົດໝາຍວ່າດ້ວຍການຟື້ນຟູ ແລະ ການລົ້ມລະລາຍຂອງວິສາຫະກິດສະບັບປັບປຸງ

1.689 27 ພ.ຈ. 2019 ຂ່າວໜ້າ​ໜຶ່ງ

   ກອງ​ປະ­ຊຸມ​ສະ­ໄໝ​ສາ­ມັນ ເທື່ອ​ທີ 8 ຂອງ​ສະ­ພາ​ແຫ່ງ​ຊາດ ຊຸດ​ທີ VIII ວັນ​ທີ 26 ພະ­ຈິກ 2019 ຢູ່​ສະ­ພາ​ແຫ່ງ​ຊາດ (ຫຼັກ 6) ໂດຍ​ເປັນ​ປະ­ທານ​ຂອງ​ທ່ານ​ນາງ ປາ­ນີ ຢາ​ທໍ່​ຕູ້ ປະ­ທານ​ສະ­ພາ​ແຫ່ງ​ຊາດ ມີ​ບັນ­ດາ​ຮອງ​ປະ­ທານ​ສະ­ພາ​ແຫ່ງ​ຊາດ ທ່ານ ໄຊ​ສີ ສັນ­ຕິ​ວົງ ລັດ­ຖະ­ມົນ­ຕີ​ກະ­ຊວງ​ຍຸ­ຕິ​ທຳ ພ້ອມ​ດ້ວຍ​ສະ­ມາ­ຊິກ​ສະ­ພາ​ແຫ່ງ​ຊາດ (ສສຊ) ແຕ່​ລະ​ເຂດ​ເລືອກ​ຕັ້ງ ເຂົ້າ​ຮ່ວມ.

   ທ່ານ ໄຊ​ສີ ສັນ­ຕິ​ວົງ ໄດ້​ສະ­ເໜີ​ຮ່າງ​ກົດ­ໝາຍ ວ່າ​ດ້ວຍ​ການ​ຟື້ນ​ຟູ ແລະ ການ​ລົ້ມ​ລະ­ລາຍ​ຂອງ​ວິ​ສາ​ຫະ​ກິດ (ສະ­ບັບ​ປັບ­ປຸງ) ວ່າ: ກົດ­ໝາຍ​ວ່າ​ດ້ວຍ​ການ​ລົ້ມ​ລະ­ລາຍ​ຂອງ​ວິ​ສາ​ຫະ​ກິດ​ໄດ້​ຖືກ​ຮັບ­ຮອງ ແລະ ປະ­ກາດ​ໃຊ້ ໃນ​ປີ 1994 ເຊິ່ງ​ກົດ­ໝາຍ​ສະ­ບັບ​ນີ້​ເກືອບ​ວ່າ​ບໍ່​ໄດ້​ຮັບ​ການ­ຈັດ­ຕັ້ງ​ປະ­ຕິ­ບັດ ເຫດ­ຜົນ​ຍ້ອນ​ເນື້ອ​ໃນ​ຂອງ​ກົດ­ໝາຍ​ຍັງ​ບໍ່​ລະ­ອຽດ ຈະ­ແຈ້ງ ມີ​ຄວາມ​ຄຸມ​ເຄືອ ບໍ່​ສອດ­ຄ່ອງ​ກັບ​ສະ­ພາບ​ຄວາມ​ເປັນ​ຈິງ ຂອງ​ການ​ຂະ­ຫຍາຍ­ຕົວ​ດ້ານ​ເສດ­ຖະ­ກິດ-ສັງ­ຄົມ ແລະ ບໍ່​ເຊື່ອມ​ໂຍງ​ກັບ​ພາກ​ພື້ນ ແລະ ສາ­ກົນ ຍ້ອນ​ລະ­ບົບ​ກົດ­ໝາຍ​ການ​ຄຸ້ມ​ຄອງ​ເປັນ​ຄື​ດັ່ງ­ກ່າວ ເຮັດ​ໃຫ້​ຫຼາຍ​ວິ​ສາ​ຫະ​ກິດ​ທີ່​ພົບ​ບັນ­ຫາ​ດ້ານ​ການ​ເງິນ ໄລ­ຍະ​ຜ່ານ​ມາ​ໄດ້​ສະ­ຫຼາຍ​ຕົວ​ແບບ​ບໍ່​ມີ​ການ​ຊຳ­ລະ​ສະ​ສາງ​ຕາມ​ກົດ­ໝາຍ ເຮັດ​ໃຫ້​ເກີດ​ສະ­ພາບ​ທີ່​ບໍ່​ສາ­ມາດ​ຄາດ​ຄະ­ເນ​ໄດ້ ໃນ​ການ​ສະ­ໜອງ​ທຶນ​ແກ່​ວິ​ສາ​ຫະ​ກິດ​ຕ່າງໆ ພາ­ໃຫ້​ເກີດ​ຄວາມ​ສ່ຽງ​ສູງ​ໃນ​ການ​ດຳ ເນີນ​ທຸ­ລະ​ກິດ ແລະ ມີ​ຄວາມ​ບໍ່​ໝັ້ນ​ໃຈ​ໃນ​ການ​ປ່ອຍ​ສິນ​ເຊື່ອ ໂດຍ​ສະ­ເພາະ ວິ​ສາ​ຫະ​ກິດ​ຂະ­ໜາດ​ນ້ອຍ ແລະ ຈຸນ​ລະ­ວິ​ສາ​ຫະ​ກິດ ທີ່​ບໍ່​ມີ​ຊັບ​ຄ້ຳ­ປະ­ກັນ ກະ­ຊວງ​ຍຸ­ຕິ​ທຳ​ຈຶ່ງ​ໄດ້​ເປັນ​ເຈົ້າ​ການ​ປະ­ສານ​ສົມ­ທົບ​ກັບ​ພາກ­ສ່ວນ​ກ່ຽວ­ຂ້ອງ ປັບ­ປຸງ​ກົດ ໝາ­ຍວ່າ​ດ້ວຍ​ການ​ລົ້ມ​ລະ­ລາຍ​ຂອງ​ວິ​ສາ​ຫະ​ກິດ​ສະ­ບັບ​ດັ່ງ­ກ່າວ ໃຫ້​ສອດ­ຄ່ອງ​ກັບ​ການ​ຂະ­ຫຍາຍ­ຕົວ​ທາງ​ດ້ານ​ເສດ­ຖະ­ກິດ-ສັງ­ຄົມ ສະ­ພາບ​ຄວາມ​ເປັນ​ຈິງ​ຂອງ​ປະ­ເທດ ເປັນ​ເຄື່ອງ­ມື​ຊຸກ­ຍູ້-ສົ່ງ­ເສີມ ແລະ ດຶງ​ດູດ​ການ​ລົງ­ທຶນ​ຈາກ​ພາຍ​ໃນ ແລະ ຕ່າງ­ປະ­ເທດ ສ້າງ​ເງື່ອນ­ໄຂ​ອຳ­ນວຍ​ຄວາມ​ສະ­ດວກ​ໃຫ້​ຜູ້​ດຳ­ເນີນ​ທຸ­ລະ​ກິດ ຫຼື ຫົວ­ໜ່ວຍ​ວິ​ສາ​ຫະ​ກິດ​ຫັນ​ມາ​ນຳ​ໃຊ້​ຂະ​ບວນ​ການ​ຟື້ນ​ຟູ ແລະ ລົ້ມ​ລະ­ລາຍ ເພື່ອ​ແກ້​ໄຂ​ບັນ­ຫາ​ທາງ​ການ​ເງິນ ພ້ອມ​ທັງ​ສ້າງ​ຄວາມ​ໝັ້ນ­ຄົງ​ໃຫ້​ລະ­ບອບ​ເສດ­ຖະ­ກິດ​ຂອງ ສປປ ລາວ.

   ການ​ປັບ­ປຸງ​ກົດ­ໝາຍ​ດັ່ງ­ກ່າວ​ເທື່ອ​ນີ້ ເປັນ​ການ​ປັບ­ປຸງ​ໃຫຍ່ ນັບ​ແຕ່​ຊື່​ກົດ­ໝາຍ​ເຊິ່ງ​ໄດ້​ປ່ຽນ​ຈາກ​ກົດ­ໝາຍ ວ່າ​ດ້ວຍ​ການ​ລົ້ມ​ລະ­ລາຍ​ຂອງ​ວິ​ສາ​ຫະ​ກິດ ມາ​ເປັນ​ກົດ­ໝາຍ​ວ່າ​ດ້ວຍ​ການ​ຟື້ນ​ຟູ ແລະ ການ​ລົ້ມ​ລະ­ລາຍ​ຂອງ​ວິ​ສາ​ຫະ​ກິດ ໂຄງ​ປະ­ກອບ​ຂອງ​ຮ່າງ​ກົດ­ໝາຍ​ຈາກ 9 ໝວດ 56 ມາດ­ຕາ ມາ​ເປັນ 11 ພາກ 103 ມາດ­ຕາ ໃນ​ນີ້ ປັບ­ປຸງ 35 ມາດ­ຕາ ແລະ ເພີ່ມ​ໃໝ່ 68 ມາດ­ຕາ ແລະ ໄດ້​ປັບ­ປຸງ​ເນື້ອ​ໃນ​ຈຳ­ນວນ​ໜຶ່ງ.

   ພາຍ­ຫຼັງ​ຮັບ​ຟັງ​ການ​ສະ­ເໜີ​ຂອງ​ທ່ານ​ລັດ­ຖະ­ມົນ­ຕີ​ກະ­ຊວງ​ຍຸ­ຕິ​ທຳ ເພື່ອ​ເຮັດ​ໃຫ້​ເນື້ອ​ໃນ​ຮ່າງ​ກົດ­ໝາຍ​ສະ­ບັບ​ປັບ­ປຸງ​ດັ່ງ­ກ່າວ​ມີ​ເນື້ອ​ໃນ​ທີ່​ຄົບ​ຖ້ວນ ສົມ­ບູນ ແລະ ສອດ­ຄ່ອງ​ກັບ​ສະ­ພາບ​ຄວາມ​ເປັນ​ຈິງ ບັນ­ດາ ສສຊ ໄດ້​ພ້ອມ​ກັນ​ປະ­ກອບ​ຄຳ​ຄິດ​ຄຳ​ເຫັນ​ຢ່າງ​ກົງ​ໄປ​ກົງ​ມາ ໂດຍ​ສະ­ເພາະ ຊື່ ແລະ ເນື້ອ​ໃນ​ຂອງ​ກົດ­ໝາຍ ເຊິ່ງ​ຜ່ານ​ການ​ປະ­ກອບ​ຄຳ​ຄິດ​ຄຳ​ເຫັນ​ສຳ­ເລັດ​ແລ້ວ ບັນ­ດາ ສສຊ ໄດ້​ເຫັນ​ດີ​ເປັນ​ເອ­ກະ​ພາບ​ຮັບ­ຮອງ​ເອົາ​ຮ່າງ​ກົດ­ໝາຍ ວ່າ​ດ້ວຍ​ການ​ຟື້ນ​ຟູ ແລະ ການ​ລົ້ມ​ລະ­ລາຍ​ຂອງ​ວິ​ສາ​ຫະ​ກິດ (ສະ­ບັບ​ປັບ­ປຸງ) ດ້ວຍ​ຄະ­ແນນ​ສຽງ​ສ່ວນ​ຫຼາຍ.

ຂ່າວທີ່ກ່ຽວຂ້ອງ