ເບິ່ງບ້ານເຂົາເອົາບົດຮຽນ 27-11-2019

1.297 27 ພ.ຈ. 2019 ຫົວຂໍ້ຂ່າວອື່ນໆ

   ມື້­ນີ້​ມີ 3 ເລື່ອງ​ທີ່​ສັນ​ຫາ​ມາ​ເລົ່າ ຄື: ເລື່ອງ​ກົດ­ໝາຍ​ລົງ­ໂທດ​ໃນ​ຄະ­ດີ​ຂົ່ມ­ຂືນ​ເດັກ​ຍິງ ສປ ຈີນ ກົດ­ໝາຍ​ປ້ອງ​ກັນ​ໂຄງ​ລ່າງ​ຂໍ້​ມູນ​ຂ່າວ­ສານ ຢູ່​ຣັດ​ເຊຍ ແລະ ສຸດ​ທ້າຍ ແມ່ນ​ກ່ຽວ​ກັບ​ຂໍ້​ຄິດ​ດີໆຈາກ ສສຊ ມຽນ​ມາ ເລື່ອງ​ການ​ເສຍ​ພາ­ສີ.

   ທີ່ ສປ ຈີນ: ຄະ­ດີ​ຂົ່ມ­ຂືນ​ຝືນ​ໃຈ​ເດັກ­ນ້ອຍ ຢູ່ ສປ ຈີນ ນັ້ນ ມີ​ໂທດ​ໜັກ­ໜ່ວງ​ເຖິງ​ຕາຍ ນີ້​ຄຳ​ເວົ້າ​ອັນ​ເດັດ­ຂາດ​ຈາກ​ສານ​ປະ­ຊາ­ຊົນ​ສູງ​ສຸດ ສປ ຈີນ ໃນ​ທ້າຍ​ເດືອນ​ກໍ­ລະ­ກົດ​ປີ​ນີ້​ເອງ ຂ່າວ​ນີ້​ອອກ​ມາ​ໃນ​ໂອ­ກາດ​ທີ່​ປະ­ເທດ​ຈີນ​ກະ­ກຽມ​ບັງ­ຄັບ​ໃຊ້​ກົດ­ໝາຍ​ຕ້ານ​ກຸ່ມ​ອາ​ຊະ​ຍາ​ກຳ​ທາງ​ເພດ​ກັບ​ເດັກ­ນ້ອຍ​ຢ່າງ​ເດັດ­ຂາດ ສານ​ປະ­ຊາ­ຊົນ​ສູງ​ສຸດ​ຈີນ ໄດ້​ປະ­ກາດ​ອອກ​ມາ​ວ່າ: ບຸກ­ຄົນ​ທີ່​ຂົ່ມ­ຂືນ​ເດັກ­ນ້ອຍ​ນັ້ນ ມີ​ສັນ­ດານ​ຊົ່ວ​ຮ້າຍ ຊຶ່ງ​ກໍ່­ໃຫ້­ເກີດ​ຜົນ​ກະ­ທົບ​ຢ່າງ​ຮຸນ​ແຮງ ໂທດ​ນີ້​ຈະ​ຕ້ອງ​ຖືກ​ຕັດ­ສິນ​ປະ­ຫານ​ຊີ­ວິດ​ຢ່າງ​ດຽວ ໂດຍ​ບໍ່​ມີ​ການ​ຜ່ອນ­ຜັນ ສານ​ມີ​ຈຸດ​ຢືນ​ຢ່າງ​ເດັດ­ຂາດ​ກ່ຽວ​ກັບ​ອາ​ຊະ​ຍາ​ກຳ​ທາງ​ເພດ​ຕໍ່​ເດັກ­ນ້ອຍ ເພາະ​ມັນ​ສົ່ງ​ຜົນ​ເສຍ​ຫຼາຍ​ຕໍ່​ສຸ­ຂະ­ພາບ​ທາງ​ຮ່າງ­ກາຍ ແລະ ຈິດ­ໃຈ​ຂອງ​ເດັກ­ນ້ອຍ​ຢ່າງ​ຮ້າຍ​ແຮງ ຫວ່າງ​ບໍ່​ດົນ​ມາ​ນີ້ ໄດ້​ເກີດ​ມີ​ຄະ­ດີ​ຂົ່ມ­ຂືນ​ແລ້ວ​ຂ້າ​ເດັກ­ນ້ອຍ​ຄົນ​ໜຶ່ງ​ຢູ່ ສປ ຈີນ ຊຶ່ງ​ຜູ້​ກະ­ທຳ​ຜິດ​ກໍ​ໄດ້​ຖືກ​ປະ­ຫານ​ຊີ­ວິດ​ໄປ​ແລ້ວ ກົດ­ໝາຍ​ໃໝ່​ທີ່​ຈະ​ບັງ­ຄັບ​ໃຊ້​ໃນ​ມໍ່ໆ​ນີ້ ໄດ້​ເພີ່ມ​ຄວາມ​ເຂັ້ມ​ຂັ້ນ ແລະ ເດັດ­ຂາດ​ໃນ​ການ​ລົງ­ໂທດ​ຜູ້​ມີ​ຄວາມ​ຜິດ​ຖານ​ໄດ້​ຂົ່ມ­ຂືນ​ເດັກ­ນ້ອຍ ຂ່າວ​ໃຫ້​ຮູ້​ຕື່ມ​ວ່າ ນັບ​ແຕ່​ປີ 2017 ຫາ​ເດືອນ​ມິ­ຖຸ­ນາ 2019 ຫ້ອງ­ການ​ສານ​ໃນ​ທົ່ວ​ປະ­ເທດ​ຈີນ ໄດ້​ຕັດ­ສິນ​ຄະ­ດີ​ລ່ວງ​ລະ­ເມີດ​ທາງ​ເພດ​ຕໍ່​ເດັກ​ໄປ​ແລ້ວ 8.332 ເລື່ອງ ໃນ​ປີ 2018 ຄະ­ດີ​ປະ­ເພດ​ນີ້​ໄດ້​ຫຼຸດ​ລົງ​ຍ້ອນ​ສັງ­ຄົມ​ເລີ່ມ​ມີ​ຄວາມ​ເຂົ້າ­ໃຈ​ກ່ຽວ​ກັບ​ຄວາມ​ສຳ­ຄັນ​ຂອງ​ການ​ປົກ​ປ້ອງ​ເດັກ­ນ້ອຍ ແລະ ຊ່ວຍ​ເປັນ​ຫູ​ເປັນ­ຕາ​ລາຍ​ງານ​ເຫດ­ການ​ໄດ້​ຢ່າງ​ທັນ​ການ.

   ທີ່ ຣັດ​ເຊຍ: ໃນ​ກາງ​ປີ 2017 ສະ­ຫະ­ພັນ​ຣັດ​ເຊຍ ໄດ້​ຮັບ­ຮອງ​ເອົາ​ຮ່າງ​ກົດ­ໝາຍ​ວ່າ​ດ້ວຍ​ການ​ປ້ອງ​ກັນ​ພື້ນ­ຖານ​ໂຄງ​ລ່າງ​ຂໍ້​ມູນ​ຂ່າວ­ສານ ກົດ­ໝາຍ​ໄດ້​ກຳ­ນົດ​ໂທດ​ຕໍ່​ຜູ້​ລະ­ເມີດ​ດ້ວຍ​ການ​ຕັດ​ອິດ­ສະ­ຫຼະ­ພາບ​ສູງ​ສຸດ​ເຖິງ 10 ປີ ກົດ­ໝາຍ​ສະ­ບັບ​ນີ້​ໄດ້​ມີ​ຜົນ​ບັງ­ຄັບ​ໃຊ້​ແຕ່​ວັນ​ທີ 1 ເດືອນ​ມັງ­ກອນ 2018 ເປັນ­ຕົ້ນ​ມາ ຈຸດ­ປະ­ສົງ​ຕົ້ນ­ຕໍ​ຂອງ​ກົດ­ໝາຍ​ແມ່ນ​ເພື່ອ​ປ້ອງ​ກັນ​ພື້ນ­ຖານ​ໂຄງ​ລ່າງ​ຂໍ້​ມູນ​ຂ່າວ­ສານ​ທີ່​ສຳ­ຄັນ​ຈາກ​ການ​ໂຈມ​ຕີ​ໂດຍ​ເຄືອ​ຄ່າຍ​ອິນ​ເຕີ​ເນັດ ໂຄງ​ລ່າງ​ທີ່​ຖື​ວ່າ​ມີ​ຄວາມ​ສຳ­ຄັນ​ຍິ່ງ​ທີ່​ກົດ­ໝາຍ​ສະ­ບັບ​ນີ້​ເລັ່ງ​ປ້ອງ​ກັນ​ນັ້ນ ໄດ້­ແກ່: ລະ­ບົບ​ຂໍ້​ມູນ​ຂ່າວ­ສານ ແລະ ຕາ​ໜ່າງ​ໂທລະ​ຄົມ­ມະ­ນາ­ຄົມ ທີ່​ຂຶ້ນ​ກັບ​ບັນ­ດາ​ສຳ­ນັກ­ງານ ອົງ­ການ​ຂອງ​ລັດ­ຖະ­ບານ ບັນ­ດາ​ລະ­ບົບ​ຄວບ​ຄຸມ​ອັດ­ຕະ­ໂນ­ມັດ​ຂອງ​ເຕັກ​ໂນ​ໂລ​ຊີ ຂະ­ແໜງ​ອຸດ­ສາ­ຫະ­ກຳ​ປ້ອງ​ກັນ​ຊາດ ສາ­ທາ­ລະ­ນະ​ສຸກ ຂົນ­ສົ່ງ ໄປ­ສະ­ນີ ການ​ເງິນ ພະ­ລັງ­ງານ ເຊື້ອ​ໄຟ ຂະ­ແໜງ​ອຸດ­ສາ­ຫະ­ກຳ​ນິວ​ເຄລຍ ການ­ບິນ​ອະ­ວະ­ກາດ ແລະ ຂະ­ແໜງ­ການ​ອື່ນໆ​ອີກ​ຈຳ­ນວນ​ໜຶ່ງ ການ​ສ້າງ​ລະ­ຫັດ​ທີ່​ເປັນ​ອັນ­ຕະ­ລາຍ (Malware) ໃຫ້​ແກ່​ການ​ໂຈມ​ຕີ​ເຄືອ​ຄ່າຍ​ອິນ​ເຕີ​ເນັດ ທີ່​ສ້າງ​ຄວາມ​ເສຍ​ຫາຍ​ຕໍ່​ພື້ນ­ຖານ​ໂຄງ​ລ່າງ​ທີ່​ສຳ­ຄັນ ດັ່ງ­ກ່າວ​ມາ​ຂ້າງ​ເທິງ​ນີ້ ຖື​ເປັນ​ການ​ກະ­ທຳ​ຜິດ​ທີ່​ຮ້າຍ​ແຮງ ຊຶ່ງ​ຜູ້​ກໍ່​ເຫດ​ຈະ​ຖືກ​ຈຳ​ຄຸກ​ສູງ​ສຸດ​ເປັນ​ເວ­ລາ 10 ປີ.

   ທີ່ ມຽນ​ມາ: ມີ​ຂ່າວ​ທີ່​ໜ້າ​ສົນ­ໃຈ​ອອກ​ມາ​ຈາກ​ມຽນ​ມາ​ໃນ​ທ້າຍ​ເດືອນ​ສິງ­ຫາ 2016 (The Nation 22/8/2016) ວ່າ​ທ່ານ​ຜູ້​ແທນ​ລັດ​ຖະ​ສະ­ພາ​ມຽນ​ມາ ຊື່ ເຢ​ຣະ​ຕັດ (Ye Htut) ໄດ້​ຮຽກ­ຮ້ອງ​ໃຫ້​ລັດ­ຖະ­ບານ​ຕິດ­ຕາມ​ກວດ​ສອບ​ບັນ­ດາ​ເສດ­ຖີ ແລະ ຜູ້­ນຳ​ດ້ານ​ທຸ­ລະ​ກິດ ທີ່​ຫຼົບ​ຫຼີກ​ການ​ເສຍ​ພັນ­ທະ​ພາ­ສີ ຫຼື ຈ່າຍ​ພາ­ສີ​ໜ້ອຍ​ກວ່າ​ຈຳ­ນວນ​ທີ່​ພວກ​ເຂົາ​ຕ້ອງ​ຈ່າຍ​ຕົວ​ຈິງ ຂໍ້​ສະ­ເໜີ​ນີ້​ແມ່ນ​ເພື່ອ​ແກ້​ໄຂ​ບັນ­ຫາ​ຂາດ­ດູນ​ງົບ­ປະ­ມານ​ຂອງ​ລັດ ທ່ານ​ຜູ້​ແທນ​ທ່ານ​ນີ້​ກ່າວ​ວ່າ: “ບໍ່​ສົມ­ຄວນ​ທີ່​ມີ​ແຕ່​ໃຫ້​ປະ­ຊາ­ຊົນ​ຄົນ​ທຳ​ມະ​ດາ​ຕ້ອງ​ໄດ້​ແບກ​ຫາບ​ພັນ­ທະ​ເສຍ​ພາ­ສີ ບັນ­ດາ​ເສດ­ຖີ ກໍ​ຄື ຫົວ­ໜ້າ​ທຸ­ລະ​ກິດ​ທີ່​ຫຼົບ​ຫຼີກ ຫຼື ຈ່າຍ​ພາ­ສີ​ໜ້ອຍ​ກວ່າ​ທີ່​ຄວນ​ຫັ້ນ​ລະ​ຈະ​ຕ້ອງ​ຈ່າຍ​ພາ­ສີ​ໃຫ້​ຄົບ ເພື່ອ​ຫຼຸດ­ຜ່ອນ​ການ​ຂາດ­ດູນ​ງົບ­ປະ­ມານ... ຖ້າ​ພວກ​ເຮົາ​ສາ­ມາດ​ຢຸດ­ຕິ​ການ​ຫຼົບ​ຫຼີກ​ພາ­ສີ ພວກ​ເຮົາ​ກໍ​ຈະ​ຮັ່ງ­ມີ​ຄື​ປະ­ເທດ​ກູ​ເວດ ແລະ ນະ­ຄອນ​ດູ​ບາຍ...” ນີ້ ກໍ​ຄື ຂໍ້​ຄິດ​ດີໆຈາກ ສສຊ ບ້ານ​ເພິ່ນ ເພື່ອ​ເອົາ​ມາ​ແລ​ໃສ່​ສະ­ພາບ​ຢູ່​ບ້ານ​ເຮົາ.

ຂ່າວທີ່ກ່ຽວຂ້ອງ