ຮອງ​ປະທານ​ປະເທດ ເນັ້ນ​ໃຫ້​ນະຄອນຫຼວງ​ສືບຕໍ່​ເອົາໃຈໃສ່​ຫຼາຍ​ບັນຫາ

942 28 ພ.ຈ. 2019 ຂ່າວໜ້າ​ໜຶ່ງ
ຮອງ​ປະທານ​ປະເທດ ເນັ້ນ​ໃຫ້​ນະຄອນຫຼວງ​ສືບຕໍ່​ເອົາໃຈໃສ່​ຫຼາຍ​ບັນຫາ

    ທ່ານ ພັນ​ຄຳ ວິພາ​ວັນ ຮອງ​ປະທານ​ປະເທດ​ຢ້ຽມຢາມ ແລະ ເຮັດ​ວຽກ​ຢູ່ ນະຄອນຫຼວງ​ວຽງ​ຈັນ (ນວ) ວັນ​ທີ 27 ພະຈິກ 2019 ໂດຍ​ໄດ້​ຮັບ​ການ​ຕ້ອນຮັບ​ຈາກ​ທ່ານ ສິນ​ລະ​ວົງ ຄຸດ​ໄພທູນ ເຈົ້າ​ຄອງ ນວ ພ້ອມ​ດ້ວຍ​ພາກສ່ວນ​ກ່ຽວຂ້ອງ.

   ທ່ານ ສິນ​ລະ​ວົງ ຄຸດ​ໄພທູນ ໄດ້​ລາຍ​ງານ​ບັນຫາ​ພົ້ນ​ເດັ່ນ ໃນ​ການຈັດຕັ້ງ​ປະຕິບັດ​ແຜນ​ພັດທະນາ​ເສດ ຖະ​ກິດ-ສັງຄົມ ແລະ ແຜນ​ວຽກ​ຈຸດ​ສຸມ​ໃນຕໍ່ໜ້າ​ຂອງ ນວ ພ້ອມ​ທັງ​ໄດ້​ສະເໜີ​ບາງ​ບັນຫາ ເປັນຕົ້ນ ກົມ​ການເມືອງ​ສູນ​ກາງ​ພັກ ໄດ້​ຮັບຮອງ​ເອົາ​ຮ່າງ​ມະຕິ​ກົມ​ການເມືອງ ວ່າ​ດ້ວຍ​ການ​ພັດທະນາ ນວ ໃນ​ໄລຍະ​ໃໝ່​ໂດຍ​ພື້ນຖານ​ແລ້ວ ພາຍຫຼັງ​ໄດ້​ປະກາດ​ໃຊ້​ເປັນ​ທາງ​ການ ຂໍ​ໃຫ້​ຊ່ວຍ​ຊີ້​ນຳ​ຜັນ​ຂະຫຍາຍ​ໄວ ເປັນຕົ້ນ ຂະແໜງການ​ຕ່າງໆ​ຂອງ​ສູນ​ກາງ​ພັກ ໃຫ້​ເຂົ້າ​ຮ່ວມ​ພາລະກິດ​ພັດທະນາ​ເມືອງ​ຫຼວງ​ໃນ​ໄລຍະ​ໃໝ່ ຄະນະ​ພັກ ຄະນະ​ປະຈຳ​ພັກ ມີ​ຄວາມ​ຈຳເປັນ​ຮີບ​ດ່ວນ​ໃນ​ການ​ສ້າງ​ພະນັກງານ​ຫຼັກ​ແຫຼ່ງ​ຢູ່​ຮາກ​ຖານ ແຕ່ ນວ ຍັງ​ຂາດທຶນ​ຮອນ​ຈຶ່ງ​ໄດ້​ສ້າງ​ກອງ​ທຶນ​ພັກ​ຂຶ້ນ​ຕາມ​ມາດຕາ 51 ໝວດ​ທີ 7 ຂອງ​ກົດ​ລະບຽບ​ພັກ ປະຊາຊົນ ປະຕິວັດ​ລາວ ສະໄໝ​ທີ 10 ວ່າ​ດ້ວຍ​ການ​ເງິນ​ພັກ ການ​ຄຸ້ມ​ຄອງ ແລະ ນຳ​ໃຊ້​ເງິນ​ຂອງ​ພັກ ປັດຈຸບັນ ໄດ້​ຜ່ານ​ການ​ຄົ້ນ ຄວ້າ​ສຳ​ມະ​ນາ​ເປັນ​ທີ່​ຮຽບ​ຮ້ອຍ​ແລ້ວ ກຳລັງ​ສະເໜີ​ຄະນະ​ຈັດ​ຕັ້ງ​ສູນ​ກາງ​ພັກ ຄະນະ​ເລຂາທິການ​ສູນ​ກາງ​ພັກ​ພິຈາລະນາ ຖ້າ​ມີ​ກອງ​ທຶນ​ດັ່ງກ່າວ ອາດ​ຈະ​ເປັນ​ແບບຢ່າງ​ໃຫ້​ທ້ອງຖິ່ນ​ອື່ນ​ໃນຕໍ່ໜ້າ ສະເໜີ​ສູນ​ກາງ​ສ້າງ​ຊັບພະຍາກອນ​ມະນຸດ ຜ່ານ​ມາ​ສູນ​ກາງ​ມີ​ຄວາມ​ອຸດົມສົມບູນ​ແລ້ວແຕ່​ຂັ້ນ​ຮາກ​ຖານ ໂດຍ​ສະເພາະ ຂັ້ນ​ບ້ານ ເປັນຕົ້ນ ໜ່ວຍ​ງານ​ຜູ້​ປະຕິບັດ​ຕົວ​ຈິງ​ຍັງ​ມີ​ບໍ່​ພຽງພໍ ແລະ ເຮັດ​ໃຫ້​ຜູ້​ເຮັດ​ຕົວ​ຈິງ​ມີ​ໂອກາດ​ເຝິກອົບຮົມ​ຫຼາຍ​ຂຶ້ນ ເຊິ່ງ​ຜ່ານ​ມາ​ນະຄອນ​ຂອງ​ປະເທດ​ເພື່ອນ​ມິດ ກໍ​ສົນໃຈ​ໃຫ້ການ​ເຝິກອົບຮົມ​ຫຼາຍ ແຕ່​ລະບຽບ​ການ​ໄປ​ຕ່າງ​ປະ ເທດ​ຍັງ​ບໍ່​ທັນ​ເປັນ​ລະບົບ​ຈະແຈ້ງ ຄວນ​ມີ​ການ​ປັບປຸງ​ຕື່ມ​ບາງ​ຈຸດ ເພື່ອ​ສ້າງ​ເງື່ອນໄຂ​ໃຫ້​ພະນັກງານ​ໄດ້​ອົບຮົມ ເງື່ອນໄຂ​ໃນ​ການ​ລົງ​ຮາກ​ຖານ ຂອງ​ພະນັກງານ​ຂອງ​ຂະແໜງການ​ຍັງ​ມີ​ຈຳກັດ ຮາກ​ຖານ​ຍັງ​ຂາດ​ພະນັກງານ​ທີ່​ມີ​ຄວາມ​ຮູ້ ມີ​ລະດັບ​ການ​ສຶກ​ສາ​ສູງ ຈະ​ສ້າງ​ເງື່ອນໄຂ​ດຶງ​ດູດ​ແນວໃດ​ໃຫ້​ພະນັກງານ​ກະຊວງ ສົນໃຈ​ລົງ​ມາ​ຊ່ວຍ​ໜູນ ນວ.

    ທ່ານ ພັນ​ຄຳ ວິພາ​ວັນ ໄດ້​ສະແດງ​ຄວາມ​ຊົມເຊີຍ​ຕໍ່​ຜົນສຳເລັດ​ທີ່ ນວ ສາມາດ​ຍາດ​ມາ​ໄດ້​ໄລຍະ​ຜ່ານ​ມາ ພ້ອມ​ທັງ​ເນັ້ນ​ໃຫ້​ສືບຕໍ່​ເອົາໃຈໃສ່​ບາງ​ດ້ານ ເປັນຕົ້ນ ຄະນະ​ພັກ-ຄະນະ​ນຳ ສະມາຊິກ​ພັກ ແລະ ພະນັກ ງານ​ຫຼັກ​ແຫຼ່ງ​ຕ້ອງ​ມີ​ສະຕິ ຢຶດ​ໝັ້ນ​ຕໍ່​ແນວທາງ​ນະໂຍບາຍ​ຂອງ​ພັກ ແລະ ຢຶດ​ໝັ້ນ​ຕໍ່​ແນວທາງ​ການ​ຕ່າງ ປະເທດ ປົກ​ປ້ອງ​ແນວທາງ​ພາຍ​ໃນ ເພື່ອ​ຮັກສາ​ຄວາມ​ສະຫງົບ ສ່ວນ​ວຽກ​ງານ​ກວດກາ​ໃຫ້​ກວດກາ​ເປັນ​ປົກກະຕິ ພ້ອມ​ທັງ​ປັບປຸງ​ຜູ້​ກວດ ແລະ ຜູ້​ຖືກ​ກວດ ແນໃສ່​ຫຼຸດຜ່ອນ​ຂໍ້​ບົກ​ຜ່ອງ​ໃຫ້​ສາມາດ​ປ້ອງ​ກັນ​ໄດ້ ຄຽງ​ຄູ່​ກັນ​ນີ້ ກໍ​ໃຫ້​ເອົາໃຈໃສ່​ແກ້​ໄຂ​ປາກົດການ​ຫຍໍ້ທໍ້​ໃນ​ສັງຄົມ ເປັນຕົ້ນ ຢາ​ເສບ​ຕິດ ຂໍ້​ຂັດ​ແຍ່ງ​ກ່ຽວ​ກັບ​ທີ່​ດິນ ໂດຍ​ໃຫ້​ແກ້​ໄຂ​ບົນ​ພື້ນຖານ​ຂອງ​ກົດໝາຍ ຕໍ່​ສື່​ສັງຄົມ​ອອນ​ລາຍ​ຕ້ອງ​ມີ​ທັດສະນະ​ຮຽນ​ຮູ້-ເຂົ້າໃຈ ນຳ​ໃຊ້​ໃຫ້​ມີ​ຜົນ​ປະໂຫຍດ​ຕໍ່​ການ​ພັດທະນາ ແລະ ມີ​ການ​ຄຸ້ມ​ຄອງ ເບິ່ງ​ດ້ານ​ນິຕິ​ກຳ ແລະ ກົດໝາຍ ອັນ​ໃດ​ບໍ່​ຄົບ​ຖ້ວນ​ຕ້ອງ​ໄດ້​ສ້າງ​ຕື່ມ ສຳລັບ​ການ​ຜະລິດ​ກະສິກຳ​ໃຫ້​ສົ່ງເສີມ​ການ​ຜະລິດ​ພາຍ​ໃນ​ເປັນ​ສຳຄັນ ເບິ່ງ​ຕົ້ນ​ທຶນ​ຂອງ​ການ​ຜະລິດ​ຊາວ​ກະສິກອນ ເນື່ອງ​ຈາກ​ຜັກ​ໃນ​ຕະຫຼາດ​ມີ​ລາຄາ​ສູງ ໂດຍ​ສະເພາະ ຜັກ​ປອດ​ສານພິດ ແລະ ໃຫ້​ມີ​ການ​ພັດທະນາ​ແບບ​ຍືນ​ຍົງ.

    ສຳລັບ​ການ​ກະກຽມ​ກອງ​ປະຊຸມ​ໃຫຍ່ ໃຫ້​ເອົາໃຈໃສ່​ຂຽນ​ບົດ​ລາຍ​ງານ​ການເມືອງ ຕ້ອງ​ຂຽນ​ຕາມ​ຄວາມ​ເປັນ​ຈິງ​ວຽກ​ທີ່​ເຮັດ​ແທ້ ແລະ ໂຄງ​ປະກອບ​ບຸ​ຄະລາ​ກອນ​ຕ້ອງ​ເບິ່ງ​ບັນຫາ​ລວມ ສ້າງ​ໃຫ້​ໄດ້​ມາດຕະຖານ ກຽມ​ຄວາມ​ພ້ອມ​ແຕ່​ຫົວທີ ຕ້ອງ​ຮັບ​ທຸກ​ຕຳແໜ່ງ​ທີ່​ໝູ່​ຄະນະ​ມອບ​ໝາຍ​ໃຫ້.

ຂ່າວທີ່ກ່ຽວຂ້ອງ