ໄຂ​ນຳ​ໃຊ້​ໂຄງການ​ນ້ອງ​ຢາກ​ເປັນ​ນັກວິທະຍາສາດ

839 28 ພ.ຈ. 2019 ຂ່າວໜ້າ​ໜຶ່ງ
ໄຂ​ນຳ​ໃຊ້​ໂຄງການ​ນ້ອງ​ຢາກ​ເປັນ​ນັກວິທະຍາສາດ

    ພິທີ​ໄຂ​ນຳ​ໃຊ້​ໂຄງການ​ນ້ອງ​ຢາກ​ເປັນ​ນັກວິທະຍາສາດ ຈັດ​ຂຶ້ນ​ວັນ​ທີ 26 ພະຈິກ 2019 ຢູ່​ກະຊວງ​ວິ ທະ​ຍາ​ສາດ ແລະ ເຕັກ​ໂນ​ໂລ​ຊີ (ກວ​​ຕ) ໂດຍ​ມີ​ທ່ານ ບໍ່​ວຽງ​ຄຳ ວົງ​ດາລາ ລັດຖະມົນຕີ ກວ​​ຕ ປະທານ​ສະພາ​ວິທະຍາສາດ​ແຫ່ງ​ຊາດ ມີ​ບັນດາ​ທ່ານ​ຮອງ​ລັດຖະມົນຕີ ກົມ ສະ​ຖາ​ບັນ ແລະ ພາກສ່ວນ​ກ່ຽວຂ້ອງ ເຂົ້າ​ຮ່ວມ.

    ທ່ານ ພຸດ​ທະ​ສັກ ວິຈິດ​ຕຣາ ຫົວໜ້າ​ຫ້ອງການ ກວ​​ຕ ຫົວໜ້າ​ໂຄງການ​ນ້ອງ​ຢາກ​ເປັນ​ນັກ​ວິທະຍາ ສາດ ກ່າວ​ວ່າ: ໂຄງການ​ນີ້ ເປັນ​ໂຄງການ​ໜຶ່ງ​ທີ່​ໄດ້​ຮັບ​ການ​ຊີ້​ນຳ-ນຳພາ​ຈາກ​ຄະນະ​ພັກ-ຄະນະ​ນຳ ກວ​​ຕ ເຊິ່ງ​ຈັດ​ຕັ້ງ​ປະຕິບັດ​ໂດຍ​ຫ້ອງການ ກວ​​ຕ ໂດຍ​ປະສານ​ສົບ​ທົບ​ກັບ​ບັນດາ​ກົມ ສະ​ຖາ​ບັນ ພາຍ​ໃນ ກວ​​ຕ ແລະ ພະ​ແນກ​ວິທະຍາສາດ ແລະ ເຕັກ​ໂນ​ໂລ​ຊີ​ແຂວງ​ທົ່ວ​ປະເທດ ເພື່ອ​ດຳເນີນ​ການ​ຈັດ​ກິດຈະກຳ​ໂຄງ ການ ໂດຍ​ມີ​ຈຸດປະສົງ​ເພື່ອ​ໂຄສະນາ​ເຜີຍແຜ່ ກ່ຽວ​ກັບ​ວຽກ​ງານ​ວິທະຍາສາດ ແລະ ເຕັກ​ໂນ​ໂລ​ຊີ ໃຫ້​ເຍົາ ວະ​ຊົນ​ໄດ້​ສຶກ​ສາ​ຮຽນ​ຮູ້ ທັງ​ເປັນ​ການ​ປູກ​ຈິດ​ສຳນຶກ​ໃຫ້​ເຂົາເຈົ້າ​ມີ​ຄວາມ​ມັກ-ຮັກ ມີ​ຄວາມ​ໄຝ່​ຝັນ​ທີ່​ຈະ​ເປັນ​ນັກວິທະຍາສາດ ແລະ ຊຸກຍູ້​ສົ່ງເສີມ​ໃຫ້​ມີ​ຄວາມ​ກ້າຫານ ກ້າ​ຄິດ ກ້າ​ເຮັດ ແລະ ກ້າ​ສະແດງ​ອອກ ເພື່ອ​ສ້າງ​ຕົນ​ເອງ​ໃຫ້​ເປັນ​ບຸ​ຄະລາ​ກອນ​ທີ່​ເຂັ້ມແຂງ ແກ່​ການ​ພັດທະນາ​ເສດຖະກິດ-ສັງຄົມ ກໍ​ຄື ປະເທດ​ຊາດ.

    ເນື້ອ​ໃນ ແລະ ຮູບ​ແບບ​ກິດຈະກຳ​ຂອງ​ໂຄງການ​ປະກອບ​ມີ ການ​ບັນ​ລະ​ຍາຍ ແລະ ສາທິດ​ດ້ານ​ວິທະຍາສາດ ການ​ປະດິດ ວຽກ​ງານ​ດາລາສາດ ນິເວດ​ວິທະຍາ ຮຽນ​ຮູ້​ການ​ນຳ​ໃຊ້​ແບບຮຽນ​ເອ​ເລັກ​ໂຕຣ​ນິກ ກິດຈະກຳ ຖາມ-ຕອບ ດ້ານ​ວິທະຍາສາດ ແລະ​ອື່ນໆ ເຊິ່ງ​ໄລຍະ​ຜ່ານ​ມາ​ພວກ​ເຮົາ​ໄດ້​ດຳເນີນ​ກິດຈະກຳ​ແລ້ວ​ຢູ່​ໂຮງຮຽນ​ປະຖົມ​ສົມບູນ ດາ​ຣາ​ພອນ ແລະ ໂຮງຮຽນ​ປະຖົມ​ສົມບູນ ໂພນ​ພະ​ເນົາ ໂດຍ​ໄດ້​ຮັບ​ການ​ຕອບ​ຮັບ​ຈາກ​ຄູ-ອາຈານ ແລະ ເຍົາວະ​ຊົນ​ເປັນ​ຢ່າງ​ດີ. 

ຂ່າວທີ່ກ່ຽວຂ້ອງ