ໃຫ້​ຄວາມ​ຮູ້​ວຽກ​ງານ​ຄຸ້ມ​ຄອງ​ຫໍສະໝຸດ ແລະ ວັດທະນະທຳ​ການ​ອ່ານ

1.444 28 ພ.ຈ. 2019 ຂ່າວໜ້າ​ໜຶ່ງ
ໃຫ້​ຄວາມ​ຮູ້​ວຽກ​ງານ​ຄຸ້ມ​ຄອງ​ຫໍສະໝຸດ ແລະ ວັດທະນະທຳ​ການ​ອ່ານ

   ກົມ​ພິມ​ຈຳໜ່າຍ ກະຊວງ​ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ (ຖວ​​ທ) ຮ່ວມ​ກັບ​ກົມ​ຫໍ​ສະໝຸດ ກະຊວງ​ວັດທະນະທຳ ກີລາ ແລະ ທ່ອງ​ທ່ຽວ ​ສສ ຫວຽດນາມ ແລະ ສູນວັດທະນະທຳ​ຫວຽດນາມ ປະຈຳ ນະຄອນຫຼວງ​ວຽງ​ຈັນ ຈັດ​ເຝິກອົບຮົມ​ວຽກ​ງານ​ຄຸ້ມ​ຄອງ​ຫໍສະໝຸດ ແລະ ວັດທະນະທຳ​ການ​ອ່ານ ໃຫ້​ພະນັກງານ​ຫໍສະໝຸດ ​ສປປ ລາວ ວັນ​ທີ 26-27 ພະຈິກ 2019 ທີ່​ນະຄອນຫຼວງ​ວຽງ​ຈັນ ໂດຍ​ເປັນ​ປະທານ​ຂອງ​ທ່ານ​ນາງ ບົວ​ໄຂ ເພັງ​ພະຈັນ ຫົວໜ້າ​ກົມ​ພິມ​ຈຳໜ່າຍ ແລະ ທ່ານ​ນາງ ວູ​ເຊືອງ ຖຸ່ຍ ງ່າ ຫົວໜ້າ​ກົມ​ຫໍສະໝຸດ ມີ​ສຳ​ມະ​ນາ​ກອນ​ຈາກ​ພາກສ່ວນ​ກ່ຽວຂ້ອງ ຈາກ​ສູນ​ກາງ ແລະ ທ້ອງຖິ່ນ ເຂົ້າ​ຮ່ວມ.

   ການ​ເຝິກອົບຮົມ​ຄັ້ງ​ນີ້ ເປັນ​ນິມິດ​ໝາຍ​ອັນ​ດີ ທີ່​ສ່ອງ​ແສງ​ໃຫ້​ເຫັນ​ຄວາມ​ສາມັກຄີ​ພິເສດ ແລະ ການ​ຮ່ວມ​ມື​ຮອບດ້ານ ລະຫວ່າງ​ສອງ​ປະເທດ ເວົ້າ​ສະເພາະ ການ​ຮ່ວມ​ມື​ລະຫວ່າງ​ກະຊວງ ຖວ​​ທ ​ສປປ ລາວ ແລະ ກະຊວງ​ວັດທະນະທຳ ກີລາ ແລະ ທ່ອງ​ທ່ຽວ ​ສສ ຫວຽດນາມ ພາຍ​ໃຕ້​ບົດ​ບັນທຶກ​ຊ່ວຍ​ຈຳ ເຊິ່ງ ວຽກ​ງານ​ຫໍສະໝຸດ ເປັນ​ວຽກ​ງານ​ໜຶ່ງ​ສຳຄັນ​ໄປ​ຄຽງ​ຄູ່​ກັບ​ວຽກ​ງານ​ອື່ນໆ ໃນ​ວຽກ​ງານ​ແນວ​ຄິດ​ວັດທະນະທຳ ອັນ​ໄດ້​ປະກອບສ່ວນ​ໃນ​ພາລະກິດ​ລວມ​ຂອງ​ຊາດ ໃນ​ສະໄໝ​ຕໍ່ສູ້​ປົດ​ປ່ອຍ​ຊາດ​ໃນ​ເມື່ອ​ກ່ອນ ກໍ​ຄື ໃນ​ສະໄໝ​ປົກ​ປັກ​ຮັກສາ ແລະ ສ້າງສາ​ພັດທະນາ​ປະເທດ​ຊາດ​ໃນ​ປັດຈຸບັນ ພະນັກງານ​ນັກຮົບ​ທີ່​ເຮັດ​ວຽກ​ງານ​ແນວ​ຄິດ​ວັດທະນະທຳ ຍາມ​ໃດ​ກໍ​ໄດ້​ປະກອບສ່ວນ​ຢ່າງ​ຫ້າວຫັນ​ຕໍ່ໜ້າ​ທີ່​ວຽກ​ງານ​ທີ່ ພັກ-ລັດ ແລະ ປະຊາ ຊົນ​ມອບ​ໝາຍ​ໃຫ້.

   ວຽກ​ງານ​ຄຸ້ມ​ຄອງ​ຫໍສະໝຸດ ແລະ ວັດທະນະທຳ​ການ​ອ່ານ ມີ​ການ​ເຕີບ​ໃຫຍ່​ຂະຫຍາຍຕົວ​ເລື້ອຍໆ​ມາ ໂດຍ​ສະເພາະ ໄລຍະ​ທີ່​ມີ​ແນວທາງ ແລະ ນະໂຍບາຍ​ປ່ຽນແປງ​ໃໝ່​ຮອບດ້ານ​ຢ່າງ​ມີ​ຫຼັກການ​ຂອງ​ພັກ ແລະ ລັດຖະບານ ສະແດງ​ອອກ​ໃຫ້​ເຫັນ ຄື: ໃນ​ເມື່ອ​ກ່ອນ​ມີ​ຫໍສະໝຸດ​ຢູ່​ເຂດ​ປົດ​ປ່ອຍ ແລະ ຢູ່​ບັນດາ​ຕົວ​ເມືອງ​ໃຫຍ່​ຈຳນວນ​ໜຶ່ງ​ເທົ່າ​ນັ້ນ ມາ​ຮອດ​ປັດຈຸບັນ ມີ​ຫໍສະໝຸດ 13 ແຫ່ງ ຫ້ອງ​ສະໝຸດ 14 ແຫ່ງ ຫ້ອງ​ອ່ານ​ປຶ້ມ 1.628 ແຫ່ງ ຕູ້​ສະໝຸດ​ເຄື່ອນ​ທີ່ 8.500 ຕູ້ ຖົງ​ສະໝຸດ​ເຄື່ອນ​ທີ່ 8.585 ຖົງ ລົດ​ສະໝຸດ​ເຄື່ອນ​ທີ່ 5 ຄັນ ແລະ ເຮືອ​ສະໝຸດ​ເຄື່ອນ​ທີ່ 3 ລຳ

ຂ່າວທີ່ກ່ຽວຂ້ອງ