ສົ່ງເສີມ​ການ​ຮຽນ-ການ​ສອນ ພາສາ​ອັງກິດ​ໃຫ້​ນັກຮຽນ

1.482 28 ພ.ຈ. 2019 ຂ່າວໜ້າ​ໜຶ່ງ
ສົ່ງເສີມ​ການ​ຮຽນ-ການ​ສອນ ພາສາ​ອັງກິດ​ໃຫ້​ນັກຮຽນ

    ກະຊວງ​ສຶກ​ສາ​ທິ​ການ ແລະ ກີລາ (​ສສກ) ໂດຍ​ໄດ້​ຮັບ​ການ​ສະໜັບສະໜູນ​ຈາກ ບໍລິສັດ ດີ​ທີ​ພີ​ເອ​ດູ​ເຄ​ຊັນ​ລາວ ຈັດ​ກອງ​ປະຊຸມ​ປືກ​ສາ​ຫາລື ຫົວຂໍ້: “ການ​ສົ່ງເສີມ ການ​ຮຽນ-ການ​ສອນ ພາສາ​ອັງກິດ​ໃນ​ສະຕະວັດ​ທີ 21” ຂຶ້ນ​ວັນ​ທີ 27 ພະຈິກ 2019 ຢູ່​ໂຮງແຮມ​ລາວ​ພລາ​ຊາ ໂດຍ​ເປັນ​ທານ​ຂອງ​ທ່ານ ດາລາ​ວອນ ກິດ​ຕິ​ພັນ ວ່າການ​ຫົວໜ້າ​ຫ້ອງການ​ກະຊວງ ​ສສກ ມີ​ທ່ານ ວໍ​ດາຍ ຟຸກ ປະທານ​ບໍລິສັດ ດີ​ທີ​ພີ​ເອ​ດູ​ເຄ​ຊັນ​ລາວ ພ້ອມ​ດ້ວຍ​ພາກສ່ວນ​ກ່ຽວຂ້ອງ ເຂົ້າ​ຮ່ວມ.

   ທ່ານ ດາລາ​ວອນ ກິດ​ຕິ​ພັນ ກ່າວ​ວ່າ: ການ​ພັດທະນາ ການ​ຮຽນ-ການ​ສອນ ພາສາ​ອັງກິດ ເພື່ອ​ໃຫ້​ນັກຮຽນ​ມີ​ຄວາມ​ຮູ້-ຄວາມ​ສາມາດ ແລະ ທັກ​ສະ​ອື່ນໆ ທີ່​ຈຳເປັນ​ໃນ​ສະຕະວັດ​ທີ 21 ຄື: ທັກ​ສະ​ໃນ​ການ​ຄິດ ວິເຄາະ ທັກ​ສະ​ດ້ານ​ຄວາມ​ຄິດ​ສ້າງສັນ ທັກ​ສະ​ດ້ານ​ການ​ສື່ສານ ແລະ ການ​ເຮັດ​ວຽກ​ຮ່ວມ​ກັນ ເວົ້າ​ສະເພາະ ການ​ຮຽນ-ການ​ສອນ ພາສາ​ອັງກິດ​ໃຫ້​ສຳເລັດ​ໃນ​ທຸກ​ລະດັບ ແມ່ນ​ມີ​ຫຼາຍ​ອົງ​ປະກອບ​ທີ່​ສຳຄັນ ເຊັ່ນ: ດ້ານ​ຫຼັກການ ຫຼັກສູດ ປື້ມ​ແບບຮຽນ ສື່​ການ​ຮຽນ ແລະ ວິທີ​ການ​ສົ່ງເສີມ​ການ​ຮຽນ-ການ​ສອນ ຂອງ​ຄູ-ອາຈານ ເພື່ອ​ເຮັດ​ໃຫ້ການ​ສອນ​ຂອງ​ຄູ​ໄດ້​ຮັບ​ປະ​ສິດທິ​ຜົນ​ຫຼາຍ​ທີ່​ສຸດ.

   ການ​ສະໜັບສະໜູນ​ຈາກ ບໍລິສັດ ດີ​ທີ​ພີ​ເອ​ດູ​ເຄ​ຊັນ​ລາວ ຄັ້ງ​ນີ້ ໄດ້​ເຊີນ​ເອົາ​ຊ່ຽວຊານ​ດ້ານ​ພາສາ​ຈາກ​ຕ່າງປະເທດ​ມາ​ຮ່ວມ​ບັນຍາຍ ເພື່ອ​ແລກປ່ຽນ​ຂໍ້​ມູນ​ກ່ຽວ​ກັບ ການ​ຮຽນ-ການ​ສອນ ພາສາ​ອັງກິດ​ໃນ​ຫຼາຍ​ຫົວຂໍ້ ເຊັ່ນ: ການ​ສົ່ງເສີມ​ການ​ສອນ​ພາສາ​ອັງກິດ​ໃນ​ສະຕະວັດ​ທີ 21 ສິ່ງ​ທ້າ​ທາຍ ແລະ ວິທີ​ການ​ແກ້​ໄຂ ການ​ສົ່ງເສີມ​ການ​ຮຽນ​ຂອງ​ເດັກ​ໃຫ້​ໄດ້​ດີ​ທີ່​ສຸດ ການ​ສົ່ງເສີມ​ສ້າງ​ທັກ​ສະ​ສຳຄັນ​ສຳລັບ​ໄວ​ໜຸ່ມ ແລະ​ອື່ນໆ ເພື່ອ​ແນໃສ່​ສົ່ງເສີມ​ການ​ຮຽນ​ຮູ້​ຂອງ​ນັກຮຽນ ກໍ​ຄື ການ​ຊ່ວຍ​ເພີ່ມ​ປະສິດທິພາບ​ການ​ສອນ​ຂອງ​ຄູ-ອາຈານ ໃນ​ປະເທດ​ລາວ ໃຫ້​ນັບ​ມື້​ດີ​ຂຶ້ນ.

   ດີ​ທີ​ພີ​ເອ​ດູ​ເຄ​ຊັນ​ລາວ ແມ່ນ​ບໍລິສັດ​ໜຶ່ງ​ທີ່​ມີ​ຄວາມ​ຊ່ຽວຊານ ແລະ ມີ​ປະສົບ​ການ​ດ້ານ​ການ​ພັດ ທະ​ນາ​ຫຼັກສູດ ປື້ມ​ແບບຮຽນ​ພາສາ​ອັງກິດ ທີ່​ເຊື່ອມ​ໂຍງ​ການ​ນຳ​ໃຊ້​ເຕັກ​ໂນ​ໂລ​ຊີ ເຂົ້າ​ໃນ​ການ​ສິດສອນ​ພາສາ​ອັງກິດ ໂດຍ​ສະເພາະ ຫຼັກສູດ​ສຳລັບ​ຊັ້ນ​ປະຖົມ​ໃນ​ຊຸດ​ຫຼັກສູດ i Lern Smart Start  ແລະ ຫຼັກສູດ​ຊັ້ນ​ມັດທະຍົມ i Lern Smart world ທີ່​ໄດ້​ຮັບ​ການ​ຍອມຮັບ​ຈາກ​ກະຊວງ​ສຶກ​ສາ ​ສສ ຫວຽດ ນາມ ແລະ ຫຼາຍ​ປະເທດ​ໃນ​ອາ​ຊຽນ. 

ຂ່າວທີ່ກ່ຽວຂ້ອງ