ນຳ​ໃຊ້​ເຄື່ອງມື​ທັນ​ສະໄໝ​ເຂົ້າ​ໃນ​ວຽກ​ງານ​ກະສິກຳ

1.499 28 ພ.ຈ. 2019 ຂ່າວໜ້າ​ໜຶ່ງ
ນຳ​ໃຊ້​ເຄື່ອງມື​ທັນ​ສະໄໝ​ເຂົ້າ​ໃນ​ວຽກ​ງານ​ກະສິກຳ

   ພະ​ແນກ​ກະສິກຳ ແລະ ປ່າໄມ້ ນະຄອນຫຼວງ​ວຽງ​ຈັນ (ນວ) ຮ່ວມ​ກັບ​ບໍລິສັດ ເວີ້ນ​ຟອງ​ໃໝ່ ຮັກສາ​ພືດ​ກະສິກຳ ຈຳກັດ ຜູ້​ດຽວ ຈັດ​ເຝິກອົບຮົມ​ການ​ນຳ​ໃຊ້​ເຄື່ອງມື​ທັນ​ສະໄໝ (ໂດຼນ) ໃນ​ວຽກ​ງານ​ກະສິກຳ​ໃຫ້​ພະນັກງານ​ຂັ້ນ​ແຂວງ ຂັ້ນ​ເມືອງ ແລະ ຜູ້​ປະກອບ​ການ ຂຶ້ນ​ວັນ​ທີ 26 ພະຈິກ 2019 ຢູ່​ພະ​ແນກ​ດັ່ງກ່າວ ໂດຍ​ມີ​ທ່ານ ວາດ​ສະໜາ ສີ​ຈະເລີນ ຮອງ​ຫົວໜ້າ​ພະ​ແນກ​ກະສິກຳ ແລະ ປ່າໄມ້ ນວ ບັນດາ​ຫົວໜ້າ-ຮອງ​ຫົວໜ້າ​ຂະແໜງ ຫົວໜ້າ​ໜ່ວຍ​ງານ ວິຊາ​ການ ແລະ ຜູ້​ປະກອບ​ການ​ດ້ານ​ການ​ປູກຝັງ ເຂົ້າ​ຮ່ວມ.

   ທ່ານ ວາດ​ສະໜາ ສີ​ຈະເລີນ ກ່າວ​ວ່າ: ນວ ເປັນ​ແຂວງ​ໜຶ່ງ​ທີ່​ມີ​ການ​ປູກ​ພືດ​ເປັນ​ສິນຄ້າ ປູກ​ພືດ​ສະໜອງ​ໃຫ້​ຊາວ ນວ ເຊິ່ງ​ລັດຖະບານ​ໄດ້​ຊຸກຍູ້​ສົ່ງເສີມ ໃຫ້​ມີ​ການ​ຜະລິດ​ກະສິກຳ​ສະອາດ ການ​ປູກ​ພືດ​ເສດຖະກິດ-ສິນຄ້າ​ສົ່ງ​ອອກ ແນ່ນອນ​ວ່າ ພວກ​ເຮົາ​ຈະ​ຕ້ອງ​ມີ​ການ​ນຳ​ໃຊ້​ສານ​ເຄ​ມີ ແຕ່​ການ​ນຳ​ໃຊ້​ສານ​ເຄ​ມີ​ຕ້ອງ​ປະຕິບັດ​ຕາມ​ລະບຽບ​ຫຼັກການ​ທີ່​ວາງ​ອອກ ໂດຍ​ສະເພາະ ສານ​ເຄ​ມີ​ທຸກ​ປະເພດ​ທີ່​ຈະ​ເຂົ້າ​ມາ​ນຳ​ໃຊ້​ຈະ​ຕ້ອງ​ໄດ້​ຂຶ້ນ​ທະບຽນ​ຈາກ​ກົມ​ປູກຝັງ ກໍ​ຄື ກະຊວງ​ກະສິກຳ ແລະ ປ່າໄມ້ ຕາມ​ລະບຽບ​ຫຼັກການ​ຈຶ່ງ​ສາ ມາດ​ນຳ​ໃຊ້​ໄດ້.

   ສຳ​ມະ​ນາ​ຄັ້ງ​ນີ້ ມີ​ຄວາມ​ໝາຍ​ສຳຄັນ​ຫຼາຍ​ໃຫ້​ນັກວິຊາການ ໃນ​ການ​ນຳ​ໃຊ້​ສານ​ເຄ​ມີ​ທີ່​ຖືກຕ້ອງ​ຕາມ ລະບຽບ​ຫຼັກການ ຈຶ່ງ​ຮຽກຮ້ອງ​ມາ​ຍັງ​ບັນດາ​ທ່ານ​ການ​ນຳ​ຂອງ​ບັນດາ​ເມືອງ ບໍລິສັດ​ໃຫ້​ມາ​ສຶກ​ສາ​ຄົ້ນຄວ້າ​ຮ່ວມ​ກັນ​ໃນ​ວຽກ​ງານ​ດັ່ງກ່າວ​ໃຫ້​ເລິກເຊິ່ງ ແລະ ແລກປ່ຽນ​ບົດຮຽນ​ເຊິ່ງ​ກັນ ແລະ ກັນ ນຳ​ເອົາ​ຄວາມ​ຮູ້​ດັ່ງ ກ່າວ​ໄປ​ເຜີຍແຜ່​ໃຫ້​ກັບ​ຊາວ​ກະສິກອນ ກໍ​ຄື ຜູ້​ປະກອບ​ການ​ຢູ່​ໃນ​ເມືອງ​ຂອງ​ທ່ານ​ໄດ້​ເຂົ້າໃຈ ແລະ ຫັນ​ມາ​ນຳ​ໃຊ້ ຫຼື ທົດ​ລອງ​ໂດຼນ ໃນ​ການ​ສີດ​ຢາ​ປາບ​ສັດຕູ​ພືດ ເພື່ອ​ຫຼຸດ​ຕົ້ນ​ທຶນ​ໃນ​ການ​ຜະລິດ. 

ຂ່າວທີ່ກ່ຽວຂ້ອງ