ປະທານ​ປະເທດ ເນັ້ນ​ໃຫ້​ເມືອງ​ໄຊ​ທານີ ເພີ່ມ​ທະວີ​ສ້າງ​ຄວາມ​ເຂັ້ມແຂງ​ໃຫ້​ຮາກ​ຖານ​ຢ່າງຮອບດ້ານ

1.162 29 ພ.ຈ. 2019 ຂ່າວໜ້າ​ໜຶ່ງ
ປະທານ​ປະເທດ ເນັ້ນ​ໃຫ້​ເມືອງ​ໄຊ​ທານີ ເພີ່ມ​ທະວີ​ສ້າງ​ຄວາມ​ເຂັ້ມແຂງ​ໃຫ້​ຮາກ​ຖານ​ຢ່າງຮອບດ້ານ

    ທ່ານ ບຸນ​ຍັງ ວໍລະ​ຈິດ ປະທານ​ປະເທດ​ພ້ອມ​ຄະນະ​ລົງ​ຢ້ຽມຢາມ ແລະ ເຮັດ​ວຽກ​ຢູ່​ເມືອງ ໄຊ​ທານີ ນະຄອນຫຼວງ​ວຽງ​ຈັນ ວັນ​ທີ 28 ພະຈິກ 2019 ໂດຍ​ໄດ້​ຮັບ​ການ​ຕ້ອນຮັບ​ຈາກ​ທ່ານ ຄຳ​ປະດິດ ເຂັມ​ມານິດ ເຈົ້າເມືອງ​ໄຊ​ທານີ ພ້ອມ​ດ້ວຍ​ພາກສ່ວນ​ກ່ຽວຂ້ອງ.

   ການເຄື່ອນໄຫວ​ຢ້ຽມຢາມ​ຄັ້ງ​ນີ້ ທ່ານ ບຸນ​ຍັງ ວໍລະ​ຈິດ ແລະ ຄະນະ ໄດ້​ພົບ​ປະ​ພະນັກງານ​ຫຼັກ​ແຫຼ່ງ ພ້ອມ​ທັງ​ໄດ້​ຮັບ​ຟັງ​ການ​ລາຍ​ງານ ການຈັດຕັ້ງ​ປະຕິບັດ​ແຜນ​ພັດທະນາ​ເສດຖະກິດ-ສັງຄົມ ໃນ​ໄລຍະ​ຜ່ານ​ມາ ແລະ ທິດ​ທາງ​ແຜນການ​ຕໍ່ໜ້າ​ຂອງ​ເມືອງ ໄຊ​ທານີ ຈາກ​ນັ້ນ ທ່ານ​ກໍ​ໄດ້​ໃຫ້​ກຽດ​ໂອ້​ລົມ ເຊິ່ງ​ໄດ້​ສະແດງ​ຄວາມ​ຊົມເຊີຍ​ຕໍ່​ຜົນສຳເລັດ​ທີ່​ອົງການ​ປົກຄອງ​ເມືອງ ໄຊ​ທານີ ຍາດ​ມາ​ໄດ້​ໄລຍະ​ຜ່ານ​ມາ ແລະ ໄດ້​ກຳນົດ​ທິດ​ທາງ​ມາດ​ຕະ​ການຈັດຕັ້ງ​ປະຕິບັດ​ໃນຕໍ່ໜ້າ​ເປັນ​ອັນ​ລະອຽດ ແຕ່​ຍັງ​ມີ​ບາງ​ບັນຫາ​ທີ່​ຈະ​ຕ້ອງ​ສືບຕໍ່​ເອົາໃຈໃສ່ ເປັນຕົ້ນ ການ​ຮັກສາ​ມູນເຊື້ອ​ຄວາມ​ສາມັກຄີ​ເປັນ​ປຶກ​ແຜ່ນ​ພາຍ​ໃນ​ອົງຄະ​ນະ​ພັກ ເພີ່ມ​ທະວີ​ເອົາໃຈໃສ່​ຕໍ່​ວຽກ​ງານ ການເມືອງ-ແນວ​ຄິດ ໃນ​ຖັນ​ແຖວ​ສະມາຊິກ​ພັກ ພະນັກງານ ທະຫານ ຕຳຫຼວດ ຕະຫຼອດ​ຮອດ​ປະຊາຊົນ ໃຫ້​ເຂົ້າໃຈ​ຕໍ່​ແນວທາງ​ນະໂຍບາຍ​ຂອງ ພັກ-ລັດ ຢ່າງ​ເລິກເຊິ່ງ ເພື່ອ​ຊຸກຍູ້​ໃຫ້​ເຂົາເຈົ້າ​ປະກອບສ່ວນ ໃນ​ການ​ສ້າງສາ​ພັດທະນາ​ເສດຖະກິດ-ສັງຄົມ ສືບຕໍ່​ປະຕິບັດ​ແນວທາງ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະຫງົບ​ທົ່ວ​ປວງ​ຊົນ​ຮອບດ້ານ ເຮັດ​ໃຫ້​ເມືອງ​ມີ​ຄວາມ​ສະຫງົບ​ໜັກ​ແໜ້ນ​ຢ່າງ​ແທ້​ຈິງ ແກ້​ໄຂ​ເດັດຂາດ​ບັນດາ​ໜໍ່​ແໜງ​ຄວາມ​ບໍ່​ສະຫງົບ ບັນຫາ​ຢາ​ເສບ​ຕິດ ຂີ້ລັກ ງັດ​ແງະ ອຸບັດເຫດ​ຕາມ​ຖະໜົນ ເອົາໃຈໃສ່​ແກ້​ໄຂ​ບັນຫາ​ການ​ບຸກລຸກ​ທີ່​ດິນ ໃຫ້​ຫັນ​ເຂົ້າ​ສູ່​ລະບຽບ​ກົດໝາຍ​ຢ່າງ​ເຂັ້ມ​ງວດ ຫັນ​ລົງ​ກໍ່ສ້າງ​ຮາກ​ຖານ​ກັບ​ທີ່ ເພື່ອ​ຕິດຕາມ​ການ​ສ່ອງ​ແສງ​ຂອງ​ຄະນະ​ໜ່ວຍ​ພັກ ກໍ​ຄື ການ​ເພີ່ມ​ທະວີ​ສ້າງ​ຄວາມ​ເຂັ້ມແຂງ​ໃຫ້​ຮາກ​ຖານ​ຢ່າງຮອບດ້ານ ສືບຕໍ່​ນຳພາ​ພັດທະນາ​ເສດຖະກິດ​ຢ່າງ​ແຂງແຮງ ແລະ ຫຼາຍ​ຂຶ້ນ​ກວ່າ​ເກົ່າ ແນໃສ່​ນຳ​ເອົາ​ຜົນ​ປະໂຫຍດ​ແທ້​ຈິງ​ມາສູ່​ປະຊາຊົນ​ບັນດາເຜົ່າ ສືບຕໍ່​ສ້າງ​ຄວາມ​ເຂັ້ມແຂງ​ໃຫ້​ຊາວບ້ານ ໂດຍ​ເລີ່ມ​ຈາກ​ການ​ປັບປຸງ​ເນື້ອ​ໃນ ແລະ ແບບແຜນ​ການ​ນຳພາ​ຂອງ​ຮາກ​ຖານ​ພັກ​ບ້ານ ວຽກ​ງານ​ກໍ່ສ້າງ​ຮາກ​ຖານ​ການເມືອງ​ໃຫ້​ປະຕິບັດ ຕາມ 4 ເນື້ອ​ໃນ 4 ຄາດໝາຍ ເຮັດ​ໃຫ້​ເສດຖະກິດ​ໄດ້​ຮັບ​ການ​ພັດທະນາ ຊີວິດ​ການ​ເປັນ​ຢູ່-ຈິດໃຈ​ຂອງ​ປະຊາຊົນ​ດີ​ຂຶ້ນ ພື້ນຖານ​ໂຄງ​ລ່າງ​ການ​ພັດທະນາ​ເສດຖະກິດ-ສັງຄົມ ມີ​ຄວາມ​ເປັນ​ທັນ​ສະໄໝ ການ​ສົ່ງ​ພະນັກງານ​ລົງ​ກໍ່ສ້າງ​ຮາກ​ຖານ ຕ້ອງ​ຖືກ​ກັບ​ຂະແໜງ ການ ແລະ ຄວາມ​ຕ້ອງການ​ຂອງ​ການ​ພັດທະນາ.

   ຈາກ​ນັ້ນ ກໍ​ໄດ້​ໄປ​ຢ້ຽມຢາມ​ບໍລິສັດ ມິດຕະພາບ​ກະສິກຳ ຈຳກັດ ຢູ່​ບ້ານ​ສາມ​ສະອາດ ໂດຍ​ໄດ້​ຮັບ​ການ​ຕ້ອນຮັບ​ຈາກ​ທ່ານ ວິລະ​ວັນ ພັນ​ນຸ​ລາດ ປະທານ​ບໍລິສັດ​ດັ່ງກ່າວ ເຊິ່ງ​ທ່ານ ບຸນ​ໄຊ ປັນຍາ​ເລີດ​ໄຊ ຜູ້ອຳນວຍການ​ຝ່າຍ​ບໍລິຫານ​ບໍລິສັດ ມິດຕະພາບ​ກະສິກຳ ຈຳກັດ ໄດ້​ລາຍ​ງານ​ວ່າ: ບໍລິສັດ ມິດຕະພາບ​ກະສິກຳ ຈຳກັດ ໄດ້​ສຳເລັດ​ການ​ກໍ່ສ້າງ​ໂຮງງານ ຕົ້ນ​ປີ 2018 ແລະ ໄດ້​ເລີ່ມ​ທົດ​ລອງ​ຜະລິດ​ໃນ​ເດືອນ​ມີນາ 2018 ປະກອບ​ມີ: ຜະລິດ​ຕະ​ພັນ​ຜັກທຽມ​ດອງ​ທີ່​ບັນຈຸ​ເປັນ​ຕຸກ ຖັງ ແລະ ເປັນ​ຈອກ ນ້ຳ​ນົມ​ສາລີ​ຫວານ ນ້ຳ​ຫວ້ານ​ຫາງ​ແຂ້​ຣົດ​ອາ​ງຸ່ນ ຣົດ​ໝາກ​ນາວ ໝາກ​ຕາວ​ເຊື່ອມ ທີ່​ບັນຈຸ​ໃສ່​ຖົງ ຖັງ ແລະ ແກ້ວ ວັດຖຸ​ດິບ​ທີ່​ນຳ​ມາ​ປ້ອນ​ໂຮງງານ ແມ່ນ​ຊື້​ມາ​ຈາກ​ຊາວ​ກະສິກອນ​ພາຍ​ໃນ​ປະເທດ ປັດຈຸບັນ ຜະລິດ​ຕະ​ພັນ​ດັ່ງກ່າວ​ມີ​ຈຳໜ່າຍ​ຕາມ​ຮ້ານ​ຄ້າ​ທົ່ວ​ໄປ ນອກ​ນີ້ ຍັງ​ໄດ້​ສົ່ງ​ໄປ​ຈຳໜ່າຍ​ທີ່​ປະເທດ​ໄທ.

   ໂອກາດ​ນີ້ ທ່ານ ບຸນ​ຍັງ ວໍລະ​ຈິດ ກໍ​ໄດ້​ສະແດງ​ຄວາມ​ຍ້ອງຍໍ​ຊົມເຊີຍ ຕໍ່​ການ​ຕັດສິນ​ໃຈ​ຂອງ​ບໍລິສັດ​ທີ່​ມາ​ລົງທຶນ​ໃນ​ປະເທດ​ລາວ ເຊິ່ງ​ເປັນ​ການ​ປະກອບສ່ວນ​ໃນ​ການ​ພັດທະນາ​ສັງຄົມ​ຂອງ​ລາວ ເພື່ອ​ເຮັດ​ໃຫ້​ມີ​ວັດຖຸ​ດິບ​ປ້ອນ​ເຂົ້າ​ໂຮງງານ​ໄປ​ຕະຫຼອດ ໃຫ້​ບໍລິສັດ​ປະສານ​ສົມທົບ​ກັບ​ຂະແໜງການ​ກ່ຽວຂ້ອງ​ຂອງ​ນະຄອນຫຼວງ​ວຽງ​ຈັນ ໃນ​ການ​ແກ້​ໄຂ​ບັນຫາ​ຂອດ​ທີ່​ເຫັນ​ວ່າ ມີ​ຄວາມ​ຫຍຸ້ງຍາກ ພ້ອມ​ທັງ​ປຸກລະດົມ​ໃຫ້​ປະຊາຊົນ​ທຳ​ການ​ຜະລິດ​ຫຼາຍ​ຂຶ້ນ ແລະ ໃຫ້​ເຂົາເຈົ້າ​ຮັກສາ​ປ່າ​ໝາກ​ຕາວ​ໃຫ້​ຫຼາຍ​ຂຶ້ນ.

ຂ່າວທີ່ກ່ຽວຂ້ອງ