ຮັບຮອງ​ຮ່າງ​ກົດໝາຍ​ວ່າ​ດ້ວຍ​ຄວາມ​ສະເໝີພາບ ຍິງ-ຊາຍ

1.317 29 ພ.ຈ. 2019 ຂ່າວໜ້າ​ໜຶ່ງ
ຮັບຮອງ​ຮ່າງ​ກົດໝາຍ​ວ່າ​ດ້ວຍ​ຄວາມ​ສະເໝີພາບ ຍິງ-ຊາຍ

   ການ​ດຳເນີນ​ກອງ​ປະຊຸມ​ສະໄໝ​ສາມັນ​ເທື່ອ​ທີ 8 ຂອງ​ສະພາ​ແຫ່ງ​ຊາດ ຊຸດ​ທີ VIII ວັນ​ທີ 28 ພະຈິກ 2019 ຢູ່​ສະພາ​ແຫ່ງ​ຊາດ (ຫຼັກ 6) ໂດຍ​ການ​ເປັນ​ປະທານ​ຂອງ​ທ່ານ ສົມ​ພັນ ແພງ​ຄຳ​ມີ ຮອງ​ປະທານ​ສະພາ​ແຫ່ງ​ຊາດ ມີ​ບັນດາ​ສະມາຊິກ​ສະພາ​ແຫ່ງ​ຊາດ (​ສສຊ) ປະຈຳ​ເຂດ​ເລືອກ​ຕັ້ງ​ຕ່າງໆ​ເຂົ້າ​ຮ່ວມ.

    ທ່ານ ນາງ ອິນ​ລາ​ວັນ ແກ້ວ​ບຸນ​ພັນ ປະທານ​ສູນ​ກາງ​ສະຫະພັນ​ແມ່ຍິງ​ລາວ ຮອງ​ປະທານ​ຄະນະ​ກຳມາ​ທິ​ການ​ແຫ່ງ​ຊາດ ເພື່ອ​ຄວາມ​ກ້າວໜ້າ​ຂອງ​ແມ່ຍິງ ແລະ ແມ່-ເດັກ ໄດ້​ສະເໜີ​ຮ່າງ​ກົດໝາຍ ວ່າ​ດ້ວຍ​ຄວາມ​ສະເໝີ ພາບ ຍິງ-ຊາຍ (ສ້າງ​ໃໝ່) ວ່າ: ໃນ​ໄລຍະ​ຜ່ານ​ມາ​ເຖິງ​ວ່າ ພັກ-ລັດຖະບານ ໄດ້​ມີ​ນະໂຍບາຍ​ກົດໝາຍ​ນິຕິ​ກຳ ແລະ ກົນ​ໄກ ເພື່ອ​ຈັດ​ຕັ້ງ​ປະຕິບັດ​ວຽກ​ງານ​ສົ່ງເສີມ​ຄວາມ​ກ້າວໜ້າ​ຂອງ​ແມ່ຍິງ​ທີ່​ຄົບ​ຖ້ວນ​ສົມຄວນ​ກໍ​ຕາມ ແຕ່​ໃນ​ສະພາບ​ການຈັດຕັ້ງ​ປະຕິບັດ​ຕົວ​ຈິງ ແມ່ຍິງ​ລາວ​ບັນດາເຜົ່າ​ຍັງ​ປະ​ເຊີນ​ໜ້າ​ກັບ​ສິ່ງ​ທ້າ​ທາຍ​ຫຼາຍ​ປະການ ໂດຍ​ສະ ເພາະ ແມ່ຍິງ​ເຂດ​ຊົນນະບົດ ແມ່ນ​ຍັງ​ມີ​ຄວາມທຸກ​ຍາກ ມີ​ການ​ອອກແຮງ​ງານ​ໜັກ ການ​ສຶກ​ສາ​ຍັງ​ຈຳກັດ ແລະ ການ​ໄດ້​ຮັບ​ບໍລິການ​ດ້ານ​ສາທາລະນະ​ສຸກ​ກໍ​ບໍ່​ທົ່ວ​ເຖິງ ອັດຕາ​ການ​ຕາຍ​ຂອງ​ແມ່ ແລະ ເດັກ​ຍັງ​ສູງ ມີ​ຄວາມ​ສ່ຽງ​ຕໍ່​ການ​ຖືກ​ຄວາມ​ຮຸນ​ແຮງ​ໃນ​ຄອບຄົວ ການ​ຈຳແນກ​ຂອງ​ສັງຄົມ ແລະ ການ​ຕົກ​ເປັນ​ເຫຍື່ອ​ຂອງ​ການ​ຄ້າ​ມະນຸດ ອັນ​ເນື່ອງ​ມາ​ຈາກ​ຫຼາຍ​ສາເຫດ ເຊິ່ງ​ອັນ​ຫຼັກໆ​ແມ່ນ​ຍ້ອນ​ຄວາມທຸກ​ຍາກ ລະດັບ​ການ​ສຶກ​ສາ​ຕ່ຳ ບໍ່​ມີ​ອາຊີບ ດ້ານ​ລາຍ​ຮັບ ຄວາມ​ບໍ່​ສະເໝີພາບ​ລະຫວ່າງ ຍິງ-ຊາຍ ແລະ​ອື່ນໆ.

   ເພື່ອ​ເຮັດ​ໃຫ້ການ​ກຳນົດ​ວຽກ​ງານ​ຄວາມ​ສະເໝີພາບ ຍິງ-ຊາຍ ມີ​ຄວາມ​ຄົບ​ຖ້ວນ ພ້ອມ​ທັງ​ຮັບປະກັນ​ໃຫ້ການ ຈັດ​ຕັ້ງ​ປະຕິບັດ ຄຸ້ມ​ຄອງ ແລະ ກວດກາ​ວຽກ​ງານ​ຄວາມ​ສະເໝີພາບ ຍິງ-ຊາຍ ໃຫ້​ມີ​ປະ​ສິດທິ​ຜົນ ຄະນະ​ກຳມາ​ທິ​ການ​ແຫ່ງ​ຊາດ ເພື່ອ​ຄວາມ​ກ້າວໜ້າ​ຂອງ​ແມ່ຍິງ ແລະ ເດັກ ຈຶ່ງ​ໄດ້​ແຕ່ງຕັ້ງ​ຄະນະ​ຮັບຜິດຊອບ​ຊີ້​ນຳ​ສ້າງ​ຮ່າງ​ກົດ ໝາຍ ວ່າ​ດ້ວຍ​ຄວາມ​ສະເໝີພາບ ຍິງ-ຊາຍ ໃນ​ປີ 2018 ເຊິ່ງ​ປະກອບ​ມີ​ທັງ​ໝົດ 7 ພາກ 4 ໝວດ ແລະ 47 ມາດຕາ ສ້າງ​ຄວາມ​ເຂັ້ມແຂງ​ໃຫ້​ວຽກ​ງານ​ດັ່ງກ່າວ ແລະ ສ້າງ​ຖານ​ຂໍ້​ມູນ​ສະຖິຕິ​ບົດບາດ ເພື່ອ​ນຳ​ໃຊ້​ເຂົ້າ​ໃນ​ການ​ວາງ​ແຜນ​ພັດທະນາ​ເສດຖະກິດ-ສັງຄົມ ທີ່​ເອົາໃຈໃສ່​ບົດບາດ ຍິງ-ຊາຍ ໃນ​ທຸກ​ຂະແໜງການ​ທັງ​ຂັ້ນ​ສູນ​ກາງ ແລະ ທ້ອງຖິ່ນ.

  ເມື່ອ​​ຮ່່າງ​ກົດໝາຍ​ສະບັບ​ນີ້​ຖືກ​ຮັບຮອງ ແລະ ປະກາດ​ໃຊ້ ຈະ​ເປັນ​ເຄື່ອງມື​ສຳຄັນ ໃນ​ການ​ດັດ​ປັບ​ສາຍ​ພົວພັນ​ສັງຄົມ ກ່ຽວ​ກັບ​ຄວາມ​ສະເໝີພາບ ຍິງ-ຊາຍ ເປັນຕົ້ນ ການ​ຍົກ​ສູງ​ຄວາມ​ຮັບ​ຮູ້ ຄວາມ​ເຂົ້າໃຈ ສະຕິ ແລະ ຄວາມ​ເປັນ​ເຈົ້າ​ການ ໃນ​ການຈັດຕັ້ງ​ປະຕິບັດ​ວຽກ​ງານ​ຄວາມ​ສະເໝີພາບ ຍິງ-ຊາຍ ໃນ​ຄອບຄົວ​ທົ່ວ​ສັງຄົມ ຍົກ​ສູງ​ຄວາມ​ເປັນ​ເຈົ້າ​ການ​ຂອງ​ເພດ​ຍິງ​ໃຫ້​ຮັບ​ຮູ້​ສິດທິ​ຂອງ​ຕົນ ແລະ ສ້າງ​ຄວາມ​ເຂັ້ມແຂງ ແລະ ຄວາມ​ຮັບຜິດຊອບ​ໃຫ້​ຍິງ-ຊາຍ ຄອບຄົວ ຊຸມ​ຊົນ ສັງຄົມ ແລະ ການຈັດຕັ້ງ​ມີ​ຈິດ​ສຳນຶກ ແລະ ເອົາໃຈໃສ່​ປະຕິບັດ​ວຽກ​ງານ​ຄວາມ​ສະ ເໝີ​ພາບ ຍິງ-ຊາຍ ຢ່າງ​ເຂັ້ມ​ງວດ ພ້ອມ​ທັງ​ເປັນ​ບ່ອນ​ອີງ​ໃຫ້​ບັນດາ​ອົງ​ການຈັດຕັ້ງ​ຕ່າງໆ ໃນ​ການ​ໂຄສະນາ​ເຜີຍແຜ່ ສຶກ​ສາ​ອົບຮົມ ຄຸ້ມ​ຄອງ ກວດກາ ແລະ ຈັດ​ຕັ້ງ​ປະຕິບັດ​ໃຫ້​ມີ​ຄວາມ​ເປັນ​ເອກະ​ພາບ.

   ພາຍຫຼັງ ​ສສຊ ໄດ້​ປະກອບ​ຄຳ​ເຫັນ​ແລ້ວ ອາ​ນຸ​ກຳມະການ​ຮ່າງ​ກົດໝາຍ ກໍ​ໄດ້​ອະທິບາຍ​ໃຫ້​ຄວາມ​ກະຈ່າງ​ແຈ້ງ ໃນ​ບາງ​ຄຳ​ເຫັນ​ທີ່ ​ສສຊ ສະເໜີ ແລະ ເຫັນ​ດີ​ຕໍ່​ຄຳ​ຄິດ​ເຫັນ​ຕ່າງໆ​ທີ່​ປະກອບສ່ວນ ເຮັດ​ໃຫ້​ເນື້ອ​ໃນ​ຂອງ​ຮ່າງ​ກົດໝາຍ​ສະບັບ​ນີ້​ມີ​ຄວາມ​ອະ​ອຽດ ຈະແຈ້ງ ແລະ ສົມບູນ​ຍິ່ງ​ຂຶ້ນ  ຈາກ​ນັ້ນ ປະທານ​ກອງ​ປະຊຸມ​ໄດ້​ສະຫຼຸບ​ສັງ ລວມ​ຄຳ​ຄິດ​ເຫັນ ແລະ ສະເໜີ​ໃຫ້ ​ສສຊ ລົງ​ຄະແນນ​ສຽງ ຮັບຮອງ​ເອົາ​ຮ່າງ​ກົດໝາຍ ວ່າ​ດ້ວຍ​ຄວາມ​ສະເໝີພາບ​ຍິງ-ຊາຍ (ສ້າງ​ໃໝ່) ດ້ວຍ​ຄະແນນ​ສຽງ​ສ່ວນ​ຫຼາຍ.  

ຂ່າວທີ່ກ່ຽວຂ້ອງ