70 ກວ່າ​ຫົວໜ່ວຍ ເຂົ້າ​ຮ່ວມ​ວາງສະແດງ​ສິນຄ້າ​ກະສິກຳ​ອິນ​ຊີ​ລາວ

1.327 29 ພ.ຈ. 2019 ຂ່າວໜ້າ​ໜຶ່ງ
70 ກວ່າ​ຫົວໜ່ວຍ ເຂົ້າ​ຮ່ວມ​ວາງສະແດງ​ສິນຄ້າ​ກະສິກຳ​ອິນ​ຊີ​ລາວ

    ກົມ​ປູກຝັງ ກະຊວງ​ກະສິກຳ ແລະ ປ່າໄມ້ ຈັດ​ງານ​ວາງສະແດງ​ສິນຄ້າ​ກະສິກຳ​ອິນ​ຊີ ລາວ ໃນ​ຫົວຂໍ້: ການ​ພັດທະນາ​ແບບ​ສີຂຽວ ຍຸດ​ທະ​ສາດ​ແຫ່ງ​ຊາດ ແລະ ຄວາມ​ສາມາດ​ການ​ແຂ່ງຂັນ​ໃນ​ລະດັບ​ສາກົນ ຂຶ້ນ​ໃນ​ວັນ​ທີ 28-29 ພະຈິກ 2019 ທີ່​ເດີນ​ສວນ​ເຈົ້າຟ້າ​ງຸ່ມ ນະຄອນຫຼວງ​ວຽງ​ຈັນ ມີ​ທ່ານ ບຸນ​ຂວາງ ຄຳ​ບຸນ​ເຮືອງ ຮອງ​ລັດຖະມົນຕີ ກະຊວງ​ກະສິກຳ ແລະ ປ່າໄມ້ ທ່ານ ສົມ​ຈິດ ອິນ​ທະ​ມິດ ຮອງ​ລັດຖະມົນຕີ ກະຊວງ​ອຸດສາຫະກຳ ແລະ ການ​ຄ້າ ທ່ານ ນາງ ມີ​ໂຣະ ຊີ​ໂຣ​ໂຕ​ຣິ ຜູ້ຕາງໜ້າ​ອົງການ​ສະຫະ​ປະຊາ​ຊາດ ເພື່ອ​ການ​ຄ້າ ແລະ ພັດທະນາ ບັນດາ​ຜູ້ຕາງໜ້າ​ຈາກ​ພາກສ່ວນ​ກ່ຽວຂ້ອງ​ທັງ​ພາຍ​ໃນ ແລະ ຕ່າງປະເທດ ພ້ອມ​ດ້ວຍ​ຊາວ​ກະສິກອນ​ກຸ່ມ​ກະສິກຳ​ອິນ​ຊີ​ທົ່ວ​ປະເທດ​ເຂົ້າ​ຮ່ວມ.

   ທ່ານ ບຸນ​ຂວາງ ຄຳ​ບຸນ​ເຮືອງ ກ່າວ​ວ່າ: ເປົ້າ​ໝາຍ​ການ​ຈັດ​ງານ​ຄັ້ງ​ນີ້ ແມ່ນ​ເພື່ອ​ໂຄສະນາ​ຜົນສຳເລັດ​ອັນ​ໃຫຍ່​ຫຼວງ ຂອງ​ການ​ພັດທະນາ​ກະສິກຳ​ອິນ​ຊີ​ໃນ​ໄລຍະ​ຜ່ານ​ມາ​ຕັ້ງແຕ່​ປີ 2004 ເຖິງ 2019 ພ້ອມ​ດຽວ​ກັນ​ນັ້ນ ກໍ່​ເປັນ​ການ​ສົ່ງເສີມ​ການ​ຜະລິດ ກະສິກຳ​ອິນ​ຊີ ຕາມ​ມາດຕະຖານ​ກະສິກຳ​ອິນ​ຊີ ແລະ ກ້າວ​ໄປ​ເຖິງ​ການ​ຜະລິດ​ຕາມ​ມາດຕະຖານ​ຂອງ​ພາກ​ພື້ນ ແລະ ສາກົນ ເພື່ອ​ເປັນ​ສິນຄ້າ ທັງ​ເປັນ​ການ​ປັກ​ປ້ອງ​ຜູ້​ຜະລິດ ແລະ ຜູ້​ບໍລິໂພກ ແລະ ຮັກສາ​ສະພາບ​ແວດ​ລ້ອມ.

   ໃນ​ງານ​ນີ້ ບັນດາ​ທ່ານ ຈະ​ໄດ້​ເຫັນ ໄດ້​ຊົມ ໄດ້​ຊີມ ໄດ້​ແຖມ ແລະ ໄດ້​ຊື້ ຜົນ​ຜະລິດ ແລະ ຜະລິດ​ຕະ​ພັນ ທີ່​ໄດ້​ຮັບ​ການ​ຢັ້ງຢືນ​ຄຸນ​ນະ​ພາບ​ຕາມ​ມາດຕະຖານ​ກະສິກຳ​ອິນ​ຊີ ທີ່​ໄດ້​ຮັບ​ການ​ຄັດ​ສັນ ລວບ​ລວມ​ເອົາ​ມາ​ເພື່ອ​ຢັ້ງຢືນ ໃຫ້​ບັນດາ​ທ່ານ​ໄດ້​ເຫັນ​ຜົນງານ ຈາກ​ຜົນສຳເລັດ ຈາກ​ການ​ພັດທະນາ​ສຳເລັດ ທີ່​ລາວ​ໄດ້​ເຮັດ​ຂື້ນ​ມາ ໃນ​ຂອບ​ເຂດ​ທົ່ວ​ປະເທດ.

   ເຂົ້າ​ຮ່ວມ​ງານ​ວາງສະແດງ​ໃນ​ຄັ້ງ​ນີ້ ໄດ້​ມີ​ກຸ່ມ​ຜູ້​ຜະລິດ ສະມາຄົມ ສະຫະກອນ ຜູ້​ປະກອບ​ການ ບໍລິສັດ ແລະ ຜູ້​ປະກອບ​ການ​ທັງ​ໝົດ 78 ຫົວໜ່ວຍ ໃນ​ນັ້ນ ຜູ້​ເຂົ້າ​ຮ່ວມ​ວາງສະແດງ​ດ້ານ​ກະສິກຳ​ອິນ​ຊີ 66 ຫົວໜ່ວຍ ແລະ ດ້ານ​ກະສິກຳ​ທີ່​ດີ 2 ຫົວໜ່ວຍ ເຊິ່ງ​ຜົນ​ຜະລິດ ແລະ ຜະລິດ​ຕະ​ພັນ​ທີ່​ນຳ​ມາ​ວາງສະແດງ​ໃນ​ຄັ້ງ​ນີ້​ປະກອບ​ມີ ພືດ​ຜັກ ໝາກ​ໄມ້ ເຂົ້າ ຊາ ກາເຟ ແລະ ຜະລິດ​ຕະ​ພັນ​ປຸງ​ແຕ່ງ​ຈຳນວນ​ໜຶ່ງ.

   ທ່ານ ສົມ​ຈິດ ອິນ​ທະ​ມິດ ໄດ້​ກ່າວ​ວ່າ: ໃນ​ງານ​ວາງສະແດງ​ຄັ້ງ​ນີ້ ນອກຈາກ ພືດ​ຜັກ​ປອດ​ສານພິດ​ແລ້ວ ຍັງ​ມີ​ສິນຄ້າ ODOP ຂອງ​ລາວ 4 ຫົວໜ່ວຍ ເຊິ່ງ​ປະກອບ​ດ້ວຍ​ສິນຄ້າ​ຫຼາກ​ຫຼາຍ​ເຊັ່ນ: ກະ​ແລັມ ນ້ຳ ໝາກກ້ຽງ ໜັງ​ເຄັມ ໝ້ຳ ຜະລິດ​ຕະ​ພັນ​ຢາພື້ນເມືອງ ແລະ ອື່ນໆ ມາ​ຮ່ວມ​ວາງສະແດງ​ໃນ​ຄັ້ງ​ນີ້ ທັງ​ນີ້ ກໍ່​ເພື່ອ​ຊຸກຍູ້​ສົ່ງເສີມ​ສິນຄ້າ ລາວ​ເຮົາ​ໃຫ້​ເປັນ​ທີ່​ຮູ້ຈັກ ແລະ ສ້າງ​ໃຫ້​ມີ​ການ​ຊົມໃຊ້​ສິນຄ້າ​ທີ່​ພວກ​ເຮົາ​ຜະລິດ​ໄດ້.

    ດັ່ງນັ້ນ ທາງ​ກອງ​ເລຂາ​ຄະນະ​ສະເພາະ​ກິດ​ສົ່ງເສີມ​ການ ແລະ ຊົມໃຊ້​ຜະລິດ​ຕະ​ພັນ​ທີ່​ຜະລິດ​ໄດ້​ຢູ່​ພາຍ​ໃນ ຍັງ​ໄດ້​ສືບຕໍ່​ຈັດ​ງານ​ຕະຫຼາດນັດ​ຜະລິດ​ຕະ​ພັນ​ກະສິກຳ​ຂຶ້ນ ໃນ​ວັນ​ທີ 30 ພະ​ຈີກ - 1ທັນວາ 2019 ທີ່​ເດີ່ນ​ຈອດ​ລົດ​ດ້ານ​ໜ້າ ສູນ​ການ​ຄ້າ​ລາວ-ໄອ​ເຕັກ ເຊິ່ງ​ພາຍ​ໃນ​ງານ​ດັ່ງກ່າວ ທ່ານ​ຈະ​ໄດ້​ທ່ຽວ​ຊົມ ແລະ ເລືອກ​ຊື້​ສິນຄ້າ​ກະສິກຳ​ພືດ​ຜັກ ຜັກ​ອິນ​ຊີ ສິນຄ້າ​ໂອ​ດ໋ອບ ອຸດສາຫະກຳ​ປຸງ​ແຕ່ງ ແລະ ສິນຄ້າ​ຄອບຄົວ​ຕົວ​ແບບ​ທີ່​ມາ​ຈາກ 9 ຕົວ​ເມືອງ​ທົ່ວ​ນະຄອນຫຼວງ​ວຽງ​ຈັນ ມີ​ທັງ​ໝົດ​ຫຼາຍ​ກວ່າ 300 ຫົວໜ່ວຍ​ທຸລະ​ກິດ ຂໍ​ເຊີນ​ຫົວໜ່ວຍ​ທຸລະ​ກິດ ທຸກໆ​ທ່ານ​ເຂົ້າ​ມີ​ສ່ວນ​ຮ່ວມ​ໃນ​ການ​ງານ​ດັ່ງກ່າວ ເພື່ອ​ສືບຕໍ່​ສົ່ງເສີມ​ສິນຄ້າ​ລາວ​ເຮົາ​ດ້ວຍ.

ຂ່າວທີ່ກ່ຽວຂ້ອງ