ພະຍາດ​ຕັບ​ອັກເສບ B-C ເຮັດ​ໃຫ້​ມີ​ຜົນ​ເສຍ​ຊີວິດ 1,4 ລ້ານ​ຄົນ​ຕໍ່​ປີ

1.366 29 ພ.ຈ. 2019 ຂ່າວໜ້າ​ໜຶ່ງ
ພະຍາດ​ຕັບ​ອັກເສບ B-C ເຮັດ​ໃຫ້​ມີ​ຜົນ​ເສຍ​ຊີວິດ 1,4 ລ້ານ​ຄົນ​ຕໍ່​ປີ

    ກອງ​ປະຊຸມ​ກ່ຽວ​ກັບ​ພະຍາດ​ຕັບ​ອັກເສບ​ໃນ​ຂົງເຂດ​ອ່າງ​ແມ່ນ້ຳ​ຂອງ ຫົວຂໍ້ “ສືບຕໍ່​ຄວບ​ຄຸມພະ​ຍາດ​ຕັບ​ອັກເສບ B ແລະ ກ້າວ​ເຂົ້າ​ສູ່​ການ​ລຶບລ້າງ​ພະຍາດ​ຕັບ​ອັກເສບ​ຕັບ C” ຈັດ​ຂຶ້ນ​ວັນ​ທີ 27-29 ພະຈິກ 2019 ຢູ່​ໂຮງແຮມ​ຄຣາວ​ພລາ ຊາ ໂດຍ​ມີ​ທ່ານ ສີ​ສະຫວາດ ສູດ​ທະ​ນິລາ​ໄຊ ຮອງ​ຫົວໜ້າ​ຫ້ອງການ​ກະຊວງ​ສາທາລະນະ​ສຸກ ທ່ານ​ນາງ Florence Jeanblan-risier ເອກ​ອັກ​ຄະ​ລັດ​ທະ​ທູດ​ຝຣັ່ງ​ປະຈຳ​ລາວ ທ່ານ Eric DEHARO ຜູ້ຕາງໜ້າ​ສະ​ຖາ​ບັນ​ຄົ້ນຄວ້າ​ເພື່ອ​ການ​ພັດທະນາ​ຂອງ​ປະເທດ​ຝຣັ່ງ (IRD) ທ່ານ Jean-Pierre BOSSER ຜູ້ຕາງໜ້າ​ມູນ​ນິທິ​ເມ​ຣິ​ເອີ ແລະ ພາກສ່ວນ​ກ່ຽວຂ້ອງ​ທັງ​ພາຍ​ໃນ ແລະ ຕ່າງປະເທດ ເຂົ້າ​ຮ່ວມ.

    ກອງ​ປະຊຸມ​ຄັ້ງ​ນີ້ ເປັນ​ການ​ເຕົ້າໂຮມ​ເອົາ​ຊ່ຽວຊານ​ຈາກ​ສາກົນ ເພື່ອ​ສ້າງ​ເຄືອ​ຂ່າຍ​ຂອງ​ພາກ​ພື້ນ​ໃນ​ການ​ຕໍ່ຕ້ານ​ພະ ຍາດ​ຕັບ​ອັກເສບ​ຊຳ​ເຮື້ອ ເຊິ່ງ​ເປັນ​ບັນຫາ​ສຳຄັນ​ດ້ານ​ສາທາລະນະ​ສຸກ​ໃນ​ຂົງເຂດ​ອ່າງ​ແມ່ນ້ຳ​ຂອງ ນອກ​ນີ້​ຍັງ​ໄດ້​ລວບ​ລວມ​ເອົາ​ນັກ​ຄົ້ນຄວ້າ ແລະ ຜູ້​ຊ່ຽວຊານ​ດ້ານ​ສາທາລະນະ​ສຸກ​ຫຼາຍ​ກວ່າ 100 ຄົນ ຈາກ​ລາວ ໄທ ມຽນ​ມາ ຫວຽດນາມ ກຳ​ປູ ເຈຍ ມາ​ເລ​ເຊຍ ອິນ​ເດຍ ຟິ​ລິບ​ປິນ ອົດ​ສະ​ຕາ​ລີ ​ຝຣັ່​ງ ແລະ ຈີນ ເຊິ່ງ​ຈະ​ຊ່ວຍ​ໃຫ້​ຜູ້​ຊ່ຽວຊານ​ສືບຕໍ່​ສົນທະນາ​ແລກປ່ຽນ​ຄວາມ​ຮູ້ ແລະ ຂໍ້​ມູນ​ຕ່າງໆ ທີ່​ໄດ້​ມີ​ການ​ແລກປ່ຽນ​ໃນ​ກອງ​ປະຊຸມ​ຄັ້ງ​ຜ່ານ​ມາ  ເພື່ອ​ຊຸກຍູ້​ໃຫ້​ຜູ້​ວາງ​ນະໂຍບາຍ​ລະດັບ​ຊາດ ແລະ ພາກ​ພື້ນ ໃນ​ການ​ເພີ່ມ​ນະໂຍບາຍ ແລະ ການ​ປະກອບສ່ວນ​ດ້ານ​ງົບປະມານ​ໃນ​ການ​ຕໍ່ຕ້ານ​ພະຍາດ​ຕັບ​ອັກເສບ ແລະ ບັນດາ​ຫົວຂໍ້​ຕ່າງໆ​ທີ່​ກ່ຽວຂ້ອງ​ກັບ​ພະຍາດ​ຕັບ​ອັກເສບ ຈະ​ຖືກ​ຍົກ​ຂຶ້ນ​ມາ​ສົນທະນາ ໂດຍ​ຈະ​ກວມ​ເອົາ​ພະຍາດ​ຕັບ​ອັກເສບ​ຊຳ​ເຮື້ອ ນັບ​ຕັ້ງແຕ່​ການ​ປິ່ນປົວ​ຄົນ​ເຈັບ​ຈົນ​ຮອດ​ສິ່ງ​ທ້າ​ທາຍ​ໃໝ່ໆ​ທີ່​ຕ້ອງ​ປະ​ເຊີນ ການ​ສຶກ​ສາ​ຄົ້ນຄວ້າ ແລະ ໂຄງການ​ລິ​ເລີ່ມ​ຕ່າງໆ ທີ່​ປະສົບ​ຜົນສຳເລັດ​ໃນ​ການ​ລຶບລ້າງ​ພະຍາດ​ໄວ​ຣັດ​ຕັບ​ອັກເສບ C ຢູ່​ປະເທດ​ຕ່າງໆ.

    ພະຍາດ​ຕັບ​ອັກເສບ B ແລະ C ສົ່ງ​ຜົນ​ກະທົບ​ຕໍ່​ປະຊາກອນ​ຫຼາຍ​ກວ່າ 320 ລ້ານ​ຄົນ​ທົ່ວ​ໂລກ ໃນ​ນີ້ 250 ລ້ານ​ຄົນ ເປັນ​ພະຍາດ​ຕັບ​ອັກເສບ B 71 ລ້ານ​ຄົນ​ເປັນ​ພະຍາດ​ຕັບ​ອັກເສບ C ເຊິ່ງ​ເປັນ​ສາເຫດ​ເຮັດ​ໃຫ້​ມີ​ຜູ້​ເສຍ​ຊີວິດ 1,4 ລ້ານ​ຄົນ​ຕໍ່​ປີ ແລະ ເປັນ​ສາເຫດ​ຕົ້ນຕໍ​ຂອງ​ການ​ເສຍ​ຊິວິດ ສູງ​ກວ່າ​ພະຍາດ​ວັນນະໂລກ HIV ແລະ ໄຂ້ຍຸງ ພະຍາດ​ຕັບ​ອັກເສບ B ແລະ C ເປັນ​ສາຍເຫດ​ຂອງ​ມະ​ເຣັງ​ຕັບ (primary liver cancers) ຫຼາຍ​ກວ່າ 80% ທົ່ວ​ໂລກ ໂດຍ​ສະ ເພາະ​ໃນ​ອາຊີ ແລະ ອາ​ຟຣິ​ກາ Hepatocarcinoma ແມ່ນ​ມະ​ເຮັງ​ຕັບ​ທີ່​ຂະຫຍາຍ​ໂຕ​ໄວ​ທີ່​ສຸດ​ໃນ​ໂລກ ພະຍາດ​ຕັບ​ອັກ ເສບ ສາມາດ​ປ້ອງ​ກັນ ແລະ ປິ່ນປົວ​ໄດ້ ໃນ​ກໍລະນີ​ທີ່​ເປັນ​ພະຍາດ​ຕັບ​ອັກເສບ C ສາມາດ​ປິ່ນປົວ​ຫາຍ​ຂາດ​ໄດ້ ຫຼາຍ​ກວ່າ 80% ຂອງ​ຄົນ​ເປັນ​ພະຍາດ​ຕັບ​ອັກເສບ ບໍ່​ໄດ້​ຮັບ​ການ​ປ້ອງ​ກັນ ການ​ກວດ ຫຼື ປິ່ນປົວ ໜຶ່ງ​ໃນ​ບັນຫາ​ທີ່​ສຳຄັນ​ກ່ຽວ​ກັບ​ພະ ຍາດ​ຕັບ​ອັກເສບ​ແມ່ນ​ຄ່າ​ໃຊ້​ຈ່າຍ​ໃນ​ການ​ປິ່ນປົວ​ໄດ້​ຫຼຸດ​ລົງ​ຢ່າງ​ຫຼວງຫຼາຍ​ໃນ​ບັນດາ​ປະເທດ​ກຳລັງ​ພັດທະນາ ຍ້ອນ​ການ​ນຳ​ໃຊ້​ຕົວຢ່າງ​ໃໝ່ໆ ແຕ່​ວ່າ​ຄ່າ​ໃຊ້​ຈ່າຍ​ໃນ​ການບົ່ງມະຕິ​ແມ່ນ​ກາຍ​ມາ​ເປັນ​ຂໍ້​ຈຳກັດ​ຂອງ​ພະຍາດ​ດັ່ງກ່າວ. 

ຂ່າວທີ່ກ່ຽວຂ້ອງ