LAPNet ໃຫ້​ບໍລິການ​ຄວບ​ຄຸມ​ລະບົບ​ຊຳລະ​ທຸລະ​ກຳ​ຍ່ອຍ ແລະ ແນະນຳ​ຜະລິດ​ຕະ​ພັນ​ໃໝ່

1.343 29 ພ.ຈ. 2019 ຂ່າວໜ້າ​ໜຶ່ງ
LAPNet ໃຫ້​ບໍລິການ​ຄວບ​ຄຸມ​ລະບົບ​ຊຳລະ​ທຸລະ​ກຳ​ຍ່ອຍ ແລະ ແນະນຳ​ຜະລິດ​ຕະ​ພັນ​ໃໝ່

    ພິທີ​ເປີດ​ບໍລິສັດ ລາວ​ເຊີນ​ນໍ​ເພ​ເມັ້ນ​ເນັດ​ເວີກ ຈຳກັດ (LAPNet) ແລະ ແນະນຳ​ຜະລິດ​ຕະ​ພັນ​ໂອນ​ເງິນ​ຂ້າມ​ທະ​ນາ ຄານ ຜ່ານ​ຕູ້​ເອ​ທີ​ເອັມ ຈັດ​ຂຶ້ນ​ວັນ​ທີ 25 ພະຈິກ 2019 ຢູ່​ໂຮງແຮມ​ຄຣາວ​ພລາ​ຊາ ໂດຍ​ມີ​ທ່ານ ສອນ​ໄຊ ສິດ​ພະ​ໄຊ ຜູ້​ວ່າ ການ​ທະນາຄານ​ແຫ່ງ ​ສປປ ລາວ ພ້ອມ​ດ້ວຍ​ຄະນະ​ບໍລິຫານ​ບໍລິສັດ ຜູ້​ຖື​ຮຸ້ນ ແລະ ພາກສ່ວນ​ທີ່​ກ່ຽວຂ້ອງ ເຂົ້າ​ຮ່ວມ.

    LAPNet ສ້າງຕັ້ງ​ວັນ​ທີ 12 ມີນາ 2019 ແລະ ໄດ້​ລົງ​ນາມ​ສັນຍາ​ການ​ຮ່ວມ​ທຶນ ສ້າງຕັ້ງ​ບໍລິສັດ ລາວ​ເນ​ເຊີນ​ນໍ​ເພ​ເມັ້ນ​ເນັດ​ເວີກ ຈຳກັດ ວັນ​ທີ 22 ພະຈິກ 2019 ພາຍ​ໃຕ້​ການ​ຮ່ວມ​ມື​ຂອງ​ຜູ້​ຖື​ຮຸ້ນ​ພາຍ​ໃນ ນຳ​ໂດຍ​ທະນາຄານ​ແຫ່ງ ​ສປປ ລາວ ແລະ 7 ທະນາຄານ​ທຸລະ​ກິດ​ຂອງ ​ສປປ ລາວ ຄື: ທະນາຄານ​ການ​ຄ້າ​ຕ່າງປະເທດ​ລາວ​ມະຫາຊົນ ທະນາຄານ​ພັດ ທະ​ນາ​ລາວ ທະນາຄານ​ສົ່ງເສີມ​ກະສິກຳ ທະນາຄານ​ຮ່ວມ​ພັດທະນາ ທະນາຄານ​ຮ່ວມ​ທຸລະ​ກິດ ລາວ-ຫວຽດ ທະນາຄານ​ເອ​​ັສ​ທີ ຈຳກັດ ທະນາຄານ​ບີ​ໄອ​ຊີ​ລາວ ຈຳກັດ ແລະ ຜູ້​ຖື​ຮຸ້ນ​ຕ່າງປະເທດ ຄື: ບໍລິສັດ ຢູ​ນຽນ​ເພ​ສາກົນ ຈຸດປະສົງ​ການ​ດຳ ເນີນ​ທຸລະ​ກິດ​ຂອງ​ບໍລິສັດ ແມ່ນ​ເຮັດ​ໜ້າທີ່​ຄວບ​ຄຸມ​ລະບົບ​ຊຳລະ​ທຸລະ​ກຳ​ຍ່ອຍ​ໃນ​ລາວ ຕາມ​ຄຳ​ຂວັນ “ທຸກ​ທີ່ ທຸກ​ເວລາ ແລະ ທຸກ​ເຄື່ອງມື​ການ​ຊຳລະ” ສອດຄ່ອງ​ກັບ​ຄາດໝາຍ​ທີ່​ໄດ້​ວາງ​ໄວ້​ໃນ​ແຜນ​ຍຸດ​ທະ​ສາດ​ພັດທະນາ​ລະບົບ​ສະ​ຖາ​ບັນ​ການ​ເງິນ-ເງິນຕາ​ຂອງ​ລາວ ໄລຍະ​ປີ 2016-2025 ແລະ ວິໄສ​ທັດ ຮອດ​ປີ 2030.

    ທ່ານ ຫົງ​ຄຳ ເພັດ​ດາ​ວົງ ຜູ້ອຳນວຍການ​ບໍລິສັດ LAPNet ກ່າວ​ວ່າ: ໂດຍ​ໄດ້​ຮັບ​ການ​ສະໜັບສະໜູນ​ຈາກ​ທະນາຄານ​ແຫ່ງ ​ສປປ ລາວ ໂດຍ​ສະເພາະ ກົມ​ຄຸ້ມ​ຄອງ​ລະບົບ​ຊຳລະ​ສະ​ສາງ ແລະ ບັນດາ​ທະນາຄານ​ທຸລະ​ກິດ ໄດ້​ສຸມ​ໃສ່​ພັດທະນາ​ການ​ເຊື່ອມ​ໂຍງ​ລະບົບ​ເຂົ້າກັນ ປັດຈຸບັນ LAPNet ມີ​ສະມາຊິກ 12 ທະນາຄານ ທີ່​ສາມາດ​ເຮັດ​ທຸລະ​ກຳ ຄື: ກວດ​ຍອດ​ເງິນ​ໃນ​ບັນຊີ ຖອນເງິນ​ສົດ​ຜ່ານ​ຕູ້​ເອ​ທີ​ເອັມ​ຮ່ວມ​ກັນ​ໄດ້​ທົ່ວ​ປະເທດ ເຊິ່ງ​ບໍລິສັດ​ກຳລັງ​ລິ​ເລີ່ມ​ໂຄງການ​ໂອນ​ເງິນ​ຂ້າມ​ທະນາຄານ ຜ່ານ​ຕູ້​ເອ​ທີ​ເອັມ ແລະ ປັດຈຸບັນ​ມີ 6 ທະນາຄານ​ທີ່​ເປັນ​ສະມາຊິກ ສາມາດ​ພັດທະນາ​ລະບົບ​ຂອງ​ຕົນ​ສຳເລັດ ແລະ ຈະ​ເປີດ​ໃຫ້​ນຳ​ໃຊ້​ໄດ້​ບາງ​ຈຸດ​ໃນ​ເທດສະບານ​ນະຄອນຫຼວງ ແລະ ສາມາດ​ນຳ​ໃຊ້​ໄດ້​ທຸກ​ຕູ້​ພາຍ​ໃນ​ທ້າຍ​ປີ 2019 ແລະ ໃນຕໍ່ໜ້າ​ຍັງ​ຈະ​ພັດທະນາ​ລະບົບ​ທີ່​ສາມາດ​ຊຳລະ​ຄ່າ​ສິນຄ້າ ແລະ ຄ່າ​ບໍລິການ​ຕ່າງໆ​ຢູ່​ຮ້ານ​ຄ້າ ຜ່ານ​ເຄື່ອງ​ພີ​ໂອ​ເອ​​ສ ຜ່ານ QR Code.

ຂ່າວທີ່ກ່ຽວຂ້ອງ