ທູຕານຸທູດ-ອົງ​ການຈັດຕັ້ງ​ສາກົນ ເຂົ້າ​ອວຍພອນ​ການ​ນຳ​ຂັ້ນ​ສູງ ພັກ-ລັດ ໂອກາດ​ວັນຊາດ​ທີ 2 ທັນວາ

456 03 ທ.ວ. 2019 ຂ່າວໜ້າ​ໜຶ່ງ
ທູຕານຸທູດ-ອົງ​ການຈັດຕັ້ງ​ສາກົນ ເຂົ້າ​ອວຍພອນ​ການ​ນຳ​ຂັ້ນ​ສູງ ພັກ-ລັດ ໂອກາດ​ວັນຊາດ​ທີ 2 ທັນວາ

    ບັນດາ​ທູຕານຸທູດ ແລະ ຜູ້ຕາງໜ້າ​ອົງ​ການຈັດຕັ້ງ​ສາກົນ​ປະຈຳ​ລາວ ໄດ້​ເຂົ້າ​ອວຍພອນ ທ່ານ ບຸນ​ຍັງ ວໍລະ​ຈິດ ປະທານ​ປະເທດ ພ້ອມ​ພັນ​ລະ​ຍາ ແລະ ການ​ນຳ​ຂັ້ນ​ສູງ ພັກ-ລັດ ໃນ​ວັນ​ທີ 29 ພະຈິກ 2019 ຢູ່​ທຳ​ນຽບ​ປະທານ​ປະເທດ ເນື່ອງ​ໃນ​ໂອກາດ​ວັນ​ສະຖາປະນາ ​ສປປ ລາວ 2 ທັນວາ ຄົບຮອບ 44 ປີ (2/12/1975-2/12/2019) ແລະ ປີ​ໃໝ່​ສາກົນ 2020 ທີ່​ຈະ​ມາ​ເຖິງ​ນີ້.

    ທ່ານ BELINDA M.ANTE ເອກ​ອັກ​ຄະ​ລັດ​ຖະ​ທູດ ແຫ່ງ ສາທາລະນະ​ລັດ ຟີ​ລິບ​ປິນ ປະຈຳ​ລາວ ທູດ​ອາວຸໂສ​ຕາງໜ້າ​ໃຫ້​ທູຕານຸທູດ ແລະ ຜູ້ຕາງໜ້າ​ອົງ​ການຈັດຕັ້ງ​ສາກົນ​ປະຈຳ​ລາວ ໄດ້​ຂຶ້ນ​ກ່າວ​ສະແດງ​ຄວາມ​ຊົມເຊີຍ​ຕໍ່​ຜົນສຳເລັດ ທີ່​ປະເທດ​ຊາດ​ຍາດ​ມາ​ໄດ້​ຕະຫຼອດ​ໄລຍະ 44 ປີຜ່ານມາ ເສດຖະກິດ​ຂອງ​ລາວ​ຄາດ​ວ່າ​ຈະ​ໄດ້​ຮັບ​ການ​ຟື້ນ​ຟູ ເຖິງ​ວ່າ​ຈະ​ຍັງ​ສືບຕໍ່​ມາດຕະຖານ​ຮັດກຸມ​ທາງ​ດ້ານ​ງົບປະມານ ແລະ ຄວາມ​ຜັນ​ຜວນ​ຂອງ​ເສດຖະກິດ​ໂລກ ທະນາຄານ​ໂລກ​ໄດ້​ລາຍ​ງານ​ໃນ​ຕົ້ນ​ປີ​ນີ້​ວ່າ: ລາວ​ເປັນ​ໜຶ່ງ​ໃນ​ບັນດາ​ປະເທດ​ທີ່​ມີ​ເສດຖະກິດ​ຂະຫຍາຍຕົວ​ໄວ​ສູງ​ສຸດ ໃນ​ອາຊີ​ຕາເວັນ​ອອກ ແລະ ປາ​ຊີ​ຟິກ ແລະ ໃນ​ຊຸມ​ປີ​ຜ່ານ ມາ​ຍັງ​ມີ​ຄວາມ​ກ້າວໜ້າ ໂດຍ​ສະເພາະ ການ​ລົບ​ລ້າງ​ຄວາມທຸກ​ຍາກ​ໃຫ້​ໝົດ​ໄປ​ກວ່າ​ເຄິ່ງ​ໜຶ່ງ ການ​ຫຼຸດຜ່ອນ​ຄວາມ​ອຶດຫິວ ແລະ ກຳລັງ​ປັບປຸງ​ປະສິດທິພາບ​ທາງ​ດ້ານ​ການ​ສຶກ​ສາ ແລະ ສາທາລະນະ​ສຸກ​ທົ່ວ​ປະເທດ.   

    ປະເທດ​ລາວ​ຍັງ​ມີ​ຜົນສຳເລັດ​ໃຫຍ່​ໃນ​ການ​ສົ່ງເສີມ​ມິດຕະພາບ ແລະ ການ​ຮ່ວມ​ມື​ໃນ​ຂອບ​ແມ່ນ້ຳ​ຂອງ ອາ​ຊຽນ  ແລະ ກັບ​ປະເທດ​ໃກ້​ຄຽງ​ປີ 2019 ກະຊວງ​ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ ໄດ້​ລາຍ​ງານ​ວ່າ: ໃນ​ເດືອນ​ກໍລະກົດ 2019 ການ​ສົ່ງເສີມ “ປີ​ທ່ອງ​ທ່ຽວ​ລາວ-ຈີນ 2019” ໄດ້​ຮັບ​ການຈັດຕັ້ງ​ຢ່າງ​ມີ​ຜົນສຳເລັດ ເຮັດ​ໃຫ້​ຈຳນວນ​ນັກ​ທ່ອງ​ທ່ຽວ​ເຂົ້າ​ມາ​ລາວ​ພາຍ​ໃນ 6 ເດືອນ​ເພີ່ມ​ຂຶ້ນ 5% ນອກ​ນັ້ນ​ລາວ​ຍັງ​ສືບຕໍ່​ໄດ້​ຮັບ​ຜົນ​ປະໂຫຍດ​ຈາກ​ທີ່​ຕັ້ງ​ຍຸດ​ທະ​ສາດ​ຢູ່​ໃຈກາງ​ພາກ​ພື້ນ​ແມ່ນ້ຳ​ຂອງ ແລະ ໄດ້​ປັບປຸງ​ການ​ເຊື່ອມ​ຈອດ ໂດຍ​ການ​ຂະຫຍາຍ​ຈຳນວນ​ເສັ້ນທາງ​ກໍ່ສ້າງ​ຂົວ​ມິດຕະພາບ ພັດທະນາ​ພື້ນຖານ​ໂຄງ​ລ່າງ ແລະ ພັດທະນາ​ຄວາມ​ສາມາດ​ໃນ​ຂະແໜງການ​ຕ້ອນຮັບ ແລະ ການ​ບໍລິການ​ໃຫ້​ສູງ​ຂຶ້ນ.

     ພວກ​ເຮົາ​ມີ​ຄວາມ​ຍິນ​ດີ​ຕໍ່​ການ​ຕັດສິນ​ໃຈ​ຢ່າງ​ແນວ​ແນ່​ຂອງ​ລັດຖະບານ ນຳ​ໂດຍ​ທ່ານ ບຸນ​ຍັງ ວໍລະ​ຈິດ ປະທານ​ປະເທດ ທ່ານ ທອງ​ລຸນ ສີ​ສຸ​ລິດ ນາຍົກ​ລັກ​ຖະ​ຕີ ເພື່ອ​ເຮັດ​ໃຫ້ການ​ຄຸ້ມ​ຄອງ​ລັດ​ຢູ່​ລາວ ມີ​ຄວາມ​ເຂັ້ມແຂງ ລວມ​ທັງ​ຄວາມ​ພະຍາຍາມ​ຂອງ​ລັດຖະບານ​ໃນ​ການ​ແກ້​ໄຂ​ຄວາມທຸກ​ຍາກ​ທາງ​ດ້ານ​ເສດຖະກິດ​ຂອງ​ປະເທດ ແລະ ຮັກສາ​ການ​ເຕີບ​ໂຕ​ເສດຖະກິດ ຕໍ່​ສິ່ງ​ທ້າ​ທາຍ ທັງ​ພາຍ​ໃນ ແລະ ພາຍ​ນອກ ພ້ອມ​ດຽວ​ກັນ​ນັ້ນ​ລັດຖະບານ​ຍັງ​ເອົາໃຈໃສ່​ຈັດ​ຕັ້ງ​ປະຕິບັດ​ແຜນ​ພັດທະນາ​ເສດຖະກິດ-ສັງຄົມ​ແຫ່ງ​ຊາດ ຄັ້ງ​ທີ 8 ຕາມ​ແນວທາງ​ພັກ-ລັດຖະບານ​ແນໃສ່​ລຶບລ້າງ​ຄວາມທຸກ​ຍາກ​ໃຫ້​ໝົດ​ໄປ​ໃນ​ລາວ ພວກ​ເຮົາ​ໃນ​ຖານະ​ເປັນ​ຄູ່​ຮ່ວມ​ມື​ສອງ​ຝ່າຍ ແລະ ໃນ​ຖານະ​ຄູ່​ຮ່ວມ​ພັດທະນາ​ຈະ​ຕັ້ງໜ້າ​ເຮັດ​ວຽກ​ກັບ​ບັນດາ​ທ່ານ ເພື່ອ​ຈັດ​ຕັ້ງ​ປະຕິບັດ ແລະ ເຮັດ​ໃຫ້​ແຜນ​ດັ່ງກ່າວ​ບັນລຸ​ເປົ້າ​ໝາຍ​ໂດຍ​ການ​ຮັດ​ແໜ້ນ​ສາຍ​ພົວພັນ​ຂອງ​ພວກ​ເຮົາ​ໃຫ້​ເລິກເຊິ່ງ​ກວ່າ​ເກົ່າ ສຶກ​ສາ​ຊ່ອງ​ທາງ ແລະ ຊຸກຍູ້​ໃຫ້​ມີ​ການ​ພົວພັນ​ທາງ​ດ້ານ​ການ​ຄ້າ ແລະ ການ​ລົງທຶນ​ໃຫ້​ຫຼາຍ​ຂຶ້ນ ສົ່ງເສີມ​ການ​ພົວພັນ​ຮ່ວມ​ມື ລະຫວ່າງ​ລັດ​ກັບ​ລັດ ແລະ ປະຊາຊົນ​ກັບ​ປະຊາຊົນ ລວມ​ທັງ​ສົ່ງເສີມ​ການ​ຮ່ວມ​ມື​ໃນ​ຂອບ​ສອງ​ຝ່າຍ​ພາກ​ພື້ນ ແລະ ຫຼາຍ​ຝ່າຍ​ນຳ​ອີກ.

    ຈາກ​ນັ້ນ ​ທ່ານ ບຸນ​ຍັງ ວໍລະ​ຈິດ ໄດ້​ສະແດງ​ຄວາມ​ຂອບໃຈ ແລະ ຕີ​ລາຄາ​ສູງ​ຕໍ່​ຄຳ​ອວຍພອນ​ອັນ​ປະເສີດ​ຂອງ​ທ່ານ​ທູດ​ອາວຸໂສ​ເຊິ່ງ​ສະແດງ​ເຖິງ​ໄມຕີ​ຈິດ​ມິດຕະພາບ​ແລະ​ການ​ຮ່ວມ​ມື​ທີ່​ດີ​ລະຫວ່າງ​ປະເທດ ແລະ ອົງ​ການຈັດຕັ້ງ​ຕ່າງໆ​ກັບ​ລາວ​ເປັນ​ການ​ໃຫ້​ກຳລັງ​ໃຈ​ອັນ​ໃຫຍ່​ຫຼວງ​ແກ່​ປະຊາຊົນ​ລາວ​ບັນດາເຜົ່າ​ໃນ​ພາລະກິດ​ປົກ​ປັກ​ຮັກສາ​ແລະ​ສ້າງສາ​ບ້ານ​ເມືອງ​ຕະຫຼອດ​ໄລຍະ 44 ປີຜ່ານມາ ເຊິ່ງ​ປີ 2019 ເປັນ​ປີ​ທີ່​ພັກ-ລັດ ແລະ ປະຊາຊົນ​ລາວ​ທັງ​ຊາດ​ໄດ້​ສືບຕໍ່​ເອົາໃຈໃສ່​ຈັດ​ຕັ້ງ​ປະຕິບັດ​ມະຕິ​ກອງ​ປະຊຸມ​ໃຫຍ່ ຄັ້ງ​ທີ X ຂອງ​ພັກ ແຜນ​ພັດທະນາ​ເສດຖະກິດ-ສັງຄົມ 5 ປີ ຄັ້ງ​ທີ VIII ຢ່າງ​ຕັ້ງໜ້າ ໂດຍ​ໄດ້​ຮັບ​ຜົນສຳເລັດ​ຕົວ​ຈິງ​ທີ່​ເປັນ​ໜ້າ​ເພິ່ງ​ພໍໃຈ​ໃນ​ຫຼາຍ​ດ້ານ​ເປັນຕົ້ນ​ຍັງ​ສາມາດ​ຮັກສາ​ໄດ້​ສະຖຽນ​ລະ​ພາບ​ທາງ​ດ້ານ​ການເມືອງ ແລະ ເສດຖະກິດ​ມະຫາ​ພາກ ໄດ້​ຢ່າງ​ໝັ້ນ​ທ່ຽງ ວຽກ​ງານ​ດ້ານ​ການ​ສຶກ​ສາ ສາທາລະນະ​ສຸກ ວັດທະນະທຳ-ສັງຄົມ ກໍ​ໄດ້​ຮັບ​ການ​ເອົາ​ໃນ​ໃສ່​ປັບປຸງ​ແກ້​ໄຂ​ໃຫ້​ມີ​ຄຸນ​ນະ​ພາບ​ດີ​ຂຶ້ນ​ຢ່າງ​ຕໍ່​ເນື່ອງ ພິເສດ​ໃນ​ຫວ່າງ​ບໍ່​ດົນ​ມາ​ນີ້​ອົງການ​ອຸຍ​ແນ​​ສ​ໂກ ກໍ​ໄດ້​ຮັບຮອງ​ເອົາ​ທົ່ງ​ໄຫ​ຫີນ​ແຂວງ​ຊຽງ​ຂວາງ​ເຂົ້າ​ບັນຊີ​ເປັນ​ມໍລະດົກ​ໂລກ​ແຫ່ງ​ທີ 3 ຂອງ​ລາວ ຖັດ​ຈາກ​ຫຼວງ​ພະ​ບາງ ແລະ ວັດ​ພູ​ຈຳປາ​ສັກ ຕາງໜ້າ​ໃຫ້​ລັດຖະບານ ແລະ ປະຊາຊົນ​ລາວ ຂ້າພະເຈົ້າ​ຂໍ​ສະແດງ​ຄວາມ​ຂອບໃຈ​ຢ່າງ​ຈິງ​ໃຈ​ຕໍ່​ບັນດາ​ສະມາຊິກ​ຂອງ​ຄະນະ​ກຳ​ມະ​ທິ​ການ​ມໍລະດົກ​ໂລກ​ທີ່​ໄດ້​ໃຫ້ການ​ສະໜັບສະໜູນ​ຕໍ່​ລາວ ມານະ​ໂດ​ກາດ​ນີ້​ດ້ວຍ ແລະ ຂໍ​ເຊີນຊວນ​ບັນດາ​ທານ​ທັງຫຼາຍ​ຈົ່ງ​ຫາ​ໂອກາດ​ໄປ​ທ່ຽວ​ຊົນ​ສະຖານທີ່​ມໍລະດົກ​ໂລກ​ແຫ່ງ​ໃໝ່​ນີ້​ດ້ວຍ.

     ໃນ​ໂອກາດ​ປີ​ໃໝ່​ສາກົນ 2020 ໃກ້​ຈະ​ວຽນມາ​ເຖິງ​ໃນ​ມໍ່ໆ​ນີ້​ຂ້າພະເຈົ້າ​ຂໍ​ອວຍພອນ​ໃຫ້​ບັນດາ​ທ່ານ​ທັງຫຼາຍ​ຈົ່ງ​ມີ​ສຸຂະພາບ​ແຂງແຮງ ມີ​ຄວາມສຸກ​ໃນ​ຊີວິດ​ສ່ວນ​ຕົວ​ຄອບຄົວ ແລະ ປະສົບ​ຜົນສຳເລັດ​ໃນ​ໜ້າທີ່​ອັນ​ມີ​ກຽດ​ສະຫງ່າ​ງາມ​ຂອງ​ທຸກ​ທ່ານ ພ້ອມ​ກັນ​ນີ້​ກໍ​ຂໍ​ຜ່ານ​ບັນດາ​ທ່ານ​ສົ່ງ​ຄວາມ​ຢ້ຽມຢາມ​ຖາມ​ຂ່າວ ແລະ ອວຍພອນ​ໄຊ​ອັນ​ປະເສີດ​ໄປ​ຍັງ​ປະມຸກ​ລັດ ຫົວໜ້າ​ລັດຖະບານ ກໍ​ຄື​ການ​ນຳ​ອົງ​ການຈັດຕັ້ງ​ສາກົນ​ຂອງ​ບັນດາ​ທ່ານ​ມານະ​ໂອກາດ​ນີ້​ດ້ວຍ.

ຂ່າວທີ່ກ່ຽວຂ້ອງ