ຮ່ວມມືກັນຄົ້ນຄວ້າ ແລະ ສ້າງຫຼັກສູດບໍລິຫານວິສະວະກຳຄອມພິວເຕີ

836 03 ທ.ວ. 2019 ຂ່າວໜ້າ​ໜຶ່ງ

    ພິ­ທີ​ລົງ​ນາມ​ເຊັນ​ບົດ​ບັນ­ທຶກ​ຄວາມ​ເຂົ້າ­ໃຈ ລະ­ຫວ່າງ ສະ​ຖາ​ບັນ​ເຕັກ​ໂນ​ໂລ​ຊີ​ການ​ສື່­ສານ​ຂໍ້​ມູນ​ຂ່າວສານ ແລະ ບໍ­ລິ­ສັດ CAT telecom ຮ່ວມ​ກັບ ບໍ­ລິ­ສັດ Pakgon ຈຳ­ກັດ (ປະ­ເທດ​ໄທ) ຈັດ​ຂຶ້ນ​ໃນ​ວັນ​ທີ 28 ພະ­ຈິກ 2019 ຢູ່​ສະ​ຖາ​ບັນ​ເຕັກ​ໂນ​ໂລ​ຊີ​ການ​ສື່­ສານ​ຂໍ້​ມູນ​ຂ່າວ­ສານ ກະ­ຊວງ​ໄປ­ສະ­ນີ​ໂທລະ​ຄົມ​ມະ​ນາ ຄົມ ແລະ ການ​ສື່­ສານ  (ປທສ) ໂດຍ​ການ​ລົງ​ນາມ​ຂອງ​ທ່ານ ສາຍ​ຝົນ ບຸດ​ຈັນ­ທະ​ລາດ ຜູ້­ອຳ­ນວຍ­ການ​ສະ​ຖາ​ບັນ​ເຕັກ​ໂນ​ໂລ​ຊີ​ການ​ສື່­ສານ ແລະ ທ່ານ ພາກ­ພູມ ສີ​ຣິ​ມາ​ກຸນ ຫົວ­ໜ້າ​ເຈົ້າ​ໜ້າ­ທີ່​ບໍ­ລິ­ຫານ ບໍ­ລິ­ສັດ CAT telecom ມີ​ທ່ານ ທອງ​ໃສ ຊານ​ໄຊ​ຍະ ຮອງ​ລັດ­ຖະ­ມົນ­ຕີ​ກະ­ຊວງ ປທສ ພ້ອມ​ດ້ວຍ​ບັນ­ດາ​ກົມ​ອ້ອມ​ຂ້າງ ກະ­ຊວງ ປທສ ລັດ​ວິ​ສາ​ຫະ​ກິດ​ໃນ​ຂະ­ແໜງ­ການ​ໂທລະ​ຄົມ ແລະ ບໍ­ລິ­ສັດ​ເອ­ກະ​ຊົນ​ຕ່າງໆ ໃນ​ຂະ­ແໜງ­ການ​ທີ່​ກ່ຽວ­ຂ້ອງ ເຂົ້າ​ຮ່ວມ​ເປັນ​ສັກ­ຂີ​ພະ­ຍານ.

    ການ​ເຊັນ​ບົດ​ບັນ­ທຶກ​ຄວາມ​ເຂົ້າ­ໃຈ​ໃນ​ຄັ້ງ​ນີ້ ກໍ​ເພື່ອ​ຮ່ວມ​ມື​ກັນ​ຄົ້ນ­ຄວ້າ ແລະ ສ້າງ​ຫຼັກ­ສູດ​ບໍ­ລິ­ຫານ​ວິ ສະ​ວະ​ກຳ​ຄອມ​ພິວ​ເຕີ ຫຼື Computer Engineering Management ເຊິ່ງ​ເປັນ​ຫຼັກ­ສູດ​ປະ­ລິນ­ຍາ​ຕີ​ຕໍ່​ເນື່ອງ 2 ປີ ໂດຍ​ຈະ​ຮັບ​ເອົາ​ຄົນ​ທີ່​ຈົບ​ຊັ້ນ​ສູງ​ຂຶ້ນ​ໄປ ຈາກ​ທຸກ​ຂະ­ແໜງ­ການ​ໃຫ້​ສາ­ມາດ​ເຂົ້າ​ຮຽນ​ຕໍ່​ໄດ້ ເຊິ່ງ​ຫຼັກ­ສູດ​ດັ່ງ­ກ່າວ​ຈະ​ລວມ​ເນື້ອ​ຫາ​ທາງ​ດ້ານ​ເຕັກ​ໂນ​ໂລ​ຊີ​ທີ່​ທັນ​ສະ­ໄໝ ເນັ້ນ​ການ​ສ້າງ ແລະ ປະ­ຕິ­ບັດ​ຕົວ​ຈິງ ແລະ ຈະ​ກວມ​ໄປ​ເຖິງ​ການ​ຮຽນ​ຮູ້​ກ່ຽວ​ກັບ​ການ​ບໍ­ລິ­ຫານ​ຈັດ­ການ​ອີກ​ດ້ວຍ.

    ເວົ້າ​ລວມ​ແມ່ນ​ຈະ​ເປັນ​ການ​ພັດ­ທະ­ນາ​ຫຼັກ­ສູດ ເພື່ອ​ສ້າງ​ບຸ​ຄະ­ລາ​ກອນ​ທີ່​ມີ​ຄວາມ​ຮູ້​ທາງ​ດ້ານ​ເຕັກ​ໂນ​ໂລ​ຊີ ເປັນ​ວິ­ສະ­ວະ­ກອນ​ທີ່​ສາ­ມາດ​ສ້າງ​ຜະ­ລິດ​ຕະ​ພັນ​ຕົວ​ຈິງ ແລະ ພຽບ​ພ້ອມ​ດ້ວຍ​ຄວາມ​ຮູ້​ຄວາມ​ສາ­ມາດ​ໃນ​ການ​ບໍ­ລິ­ຫານ​ຈັດ­ການ ເພື່ອ​ໃຫ້​ເປັນ​ຄົນ​ໜຶ່ງ​ທີ່​ສາ­ມາດ​ຫັນ​ຕົນ​ເປັນ​ຜູ້​ບໍ­ລິ­ຫານ​ທີ່​ທັນ​ສະ­ໄໝ ຫຼື ເປັນ​ບຸກ­ຄົນ​ທີ່​ສາ­ມາດ​ສ້າງ​ຜະ­ລິດ​ຕະ​ພັນ (Solution) ທີ່​ຕອບ​ສະ­ໜອງ​ໃຫ້​ແກ່​ຄວາມ​ຕ້ອງ­ການ​ຂອງ​ສັງ­ຄົມ ຈົນ​ສາ­ມາດ​ຫັນ​ຕົນ​ເປັນ​ເຈົ້າ​ຂອງ​ກິດ­ຈະ­ການ​ໄດ້​ອີກ​ດ້ວຍ.

ຂ່າວທີ່ກ່ຽວຂ້ອງ