ມອບ-ຮັບໂຄງການກໍ່ສ້າງເດີ່ນ ເສັ້ນທາງເບຕົງ ທາງປູຢາງ ແລະ ສວນດອກໄມ້ ກອງບັນຊາການທະຫານ ນວ

    ພິ­ທີ​ມອບ-ຮັບ​ໂຄງ­ການ​ກໍ່­ສ້າງ​ເດີ່ນ ເສັ້ນ­ທາງ​ເບ​ຕົງ ທາງ​ປູ­ຢາງ ແລະ ສວນ​ດອກ​ໄມ້ ກອງ​ບັນ­ຊາ​ການ​ທະ­ຫານ ນະ­ຄອນ­ຫຼວງ​ວຽງ​ຈັນ (ນວ) ຈັດ​ຂຶ້ນ​ວັນ​ທີ 29 ພະ­ຈິກ 2019 ຢູ່​ກອງ​ບັນ­ຊາ​ການ​ດັ່ງ­ກ່າວ ໂດຍ​ມີ​ທ່ານ ພົ​ຈວ ສີ​ພອນ ຈັນ​ສົມ​ວົງ ຫົວ­ໜ້າ​ກອງ​ບັນ­ຊາ​ການ​ທະ­ຫານ ນວ ທ່ານ ພັອ ຫງວ​ຽນ ດິງ​ລີວ ຮອງ​ຜູ້​ບັນ­ຊາ​ການ ກອງ​ບັນ­ຊາ​ການ​ທະ­ຫານ ນະ­ຄອນ­ຫຼວງ​ຮ່າ​ໂນ້ຍ ສສ ຫວຽດ­ນາມ ທ່ານ ພົ​ຈວ ຮາ ເຕີນ​ຕ່ຽນ ຮອງ​ຫົວ­ໜ້າ​ກອງ​ບັນ­ຊາ​ການ​ທະ­ຫານ ເຂດ 4 ສສ ຫວຽດ­ນາມ ແລະ ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

    ທ່ານ ພັທ ມອນ​ຕາ ວັນ​ເລືອງ​ສອນ ຄະ­ນະ​ຮັບ­ຜິດ­ຊອບ​ໂຄງ­ການ​ກໍ່­ສ້າງ​ເດີ່ນ ເສັ້ນ­ທາງ​ເບ​ຕົງ ທາງ​ປູ ຢາງ ແລະ ສວນ​ດອກ​ໄມ້ ກອງ​ບັນ­ຊາ​ການ​ທະ­ຫານ ນວ ກ່າວ​ວ່າ: ກອງ​ບັນ­ຊາ​ການ​ທະ­ຫານ ນວ ແລະ ກອງ​ບັນ­ຊາ​ການ​ທະ­ຫານ ນະ­ຄອນ­ຫຼວງ​ຮ່າ​ໂນ້ຍ ໄດ້​ຕົກ­ລົງ​ແຮກ­ສ່ຽວ​ນຳ​ກັນ ວັນ​ທີ 7 ມິ­ຖຸ­ນາ 2015 ແລະ ໄດ້​ມີ​ການ​ພົວ­ພັນ​ກັນ​ນັບ​ມື້​ໜັກ​ແໜ້ນ ໄລ­ຍະ​ຜ່ານ​ມາ​ອົງ­ການ​ປົກ­ຄອງ ນະ­ຄອນ­ຫຼວງ​ຮ່າ​ໂນ້ຍ ໄດ້​ຊ່ວຍ­ເຫຼືອ​ກອງ​ບັນ­ຊາ​ການ​ທະ­ຫານ ນວ ໂດຍ​ຜ່ານ​ກອງ​ບັນ­ຊາ​ການ​ທະ­ຫານ ນະ­ຄອນ­ຫຼວງ​ຮ່າ​ໂນ້ຍ ເປັນ​ເງິນ ວັດ­ຖຸ​ອຸ­ປະ­ກອນ ແລະ ໂຄງ­ການ​ກໍ່­ສ້າງ​ຫໍ­ສະ­ໝຸດ-ຫໍ​ມູນ­ເຊື້ອ ມູນ​ຄ່າ 8 ຕື້​ດົງ ຫຼື ປະ­ມານ 3,04 ຕື້​ກີບ ເພື່ອ​ສືບ­ຕໍ່​ຊ່ວຍ­ເຫຼືອ​ກອງ​ບັນ­ຊາ​ການ​ທະ­ຫານ ນວ ກອງ​ບັນ­ຊາ​ການ​ທະ­ຫານ ນະ­ຄອນ­ຫຼວງ​ຮ່າ​ໂນ້ຍ ໄດ້​ນຳ​ສະ­ເໜີ​ອົງ­ການ​ປົກ­ຄອງ ນະ­ຄອນ­ຫຼວງ​ຮ່າ​ໂນ້ຍ ໃຫ້​ທຶນ​ຊ່ວຍ­ເຫຼືອ​ກໍ່­ສ້າງ​ເດີ່ນ ເສັ້ນ­ທາງ​ເບ​ຕົງ ທາງ​ປູ­ຢາງ ແລະ ສວນ​ດອກ​ໄມ້ ກອງ​ບັນ­ຊາ​ການ​ທະ­ຫານ ນວ ມູນ​ຄ່າ 12 ຕື້​ດົງ ຫຼື ປະ­ມານ 4,57 ຕື້​ກີບ ແລະ ປີ 2019 ຍັງ​ໄດ້​ຮັບ​ການ​ຊ່ວຍ­ເຫຼືອ ຈາກ​ກອງ​ບັນ­ຊາ​ການ​ທະ­ຫານ ເຂດ 4 ສສ ຫວຽດ­ນາມ ເພື່ອ​ກໍ່­ສ້າງ​ກັນ​ເຈື່ອນ ມູນ​ຄ່າ 148 ລ້ານ​ດົງ ຫຼື ປະ­ມານ 56,4 ລ້ານ​ກີບ ແລະ ໄດ້​ຕົກ­ລົງ​ເອົາ​ບໍ­ລິ­ສັດ ໂກ​ເອ​ໂກ ຈຳ­ກັດ​ຜູ້​ດຽວ ເຊິ່ງ​ເປັນ​ບໍ­ລິ­ສັດ​ຂອງ​ກອງ​ບັນ­ຊາ​ການ​ທະ­ຫານ ເຂດ 4 ສສ ຫວຽດ­ນາມ ເປັນ​ຜູ້​ຮັບ​ເໝົາ.

    ໂຄງ­ການ​ກໍ່­ສ້າງ​ເດີ່ນ ເສັ້ນ­ທາງ​ເບ​ຕົງ ທາງ​ປູ­ຢາງ ແລະ ສວນ​ດອກ​ໄມ້ ກອງ​ບັນ­ຊາ​ການ​ທະ­ຫານ ນວ ໄດ້​ວາງ​ສີ​ລາ​ລຶກ​ເລີ່ມ​ກໍ່­ສ້າງ ວັນ​ທີ 4 ກໍ­ລະ­ກົດ ແລະ ມອບ-ຮັບ ວັນ​ທີ 29 ພະ­ຈິກ 2019 ເຊິ່ງ​ບໍ­ລິ­ສັດ​ຮັບເໝົາ​ໄດ້​ເອົາ­ໃຈ­ໃສ່​ປະ­ຕິ­ບັດ​ຕາມ​ສັນ­ຍາ ກໍ​ຄື ເຕັກ­ນິກ​ການ​ກໍ່­ສ້າງ ແລະ ວັດ​ສະ​ດຸ​ຕ່າງໆ​ຖືກ­ຕ້ອງ​ຕາມ​ກຳ­ນົດ ແລະ ຮັບ­ປະ­ກັນ​ຄຸນ​ນະ​ພາບ ຜົນ­ສຳ­ເລັດ​ຂອງ​ໂຄງ­ການ​ນີ້​ຍ້ອນ​ອົງ­ການ ແລະ ກອງ​ບັນ­ຊາ​ການ​ທະ­ຫານ​ນະ­ຄອນ­ຫຼວງ​ຮ່າ​ໂນ້ຍ ໄດ້​ເອົາ­ໃຈ­ໃສ່​ໃຫ້­ການ​ສະ­ໜັບ­ສະ­ໜູນ ຄະ­ນະ​ພັກ-ຄະ­ນະ​ນຳ​ກອງ​ບັນ­ຊາ​ການ​ທະ­ຫານ ນວ ໄດ້​ເອົາ­ໃຈ­ໃສ່​ຊີ້​ນຳ​ຢ່າງ​ໃກ້­ຊິດ ຄະ­ນະ​ຮັບ­ຜິດ­ຊອບ​ໂຄງ­ການ​ໄດ້​ຕິດ­ຕາມ ແລະ ແກ້​ໄຂ​ບັນ­ຫາ​ຢ່າງ​ເໝາະ​ສົມ ຈຶ່ງ​ເຮັດ​ໃຫ້​ໂຄງ­ການ​ນີ້​ສຳ­ເລັດ​ຕາມ​ເປົ້າ​ໝາຍ ເຊິ່ງ​ໄດ້​ປະ­ກອບ­ສ່ວນ​ໃນ​ການ​ກໍ່­ສ້າງ​ພື້ນ­ຖານ​ໂຄງ​ລ່າງ​ຂອງ​ກອງ​ບັນ­ຊາ​ການ​ທະ­ຫານ ນວ ແລະ ເປັນ​ຂອງ­ຂວັນ​ຕ້ອນ­ຮັບ​ວັນ­ຊາດ ທີ 2 ທັນ­ວາ ຄົບ­ຮອບ 44 ປີ ວັນ​ສ້າງ­ຕັ້ງ​ກອງ­ທັບ ຄົບ­ຮອບ 71 ປີ ແລະ ກອງ​ປະ­ຊຸມ​ໃຫຍ່ ຄັ້ງ​ທີ V ຂອງ​ອົງ­ຄະ​ນະ​ພັກ ກອງ​ບັນ­ຊາ​ການ​ທະ ຫານ ນວ ທີ່​ຈະ​ໄຂ​ຂຶ້ນ​ໃນ​ປີ 2020.