ໄຂຂະບວນການຮັກຊາດ ແລະ ພັດທະນາຂອງພາກທຸລະກິດເຂົ້າສູ່ 2 ເມືອງ

627 03 ທ.ວ. 2019 ຂ່າວໜ້າ​ໜຶ່ງ
ໄຂຂະບວນການຮັກຊາດ ແລະ ພັດທະນາຂອງພາກທຸລະກິດເຂົ້າສູ່ 2 ເມືອງ

    ກອງ​ປະ­ຊຸມ​ຊຸກ­ຍູ້​ຂະ​ບວນ​ການ​ຮັກ​ຊາດ ແລະ ພັດ­ທະ­ນາ​ຂອງ​ພາກ​ທຸ­ລະ​ກິດ ເຂົ້າ​ສູ່​ເມືອງ​ນາ​ຊາຍ​ທອງ ແລະ ເມືອງ​ຫາດ​ຊາຍ​ຟອງ ຈັດ​ຂຶ້ນ​ວັນ​ທີ 29 ພະ­ຈິກ 2019 ຢູ່​ສວນ​ພຶກ­ສາ ເມືອງ​ນາ​ຊາຍ​ທອງ ນະ­ຄອນ­ຫຼວງ​ວຽງ​ຈັນ (ນວ) ໂດຍ​ເປັນ​ປະ­ທານ​ຂອງ​ທ່ານ ວິ­ລະ​ສັກ ນາມ​ມຸນ­ຕີ ເຈົ້າ­ເມືອງ​ນາ​ຊາຍ​ທອງ ແລະ ທ່ານ ວົງ​ເດືອນ ບຸນ​ຍະ​ແສງ ເຈົ້າ­ເມືອງ​ຫາດ​ຊາຍ​ຟອງ ມີ​ທ່ານ ອາດ​ສະ­ພັງ​ທອງ ສີ​ພັນ​ດອນ ຮອງ​ເຈົ້າ​ຄອງ ນວ ພ້ອມ​ດ້ວຍ​ບັນ­ດາ​ພະ­ແນກ­ການ​ເມືອງ ນັກ­ທຸ­ລະ­ກິດ ແລະ ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

    ທ່ານ ວິ­ລະ​ສັກ ນາມ​ມຸນ­ຕີ ກ່າວ​ວ່າ: ເພື່ອ​ພ້ອມ​ກັນ​ສຶກ​ສາ​ຄວາມ​ເປັນ​ໄປ​ໄດ້ ແລະ ປຶກ­ສາ​ຫາ­ລື​ກ່ຽວ​ກັບ​ການ​ພັດ­ທະ­ນາ​ໃນ​ຂົງ­ເຂດ​ຕ່າງໆ ຂອງ​ເມືອງ​ນາ​ຊາຍ​ທອງ ແລະ ເມືອງ​ຫາດ​ຊາຍ​ຟອງ ຂະ​ບວນ​ການ​ຮັກ​ຊາດ ແລະ ພັດ­ທະ­ນາ ຕິດ​ພັນ​ກັບ​ຮັກ ນວ ໄລ­ຍະ​ຜ່ານ​ມາ ປະ­ຊາ­ຊົນ​ບັນ­ດາ­ເຜົ່າ ນັກ­ທຸ­ລະ­ກິດ ຜູ້​ປະ­ກອບ​ການ ແລະ ຊັ້ນ​ຄົນ​ຕ່າງໆ​ໃນ ນວ ໄດ້​ສຸມ​ສະ­ຕິ​ປັນ­ຍາ ທຶນ­ຮອນ ເຫື່ອ­ແຮງ​ປະ­ກອບ­ສ່ວນ​ພັດ­ທະ­ນາ ນວ ຕາມ​ເງື່ອນ­ໄຂ​ຄວາມ​ສາ­ມາດ ໂດຍ​ຖື​ເອົາ​ການ​ແຂ່ງ­ຂັນ​ເປັນ​ຈຸດ­ໝາຍ​ລວມ ແລະ ຄາດ­ໝາຍ​ສູ້​ຊົນ​ຕ່າງໆ ທີ່ ພັກ-ລັດ ວາງ​ອອກ​ເປັນ​ຈຸດ​ສຳ­ຄັນ ຂະ​ບວນ​ການ​ດັ່ງ­ກ່າວ​ໄດ້​ຈັດ​ຕັ້ງ​ປະ­ຕິ­ບັດ ແຕ່​ປີ 2017 ຢູ່​ເມືອງ​ສັງ​ທອງ ປາກ​ງື່ມ ແລະ ເມືອງ​ໄຊ​ທາ­ນີ ຈາກ​ນັ້ນ ກໍ​ໄດ້​ໄຂ​ຂະ​ບວນ​ເຂົ້າ​ສູ່​ເມືອງ​ນາ​ຊາຍ​ທອງ ແລະ ເມືອງ​ຫາດ​ຊາຍ​ຟອງ ເພື່ອ​ໃຫ້​ຄາດ­ໝາຍ​ສູ້​ຊົນ​ຂອງ ນວ ໃຫ້​ບັນ­ລຸ​ຜົນ­ສຳ­ເລັດ ໂດຍ​ສະ­ເພາະ 6 ບຸກ​ທະ­ລຸ 18 ຄາດ­ໝາຍ​ທີ່ ນວ ວາງ​ອອກ ນອກ​ນີ້ ໃນ​ກອງ​ປະ­ຊຸມ​ນັກ­ທຸ­ລະ­ກິດ​ໄດ້​ຂຶ້ນ​ລາຍ​ງານ​ສະ­ພາບ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ຂອງ​ຕົນ​ໃຫ້​ຂັ້ນ​ເທິງ​ຊາບ.

    ທ່ານ ອາດ​ສະ­ພັງ​ທອງ ສີ​ພັນ​ດອນ ໄດ້​ສະ­ແດງ​ຄວາມ​ຊົມ­ເຊີຍ​ຕໍ່​ຜົນ­ງານ​ທີ່​ຍາດ​ມາ​ໄດ້​ໃນ​ໄລ­ຍະ​ຜ່ານ​ມາ ພ້ອມ​ທັງ​ໄດ້​ຕີ​ລາ­ຄາ​ຄືນ ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ແຂ່ງ­ຂັນ​ຮັກ​ຊາດ ແລະ ພັດ­ທະ­ນາ  ຕິດ​ພັນ​ກັບ​ຮັກ ນວ ໃນ​ໄລ­ຍະ​ຜ່ານ​ມາ ຍັງ​ບໍ່​ທັນ​ໄດ້​ດີ​ເທົ່າ​ທີ່​ຄວນ ໂດຍ​ສະ­ເພາະ ການ​ຈັດ​ສັນ​ຄວາມ​ເປັນ​ລະ­ບຽບ​ຮຽບ​ຮ້ອຍ ການ­ຈັດ­ຕັ້ງ​ປະ­ຕິ­ບັດ 3 ຫຼຸດ 3 ເພີ່ມ ແລະ 3 ຂະ​ບວນ​ການ ໃນ​ກອງ​ປະ­ຊຸມ​ໃຫຍ່ 3 ຂັ້ນ ຍັງ​ບໍ່​ທັນ​ເປັນ​ແຜນ​ງານ​ຈະ­ແຈ້ງ ການ​ຊຸກ­ຍູ້​ຕິດ­ຕາມ​ກວດ­ກາ ການ​ແກ້​ໄຂ​ບັນ­ຫາ​ການ​ປະ­ຕິ­ບັດ​ແຜນ​ງົບ­ປະ­ມານ ໂດຍ​ສະ­ເພາະ ຂັ້ນ​ເມືອງ​ຍັງ​ມີ​ຄວາມ​ສ່ຽງ ເປັນ­ຕົ້ນ ການ​ຂຸດ​ຄົ້ນ​ທ່າ­ແຮງ​ບົ່ມ​ຊ້ອນ ການ​ປະ​ຕີ​ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ບັນ­ດາ​ຄາດ­ໝາຍ​ທີ່​ກຳ­ນົດ​ໃນ​ແຜນ​ງານ ກໍ​ຄື ການ​ສູ້​ຊົນ​ແຜນ​ງົບ­ປະ­ມານ ປະ­ຈຳ​ປີ 2019 ພ້ອມ​ນີ້ ຄວາມ​ເຂັ້ມ​ງວດ​ໃນ​ການ­ຈັດ­ຕັ້ງ​ປະ­ຕິ­ບັດ​ກົດ­ໝາຍ ນິ­ຕິ​ກຳ​ຕ່າງໆ ການ​ແກ້​ໄຂ​ບັນ­ຫາ ການ​ປະ­ສານ​ງານ​ຂອງ​ຂະ­ແໜງ­ການ​ຂອງ​ເມືອງ ຍັງ​ມີ​ລັກ­ສະ­ນະ​ຖິ້ມ​ຄວາມ​ຮັບ­ຜິດ­ຊອບ​ເຊິ່ງ​ກັນ ແລະ ກັນ ບັນ­ຫາ​ປາ­ກົດ­ການ​ຫຍໍ້­ທໍ້​ຕ່າງໆ ຍັງ​ບໍ່​ທັນ​ແກ້​ໄຂ​ໄດ້​ຢ່າງ​ຂາດ​ຕົວ ຄາດ­ໝາຍ​ຂອງ​ຂະ​ບວນ​ການ​ແຂ່ງ­ຂັນ​ດັ່ງ­ກ່າວ ເພື່ອ​ແກ້​ໄຂ​ບັນ­ຫາ​ຄົງ​ຄ້າງ​ຕ່າງໆ​ໃນ ນວ ແລະ ການ­ຈັດ­ຕັ້ງ​ແຜນ​ພັດ­ທະ­ນາ​ເສດ​ຖະ ກິດ-ສັງ­ຄົມ ປະ­ຕິ­ບັດ​ຄາດ­ໝາຍ​ທີ່​ກຳ­ນົດ​ໄວ້​ໃຫ້​ບັນ­ລຸ ເປັນ­ຕົ້ນ ການ​ປະ­ຕິ­ບັດ​ແຜນ­ການ​ເກັບ​ລາຍ​ຮັບ ລາຍ​ຈ່າຍ ໃຫ້​ສຳ­ເລັດ​ໃນ​ປີ​ນີ້ ສຳ­ລັບ​ແຜນ­ການ​ຕໍ່­ໜ້າ​ຈະ​ສຸມ​ໃສ່​ແກ້​ໄຂ​ຂໍ້​ຂັດ​ແຍ່ງ​ດ້ານ​ທີ່​ດິນ ຄວາມ​ຮັບ­ຜິດ­ຊອບ​ໃນ​ໜ້າ­ທີ່​ການ­ເມືອງ​ທີ່​ກຳ­ນົດ​ໄວ້ ກົນ​ໄກ​ການ​ປະ­ສານ​ງານ ແກ້​ໄຂ​ຄວາມ​ບໍ່​ເປັນ​ລະ​ບຽນ​ຮຽບ​ຮ້ອຍ​ໃນ​ຕົວ​ເມືອງ ການ­ຈັດ­ຕັ້ງ​ປະ­ຕິ­ບັດ 6ສ ໃຫ້​ມີ​ຄວາມ​ເຂັ້ມ​ງວດ ແລະ​ອື່ນໆ.

ຂ່າວທີ່ກ່ຽວຂ້ອງ