ສສຊ ຮັບຮອງຮ່າງກົດໝາຍວ່າດ້ວຍການປະກັນໄພ

851 03 ທ.ວ. 2019 ຂ່າວໜ້າ​ໜຶ່ງ

    ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 8 ຂອງ ສະ­ພາ​ແຫ່ງ​ຊາດ​ຊຸດ​ທີ VIII ວັນ​ທີ 29 ພະ­ຈິກ 2019 ໄດ້​ນຳ​ສະ­ເໜີ​ຮ່າງ​ກົດ­ໝາຍ​ວ່າ​ດ້ວຍ​ປະ­ກັນ​ໄພ ສະ­ບັບ​ປັບ­ປຸງ ເປັນ​ປະ­ທານ​ຂອງ​ທ່ານ ສົມ​ພັນ ແພງ​ຄຳ​ມີ ຮອງ​ປະ­ທານ​ສະ­ພາ​ແຫ່ງ​ຊາດ ມີ​ບັນ­ດາ​ຮອງ​ປະ­ທານ​ສະ­ພາ​ແຫ່ງ​ຊາດ ພ້ອມ​ດ້ວຍ​ສະ­ມາ­ຊິກ​ສະ­ພາ​ແຫ່ງ​ຊາດ (ສສຊ) ປະ­ຈຳ​ເຂດ​ເລືອກ​ຕັ້ງ​ເຂົ້າ​ຮ່ວມ.

    ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ໄດ້​ຂຶ້ນ​ຜ່ານ​ເນື້ອ​ໃນ​ຂອງ​ການ​ສ້າງ​ຮ່າງ​ກົດ­ໝາຍ​ວ່າ​ດ້ວຍ​ປະ­ກັນ​ໄພ ສະ­ບັບ​ປັບ­ປຸງ ວ່າ: ໃນ​ໄລ­ຍະ​ຜ່ານ​ມາ​ການ­ຈັດ­ຕັ້ງ​ປະ­ຕິ­ບັດ​ກົດ­ໝາຍ ວ່າ​ດ້ວຍ​ການ​ປະ­ກັນ​ໄພ​ໄດ້​ຊ່ວຍ​ຊຸກ­ຍູ້​ການ ພັດ­ທະ­ນາ​ທຸ­ລະ​ກິດ​ປະ­ກັນ​ໄພ​ໄດ້​ເຕີບ​ໃຫຍ່​ຂະ­ຫຍາຍ­ຕົວ ແລະ ສາ­ມາດ​ປະ­ກອບ­ສ່ວນ​ໃນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ຂອງ ສປປ ລາວ ເຊິ່ງ​ສະ­ແດງ​ອອກ​ໂດຍ​ການ​ເພີ່ມ​ຂຶ້ນ​ຂອງ​ບໍ­ລິ­ສັດ​ປະ­ກັນ​ໄພ ຈາກ 5 ບໍ­ລິ­ສັດ ໃນ​ປີ 2011 ມາ​ເປັນ 22 ບໍ­ລິ­ສັດ ໃນ​ປີ 2018 (8 ບໍ­ລິ­ສັດ​ປະ­ກັນ​ໄພ​ທົ່ວ​ໄປ 3 ບໍ­ລິ­ສັດ​ປະ­ກັນ​ໄພ​ຊີ­ວິດ ແລະ 11 ບໍ­ລິ­ສັດ​ປະ­ກັນ​ໄພ​ລວມ) ແລະ ສາ­ມາດ​ເກັບ​ຄ່າ​ປະ­ກັນ​ໄພ ລວມ​ທັງ​ໝົດ​ໃນ​ປີ 2018 ມູນ​ຄ່າ​ຫຼາຍ​ກວ່າ 524 ຕື້​ກີບ ແລະ ມີ​ແນວ​ໂນ້ມ​ຈະ​ເພີ່ມ​ຂຶ້ນ​ໃນ­ຕໍ່­ໜ້າ ພ້ອມ​ດຽວ​ກັນ​ນີ້ ວຽກ​ງານ​ປະ­ກັນ​ໄພ​ຍັງ​ເປັນ​ວຽກ​ງານ​ໜຶ່ງ​ທີ່​ສຳ­ຄັນ ແລະ ມີ​ບົດ­ບາດ​ໃນ​ການ​ປົກ​ປ້ອງ ຜົນ​ປະ­ໂຫຍດ​ຂອງ​ສັງ­ຄົມ ຜູ້​ຊື້​ປະ­ກັນ​ໄພ ຮັກ­ສາ​ສະ­ຖຽນ​ລະ​ພາບ​ດ້ານ​ການ​ເງິນ ສ້າງ​ຄວາມ​ເຂັ້ມ­ແຂງ ຄວາມ​ໝັ້ນ­ຄົງ​ໃຫ້​ແກ່​ລະ­ບົບ​ເສດ­ຖະ­ກິດ.

    ຮ່າງ​ກົດ­ໝາຍ​ວ່າ​ດ້ວຍ​ການ​ປະ­ກັນ​ໄພ​ສະ­ບັບ​ປັບ­ປຸງ ປະ­ກອບ​ມີ 11 ພາກ 12 ໝວດ 99 ມາດ­ຕາ ເຊິ່ງ​ປັບ­ປຸງ​ມາ​ຈາກ 14 ພາກ 13 ໝວດ ແລະ 126 ມາດ­ຕາ ຕາມ​ກົດ­ໝາຍ​ສະ­ບັບ​ນຳ​ໃຊ້​ປັດ­ຈຸ­ບັນ ໃນ​ນັ້ນ ປັບ­ປຸງ 54 ມາດ­ຕາ ກຳ­ນົດ​ມາດ­ຕາ​ຂຶ້ນ​ໃໝ່ 32 ມາດ­ຕາ ຕັດ​ອອກ 59 ມາດ­ຕາ ແລະ ປັບ­ປຸງ​ໜ້ອຍ ຫຼື ບໍ່​ໄດ້​ປັບ­ປຸງ 13 ມາດ­ຕາ ຈາກ​ນັ້ນ ສສຊ ກໍ​ໄດ້​ຜັດ­ປ່ຽນ​ກັນ​ປະ­ກອບ​ຄຳ​ຄິດ​ຄຳ​ເຫັນ​ຢ່າງ​ກົງ​ໄປ​ກົງ​ມາ ໃນ​ນີ້ ບັນ­ຫາ​ທີ່ ສສຊ ໄດ້​ໃຫ້​ຄວາມ​ສົນ­ໃຈ​ມີ​ຄວາມ​ໝາຍ​ຕົວ​ແທນ​ປະ­ກັນ​ໄພ ແລະ ການ​ເປັນ​ນາຍ​ໜ້າ​ຕົວ​ແທນ​ປະ­ກັນ​ໄພ ການ​ລົ້ມ​ລະ­ລາຍ ທຶນ​ຈົດ​ທະ­ບຽນ ເງິນ​ແຮ ເງິນ​ມັດ​ຈຳ ແລະ ບັນ­ຫາ​ອື່ນໆ​ທີ່​ພົວ­ພັນ​ກັບ​ຮ່າງ​ກົດ­ໝາຍ​ສະ­ບັບ​ດັ່ງ­ກ່າວ ເພື່ອ​ໃຫ້​ຄະ­ນະ​ກຳ­ມະ­ການ​ຮ່າງ​ກົດ­ໝາຍ ນຳ­ໄປ​ປັບ­ປຸງ​ໃຫ້​ສອດ­ຄ່ອງ​ກັບ​ສະ­ພາບ​ຄວາມ​ເປັນ​ຈິງ ມີ​ຄວາມ​ຮັດ­ກຸມ ລະ­ອຽດ ຊັດ​ເຈນ ແລະ ຈະ­ແຈ້ງ​ເປັນ​ບ່ອນ​ອີງ​ໃຫ້​ແກ່​ການ­ຈັດ­ຕັ້ງ​ປະ­ຕິ­ບັດ.

    ພາຍ­ຫຼັງ​ທີ່ ສສຊ ປະ­ກອບ​ຄຳ​ຄິດ​ເຫັນ​ແລ້ວ ກໍ​ໄດ້​ພ້ອມ​ກັນ​ລົງ​ຄະ­ແນນ​ສຽງ​ຮັບ­ຮອງ​ເອົາ​ດ້ວຍ​ຄະ­ແນນ​ສຽງ​ເຫັນ​ດີ​ເປັນ​ສ່ວນ​ຫຼາຍ.

ຂ່າວທີ່ກ່ຽວຂ້ອງ