ຍ້ອງຍໍພາກສ່ວນທີ່ອຸປະຖຳ ສະຫຼອງວັນສ້າງຕັ້ງເມືອງວຽງໄຊ

654 03 ທ.ວ. 2019 ຂ່າວໜ້າ​ໜຶ່ງ
ຍ້ອງຍໍພາກສ່ວນທີ່ອຸປະຖຳ ສະຫຼອງວັນສ້າງຕັ້ງເມືອງວຽງໄຊ

    ພິ­ທີ​ຍ້ອງ­ຍໍ​ບັນ­ດາ​ພາກ­ສ່ວນ​ຕ່າງໆ​ທີ່​ໄດ້​ປະ­ກອບ­ສ່ວນ ແລະ ອຸ­ປະ­ຖຳ​ງານ​ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງ​ເມືອງ​ວຽງ​ໄຊ-ຖານ​ທີ່​ໝັ້ນ​ການ​ປະ­ຕິ­ວັດ​ລາວ ຄົບ­ຮອບ 50 ປີ (30/11/1968-30/11/2018) ຈັດ​ຂຶ້ນ​ວັນ​ທີ 29 ພະ­ຈິກ 2019 ທີ່​ຫໍ​ປະ­ຊຸມ​ແຫ່ງ​ຊາດ ໃຫ້​ກຽດ​ມອບ​ຂອງ​ທ່ານ ພັນ​ຄຳ ວິ­ພາ​ວັນ ຮອງ​ປະ­ທານ​ປະ­ເທດ ຫົວ­ໜ້າ​ຄະ­ນະ​ຮັບ­ຜິດ­ຊອບ​ການ​ກະ­ກຽມ​ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງ​ເມືອງ​ວຽງ​ໄຊ ເຂດ​ທີ່​ໝັ້ນ​ການ​ປະ­ຕິ­ວັດ ຄົບ­ຮອບ 50 ປີ ມີ​ບັນ­ດາ​ລັດ­ຖະ­ມົນ­ຕີ ຮອງ​ລັດ­ຖະ­ມົນ­ຕີ ຫົວ­ໜ້າ ຮອງ​ຫົວ­ໜ້າ​ອົງ­ການ​ທຽບ​ເທົ່າ ແລະ ນັກ­ທຸ­ລະ­ກິດ​ເຂົ້າ​ຮ່ວມ.

   ໃນ​ພິ­ທີ​ທ່ານ ຄຳ​ມູນ ວິ​ພົງ​ໄຊ ຮອງ​ລັດ­ຖະ­ມົນ­ຕີ​ກະ­ຊວງ​ພາຍ​ໃນ ໄດ້​ຂຶ້ນ​ອ່ານ​ດຳ­ລັດ​ຂອງ​ທ່ານ​ນາ­ຍົກ­ລັດ­ຖະ­ມົນ­ຕີ ວ່າ​ດ້ວຍ​ການ​ມອບ​ໃບ​ຍ້ອງ­ຍໍ​ລັດ­ຖະ­ບານ ການ​ປະ­ດັບ​ຫຼຽນ​ກາ​ແຮງ​ງານ ແລະ ການ​ປະ­ດັບ​ຫຼຽນ​ກາ​ພັດ­ທະ­ນາ ຄື: ໃບ​ຍ້ອງ­ຍໍ​ລັດ­ຖະ­ບານ​ປະ­ກອບ​ມີ: ບໍ­ລິ­ສັດ ເບຍ​ລາວ ຈຳ­ກັດ ບໍ­ລິ­ສັດ ບຸນ​ທະ­ວີ​ຊັບ ຈຳ­ກັດ ທະ­ນາ­ຄານ ເອັສ​ທີ ຈຳ­ກັດ ບໍ­ລິ­ສັດ ແສງ​ທອງ ຈຳ­ກັດ ບໍ­ລິ­ສັດ ລາວ​ໂທລະ​ຄົມ­ມະ­ນາ­ຄົມ ແຂວງ​ສະ­ຫວັນ​ນະ​ເຂດ ບໍ­ລິ­ສັດ ພອນ​ສັກ ຈຳ­ກັດ ແລະ ຂະ​ບວນ​ຄາ​ລະ​ວານ​ລົດ​ທ່ອງ​ທ່ຽວ ສ່ວນ​ຫຼຽນ​ກາ​ແຮງ​ງານ​ປະ­ກອບ​ມີ: ບໍ­ລິ­ສັດ ພອນ​ຈະ­ເລີນ​ກໍ່­ສ້າງ ແລະ ສົ່ງ­ເສີມ​ກະ­ສິ­ກຳ​ຄົບ​ວົງ​ຈອນ ຂາ​ເຂົ້າ-ຂາ​ອອກ ຈຳ­ກັດ​ຜູ້​ດຽວ ບໍ­ລິ­ສັດ ພົງ​ຊັບ​ທະ­ວີ ຈຳ­ກັດ ທະ­ນາ­ຄານ​ຮ່ວມ​ພັດ­ທະ­ນາ ບໍ­ລິ­ສັດ ທີ່​ປຶກ­ສາ​ການ​ລົງ­ທຶນ ແລະ ກໍ່­ສ້າງ​ເຂື່ອນ​ໄຟ­ຟ້າ ຈຳ­ກັດ ຜູ້​ດຽວ ບໍ­ລິ­ສັດ ໂສ​ມາ​ພາ ອິນ​ຟໍ​ເມ​ເຊິນ ເຕັກ​ໂນ​ໂລ​ຊີ​ລາວ ຈຳ­ກັດ ແລະ ບໍ­ລິ­ສັດ ໜໍ່​ຄຳ ກໍ່­ສ້າງ​ຂົວ​ທາງ ຈຳ­ກັດ ສຳ­ລັບ​ຫຼຽນ​ກາ​ພັດ­ທະ­ນາ ປະ­ກອບ​ມີ: ບໍ­ລິ­ສັດ ຈະ­ເລີນ​ເຊ​ກອງ ຈຳ­ກັດ.

    ໂອ­ກາດ​ນີ້ ທ່ານ​ຮອງ​ປະ­ທານ​ປະ­ເທດ​ໃຫ້​ກຽດ​ໂອ້​ລົມ ເຊິ່ງ​ທ່ານ​ກ່າວ​ວ່າ: ຈາກ​ຜົນ­ສຳ­ເລັດ​ໃນ​ການ​ສະ­ເຫຼີມ­ສະ­ຫຼອງ​ດັ່ງ­ກ່າວ​ວັນ​ທີ 28-30 ພະ­ຈິກ 2018 ນັ້ນ ກໍ​ຍ້ອນ​ໄດ້​ຮັບ​ການ​ປະ­ກອບ­ສ່ວນ​ຂອງ​ທຸກ​ພາກ­ສ່ວນ ແລະ ທຸກ​ກຳ­ລັງ​ແຮງ ໃນ​ນັ້ນ ສຳ­ຄັນ​ພິ­ເສດ​ແມ່ນ ຍ້ອນ​ໄດ້​ຮັບ​ການ​ປະ­ກອບ­ສ່ວນ​ທາງ​ວັດ­ຖຸ​ປັດ​ໄຈ​ຂອງ​ບັນ­ດາ​ພາກ­ສ່ວນ​ຕ່າງໆ ໃນ​ທຸກ​ຂົງ­ເຂດ​ຂອບ​ເຂດ​ທົ່ວ​ປະ­ເທດ ເຖິງ​ແມ່ນ​ວ່າ ປີ 2018 ປະ­ເທດ​ເຮົາ​ໄດ້​ພົບ­ພໍ້​ກັບ​ບັນ­ຫາ​ຄວາມ​ຫຍຸ້ງ­ຍາກ​ຫຼາຍ​ຢ່າງ​ກໍ​ຕາມ ເປັນ­ຕົ້ນ ຫຼາຍ​ທ້ອງ­ຖິ່ນ​ໃນ​ທົ່ວ​ປະ­ເທດ​ໄດ້​ຮັບ​ຜົນ​ກະ­ທົບ​ຈາກ​ໄພ​ທຳ​ມະ​ຊາດ​ຕ່າງໆ ເຊິ່ງ​ໄດ້​ສ້າງ​ຜົນ​ເສຍ​ຫາຍ ສົ່ງ​ຜົນ​ກະ­ທົບ​ຕໍ່​ທາງ​ດ້ານ​ເສດ­ຖະ­ກິດ ແລະ ງົບ­ປະ­ມານ ເວົ້າ​ລວມ ເວົ້າ​ສະ­ເພາະ ງົບ­ປະ­ມານ​ໃນ​ການ​ຈັດ​ງານ​ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງ​ເມືອງ​ວຽງ​ໄຊ-ຖານ​ທີ່​ໝັ້ນ ຂອງ​ການ​ປະ­ຕິ­ວັດ​ລາວ ຄົບ­ຮອບ 50 ປີ ທີ່​ມີ​ຈຳ­ກັດ​ນັ້ນ ແຕ່​ບັນ­ດາ​ພາກ­ສ່ວນ​ຕ່າງໆ​ຂອງ​ລັດ ແລະ ພາກ­ສ່ວນ​ທຸ­ລະ​ກິດ ຕະ­ຫຼອດ​ຮອດ​ບຸກ­ຄົນ​ກໍ​ຍັງ​ມີ​ຄວາມ​ຕື່ນ​ຕົວ​ສະ­ໝັກ​ໃຈ​ສະ­ໜັບ­ສະ­ໜູນ ໃຫ້­ການ​ປະ­ກອບ­ສ່ວນ​ເປັນ​ຈຳ­ນວນ​ເງິນ ທັງ​ໝົດ 2,4 ຕື້​ກວ່າ​ກີບ ເພື່ອ​ເຮັດ​ໃຫ້­ການ​ຈັດ​ງານ​ດັ່ງ­ກ່າວ​ສຳ­ເລັດ​ຕາມ​ຄາດ­ໝາຍ​ທີ່​ວາງ​ໄວ້ ຕາງ­ໜ້າ​ໃຫ້​ກົມ​ການ­ເມືອງ​ສູນ​ກາງ​ພັກ-ລັດ­ຖະ­ບານ ກໍ​ຄື ໃນ​ນາມ​ຄະ­ນະ​ຮັບ​ຜິດ ຊອບ​ການ​ສະ­ເຫຼີມ­ສະ­ຫຼອງ​ງານ​ດັ່ງ­ກ່າວ ຂໍ​ສະ­ແດງ​ຄວາມ​ຂອບ­ໃຈ​ທຸກ​ພາກ­ສ່ວນ​ທີ່​ໃຫ້­ການ​ສະ­ໜັບ­ສະ­ໜູນ ແລະ ປະ­ກອບ­ສ່ວນ​ເຮັດ​ໃຫ້­ການ​ສະ­ເຫຼີມ­ສະ­ຫຼອງ​ບັນ­ລຸ​ຈຸດ­ປະ­ສົງ ແລະ ຄາດ­ໝາຍ​ທີ່​ວາງ​ໄວ້​ຢ່າງ​ຈົບ­ງາມ ພ້ອມ​ຫວັງ​ວ່າ​ໃນ­ຕໍ່­ໜ້າ​ຈະ​ໄດ້​ຮັບ​ການ​ສະ­ໜັບ­ສະ­ໜູນ​ຈາກ​ທຸກ​ພາກ­ສ່ວນ​ຕ່າງໆ​ຕື່ມ​ອີກ ເພື່ອ​ພ້ອມ​ກັນ​ປະ­ກອບ­ສ່ວນ​ເຂົ້າ​ໃນ​ການ​ສ້າງ­ສາ​ພັດ­ທະ­ນາ​ປະ­ເທດ​ຊາດ ຂອງ​ພວກ​ເຮົາ​ໃຫ້​ຈະ­ເລີນ​ຮຸ່ງ­ເຮືອງ​ຂຶ້ນ​ໄປ​ເລື້ອຍໆ.

ຂ່າວທີ່ກ່ຽວຂ້ອງ