ເບິ່ງບ້ານເຂົາເອົາບົດຮຽນ 03-12-2019

650 03 ທ.ວ. 2019 ຫົວຂໍ້ຂ່າວອື່ນໆ

   ມື້­ນີ້ ຂໍ​ສະ­ເໜີ​ເລື່ອງ​ອ່າວ​ແປກ​ຢູ່​ຍີ່­ປຸ່ນ ຄື​ເລື່ອງ​ໂຊ​ເຟີ​ລົດ­ໄຟ ຖ່າຍ­ເບົາ​ຜິດ​ບ່ອນ ເຖິງ​ຂັ້ນ​ຜູ້​ຈັດ­ການ​ລົດ­ໄຟ​ໄລ​ອອກ​ມາ​ຂໍ​ໂທດ​ຕໍ່​ສັງ­ຄົມ ຕໍ່​ໃສ່​ນະ­ໂຍ­ບາຍ​ໃຫ້​ເດັກ​ຍີ່­ປຸ່ນ​ຮຽນ​ໂດຍ​ບໍ່​ເສຍ​ເງິນ ສຸດ​ທ້າຍ​ແມ່ນ​ເລື່ອງ​ການ​ຮ້ອງ­ທຸກ​ຢູ່​ມຽນ​ມາ.

   ທີ່ ຍີ່­ປຸ່ນ: ມີ​ຂ່າວ​ກ່ຽວ​ກັບ​ເຫດ­ການ​ລັກ­ສະ­ນະ​ບັງ­ເອີນ​ເກີດ​ຂຶ້ນ​ໃນ​ວົງ​ການ​ໂດຍ­ສານ​ລົດ­ໄຟ​ຍີ່­ປຸ່ນ ເຖິງ​ຂັ້ນ​ຜູ້​ຮັບ­ຜິດ­ຊອບ​ຕ້ອງ​ໄດ້​ອອກ​ມາ​ຂໍ​ໂທດ​ຂໍ​ໂພຍ​ຕໍ່​ສັງ­ຄົມ ເລື່ອງ​ມີ​ຢູ່​ວ່າ ຜູ້​ຈັດ­ການ​ໂດຍ­ສານ​ລົດ­ໄຟ ສາຍ JR East ໄດ້​ອອກ​ມາ​ຂໍ​ໂທດ​ຕໍ່­ໜ້າ​ສັງ­ຄົມ ຍ້ອນ​ກໍ­ລະ­ນີ​ໂຊ​ເຟີ​ລົດ­ໄຟ​ຄັນ​ດັ່ງ­ກ່າວ ຍ່ຽວ​ຮວາດ​ຮາງ​ລົດ­ໄຟ ໂດຍ​ບໍ່​ຍອມ​ໄປ​ເຂົ້າ​ຫ້ອງ​ນ້ຳ ເຫດ​ເກີດ​ຂຶ້ນ​ເມື່ອ​ລົດ­ໄຟ​ຈອດ​ຊົ່ວ­ຄາວ​ຢູ່​ສະ­ຖາ­ນີ​ເມືອງ​ຈິ​ບະ (Chiba) ໃນ​ວັນ​ໜຶ່ງ​ຂອງ​ເດືອນ​ກັນ­ຍາ ປີ 2016 ໃນ​ເວ­ລາ​ນັ້ນ ໂຊ​ເຟີ​ລົດ­ໄຟ ປວດ​ຍ່ຽວ​ຢ່າງ​ຮຸນ​ແຮງ ດັ່ງ­ນັ້ນ ເຂົາ​ຈຶ່ງ​ໄຂ​ຝາ​ປະ­ຕູ​ຫ້ອງ​ຂັບ ຍ່ຽວ​ຮວາດ​ລົງ​ຫົດ​ຮາງ​ລົດ­ໄຟ ແຕ່​ບໍ່​ເປັນ​ຈັ່ງ​ບຸນ ມີ​ຜູ້​ຖ່າຍ­ຮູບ​ສາກ​ນີ້​ໄວ້​ໄດ້ ແລ້ວ​ເອົາ​ໄປ​ເຜີຍ­ແຜ່​ຕໍ່ ເຮັດ​ໃຫ້​ມີ​ຫາງ​ສຽງ​ວິ­ພາກ​ວິ­ຈານ​ຢ່າງ​ໜັກ​ຈາກ​ສັງ­ຄົມ​ວ່າ ໂຊ​ເຟີ​ຄົນ​ດັ່ງ­ກ່າວ​ເຮັດ​ແນວ​ບໍ່​ສົມ​ມາ​ພາ​ຄວນ ເປັນ​ການ​ບໍ່​ນັບ­ຖື​ຜູ້­ໂດຍ­ສານ ໃນ​ການ​ອອກ​ມາ​ຂໍ​ໂທດ​ນັ້ນ ຜູ້​ຈັດ­ການ​ລົດ­ໄຟ ບອກ​ວ່າ ພວກ​ເຮົາ​ຂໍ​ໂທດ​ຢ່າງ​ເລິກ­ເຊິ່ງ​ທີ່​ໄດ້​ສ້າງ​ຄວາມ​ບໍ່​ໝັ້ນ​ໃຈ?ຄວາມ​ບໍ່​ສະ­ບາຍ​ໃຈ​ໃຫ້​ລູກ​ຄ້າ ພວກ​ເຮົາ​ຂໍ​ຮັບ­ປະ­ກັນ​ວ່າ ຈະ​ບໍ່​ໃຫ້​ເຫດ­ການ​ແບບ​ນີ້​ເກີດ​ຂຶ້ນ​ອີກ​ຢ່າງ​ເດັດ­ຂາດ ສ່ວນ​ໂຊ​ເຟີ​ຜູ້​ກໍ່​ເຫດ​ນັ້ນ ໄດ້​ເປີດ­ເຜີຍ​ດ້ວຍ​ຄວາມ​ຈິງ​ໃຈ​ວ່າ ທີ່​ເຂົາ​ບໍ່​ຍອມ​ໄປ​ຫ້ອງ​ນ້ຳ​ນັ້ນ ກໍ​ເພາະ­ວ່າ ລົດ­ໄຟ​ຈອດ​ພຽງ​ໄລ­ຍະ​ສັ້ນ ຖ້າ​ໄປ​ຫ້ອງ​ນ້ຳ­ມັນ​ອາດ​ຈະ​ເຮັດ​ໃຫ້­ການ​ອອກ​ລົດ​ຊັກ​ຊ້າ ເຂົາ​ຕ້ອງ­ການ​ຄວາມ​ຕົງ​ເວ­ລາ ຈຶ່ງ​ຍອມ​ເຮັດ​ແນວ​ທີ່​ພາ­ໃຫ້​ເກີດ​ຫາງ​ສຽງ ໂດຍ​ບໍ່​ຮູ້​ຕົວ.

   ອີກ​ຂ່າວ​ໜຶ່ງ​ກ່ຽວ​ກັບ​ຍີ່­ປຸ່ນ ນັ້ນ ກໍ​ຄື ການ​ຮັບ­ຮອງ​ເອົາ​ກົດ­ໝາຍ​ໃຫ້​ເດັກ­ນ້ອຍ​ອະ­ນຸ­ບານ ບໍ່​ເສຍ​ຄ່າ​ຮຽນ​ຢູ່​ຕາມ​ໂຮງ­ຮຽນ​ຂອງ​ລັດ ແຕ່​ຖ້າ​ເດັກ​ເຂົ້າ​ຮຽນ​ຢູ່​ໂຮງ­ຮຽນ​ເອ­ກະ​ຊົນ ລັດ­ຖະ­ບານ​ກໍ​ມີ​ເງິນ​ອຸດ​ໜູນ​ຈຳ­ນວນ 37 ພັນ​ເຢັນ​ຕໍ່​ຄົນ (ປະ­ມານ 2,9 ລ້ານ​ກີບ) ກົດ­ໝາຍ​ສະ­ບັບ​ນີ້​ໃຊ້​ກັບ​ເດັກ​ໄວ​ອະ­ນຸ­ບານ ຄື: ແຕ່​ອາ­ຍຸ 3?5 ປີ ສ່ວນ​ເດັກ­ນ້ອຍ​ທີ່​ມີ​ອາ­ຍຸ​ຕ່ຳ​ກວ່າ​ໄວ​ອະ­ນຸ­ບານ​ທີ່​ຕ້ອງ​ໄດ້​ເຂົ້າ​ສູນ​ລ້ຽງ​ເດັກ​ນັ້ນ ກໍ​ຈະ​ໄດ້​ຮັບ​ເງິນ​ອຸດ​ໜູນ​ຈາກ​ລັດ­ຖະ­ບານ ຈຳ­ນວນ 42 ພັນ​ເຢັນ (ປະ­ມານ 3 ລ້ານ​ກີບ) ສະ­ເພາະ​ນະ­ໂຍ­ບາຍ​ນີ້​ປະ­ຕິ­ບັດ​ກັບ​ເດັກ​ໃນ​ຄອບ­ຄົວ​ທີ່​ມີ​ຖາ­ນະ​ທຸກ​ຍາກ ຫຼື ມີ​ລາຍ​ຮັບ​ຕ່ຳ ກົດ  ໝາຍ​ສະ­ບັບ​ນີ້​ມີ​ຜົນ​ບັງ­ຄັບ​ໃຊ້​ໃນ​ທ້າຍ​ປີ​ນີ້​ເອງ ນະ­ໂຍ­ບາຍ​ດີໆ​ດັ່ງ­ກ່າວ​ນີ້ ມີ​ເປົ້າ​ໝາຍ​ຊ່ວຍ​ຫຼຸດ­ຜ່ອນ​ການ​ໃຊ້​ຈ່າຍ​ຂອງ​ຜູ້​ເປັນ​ພໍ່?ແມ່​ມື​ໃໝ່ (ຜູ້​ມີ​ລູກ​ຄັ້ງ​ທຳ​ອິດ) ແລະ ເພື່ອ​ກະ​ຕຸ້ນ​ການ​ເກີດ ຊຶ່ງ​ມີ​ທ່າ​ອ່ຽງ​ລົງ​ຄ້ອຍ​ມາ​ໄດ້​ຫຼາຍ​ປີ​ແລ້ວ ຄາດ​ວ່າ​ນະ­ໂຍ­ບາຍ​ນີ້​ຕ້ອງ­ການ​ກ້ອນ​ທຶນ​ຈຳ­ນວນ 776.000 ລ້ານ​ເຢັນ​ຕໍ່​ປີ (ປະ­ມານ 6 ຕື້​ກວ່າ​ກີບ) ແລະ ເງິນ​ຈຳ­ນວນ​ນີ້​ຈະ​ໄດ້​ມາ​ຈາກ​ການ​ຂຶ້ນ​ພາ­ສີ​ຜູ້​ບໍ­ລິ­ໂພກ ຈາກ 8% ໃນ​ເມື່ອ​ກ່ອນ ມາ​ເປັນ 10%.

   ທີ່ ມຽນ​ມາ: ເຊັ່ນ​ກັບ​ຢູ່​ລາວ ແລະ ຢູ່​ຫຼາຍ​ປະ­ເທດ​ໃນ​ຍຸກ​ແຫ່ງ​ຄວາມ​ໂປ່ງ​ໃສ ມຽນ​ມາ ກໍ​ໄດ້​ເປີດ​ຫ້ອງ­ການ​ຮັບ​ຄວາມ​ຮ້ອງ­ທຸກ​ຈາກ​ປະ­ຊາ­ຊົນ​ເຊັ່ນ​ກັນ ໃນ​ວັນ​ທີ 2 ເດືອນ​ພະ­ຈິກ ປີ 2016 (KPL News 4 ພະ­ຈິກ 2016) ໂດຍ​ແມ່ນ​ຮອງ​ລັດ­ຖະ­ມົນ­ຕີ​ກະ­ຊວງ​ທີ່​ປຶກ­ສາ​ແຫ່ງ​ລັດ ຄຳ​ຮ້ອງ­ທຸກ​ດັ່ງ­ກ່າວ​ເນັ້ນ​ສະ­ເພາະ​ເລື່ອງ​ການ​ໃຫ້?ຮັບ​ສິນ​ບົນ ແລະ ບັນ­ຫາ​ສໍ້​ລາດ​ບັງ​ຫຼວງ ໂດຍ​ພະ­ນັກ­ງານ​ຂອງ​ລັດ ຄຳ​ຮ້ອງ­ທຸກ​ໃຫ້​ຂຽນ​ເປັນ​ຈົດ­ໝາຍ​ລົງ­ທະ­ບຽນ ຫຼື ສົ່ງ​ຜ່ານ​ອີ​ເມວ ທາງ​ກະ­ຊວງ​ມີ­ໜ້າ​ທີ່​ຮັບ­ຜິດ­ຊອບ​ກ່ຽວ​ກັບ​ຄວາມ​ລັບ ແລະ ຄວາມ​ປອດ​ໄພ​ຂອງ​ຜູ້​ຮ້ອງ­ທຸກ ແນວ­ໃດ​ກໍ​ດີ ທາງ​ກະ­ຊວງ​ຮຽກ­ຮ້ອງ​ບໍ່​ໃຫ້​ມີ​ການ​ຮ້ອງ­ທຸກ​ກ່ຽວ​ກັບ​ຄະ­ດີ​ທີ່​ໄດ້​ຟ້ອງ​ຂຶ້ນ​ສານ​ແລ້ວ ຄະ­ດີ​ທີ່​ພວມ​ມີ​ການ​ຕັດ­ສິນ ກໍ​ຄື ຄຳ​ຮ້ອງ­ທຸກ​ຕໍ່​ຜູ້​ທີ່​ຖືກ​ຕັດ­ສິນ​ໂທດ​ໄປ​ແລ້ວ.

ຂ່າວທີ່ກ່ຽວຂ້ອງ