ຂ່າວຫຼ້າສຸດ

ທີມຊາດລາວ ຖືກ ໄທ ຍິງທ້າຍເກມ 2-0 ຕົກຮອບເຕະບານຊາຍ ຊີເກມ

1.847 05 ທ.ວ. 2019 ວົງຈອນກີລາ

   ຂຸນ​ພົນ​ນັກ​ເຕະ​ທີມ​ຊາດ​ລາວ ລົງ​ສະ­ໜາມ​ນັດ​ທີ 4 ໃນ​ວັນ​ທີ 4 ທັນ­ວາ 2019 ຕ້ານ​ຄວາມ​ແຂງ​ແກ່ນ​ຂອງ​ທີມ​ຊາດ​ໄທ ບໍ່​ໄຫວ ຖືກ​ຍິງ​ທ້າຍ​ເກມ​ໄປ 2-0 ປະ­ຕູ ເຮັດ​ໃຫ້​ທີມ​ຊາດ​ລາວ ຕົກ​ຮອບ​ເປັນ​ທີ່​ແນ່­ນອນ​ແລ້ວ ເຖິງ​ວ່າ​ຈະ​ເຫຼືອ​ການ​ແຂ່ງ­ຂັນ​ອີກ 1 ນັດ​ກໍ​ຕາມ ແລະ ເປັນ​ຄັ້ງ​ທີ 5 ທີ່​ທີມ​ຊາດ​ລາວ ບໍ່​ສາ­ມາດ​ຜ່ານ​ເຂົ້າ​ສູ່​ຮອບ​ຮອງ​ຊະ­ນະ​ເລີດ ຫຼື ຮອບ 4 ທີມ​ໄດ້ ນັບ​ແຕ່​ປີ 2009 ຄັ້ງ​ທີ XXV ທີ່ ສປປ ລາວ ເປັນ​ເຈົ້າ­ພາບ ໃນ​ການ​ແຂ່ງ­ຂັນ​ເຕະ­ບານ​ຊາຍ ງານ​ມະ​ຫະ​ກຳ​ກີ­ລາ​ຊີ­ເກມ ຄັ້ງ​ທີ XXX ທີ່​ປະ­ເທດ​ຟີ​ລິບ​ປິນ ເປັນ​ເຈົ້າ­ພາບ.

   ທີມ​ຊາດ​ລາວ ຮຸ່ນ​ອາ­ຍຸ​ບໍ່​ເກີນ 22 ປີ ລົງ​ແຂ່ງ­ຂັນ​ໃນ​ຮອບ​ແບ່ງ​ກຸ່ມ ກຸ່ມ B ພົບ​ກັບ​ທີມ​ຊາດ​ໄທ ຮຸ່ນ​ອາ­ຍຸ​ບໍ່​ເກີນ 22 ປີ ຜ່ານ​ການ​ແຂ່ງ­ຂັນ​ຜົນ​ປາ­ກົດ​ວ່າ ໃນ​ເຄິ່ງ​ເວ­ລາ​ທຳ​ອິດ ທີມ​ຊາດ​ລາວ​ຕັ້ງ​ຮັບ​ສູ້​ໄດ້​ຢ່າງ​ໜຽວ​ແໜ້ນ ຈົນ​ເຮັດ​ໃຫ້​ທີມ​ຊາດ​ໄທ​ບຸກ​ຂຶ້ນ​ມາ​ຍິງ​ປະ­ຕູ​ບໍ່​ໄດ້ ແລະ ເຮັດ​ໃຫ້​ຈົບ​ເຄິ່ງ​ເວ­ລາ​ທຳ​ອິດ 45+1 ນາ­ທີ ຍັງ​ສະ­ເໝີ​ກັນ​ຢູ່ 0-0 ປະ­ຕູ.

   ກັບ­ເຂົ້າ​ສູ່​ເຄິ່ງ​ເວ­ລາ​ທີ 2 ທີມ​ຊາດ​ລາວ ຍັງ​ເປັນ​ຝ່າຍ​ຕັ້ງ​ຮັບ ແລະ ມີ​ໂອ­ກາດ​ບຸກ​ບາງ​ຈັງ­ຫວະ ແຕ່​ຖື​ໄດ້​ວ່າ ທີມ​ຊາດ​ລາວ ກຽມ​ແຜນ​ຮັບ​ມາ​ດີ ຈົນ​ມາ​ເຖິງ​ໄລ­ຍະ​ທ້າຍ​ເກມ​ນາ­ທີ​ສຸດ​ທ້າຍ ແລະ ໄລ­ຍະ​ທົດ​ເວ­ລາ​ບາດ­ເຈັບ ທີມ​ຊາດ​ລາວ ກໍ​ມາ​ຖືກ​ຍິງ​ຈົນ​ໄດ້ ແລະ ເປັນ​ການ​ຍິງ 2 ປະ­ຕູ​ລວດ​ຂອງ ສຸ­ພາ​ນັດ ເໝືອນ​ຕາ ໃນ​ນາ­ທີ 90 ແລະ ນາ­ທີ 90+4 ເຮັດ​ໃຫ້​ຈົບ​ເກມ​ທີມ​ຊາດ​ລາວ ເສຍ​ໄປ​ແບບ​ຫວຸດ​ຫວິດ 2-0 ປະ­ຕູ ສົ່ງ​ຜົນ​ໃຫ້​ຕົກ​ຮອບ​ແບ່ງ​ກຸ່ມ​ເປັນ​ທີ່​ແນ່­ນອນ​ແລ້ວ ເຖິງ​ວ່າ​ຈະ​ຍັງ​ເຫຼືອ​ໂປຣ​ແກຣມ​ລົງ​ສະ­ໜາມ​ອີກ 1 ນັດ​ກໍ​ຕາມ ກັບ​ທີມ​ຊາດ​ອິນ​ໂດ​ເນ​ເຊຍ ໃນ​ມື້­ນີ້ (5 ທັນ­ວາ) ເວ­ລາ 16:00 ໂມງ ທີ່​ສະ­ໜາມ IMUS CAVITE ສ່ວນ​ທີມ​ຊາດ​ໄທ ຈະ​ພົບ​ກັບ​ທີມ​ຊາດ​ຫວຽດ­ນາມ ແລະ ທີມ​ຊາດ​ສິງ­ກະ­ໂປ ພົບ​ກັບ​ທີມ​ຊາດ​ບຣູ​ໄນ ໃນ​ວັນ​ດຽວ​ກັນ.

   ສະ­ຫຼຸບ​ຕາ­ຕະ­ລາງ​ຄະ­ແນນ​ກຸ່ມ B ອັນ​ດັບ 1 ທີມ​ຊາດ​ຫວຽດ­ນາມ ລົງ​ສະ­ໜາມ 4 ນັດ​ຊະ­ນະ ລວດ ມີ 12 ຄະ­ແນນ ອັນ​ດັບ 2 ທີມ​ຊາດ​ອິນ​ໂດ​ເນ​ເຊຍ ລົງ​ສະ­ໜາມ 4 ນັດ ຊະ­ນະ 3 ນັດ ແລະ ເສຍ 1 ນັດ ມີ 9 ຄະ­ແນນ ອັນ​ດັບ 3 ທີມ​ຊາດ​ໄທ ລົງ​ສະ­ໜາມ 4 ນັດ ຊະ­ນະ 3 ນັດ ແລະ ເສຍ 1 ນັດ ມີ 9 ຄະ­ແນນ ອັນ​ດັບ 4 ທີມ​ຊາດ​ລາວ ລົງ​ສະ­ໜາມ 4 ນັດ ຊະ­ນະ 1 ນັດ ສະ­ເໝີ 1 ນັດ ແລະ ເສຍ 2 ນັດ ມີ 4 ຄະ­ແນນ ອັນ​ດັບ 5 ທີມ​ຊາດ​ສິງ­ກະ­ໂປ ລົງ​ສະ­ໜາມ 4 ນັດ ສະ­ເໝີ 1 ນັດ ແລະ ເສຍ 3 ນັດ ມີ 1 ຄະ­ແນນ ແລະ ອັນ​ດັບ 6 ທີມ​ຊາດ​ບຣູ​ໄນ ລົງ​ສະ­ໜາມ 4 ນັດ ເສຍ​ລວດ ບໍ່​ມີ​ຈັກ​ຄະ­ແນນ.

ຂ່າວທີ່ກ່ຽວຂ້ອງ