ຂ່າວຫຼ້າສຸດ

ກະກຽມ​ກອງ​ປະຊຸມ​ວຽກ​ງານ​ການ​ຕ່າງປະເທດ ຄັ້ງ​ທີ 14

1.332 06 ທ.ວ. 2019 ຂ່າວໜ້າ​ໜຶ່ງ
ກະກຽມ​ກອງ​ປະຊຸມ​ວຽກ​ງານ​ການ​ຕ່າງປະເທດ ຄັ້ງ​ທີ 14

   ກອງ​ປະຊຸມ​ປຶກສາ​ຫາລື​ພາຍ​ໃນ​ວຽກ​ງານ​ການ​ຕ່າງປະເທດ ຈັດ​ຂຶ້ນ​ວັນ​ທີ 5-6 ທັນວາ 2019 ທີ່​ສູນ​ການ​ຮ່ວມ​ມື​ສາກົນ ແລະ ການ​ເຝິກອົບຮົມ ນະຄອນຫຼວງ​ວຽງ​ຈັນ ເປັນ​ປະທານ​ຂອງ​ທ່ານ ສະເຫຼີມ​ໄຊ  ກົມ​ມະ​ສິດ ລັດຖະມົນຕີ​ກະຊວງ​ການ​ຕ່າງປະເທດ ມີ​ບັນດາ​ຮອງ​ລັດຖະມົນຕີ ຄະນະ​ກົມ ແລະ ຄະນະ​ພະ​ແນກ ເອກ​ອັກ​ຄະ​ລັດ​ຖະ​ທູດ ແລະ ກົງສຸນ​ໃຫຍ່​ລາວ​ປະຈຳ​ຕ່າງປະເທດ ພ້ອມ​ດ້ວຍ​ພະນັກງານ​ອາວຸໂສ​ບຳນານ ຂະແໜງການ​ຕ່າງປະເທດ​ເຂົ້າ​ຮ່ວມ​ຫຼາຍ​ກວ່າ 380 ຄົນ.

    ເພື່ອ​ສະຫຼຸບ​ຕີ​ລາຄາ​ການຈັດຕັ້ງ​ປະຕິບັດ​ນະໂຍບາຍ​ຕ່າງປະເທດ​ຂອງ​ພັກ-ລັດ ແລະ ການເຄື່ອນໄຫວ​ການ​ຕ່າງປະເທດ​ຂອງ​ລາວ ໃນ​ໄລຍະ 3 ປີຜ່ານມາ ນັບ​ແຕ່​ກອງ​ປະຊຸມ​ວຽກ​ງານ​ການ​ຕ່າງປະເທດ ຄັ້ງ​ທີ 13 ໄດ້​ກຳນົດ​ອອກ​ປີ 2016 ເປັນຕົ້ນ​ມາ ພ້ອມ​ທັງ​ກຳນົດ​ທິດ​ທາງ​ແຜນການ​ວຽກ​ງານ​ການ​ຕ່າງປະເທດ​ຂອງ​ລາວ ສຳລັບ 3 ປີ​ຕໍ່ໜ້າ (2020-2022).

    ທ່ານ ສະເຫຼີມ​ໄຊ ກົມ​ມະ​ສິດ ກ່າວ​ວ່າ: ກອງ​ປະຊຸມ​ປຶກສາ​ຫາລື​ພາຍ​ໃນ​ຈະ​ສຸມ​ໃສ່​ສຳ​ຫຼວດ​ກວດກາ ແລະ ແລກປ່ຽນ​ຄຳ​ຄິດ​ຄຳ​ເຫັນ​ປິ່ນ​ອ້ອມ 3 ຫົວຂໍ້​ໃຫຍ່​ສຳຄັນ ຄື: ວຽກ​ງານ​ຈັດ​ຕັ້ງ​ພັກ ແລະ ພະນັກງານ ໂດຍ​ຈະ​ເນັ້ນ​ໃສ່​ວຽກ​ງານ​ອົບຮົມ​ການເມືອງ-ແນວ​ຄິດ ການ​ຂຶ້ນ​ແຜນການ​ກໍ່ສ້າງ​ພະນັກງານ​ທີ່​ສາມາດ​ຕິດຕາມ ແລະ ປະ​ເມີນ​ຜົນ​ໄດ້​ໃນ​ແຕ່​ລະ​ໄລຍະ ການ​ກໍ່ສ້າງ​ພະນັກງານ​ກັບ​ທີ່ ການ​ຄົ້ນຄວ້າ​ນະໂຍບາຍ​ຕ່າງໆ ສະຫວັດດີ​ການ ແລະ ການ​ຍ້ອງຍໍ​ໃຫ້​ພະນັກງານ ການ​ກໍ່ສ້າງ​ໜ່ວຍ​ພັກ​ປອດ​ໃສ ເຂັ້ມແຂງ ໜັກ​ແໜ້ນ ການ​ຂະຫຍາຍ​ສະມາຊິກ​ພັກ ການ​ປັບປຸງ​ກົງຈັກ​ການຈັດຕັ້ງ ແລະ ການ​ສັບ​ຊ້ອນ​ພະນັກງານ ທັງ​ພາຍ​ໃນ ແລະ ຢູ່​ຕ່າງປະເທດ ຕາມ​ທິດ​ກະທັດ​ຮັດ ແລະ ສາມາດ​ຮັບຜິດຊອບ​ໄດ້​ຫຼາຍ​ໜ້າ​ວຽກ ວຽກ​ງານ​ວິຊາ​ສະເພາະ ຈະ​ສຸມ​ໃສ່​ປຶກສາ​ຫາລື​ກ່ຽວ​ກັບ​ການຈັດຕັ້ງ​ປະຕິບັດ​ໜ້າທີ່​ໃຫ້​ມີ​ຄຸນ​ນະ​ພາບ​ຂຶ້ນ​ຕື່ມ ເປັນຕົ້ນ ເພີ່ມ​ຄວາມ​ເປັນ​ເຈົ້າ​ການ​ໃນ​ການ​ປະຕິບັດ​ໜ້າທີ່​ການເມືອງ-ການ​ທູດ ການ​ຄົ້ນຄວ້າ ແລະ ເປັນ​ເສນາ​ທິ​ການ​ໃຫ້​ວ່ອງໄວ​ທັນ​ການ ແລະ ຮັບປະກັນ​ປັບປຸງ​ກົນ​ໄກ​ການ​ປະສານ​ງານ ແລະ ການ​ຄຸ້ມ​ຄອງ​ການເຄື່ອນໄຫວ​ວຽກ​ງານ​ການ​ຕ່າງປະເທດ​ຢ່າງ​ລວມ​ສູນ ແລະ ມີ​ປະສິດທິພາບ ແລະ ວຽກ​ງານ​ບໍລິຫານ-ການ​ເງິນ ແນໃສ່​ປຶກສາ​ຫາລື​ກ່ຽວ​ກັບ​ການ​ຄຸ້ມ​ຄອງ​ຊັບ​ສິນ​ຂອງ​ກະຊວງ​ການ​ຕ່າງປະເທດ​ໃຫ້​ມີ​ປະ​ສິດທິ​ຜົນ​ກວ່າ​ເກົ່າ. 

ຂ່າວທີ່ກ່ຽວຂ້ອງ