ຂ່າວຫຼ້າສຸດ

ຍີ່ປຸ່ນ ຊ່ວຍເຫຼືອ​ປັບປຸງ​ການ​ສຶກ​ສາ​ໃຫ້​ເດັກນ້ອຍ​ຊົນເຜົ່າ

1.439 06 ທ.ວ. 2019 ຂ່າວໜ້າ​ໜຶ່ງ
ຍີ່ປຸ່ນ ຊ່ວຍເຫຼືອ​ປັບປຸງ​ການ​ສຶກ​ສາ​ໃຫ້​ເດັກນ້ອຍ​ຊົນເຜົ່າ

   ລັດຖະບານ​ຍີ່ປຸ່ນ​ໄດ້​ໃຫ້ການ​ຊ່ວຍເຫຼືອ​ລ້າ 526.999 ໂດ​ລາ​ສະຫະລັດ ຫຼື ປະມານ 470 ລ້ານ​ກີບ ເພື່ອ​ຊ່ວຍເຫຼືອ​ການ​ປັບປຸງ​ການ​ສຶກ​ສາ​ຂັ້ນ​ພື້ນຖານ​ໃຫ້​ແກ່​ເດັກນ້ອຍ​ຊົນເຜົ່າ​ກຸ່ມ​ນ້ອຍ​ທີ່​ແຂວງ​ອຸດົມ​ໄຊ ພິທີ​ເຊັນ​ສັນຍາ​ໂຄງການ​ໄດ້​ຖືກ​ຈັດ​ຂຶ້ນ​ທີ່​ສະຖານທູດ​ຍີ່ປຸ່ນ ປະຈຳ​ລາວ ໃນ​ວັນ​ທີ 3 ທັນວາ 2019 ລະຫວ່າງ​ທ່ານ ທາ​ເກ​ວາ​ກະ ເຄ​ໂຊ ເອກ​ອັກຄະລາຊະທູດ​ຍີ່ປຸ່ນ ປະຈຳ​ລາວ ແລະ ທ່ານ​ນາງ ຊູ​ຊູ​ມູ​ຣະ ຄຸ​ມິ​ໂກະ ຜູ້​ຈັດການ​ໂຄງການ​ຂອງ​ອົງການ​ແພລນ​ສາກົນ ປະຈຳ​ປະເທດ​ຍີ່ປຸ່ນ ເຊິ່ງ​ເປັນ​ອົງການ​ບໍ່​ຫວັງ​ຜົນ​ກຳໄລ​ຈາກ​ປະເທດ​ຍີ່ປຸ່ນ ທີ່​ລິ​ເລີ່ມ ແລະ ຈັດການ​ໂຄງການ​ດັ່ງກ່າວ ສຳລັບ​ການ​ເຊັນ​ສັນຍາ​ຊ່ວຍເຫຼືອ​ຄັ້ງ​ນີ້​ແມ່ນ​ການ​ສະໜັບສະໜູນ​ທຶນ​ປີ​ທຳ​ອິດ​ຂອງ​ໂຄງການ​ທີ່​ມີ​ອາຍຸ 3 ປີ.

    ສຳລັບ​ໂຄງການ​ທີ່​ມີ​ຊື່ວ່າ “ການ​ສຶກ​ສາ​ຂັ້ນ​ພື້ນຖານ​ສຳລັບ​ເດັກນ້ອຍ​ຊົນເຜົ່າ​ກຸ່ມ​ນ້ອຍ ທີ່​ແຂວງ​ອຸດົມ​ໄຊ” ໃນ​ປີ​ທຳ​ອິດ​ມີ​ເປົ້າ​ໝາຍ​ທີ່​ຈະ​ປັບປຸງ​ຄຸນ​ນະ​ພາບ​ການ​ສຶກ​ສາ​ຂັ້ນ​ພື້ນຖານ ແລະ ກະກຽມ​ກ່ອນ​ເຂົ້າ​ຮຽນ​ໃຫ້​ແກ່​ເດັກນ້ອຍ​ຊົນເຜົ່າ​ກຸ່ມ​ນ້ອຍ​ທີ່​ເມືອງ​ປາກ​ແບ່ງ ແຂວງ​ອຸດົມ​ໄຊ ໂຄງການ​ນີ້​ຈະ​ຍົກ​ລະດັບ​ຄວາມ​ສາ ມາດ ຜູ້​ເຝິກ​ສອນ ແລະ ຜູ້​ປົກຄອງ​ໃນ​ລະດັບ​ກ່ອນ ແລະ ລະຫວ່າງ​ປະຖົມ​ສຶກ​ສາ​ທີ່​ເມືອງ​ປາກ​ແບ່ງ ໂຄງ ການ​ນີ້​ຈະ​ກໍ່ສ້າງ​ຫ້ອງ​ຮຽນ​ຊັ້ນ​ກ່ອນ​ປະຖົມ​ສຶກ​ສາ​ໃຫ້​ໂຮງຮຽນ 9 ແຫ່ງ (ໂຮງຮຽນ 3 ແຫ່ງ​ຕໍ່​ປີ) ການ​ເຝິກອົບຮົມ​ຄູບາ​ອາຈານ ແລະ ຜູ້​ປົກຄອງ​ໃຫ້​ແກ່​ທຸກ​ໂຮງຮຽນ​ເປົ້າ​ໝາຍ​ຈະ​ຖືກ​ຈັດ​ຕັ້ງ​ຕໍ່​ປີ ນັບ​ແຕ່​ປີ​ທຳ​ອິດ​ຫາ​ປີ​ທີ 3.

    ອົງການ​ແພລນ​ສາກົນ​ຕ້ອງການ​ທີ່​ຈະ​ເຫັນ​ໂລກ​ທີ່​ເດັກນ້ອຍ​ທຸກ​ຄົນ​ຮັບ​ຮູ້​ເຖິງ​ທ່າແຮງ​ບົ່ມ​ຊ້ອນ​ຂອງ​ພວກ​ເຂົາ ແລະ ພະຍາຍາມ​ທີ່​ຈະ​ເຮັດ​ໃຫ້​ໂລກ​ເຮົາ​ຍົກ​ສູງ​ສິດທິ​ເດັກນ້ອຍ ແລະ ຄວາມ​ສະເໝີພາບ​ໃຫ້​ແກ່​ເດັກນ້ອຍ​ຍິງ ພວກ​ເຂົາ​ເຮັດ​ວຽກ​ນຳ​ເດັກນ້ອຍ ໂຮງຮຽນ ແລະ ລັດຖະບານ​ທົ່ວ​ທຸກ​ມຸມ​ຂອງ​ໂລກ ລວມ​ເປັນ​ຈຳນວນ​ຫຼາຍ​ກວ່າ 70 ປະເທດ. 

ຂ່າວທີ່ກ່ຽວຂ້ອງ